पीएम-वर्ल्ड लीडर्स फोरम
प्रधानमंत्री नरेंद्र मोदी ह किहीन हे कि देस ह पाछू दस ले बारह बछर म पच्चीस करोड़ लोगन ल गरीबी ले बाहिर निकाले हे। सरकार ह सुधार बर प्रतिबध्द हे। ओमन किहीन हे कि भारत के हमेसा साझा भविष्य के भावना म विस्वास रेहे हे। नई दिल्ली म काली संझा वर्ल्ड लीडर्स फोरम ल संबोधित करत हुए श्री मेादी ह किहीन कि इही कारण हे कि भारत के जी-ट्वेंटी म अगुवई के दउरान ओखर मार्गदर्सक सिध्दांत ‘एक पृथ्वी, एक परिवार, एक भविष्य‘ रिहीस।
पेपर लीक-खुलासा
इंदिरा गांधी कृषि विश्वविद्यालय यानी आईजीकेवी म होय पेपर लीक मामला म पुलिस ह भारती एग्रीकल्चर कॉलेज दुरूग के प्रोफेसर योगेश सोनकेसरिया समेत छै झन आरोपी ल गिरफ्तार करे हे।
सुनइया मन ल बतादन कि पाछू बीस अगस्त के बीएससी एग्रीकल्चर दूसरइया बछर के कीट विज्ञान बिसय के परीक्षा सुरू होय ले करीब दू घंटा पहिली पेपर ह ई-मेल के माध्यम ले लीक होगे रिहीस। एखर सूचना मिले के बाद विश्वविद्यालय के परीक्षा प्रकोष्ठ प्रभारी डॉक्टर एन.आर. रंगारे ह तेलीबांधा थाना म एफआईआर दरज करवाय रिहीस। जांच म पुलिस ह रईपुर, दुरूग, बिलासपुर अउ कबीरधाम समेत लखटा के जिला म आने-आने टीम भेज के बारीकी ले जांच करीस, जेमा दुरूग के रहइया अनुज मिंज ले जरूरी जानकारी मिलिस। पुलिस के अनुसार करीब छत्तीस घंटा के जांच के बाद पेपर लीक के श्रोत अउ आरोपी मनके पहिचान कर ले गीस।
ए पूरा मामला के मुख्य आरोपी योगेश सोनकेसरिया हे। जेन बछर दू हजार उन्नीस ले भारती एग्रीकल्चर कॉलेज दुरूग म प्रोफेसर के पद म काम करत हे। पाछू एक बछर ले ओहा अपन कॉलेज के उत्तर पुस्तिका मन ल जमा करे अउ अवइया परीक्षा मनके प्रश्नपत्र ल लेके ओला कॉलेज म जमा करे के काज करत रिहीस। पुलिस ह बतइस हे कि संबंधित ह लीक प्रश्नपत्र ल अपन कॉलेज के पढ़इया छात्र मन ल ग्यारा हजार रूपिया म बेचे हे। इही कोति ले ए प्रश्नपत्र ह सोसल मीडिया म वायरल होइस हे।
पुलिस ह आरोपी के तीर ले ग्यारा हजार रूपिया नगद, छै मोबाइल फोन, वीडियो रिकॉर्डिंग उपकरण, केबल तार, अउ मोबाइल कनेक्टर जब्त करे हे। पुलिस ह बतइस हे कि दू आने आरोपी मन अभी फरार हे, जेमन ल खोजे जावत हे। पकड़ाय आरोपी मन ले पूछताछ करके ए मामला म सामिल अउ लोगन के बारे म जानकारी जुटाय जावत हे।
इही बीच, विश्वविद्यालय प्रबंधन ह पाछू सात अगस्त के आयोजित प्लांट पैथोलॉजी बिसय के परीक्षा घलो रद्द कर देहे।
