मुख्यमंत्री-स्त्रोत महोत्सव
मुख्यमंत्री विष्णुदेव साय ह आज रायपुर म आयोजित ‘स्त्रोत महोत्सव अउ राज्य स्तरीय कार्यशाला के सुभारंभ करीन। ए मउका म ओमन किहीन कि नदी केवल जल के स्त्रोत नइ हे, बल्कि हमर सभ्यता, संस्कृति, कृषि अउ समृद्धि के जीवन धारा हरय। श्री साय ह किहीन कि नदी बाचही त पानी बाचही अउ पानी बाचही त जीवन बाचही। इही उद्देश्य ले राज्य सरकार ह नदी के उद्गम स्थल अउ कैचमेंट एरिया के संरक्षण ल प्राथमिकता देहे। मुख्यमंत्री ह किहीन कि प्रदेस म नदी संरक्षण बर मानचित्रण, संरक्षण, पुनर्भरण, जनभागीदारी अउ कार्ययोजना के पांच प्रमुख स्तंभ उपर काम करे जाही।
कार्यक्रम के दउरान जल संरक्षण के क्षेत्र म राज्य के संस्थागत अउ तकनीकी क्षमता ल मजबूत बनाय के उद्देश्य ले पुणे के नेशनल वाटर एकेडमी अउ बेंगलुरू के एंट्रिक्स कॉरपोरेशन के साथ एमओयू करे गीस।
सुप्रीम कोर्ट-जज नियुक्त
सर्वोच्च न्यायालय ह न्यायाधीश संतोष शर्मा, सुषमा सावंत अउ सुधीर कुमार ल छत्तीसगढ़ उच्च न्यायालय के जज नियुक्त करे जाय के प्रस्ताव ल मंजूरी दे देहे। कॉलेजियम के अट्ठारह अगस्त के होय बइठका म ए तीन झन नवा जज के नियुक्ति के सिफारिश ल मंजूरी दे गीस।
संतोष शर्मा ह बछर दू हजार नौ म न्यायिक सेवा म प्रवेस करीन। अपन कार्यकाल म ओमन दंतेवाड़ा अउ बलौदाबाजार म जिला अउ सत्र न्यायाधीश, छत्तीसगढ़ हाईकोर्ट अउ विजिलेंस म रजिस्ट्रार, फैमिली कोर्ट के जज अउ रायपुर म जिला अउ सत्र न्यायाधीश जइसे पद म काम कर चुके हे।
उहें, सुषमा सावंत, वर्तमान म छत्तीसगढ़ शासन के विधि अउ विधायी कार्य विभाग म प्रधान सचिव के पद म कार्यरत् हवय।
सुधीर कुमार वर्तमान म रायपुर फैमिली कोर्ट के प्रधान न्यायाधीश हवय। ओमन बछर दू हजार नौ म न्यायिक सेवा म प्रवेस करे रिहीन। ओमन दंतेवाड़ा, धमतरी अउ बिलासपुर म जिला अउ सत्र न्यायाधीश के रूप म काम कर चुके हे।
मुख्य सचिव-उपराष्ट्रपति प्रवास
उपराष्ट्रपति सीपी राधाकृष्णन के दू सितंबर के प्रस्तावित छत्तीसगढ़ प्रवास ल लेके मुख्य सचिव विकासशील के अध्यक्षता म आज मंत्रालय म बइठका होइस। बइठका म उपराष्ट्रपति के प्रवास के दउरान सुरक्षा, प्रोटोकॉल, यातायात, चिकित्सा समेत दूसर व्यवस्था के समीक्षा करे गीस। बइठका म बताय गेहे कि उपराष्ट्रपति दू सितंबर के रायपुर स्थित अखिल भारतीय आयुर्विज्ञान संस्थान एम्स के दीक्षांत समारोह म सामिल होही।
मुख्यमंत्री-माय भारत
