उच्चतम न्यायालय-वकालत अवधि
सर्वोच्च न्यायालय ह प्रवेस स्तर के न्यायिक सेवा परीक्षा देके बारे म विधि स्नातक बर जरूरी तीन बछर के वकालत के बेरा ल घटाके एक साल कर देहे। न्यायालय ह ए बारे म पाछू बछर के अपन फैसला म संशोधन करे हे। मुख्य न्यायाधीश सूर्यकांत, न्यायमूर्ति ए जी मसीह अउ के. विनोद चन्द्रन के पीठ ह पुर्नसमीक्षा ल खारिज करत दू-एक ले ए फैसला दीन।
सुरंग हादसा-मुआवजा
उत्तराखंड के चमोली जिला के पीपलकोटी म पाछू हफ्ता सुरंग हादसा म लापता दू झिन मजूर के शव म एक झिन के पहिचान छत्तीसगढ़ के चेतन पोयाम के रूप म होय हे। संगेसंग ए घटना म जान गंवइया लोगन मनके संख्या बाढ़के दस हो गेहे। ए घटना म कोंडागांव जिला के गांव धनसुली के दू, मदनार के एक अउ दहीकोंगा के एक झिन मजूर के मउत होय के पुष्टि पहिलीच करे जा चुके हे। ए घटना म इही जिला के दू झिन मजूर घायल होय हे।
ऐति, मुख्यमंत्री विष्ण्ुादेव साय ह उत्तराखंड के चमोली म बनत सुरंग म पानी भरे के घटना म कोंडागांव जिला के चार झिन मजूर के मउत उपर गहरा सोक व्यक्त करे हे। मुख्यमंत्री ह मृतक श्रमिक मनके परिवार वाले मन ल पांच-पाचं लाख रूपिया अउ ए घटना म घायल दूनों श्रमिक मन ल पचास-पचास हजार रूपिया के आर्थिक सहायता देके निरदेस देहे।
कृषि विवि-पेपर निरस्त
इंदिरा गांधी कृषि विश्वविद्यालय म पेपर लीक के मामला आगू आय के बाद परीक्षा रद्द कर दे गेहे। मुख्यमंत्री ह ए मामला ल संज्ञान म लेहे। ओमन किहीन कि एखर जांच बर पांच सदस्यीय जांच समिति बनाय गेहे। जांच रिपोर्ट आय के बाद दोषी मनके खिलाफ कड़ा कार्रवाई करे जाही। ए मामला म एफआईआर दर्ज करा दे गेहे।
केंद्रीय सचिव-मत्स्य पालन
केंद्रीय मत्स्य पालन, पशुपालन अउ डेयरी मंत्रालय के सचिव अविलक्ष्य लेखी ह किहीन हे कि प्रधानमंत्री मत्स्य संपदा योजना के माध्यम ले मत्स्य किसान मन ल आधुनिक तकनीक, वित्तीय सहायता अउ बढ़िया अधोसंरचना देवाय जात हे। काली रईपुर म राखे गे एक ठिन कारीकरम म ओमन किहीन कि छत्तीसगढ़ म मछरी उत्पादन के बढ़िया संभावना हे अउ राज्य म तिलापिया कलस्टर विकसित करे जात हे। ओमन बतइन कि राज्य म मत्स्य क्षेत्र के परियोजना उपर करीबन नौ सौ करोड़ रूपिया खर्चा के मंजूरी दे जा चुके हे। राज्य म दू हजार ले जादा किसान मन तिलापिया पालन करत हे।
स्कूल मंत्री-पत्रकारवार्ता
प्रदेस के स्वामी आत्मानंद उत्कृष्ट विद्यालय अउ आने सरकारी संस्थान मन म अलग-अलग सैक्षणिक अउ गैर सैक्षणिक पद म कान्ट्रैक्ट भर्ती बर राज्य स्तरीय ऑनलाइन कम्प्यूटर आधारित परीक्षा राखे जाही, जेखर परिणाम एक हफ्ता के भीतर घोसित कर दे जाही। ए जानबा स्कूल शिक्षा मंत्री गजेन्द्र यादव ह आज नवा रईपुर म राखे गे पत्रकारवार्ता म दीन।