मुख्यमंत्री विष्णुदेव साय ह किहीन हे कि प्रदेस म परीक्षा मनके शुचिता, पारदर्सिता अउ विस्वसनीयता ले कोनो प्रकार ले समझौता नइ करे जाही। ओमन किहीन कि परीक्षा प्रक्रिया ल प्रभावित करइया या पढ़इया मनके भविष्य ले खिलवाड़ करइया मनके खिलाफ कड़ा कारवाई करे जाही। मुख्यमंत्री ह प्रकरण के निष्पक्ष जांच के निरदेस दीन हे।
केंद्र सरकार-चीनी
केंद्र सरकार ह किहीस हे कि देस म घरेलू मांग ल पूरा करे बर चीनी के पर्याप्त भंडार हवय, फेर एखर उत्पादन ह अनुमान ले कमती होय के संभावना हे। सरकार ह सक्कर के कीमत म हाले म होय बढ़ोत्तरी ल देखत हुए पर्याप्त उपलब्धता पक्का करे अउ कीमत ल स्थिर राखे बर कई ठिन काज करत हे। मंत्रालय ह किहीस हे कि सक्कर के कीमत म होय बढ़ोत्तरी ल इथेनॉल बनाय बर चीनी के इस्तेमाल ले जोड़ना सही नइ हे।
बच्चे दवाई-प्रतिबंध
केंद्र सरकार ह आज चार बछर ले कम उमर के लइका मन बर क्लोरफेनिरामाइन मैलेट अउ फिनाइलएफ्रिन हाइड्रोक्लोराइड वाले सबो फिक्सड डोज कॉम्बिनेशन ल बनाय, बेचे अउ बांटे उपर रोक लगा देहे। केंद्रीय स्वास्थ्य मंत्रालय ह एक अधिसूचना जारी करके ए दवई मन उपर साफ-साफ चेतावनी लिखना जरूरी करे हे कि चार बछर ले कम उमर के लइका मन ल ए दवई नइ पियाना हे। ए कदम छोटे लइका मनके स्वास्थ्य अउ सुरक्षा ल धियान म राखत हुए उठाय गेहे। सरकार ह ए दवई बनइया कंपनी मन ल निरदेस देहे कि ए सबो दवई के लेबल म दे गे निरदेस अउ प्रचार सामग्री उपर साफ रूप ले चेतावनी लिखे जाय। सरकार ह किहीस हे कि अइसन दवई के इस्तेमाल ले चार बछर ले कम उमर के लइका मन ल खतरा हो सकत हे अउ एखर सुरक्षित विकल्प उपलब्ध हवय। ए बछर जून म घलो स्वास्थ्य और परिवार कल्याण मंत्रालय ह देसभर म लोगन के इस्तेमाल बर सोलह फिक्स्ड डोज कॉम्बिेनशन दवई ल बनाय, बेचे अउ बांटे उपर रोक लगाय रिहीस।
अंत्योदय योजना
केन्द्र सरकार ह काली दीनदयाल अंत्योदय योजना-राष्ट्रीय ग्रामीण आजीविका मिशन के अंतर्गत ’उद्यमिता पर राष्ट्रीय अभियान’ के दूसरइया चरण के सुरूआत करे हे। ए अभियान इक्कीस नवम्बर तक तीन माह बर अउ चलही। ग्रामीण विकास मंत्रालय ह बताइस हे कि ए अभियान ले ग्रामीण माईलोगिन के उद्यमिता ल मजबूती मिलही अउ छै करोड़ लखपति दीदी बनाए के लक्ष्य म योगदान होही।
भाजपा-वंदे मातरम्
भारतीय जनता पार्टी ह वंदे मातरम् उपर जागरूकता फैलाय अउ एखर गायन ल बढ़ावा देबर देसभर म अभियान चलाही। नई दिल्ली म आज पत्रकार मनले गोठबात म भाजपा प्रवक्ता संबित पात्रा ह किहीस कि ए फैसला पार्टी के नवा नियुक्त राष्ट्रीय पदाधिकारी मनके पहिली बइठका म ले गेहे।
हज-सूची
