राष्ट्रीय शिक्षक पुरस्कार
राष्ट्रपति द्रौपदी मुर्मू पांच सितंबर के नई दिल्ली के विज्ञान भवन म अड़तालीस झिन शिक्षक मन ल राष्ट्रीय शिक्षक पुरस्कार दिही। एमा छत्तीसगढ़ के सारंगगढ़-बिलाईगढ़ जिला के शासकीय प्राथमिक शाला खीचरी म पदस्थ शिक्षिका सुनीता यादव घलो सामिल हे। सुनीता यादव ह प्राथमिक शिक्षा के क्षेत्र म सुग्घर काम करत नान्हे लइका मन म पढ़ई सोज रूचि बढ़ाय, नवाचार के माध्यम ले शिक्षा ल प्रभावी बनाय के संगे पढ़इया लइका मनके सर्वांगीन विकास खातिर संहराय के लइक काम करे हे।
राष्ट्रीय अंतरिक्ष दिवस
आज अंतरिक्ष दिवस हरय। प्रधानमंत्री नरेंद्र मोदी ह किहीन हे कि अंतरिक्ष क्षेत्र के स्टार्टअप्स ह सरकार म अपन भरोसा देखाय हे। ओमन अंतरिक्ष क्षेत्र के स्टार्टअप्स मुख्य कार्यकारी अधिकारी मन संग चर्चा म उंखर मनले सरलग प्रयास करे के संगे अंतरिक्ष क्षेत्र के एक ठिन मजबूत इको सिस्टम तियार करे के अपील करे हे। प्रधानमंत्री ह किहीन हे कि अइसन अनुकूल माहौल बनाय जाना चाही, जेखर ले दुनियाभर के लोगन अंतरिक्ष क्षेत्र म अपन कैरियर बनाय बर भारत ल पसंद के रूप म देखय। उहें, प्रधानमंत्री अंतरिक्ष क्षेत्र म जवान लइका मनके काम ल घलो संहराइन।
स्वाइन फ्लू
दुरूग जिला म स्वाइन फ्लू के पहलइया मामला आगू आय बाद स्वास्थ्य विभाग सतर्क हो गेहे। जिला के एक ठिन निजी अस्पताल म भर्ती करीबन तीन साल के नान्हे नोनी एच-वन-एन-वन वायरस के पुष्टि होय हे। ए नोनी ल तेज बुखार अउ फ्लू असन लक्षण बाद अस्पताल म भर्ती कराय गे रिहीस। फिलहाल ओखर उपचार बिसेसज्ञ डॉक्टर मनके निगरानी म चलत हे। उहें, संक्रमण झन फैले कहिके ओला आइसोलेट करे गेहे।
दुरूग के जिला नोडल अधिकारी डॉक्टर सीबीएस बंजारे ह बतइन कि स्वास्थ्य विभाग ह नान्हे नोनी के संपर्क म आय आने मनखे मनके बारे म घलो जानकारी सकेलत हे। एखर उद्देस्य सुरूआती स्तर म संक्रमण ल बगरे ले रोकना हे। डॉक्टर बंजारे ह लोगन मन ले अपील करे हे कि ओमन घबराय झन अउ कोनो भी मनखे म फ्लू असन लक्षण दिखतेसाठ सावधानी राखे के संगे डॉक्टरी सलाह तुरते लेवय।
पूर्व अग्निवीर-आरक्षण
छत्तीसगढ़ सरकार ह पूर्व अग्निवीर मन बर सरकारी नौकरी के रद्दा ल सरल बनाय खातिर बड़का फइसला लेहे। राज्य म अब तृतीय श्रेणी के पद मन बर सोज्झे भर्ती म पूर्व अग्निवीर मन ल दस प्रतिसत आरक्षण मिलही। राज्य सरकार ह एखर बर अग्निवीर सैनिक आरक्षण नियम दू हजार छब्बीस के नोटिफिकेसन निकाल दे गेहे। चार बछर के सेवा पूरा करइया अग्निवीर मन ए व्यवस्था के दायरा म आही।