स्कूल शिक्षा मंत्री गजेन्द्र यादव ह किहीन हे कि स्कूल शिक्षा विभाग डहार ले पाछू दू साल म दू हजार एक सौ चार सैक्षणिक पद म सीधी भर्ती करे गेहे अउ पांच हजार ले जादा पद म भर्ती के काम चलत हे। ओमन किहीन कि विभाग डहार ले सात हजार ले जादा शिक्षक मन ल आने-आने पद म परमोसन दे गेहे। ओमन बतइन कि बहुभाषी शिक्षा ल बढ़ावा देवत बस्तर संभाग म उहें, के भाषा के परयोग करके शिक्षक मन ल प्रसिक्षण दे गेहे। उहें, छात्र मन ल बेरा म मुफत म पाठ्यपुस्तक अउ ड्रेय दे जाही। एखर अलावा, विद्या समीक्षा केंद्र के माध्यम ले स्कूल शिक्षा के आने-आने गतिविधि मनके ऑनलाइन निगरानी करे जात हे।
मुख्य सचिव-जल जीवन मिशन
मुख्य सचिव विकाससील ह मंत्रालय ले वीडियो कॉन्फ्रेंसिंग के माध्यम ले प्रदेस म जल जीवन मिसन के कामकाज के समीक्षा बर कलेक्टर कॉन्फ्रेंस राखिन। ओमन कलेक्टर मन ल हर घर नल ले पानी पहुंचाय बर मिसन कोड म काम करे के निरदेस दीन। मुख्य सचिव ह पूरा हो चुके योजना मनके भौतिक सत्यापन कराय अउ पंचायत मन ल हस्तांतरित योजना मनके रूके भुगतान ल जल्दी करे बर किहीन।
बातों-बातों-में
प्रादेशिक समाचार एकांश के समसामयिक बिसय उपर आधारित कारीकरम ‘‘बातों-बातों-में‘‘ म ए दारी ‘कोंडागांव जिला म सुरू करे गे हीलर हर्बल गार्डन योजना‘ उपर केन्द्रित औषधीय पादप बोर्ड के अध्यक्ष विकास मरकाम ले लेगे भेंटवार्ता प्रसारण करे जाही। एखर प्रसारण काली बाईस अगस्त के आकाशवाणी केंद्र रइपुर डहार ले एफ.एम. अउ प्रायमरी चैनल म बिहनिया नौ बजे ले करे जाही। जेला छत्तीसगढ़ के जम्मो आकाशवाणी केंद्र एके संघरा रिले करहीं।
सोनमणि बोरा-समीक्षा
नगरीय प्रशासन विभाग के प्रमुख सचिव सोनमणि बोरा ह काली मंत्रालय म विभागीय अधिकारी मनके बइठका लेके योजना मनके क्रियान्वयन अउ विकास कामकाज के समीक्षा करीन। ओमन नगर निगम आयुक्त अउ मुख्य नगर पालिका अधिकारी मनके टीम के संग रोजेच वार्ड मन म घूमके विकास अउ सफाई काम के निगरानी करे बर किहीन। संगेसंग बाजार मन म रोजे साफ-सफई, बेरा म कचरा उठाय उपर धियान देके बात किहीन। प्रमुख सचिव ह आने-आने नगरीय निकाय मन म बनत अड़तीस ठिन नालंदा परिसर मनके काम ल जल्दी पूरा करे के निरदेस दीन।
सरपंच अविश्वास प्रस्ताव
