खेलो इंडिया-संवाद
महान हॉकी खिलाड़ी मेजर ध्यानचंद के जयंती अउ राष्ट्रीय खेल दिवस म सत्ताईस अगस्त के राष्ट्र भर म खेलो इंडिया संवाद के आयोजन करे जाही। ए दउरान प्रधानमंत्री नरेंद्र मोदी वर्चुअल माध्यम ले देसभर के सोलह सौ आने-आने जघा म मौजूद आठ लाख ले जादा युवा मन ले गोठबात करही।
माय भारत के राज्य निदेशक अर्पित तिवारी ह पत्रकार मनले गोठबात करत बतइन कि केंद्रीय युवा कारीकरम अउ खेल मंत्रालय के माय भारत कोति ले मुख्य कारीकरम उनतीस अगस्त के जघा म सत्ताईस अगस्त के राखे जाही। ए महा अभियान के थीम युवा भागीदारी खेल विकास और राष्ट्र निर्माण राखे गेहे। ए कारीकरम देस के हरेक जिला के दू-दू महाविद्यालय म राखे जाही, जेखर ले देस के आने-आने हिस्सा के युवा मन ल एक कॉमन नेशनल प्लेटफॉर्म ले जोड़े जा सकही।
मुख्यमंत्री-सोलर पैनल
छत्तीसगढ़ म अवइया बछर मार्च तक पांच लाख घर म सोलर पैनल लगाय के लक्ष्य राखे गेहे। ए बात मुख्यमंत्री विष्णुदेव साय ह काली रईपुर म छत्तीसगढ़ सोलर वेलफेयर एसोसिएसन कोति ले राखे गे दू दिवसीय संवाद कारीकरम के समापन समारोह म किहीन। ओमन किहीन कि राज्य सरकार के लक्ष्य छत्तीसगढ़ ल ऊर्जा के क्षेत्र म देस के सबले अव्वल राज्य म स्थापित करना हे। श्री साय ह बतइन कि प्रदेस म अभी तक करीबन पंचानवे हजार घर के छत म सोलर पैनल लगाय गेहे।
मुख्यमंत्री-‘अटल उत्कृष्ट शिक्षा योजना‘
मुख्यमंत्री विष्णुदेव साय ह आज रईपुर म राखे गे कारीकरम म ‘अटल उत्कृष्ट शिक्षा योजना‘ म सैक्षणिक अउ खेलकूद म बने प्रदर्सन करइया निर्माण श्रमिक मनके हुसियार लइका मन ल सम्मानित करे गीस। ए दउरान मुख्यमंत्री ह डीबीटी ले एक लाख पैंतालीस हजार ले जादा श्रमिक मनके बैंक खाता म उनतालीस करोड़ रूपिया ले जादा के रकम भेजिन।
पीडीएस सिस्टम
खाद्य नागरिक आपूर्ति अउ उपभोक्ता संरक्षण विभाग के जम्मों व्यवस्था अब ऑनलाइन होवइया हे। एखर बर विभाग के मौजूदा व्यवस्था ल छत्तीसगढ़ स्मार्ट पी.डी.एस. सिस्टम ले जोड़े जात हे। एमा रासन कारड बनाय ले लेके उचित मूल्य दुकान के आवंटन खाद्यान्न के पूर्ति दूकान के स्टाफ अउ रासन बांटे तक के पूरा काम ऑनलाइन होही। स्मार्ट पी.डी.एस. लागू होय के बाद अर्जी ल लेके मंजूरी अउ आगे के पूरा काम सिस्टम ले चलही।
नक्सली डंप बरामद
सुकमा जिला म थाना भेज्जी क्षेत्र के गांव भंडारपदर के जंगल ले सुरक्षा बल ह मोओवादी मन कोति ले डंप करे गे हथियार, गोला बारूद अउ बिस्फोटक जिनिस बरामद करे हे। एमा एसएलआर रायफल, भरमार बंदूक, मस्केट, छै बीजीएल लांचर समेत कुल तेईस ठिन हथियार सामिल हे। एखर संगेसंग चार सौ बयानवे जिंदा कारतूस, दू सौ चालीस जिलेटिन स्टिक अउ अट्ठारा किलो ग्राम गन पाउडर समेत आने बिस्फोटक जिनिस बरामद करे गेहे। पुलिस अधीक्षक मयंक गुर्जर ह बतइन कि ए कारवाई आत्मसमर्पित नक्सली मनले मिले जानकारी के आधार म करे गीस।