कृषि विवि-परीक्षा रद्द
इंदिरा गांधी कृषि विश्वविद्यालय ह प्रश्नपत्र लीक होय के घटना ल देखत बीते सात अगस्त के होय बीएससी कृषि के फर्स्ट इयर के प्लांट पैथोलॉजी वाले परीक्षा ल घलो केंसल कर देहे। ए निरनय विश्वविद्यालय के कुलपति डॉक्टर गिरिश चंदेल के पगरइती म होय बइठका म ले गीस। ए बइठका म अवइया परीक्षा बेरा गोपनीयता अउ निष्पक्षता तय राखे बारे म कई ठिन बड़का निरनय ले गीस। उहें, दुरूग के भारती कृषि महाविद्यालय के खिलाफ नियम के तहत कारवाई करे के फइसला ले गेहे। बइठका म यहू तय करे गीस कि दूनों रद्द होय पेपर ल सितंबर के पहला सप्ताह म ले जाही।
विजय शर्मा-प्रेसवार्ता
उपमुख्यमंत्री अउ पंचायत मंत्री विजय शर्मा ह किहीन कि पाछू ढाई बछर म प्रदेस म प्रधानमंत्री आवास योजना-ग्रामीण के तहत ग्यारा लाख ले जादा घर-कुरिया बनाय गेहे। आज रईपुर म पत्रकार मन ले गोठबात करत उप मुख्यमंत्री ह किहीन कि वर्तमान म प्रदेस म करीबन चार लाख मकान बनत हे। अउ एला बहुत जल्दी पूरा करे बर विभाग डहार ले प्रयास करे जात हे। श्री शर्मा ह किहीन कि पूर्व मुख्यमंत्री भूपेश बघेल ह प्रधानमंत्री आवास योजना ग्रामीण बारे म बात करना चाहत हे, त सरकार ह तियार हे।
मुख्यमंत्री-कांवड़ यात्रा
मुख्यमंत्री विष्ण्ुादेव साय ह आज रईपुर के गुढ़ियारी म राखे गे कांवर यात्रा म सामिल होइन। ओमन भगवान शिव के रूद्राभिषेक करके कांवर यात्रा म सामिल शिवभक्त मन ल पवित्र सावन महिना बर सुभकामना दीन हे। ओमन किहीन कि सावन महिना ह भगवान शिव के अराधना अउ भक्तिभाव के बिसेस मउका रहिथे। ए आयोजन ह धार्मिक यात्रा बर होय भलुक हमर संस्कृति परंपरा अउ सामाजिक एकता के तिहार घलो हे। इंहा ए बतादन कि गुढ़ियारी के मारूति मंगलम परिसर ले हजारों कांवरिया मन सुध्द जल लेके महादेव घाट स्थित भगवान हटकेश्वर नाथ महादेव के जलाभिषेक बर रवाना होइन।
ठग गिरोह
राज्य पुलिस ह वॉस-वॉस याने करिया नोट ल असली पइसा म बदले के झांसा देके ठगइया अंतरर्राज्यीय गिरोह के पर्दाफास करे हे। पुलिस ह पुणे ले सात झिन आरोपी ल गिरफ्तार करे हे। आरोपी मन तीर ले चार करोड़ रूपिया ले जादा के नगदी सत्रह ठिन मोबाइल फोन अउ ठगई मामला म इस्तेमाल होवइया जिनिस जब्त करे गेहे। पुलिस के मुताबिक ए गिरोह ह बछर दू हजार पांच ले सक्रिय रिहीस अउ देसभर म सौ ले जादा मनखे मन तीर ले अरबो रूपिया के ठगी करे हे। ए मामला म अब तक नौ झिन आरोपी ल गिरफ्तार करे गेहे।
साइबर जागृति अभियान