राजनांदगांव जनपद पंचायत के ग्राम पंचायत सोमनी के सरपंच नीलिमा साहू के खिलाफ अविस्वास प्रस्ताव पारित हो गेहे। मतदान के दउरान सरपंच के संगेसंग दू झिन पंच ह वोट नइ डारिसा, जेखर ले अविस्वास प्रस्ताव के पक्ष म कुल सोलह मत मिलिस अउ सरपंच के पक्ष म एको मत नइ पड़िस अउ अविस्वास प्रस्ताव सोलह सून्य के स्पष्ट बहुमत ले पारित हो गेहे।
टेरियर साइबर क्वेस्ट
प्रादेशिक सेना ह राष्ट्रीय स्तर म हैकथॉन-टेरियर साइबर क्वेस्ट के सुरूआत करे हे। एखर उद्देस्य रक्षा, साइबर सुरक्षा अउ सूचना के क्षेत्र म आवत चुनौती ले निपटे बर नवा समाधान बनाना हे। हैकथॉन के सुरूआत साइबर पीस के मदद ले करे गेहे। एखर तहत शिक्षा जगत, उद्योग, अनुसंधान संस्थान, सरकारी संगठन अउ सशस्त्र बल के तकनीकी प्रतिभा मन ल एके संघरा लाय जाही। रक्षा मंत्रालय ह बतइन कि ए पहल के माध्यम ले आर्टिफिसियल इंटेलीजेंस, साइबर सुरक्षा अउ डिजीटल जागरूकता के संगेसंग राष्ट्रीय सुरक्षा बर स्वदेसी समाधान विकसित करे बर आगू लाय जाही। प्रतियोगिता बर पंजीकरण इकतीस अगस्त तक कराय जा सकथे। ऑनलाइन चयन एक ले दस सितंबर तक करे जाही। एखर बाद फाइनल नई दिल्ली म छै ले आठ अक्टूबर तक होही।
बच्चे-मौत
बिलासपुर जिला के पचपेड़ी थाना क्षेत्र म काली संझा तरिया म बूडे़ ले दू झिन सगा भाई के मउत होगे। जानबा के मुताबिक चार अउ सात साल के ए दूनों लइका मन अपन बाबू के संग तरिया गे रिहीन। इही दउरान चार साल के लइका के पैर फिसले ले ओहा गहरा पानी म चले गे, भाई ल डूबत देख बड़का भाई ह घलो बचाय के कोसिस म तरिया के पानी म चले गे गहराई जादा होय के सेति दूनों भाई के पानी म बूड़े ले मउत होगे।
क्रीडा प्रतियोगिता-समापन
गौरेला-पेंड्रा-मरवाही जिला के पेंड्रा म राखे गे चार दिवसीय छब्बीसवां राज्य स्तरीय शालेय क्रीडा प्रतियोगिता आज सिरागे। प्रतियोगिता म जिम्नास्टिक, ताइक्वांडो, कबड्डी अउ क्रिकेट म बढ़िया प्रदर्सन के आधार म बिलासपुर संभाग ओवर ऑल चैंपियन रिहीस। समापन समारोह म कोरबा सांसद ज्योत्सना चरणदास महंत ह बढ़िया प्रदर्सन करइया खिलाड़ी अउ विजेता टीम ल पुरस्कार देके सम्मानित करीन। ए मउका म ओमन फिजिकल कॉलेज मैदान के जीर्णाेध्दार बर बीस लाख अउ पतगंवां म सीसी रोड बनाय बर दस लाख रूपिया देके घोसना करीन। राज्य स्तरीय शालेय क्रीडा प्रतियोगिता म प्रदेस के पांच संभाग ले पांच सौ चालीस खिलाड़ी मन भाग लीन।
यूपीएससी-परीक्षा
संघ लोक सेवा आयोग-यूपीएससी के मुख्य परीक्षा आज ले सुरू होगे। ए परीक्षा बाईस, तेईस, उनतीस अउ तीस अगस्त तक चलही। परीक्षा बिहनिया नौ बजे ले मंझनिया बारह बजे तक अउ ढाई बजे ले साढ़े पांच बजे तक दू पाली म चलत हे।