विशेष कार्यक्रम
आकाशवाणी केंद्र रईपुर ले छत्तीसगढ़ पुलिस कोति ले चलाय जात साइबर जागृति अभियान म काली पच्चीस अगस्त के बिसेस कारीकरम प्रसारित करे जाही। ए कारीकरम के प्रसारण रतिहा आठ बजके पंद्रह मिनट ले आठ बजके तीस मिनट तक होही। ए कारीकरम ल छत्तीसगढ़ स्थित आकाशवाणी के सबो केंद्र रिले करही।
शेर हमला-मौत
बिलासपुर जिला म तखतपुर क्षेत्र के गांव बांधा म शेर के हमला ले एक मनखे के मउत होगे। मउत होवइया जोगीपुर जंगल के फॉरेस्ट बीट क्षेत्र म बांस करिल कांटे अउ पीहरी ले बर गे रिहीस हे। इही बेरा औचक शेर ह हमला कर दीस, जेखर ले ओ मनखे के मउकच म मउत होगे। ए घटना के बाद वन विभाग ह गांव के लोगन ल जंगल कोति जाय ले मना करे हे संगेसंग सतर्क रेहे के सलाह देहे।
अंतिम सावन सोमवार
आज सावन महिना के चौंथा अउ अंतिम सम्मार हे। प्रदेसभर के आने-आने शिव मंदिर मन म भिंसरहच ले भक्त मनके भीड़ हवय। श्रध्दालु मन भगवान भोलेनाथ के जलाभिषेक रूद्राभिषेक करके बिसेस पूजापाठ करीन। उहें, कांवड़ यात्री मन भगवान भोलेनाथ के प्रतिमा अउ सुघ्घर वेसभूषा संग मंदिर पहुंचके अपन मानता ल पूरा करीन। मंदिर के तीर-तखार म फूल पान, बेल पत्र के दुकान सजे हे। उहें, जघा-जघा भंडारा के आयोजन करे गेहे।
प्रदेस के उपमुख्यमंत्री विजय शर्मा ह अमरकंटक के जुन्ना ज्वालेश्वर महादेव मंदिर म पूजापाठ करके प्रदेसवासी मन खातिर सुख-समृध्दि के मानता मानिन अउ उंहा मौजूद श्रध्दालु अउ कांवरिया मन ले भेंट करीन।
रक्षाबंधन-जवान सम्मान
रक्षा बंधन के उपलक्ष्य म नवा रईपुर अटल नगर के शासकीय उच्चतर माध्यमिक विद्यालय राखी म भारतीय सेना के जवान मनके सम्मान म कारीकरम राखे गीस। कोसा आर्मी के मदद ले राखे गे ए कारीकरम म भारतीय सेना के अधिकारी सैन्य कर्मी अउ अधिकारी मन भाग लीन। ए दउरान स्कूल के पढ़इया नोनी मन ह सैनिक भाई मनके कलाई म राखी बांध के रक्षा बंधन के सुभकामना दीन। संगेसंग भारतीय सेना के जवान मन बर चिट्ठी अउ संदेसा लिखिन।
गांजा-बरामद
गरियाबंद के देवभोग पुलिस ह खुटगांव अंतरराज्यीय के पोस्ट म चार सौ किलो ग्राम गांजा संग पांच झिन आरोपी ल गिरफ्तार करे हे। जब्त करे गे गांजा के कीमत करीबन दू करोड़ रूपिया बताय जात हे। आरोपी मनके तीर ले साढ़े छै लाख रूपिया नगदी समेत दू ठिन चौपहिया गाड़ी जब्त करे गेहे। पुलिस के मुताबिक खुटगांव नाका तीर गाड़ी के तलासी के दउरान गांजा बरामद करे गीस। आरोपी ओडिसा ले गांजा लेके आवत रिहीन।