मुख्यमंत्री विष्णुदेव साय ह किहीन कि युवा मनके ऊर्जा, प्रतिभा अउ रचनात्मकता विकसित भारत के संघरा विकसित छत्तीसगढ़ के सबले बड़का ताकत हरय। ओमन काली रायपुर म माय भारत के प्रदेस स्तरीय समीक्षा बइठका ल संबोधित करत रिहीन। मुख्यमंत्री ह प्रदेस के जादा ले जादा युवा मन ल माय भारत ले जोड़े अउ स्वास्थ्य, सिक्षा, खेल, पर्यावरण, कौशल विकास अउ आपदा प्रबंधन जइसे क्षेत्र म ओमन के भागीदारी बढ़ाय के निरदेस दीन।
रक्षाबंधन-अवकाश
राज्य सरकार ह रक्षाबंधन परब के मउका म अट्ठाईस अगस्त के राज्य म सार्वजनिक अवकाश घोषित करे हे। सामान्य प्रशासन विभाग डहार ले जारी अधिसूचना के अनुसार ए दिन जम्मों सासकीय कार्यालय अउ संस्था मनके संघरा कोषालय अउ बैंक म अवकाश रिही।
अतिथि व्याख्याता-नियुक्ति आदेश
उच्च सिक्षा संचालनालय ह प्रदेस के जम्मों सासकीय कॉलेज म रिक्त पद म अतिथि व्याख्याता मनके नियुक्ति के आदेस जारी करे हे। उच्च सिक्षा संचालनालय के आयुक्त ह प्रदेस के सरकारी विश्वविद्यालय मनके कुलसचिव, राजकीय विश्वविद्यालय अउ जम्मों सासकीय महाविद्यालय के प्राचार्य ल पत्र जारी करके चालू सैक्षणिक सत्र म प्राध्यापक, सहायक प्रध्यापक, ग्रंथपाल, क्रीडा अधिकारी के खाली पद म अतिथि व्याख्याता के व्यवस्था के संबंध म जरूरी दिसा-निरदेस देहे।
दाण्डिक ब्याज-छूट
छत्तीसगढ़ गृह निर्माण अउ अधोसंरचना विकास मंडल ह अपन हितग्राही मन ल दाण्डिक ब्याज म पचास प्रतिशत छूट देके घोसना करीन हे। ए छूट मंडल के जम्मों योजना म निर्मित अउ निर्माणाधीन आवंटित संपत्ति म लागू होही। पात्र हितग्राही संपूर्ण बकाया रासि एकमुश्त जमा करके ए छूट के फायदा ले सकही।
दिव्यांजन-विशेष मेडिकल बोर्ड
दिव्यांगता प्रमाण पत्र के आधार म सासकीय सेवा म कार्यरत् एक सौ छियासी लोगन मन ले जुड़े प्रकरण के जांच करे जाही। एखर बर विशेष मेडिकल बोर्ड के गठन करे जाही। संगेसंग संबंधित मनखे ल मेडिकल बोर्ड के आगू उपस्थित होना होही। ए निर्णय काली मंत्रालय म समाज कल्याण विभाग अउ स्वास्थ्य विभाग के बइठका म ले गीस। बइठका म विभागीय मंत्री लक्ष्मी राजवाड़े अउ स्वास्थ्य मंत्री श्याम बिहारी जायसवाल ह दिव्यांजन, उभयलिंगी समुदाय अउ दूसर अंतरविभागीय विषय ले जुड़े कल्याणकारी योजना अउ स्वास्थ्य सेवा के क्रियान्वयन के समीक्षा करीन।
शिशु संरक्षण माह
लइका मनके स्वास्थ्य, पोषण अउ उत्तरजीविता ल बढ़ावा देके उद्देश्य ले प्रदेसभर म काली ले शिशु संरक्षण माह के सुभारंभ करे गीस। चौबीस सितंबर तक चलइया ए अभियान के दउरान लइका मन ल विटामिन-ए के खुराक दे जाही। स्वास्थ्य विभाग ह अभिभावक मन ले निर्धारित तिथि म लइका मन ल नजदीकी सत्र म लाय के अपील करीन हे।
स्वतंत्रता दिवस-प्रस्तुति