छत्तीसगढ़ पुलिस डहार ले पंद्रह अगस्त ले सुरू करे गे साइबर जागृति अभियान के दूसर हफ्ता आज ले सुरू हो गेहे। ए दउरान बैंक, एटीएम परिसर, वित्तीय संस्थान अउ आने जघा मन म लोगन मन ल यूपीआई फ्रॉड, फर्जी कॉल या मैसेज ले ठगई, क्यूआर कोड अउ ओटीपी ले जुड़े ठगई बारे म जागरूक करे जात हे। संगे साइबर धोखाधड़ी होय के स्थिति म एक नौ तीन सून्य उपर सिकायत दर्ज करे बारे म घलो जानकारी दे जाही।
खदान-शव बरामद
रईपुर के नकटी गांव स्थित ब्लू वॉटर खदान म बूड़े आदिल खान के लास ह पानी उपर उफलाय ले मिलिस हे। तीन दिन तक एसडीआरएफ अउ एनडीआरएफ के टीम वाले मन गहिर पानी भीतरी सरलग सर्च आपरेसन चलात रिहीन, तभो ले कामयाबी नइ मिले रिहीस। फेर शनिच्चर देर रतिहा लास ह खुदे पानी उपर उफला गीस। घटना के बाद ले परिवार वाले मन लगातार मउका म मौजूद रिहीन। इंहा ए बतादन कि प्रशासन ह इंडियन नेवी ले घलो मदद मांगे रिहीस, जेखर बाद इंडियन नेवी के विसेस टीम आज रईपुर पहुंचइया रिहीस।
उहें, बिलासपुर जिला के तखतपुर म काली स्कूल छुट्टी बाद घर लहुटत तीन झिन नान्हे लइका मन घोंघा नदी ल नहाकत बेरा हुरहा पानी के तेज बहाव म बोहा गीन। हादसा बाद पुलिस अउ गंवई के मनखे मन ए नदी म घंटो सर्च आपरेसन चलाइन। जेखर बाद एक झिन नान्हे लइका के लास मिलिस हे। उहें दू झिन ल खोजे के काम चलत हे।
नीट यूजी प्रवेश परीक्षा
छत्तीसगढ़ राज्य काउंसिलिंग समिति ह नीट-यूजी प्रवेस बछर दू हजार छब्बीस के राज्य स्तरीय काउंसिलिंग ल लेके दिसा निरदेस जारी करे हे। समिति ह स्पष्ट करे हे कि केवल मेरिट सूची म नाम आय या फेर कोनो संस्थान म सीट आवंटित होय ले केंडीडेट के एडमिसन आखिरी नइ माने जाही। पाछू बछर असन ए बछर घलो काउंसलिंग, मेरिट अउ आवंटन के प्रक्रिया ऑनलाइन माध्यम ले करे जावत हे। आवंटन बाद केंडीडेट डहार ले जरूरी मूल दस्तावेज प्रस्तुत करे अउ उंखर वेरीफिकेसन म पात्र पाय जाय के बादे प्रवेस प्रक्रिया पूरा माने जाही।
चिकित्सा शिक्षा मंत्री श्याम बिहारी जायसवाल ह किहीन हे कि छत्तीसगढ़ के स्थानीय पढ़इया लइका मनके हित के संग कोनो भी तरह के अनदेखी बर्दास्त नइ करे जाही। ओमन किहीन हे कि डोमेसाइल ल लेके अगर कोनो सिकइत सामने आही, त ओखर गंभीरता ले जांच कराय जाही।
अउ अब थोरकुन समाचार सार म
– रईपुर स्थित पंडित जवाहरलाल नेहरू स्मृति चिकित्सा महाविद्यालय के नेत्र रोग विभाग डहार ले नेत्रदान प्रक्रिया उपर राज्य स्तरीय वर्कसॉप राखे गीस।
अउ
– बिसेस रोजगार कार्यालय अउ एक ठिन निजी संस्था डहार ले दिव्यांगजन मन बर रईपुर म इकतीस अगस्त के रोजगार मेला रा
खे जाही। जेमा कुल तीस ठिन पद म भर्ती करे जाही।