उहें, कोंडागांव पुलिस ह गांजा तस्करी के दू आने-आने मामला म करीबन पचपन किलोे गांजा बरामद करे हे, जेखर कीमत करीबन अट्ठाईस लाख रूपिया बताय गेहे। ए मामला म सात झिन आरोपी मन ल गिरफ्तार करे गेहे। आरोपी मन तीर ले छै ठिन मोबाइल फोन अउ दू ठिन गाड़ी घलो जब्त करे गेहे। उहें, जांजगीर-चांपा जिला म घलो दू किलो गांजा संग एक झिन आरोपी ल गिरफ्तार करे गेहे। आरोपी फटफटी के डिक्की ले गांजा ले जावत रिहीस, जेखर कीमत करीबन एक लाख रूपिया आंके गेहे।
बारिश
प्रदेस म पाछू दू दिन ले होवत सरलग बरसा के सेति लोगन के जनजीवन प्रभावित होय हे। नंदिया-नरवा उफान म हवय, जेखर ले कतकोन रद्दा के अवई-जवई बंद हो गेहे। राजधानी रईपुर समेत आने-आने सहर के निचली बस्ती म बरसा के पानी भर गे हे। बस्तर संभाग म इंद्रावती नंदिया खतरा के निसान ले उप्पर बोहावत हे। नंदिया के जल स्तर बाढ़ते जात हे। जगदलपुर के जुन्ना पुलिया के उपर ले पानी बोहात हे। नंदिया नरवा उफान म होय के सेति कतकोन गांव के सड़क संपर्क टूट गेहे। बाढ़ प्रभावित क्षेत्र म मुनादी कराके लोगन ल चेताय जात हे।
उहें, बीजापुर जिला म नंदिया-नरवा के जल स्तर बाढ़े ले गांव-गंवई के क्षेत्र म अवई-जवई प्रभावित हे। जिला के गांव चिन्नाकवाली तीर चिंतावागु नंदिया के बाढ़ म फंसे गांव के लोगन ल नगर सेना के टीम ह बोट ले नंदिया के दूसर छोर म सुरक्षित पहुंचाइन।
ऐति, मंुगेली जिला के गांव पंडरभट्टा म काली खेत ले घर लहुटत एक झिन माईलोगन गाज के चपेट म आगे, जेखर ले ओखर मउकच म मउत होगे। इही बीच, मौसम विभाग ह अवइया चौबीस घंटा के दउरान प्रदेस के कतकोन जघा म हल्का ले मध्यम बरसा होय के संभावना जताय हे। उहें, कुछेक जघा गरज-चमक संग भारी बरसा होय के चेतावनी दे गेहे। मौसम विभाग के मुताबिक बरसा के गतिविधि अवइया छै दिन तक जारी रइही।
अउ अब थोरकुन समाचार सार म –
– शिक्षक संघर्ष मोर्चा ह प्रदेस म शिक्षक पात्रता परीक्षा टीईटी के विरोध म काली पच्चीस अगस्त के सबो जिला मुख्यालय म टीईटी मुक्ति रैली निकाले के घोसना करे हे। ए बेरा म मुख्यमंत्री, शिक्षा मंत्री अउ शिक्षा सचिव के नांव म कलेक्टर ल ज्ञापन सौंपे जाही।
– वन मंत्री केदार कश्यप ह जगदलपुर के डिमरापाल के अस्पताल पहुंचके रद्दा दुर्घटना म घायल जवान मनले भेंट करके उंखर स्वास्थ्य के संबंध म जानकारी लीन अउ बने चिकित्सा सुबिधा देवाय के निरदेस दीन।
अउ
– बलौदाबाजार-भांटापारा पुलिस ह स्वास्थ्य विभाग म फर्जी स्नांनतरण आदेस अउ फर्जीवाड़ा के मामला म दू झिन अउ आरोपी ल गिरफ्तार करे हे। ए मामला म अभी तक ग्रामीण चिकित्सा सहायक समेत छै झिन आरोपी मन ल गिरफ्तार करे गेहे।