स्वतंत्रता दिवस म राष्ट्रपति भवन के सेंट्रल हॉल म धमतरी जिला के सरईटोला गांव के कलाकार मन मांदरी नृत्य के प्रस्तुति दीन। पारंपरिक वेशभूषा अउ मांदर के थाप म कलाकार मन छत्तीसगढ़ के समृद्ध आदिवासी संस्कृति अउ लोककला के सुघ्घर झलक पेस करीन। ए प्रस्तुति ह राष्ट्रीय मंच म छत्तीसगढ़ के लोक संस्कृति के गरब बड़ईस।
मुख्य सचिव-सड़क सुरक्षा
मुख्य सचिव विकासशील के अध्यक्षता म काली रायपुर म राज्य स्तरीय सड़क सुरक्षा समिति के समीक्षा बइठका होइस। बइठका म सड़क दुर्घटना म प्रभावी रोक लगाय अउ यातायात व्यवस्था ल सुगम बनाय बर संबंधित विभाग मन ल बेहतर समन्वय के संग काम करे के निरदेस दे गीस। बइठका म जादा दुर्घटना वाला रायपुर, बिलासपुर, दुरूग, कोरबा, रायगढ़, बलौदाबाजार, सरगुजा अउ बस्तर जिला म दुर्घटना के कारण के विश्लेषण करके बिसेस कार्ययोजना बनाय बर केहे गीस।
रेडियो श्रोता सम्मेलन
छत्तीसगढ़ श्रोता मंच डहार ले भिलाई म आज ले अखिल भारतीय रेडियो श्रोता सम्मेलन के आयोजन करे जात हे। सम्मेलन के पहिली दिन आज भिलाई के सेक्टर-छै स्थित डॉक्टर बाबा साहेब अंबेडकर सभागार म कार्यक्रम के आयोजन करे गीस। उहें, काली बीस अगस्त के भिलाई के सिविक सेंटर स्थित महात्मा गांधी कला मंदिर म कार्यक्रम के आयोजन करे जाही। ए सम्मेलन म देशभर ले पांच सौ ले जादा रेडियो श्रोता मन सामिल होवत हे।
उहें, ओल्ड लिसर्नस ग्रुप ऑफ छत्तीसगढ़ जोन डहार ले काली बीस अगस्त के रेडियो श्रोता दिवस मनाय जाही। ए मउका म रायपुर म रेडियो श्रोता बर एक ठिन कार्यक्रम के आयोजन करे जाही। ओल्ड लिसर्नस ग्रुप ऑफ छत्तीसगढ़ जोन के प्रदेस अध्यक्ष मोहनलाल देवांगन ह बतईन कि कार्यक्रम के मुख्य अतिथि ओल्ड लिसनर्स ग्रुप ऑफ छत्तीसगढ़ जोन के संस्थापक महेन्द्र मोदी होही।
गांजा बरामद
सुकमा जिला के कोंटा थाना क्षेत्र म पुलिस ह दू अंतर्राज्यीय तस्कर मन ल गिरफ्तार करके ओमन करा ले तीन सौ आठ किलोग्राम ले जादा के गांजा जब्ती करे हे। जब्ती गांजा के कीमत एक करोड़ चौव्वन लाख रूपिया ले जादा बताय गेहे। गांजा नमक के बोरी के नीचे लुका के लाय जात रिहीस। गिरफ्तार दूनों आरोपी राजस्थान निवासी बताय जात हे।
मुख्यमंत्री कौशल विकास योजना
रायपुर जिला के युवा मन ल मुख्यमंत्री कौशल विकास योजना के तहत निःशुल्क कौशल प्रसिक्षण दे जात हे। जिला परियोजना लाईवलीहुड कॉलेज सोसायटी जोरा म होवइया ए प्रसिक्षण बर अट्ठारह ले पैंतालीस बछर के आयु वाला युवक-युवती आवेदन कर सकत हे। न्यूनतम सैक्षणिक योग्यता आठवीं अउ दसवीं उत्तीर्ण निर्धारित हे। प्रसिक्षण म कम्प्यूटर अउ संवाद कौशल के संग व्यक्तित्व विकास घलो सामिल हे।