छत्तीसगढ़ ले हज बर आवेदन करइया मनके प्रतीक्षा सूची म ले बयासी झन के नांव तय हो गेहे। राज्य हज कमेटी के चेयरमेन मिर्जा एजाज बेग ह बतइस हे कि हज कमेटी ऑफ इंडिया ले मिले जानकारी अनुसार प्रतीक्षा सूची म एक नंबर ले बयासी नंबर तक के आवेदक मनके चयन होय हे। चुने गे हज यात्री मन ल पहिली किस्त के रूप म हरेक हाजी ल एक लाख बावन हजार तीन सौ रूपिया तीस अगस्त तक जमा करना होही।
दुर्घटना
बलरामपुर जिला म पाछू रतिहा बॉक्साइट ट्रक अउ पिकअप के बीच होय जोरदरहा टक्कर म तीन मजदूर के मउका म ही मउत होगे अउ सात मजदूर गंभीर रूप ले घायल हे। ए हादसा राजपुर-कुसमी रद्दा म हाई स्कूल के तीर होय हे। पिकअप म चालक समेत ग्यारा झन मजदूर संवार रिहीन, जेन मन प्रतापपुर ले संकरगढ़ जावत रिहीन। दुर्घटना के बाद पुलिस ह घायल मन ल सामुदायिक स्वास्थ्य केंद्र पहुंचाइस, जिंहा सुरूआती मलहम पट्टी के बाद गंभीर रूप ले घायल सात मजदूर ल सुग्घर इलाज बर मेडिकल कॉलेज रेफर करे गेहे।
जिले की चिट्ठी
आकासवाणी रईपुर के प्रादेशिक समाचार एकांश, डहार ले प्रस्तुत कार्यक्रम “जिले की चिट्ठी“ के प्रसारण काली संझा छह बजके पांच मिनट ले छह बजके दस मिनट तक करे जाही। ए कार्यक्रम ल छत्तीसगढ़ के सबो आकाशवाणी केन्द्र एके संघरा रिले करही। ए दारी के अंक म आपमन ‘‘दंतेवाड़ा’’ जिला के गतिविधि के बारे में जानकारी सुनिहा।
मौसम
प्रदेस म अवइया एक हफ्ता तक बरसा के सक्रिय रहे के संभावना हवय। आज राजधानी रईपुर समेत अब्बड़ अकन जघा म हल्का ले मध्यम बारिस होय के खबर हे। मौसम विभाग अनुसार मध्यप्रदेस अउ ओखर तीर एक निम्न दाब के क्षेत्र बने हुए हे। एखरे असर ले प्रदेस म अवइया एक हफ्ता तक बदली अउ बारिस के संभावना बने रइही।
मौसम विभाग ह अवइया चोबीस घंटा के दउरान उत्तरी अउ मध्य छत्तीसगढ़ के एक-दू जघा म मध्यम ले भारी बरसा के चेतावनी देहे। उंहे, कुछेक जघा म गरजे-लउके के संग गाज गिरे के संभावना घलो हे।
इही बीच, कबीरधाम जिला के पंडरिया क्षेत्र के सरैया गांव म एक जुन्ना बांध टूट गीस। जेखर ले कतकोन एकड़ फसल के परभावित होय के आसंका हे। उहें, एखर ले बांध म पानी कम होय ले अवइया समय म किसनहा मन के आगू फसल बर पानी पलोय के संकट खड़ा होय के आसंका ले ओमन चिंता म हे।
नीट पीजी-परीक्षा
राष्ट्रीय परीक्षा बोर्ड यानी एनटीई कोति ले नीट-पीजी परीक्षा के आयोजन अवइया तीस अगस्त के करे जाही। परीक्षा ह बिहनिया नौ बजे ले मंझनिया साढ़े बारह बजे तक होही। रईपुर जिला म परीक्षा के ठीक संचालन बर डिप्टी कलेक्टर रईपुर उपेन्द्र किण्डो अउ सहायक पुलिस आयुक्त नंदनी ठाकुर ल नोडल अधिकारी बनाय गेहे।