टेबल टॉप एक्सरसाइज
छत्तीसगढ़ म बाढ़ जइसन प्राकृतिक आपदा के दउरान राहत अउ बचाव काम सुनिश्चित करे के संग आने-आने विभाग अउ संबंधित एजेंसी के बीच बने ढंग ले समन्वय स्थापित करे के उद्देश्य ले आज मंत्रालय म राज्य स्तरीय टेबल टॉप एक्सरसाइज आयोजित करे गीस। एखर आयोजन छत्तीसगढ़ राज्य आपदा प्रबंधन प्राधिकरण अउ राजस्व आपदा प्रबंधन विभाग डहार ले केन्द्रीय गृह मंत्रालय के राष्ट्रीय आपदा प्रबंधन प्राधिकरण के मदद ले करे गीस। ए दउरान बाढ़ प्रबंधन, प्रभावित मन ल मदद, मौसम विज्ञान अउ जल संसाधन विभाग के बीच समन्वय अउ चेतावनी के संगेसंग सार्वजनिक सूचना प्रणाली के माध्यम ले डाऊन स्ट्रीन के गांव मन ल पहिली ले सचेत करे उपर गोठबात करे गीस। उहें, बाढ़ आपदा के समय एन.डी.आर.एफ., एस.डी.आर.एफ., नगर सेना अउ आने-आने बचाव दल म आपसी समन्वय उपर घलो गोठबात होइस।
बइठका म राजस्व अउ आपदा प्रबंधन के सचिव शम्मी आबिदी ह आपदा के दउरान तुरते निर्णय, संसाधन के सुघ्घर उपयोग अउ जम्मों जुड़े विभाग के बीच मजबूत समन्वय उपर जोर दीन। राजस्व अउ आपदा प्रबंधन विभाग के अधिकारी मन ह बतईन कि बीस अगस्त के राज्य स्तरीय मॉक एक्सरसाइज आयोजित करे जाही। एमा प्रदेस के जम्मों जिला के अधिकारी मन सामिल होही।
यूसीसी समिति
छत्तीसगढ़ राज्य वक्फ बोर्ड के अध्यक्ष डॉक्टर सलीम राज ह आज रायपुर म समान नागरिक संहिता-यूसीसी समिति के सदस्य मन ले भेंट करीन। ए दउरान डॉक्टर सलीम राज ह समिति के सदस्य मन ल आम नागरिक मन ल यूसीसी के आने-आने पहलु मन ल समझाय बर सरल भासा म एक ठिन पुस्तक प्रकाशित कराय के सुझाव दीन। सदस्य मन ह राज्य के प्रबुद्ध नागरिक, सामाजिक संगठन अउ आम जनता मन ले यूसीसी के ड्राफ्ट बर अपन सुझाव साझा करे के आग्रह करीन।
उद्योग मंत्री-निर्देश
उद्योग मंत्री लखनलाल देवांगन ह मानिकपुर ओपन कास्ट एक्सपेंशन परियोजना के प्रस्तावित जनसुनवाई ल लेके एसईसीएल कोरबा के महाप्रबंधक ले चर्चा करीन। ए दउरान ओमन मुआवजा, पुनर्वास अउ पुनर्स्थापना ले जुड़े लंबित काम के निराकरण अउ काचांदी नाला डायवर्सन के प्रारंभिक निरीक्षण रिपोर्ट मिले के बाद जनसुनवाई आयोजित करे के निरदेस दीन।
खबर के मुताबिक मानिकपुर ओपन कास्ट एक्सपेंशन परियोजना के तहत कोयला उत्पादन क्षमता ल पांच दशमलव दू-पांच एमटीपीए ले बढ़ाके सात एमटीपीए करे जाय के प्रस्ताव हे। एखर बर इक्कीस अगस्त के जनसुनवाई होना हे।
मुख्य सचिव-बैठक
मुख्य सचिव विकासशील के अगुवई म काली रायपुर म राज्य सहकारी डेयरी फेडरेशन के राज्य स्तरीय संचालन समिति के बइठका होइस। बइठका म प्रदेस म डेयरी क्षेत्र के विकास, दुग्ध उत्पादक के फायदा, महिला दुग्ध उत्पादक के भागीदारी बढ़ाय अउ दूध संग्रहण के संगेसंग विपणन व्यवस्था ल मजबूत करे उपर चर्चा होइस। संगेसंग बस्तर अउ सरगुजा संभाग म डेयरी विकास ल लेके बिसेस जोर दे गीस।
हरेली बर्ड फेस्टिवल
पर्यावरण, प्रकृति अउ जैव विविधता के संरक्षण ल बढ़ावा देके उद्देश्य ले छत्तीसगढ़ के तैंतीस जिला म चौदह ले सोलह अगस्त तक ‘‘हरेली बर्ड फेस्टिवल‘‘ के आयोजन करे गीस। ए अभियान म एक हजार ले जादा प्रतिभागी मन ह भाग लीन। ए दउरान प्रदेसभर म पैंतीस ‘‘बर्ड वॉक‘‘ आयोजित करे गीस। तीन दिन म नौ सौ चौव्वन ई-बर्ड चेकलिस्ट के माध्यम ले दू सौ ग्यारह पक्षी प्रजाति के दस्तावेजीकरण करे गीस।
हरेली बर्ड फेस्टिवल के उद्देश्य सिरिफ पक्षी मनके गणना करना नइ हे, बल्कि नागरिक विज्ञान के माध्यम ले छत्तीसगढ़ के पक्षी विविधता के वैज्ञानिक दस्तावेजीकरण करना हवय।
शेयर ट्रेडिंग-आरोपी गिरफ्तार
शेयर ट्रेडिंग म मुनाफा के लालच देके करीबन एक करोड़ पन्द्रह लाख रूपिया के ठगी करइया चार झिन आरोपी मन ल रायपुर पुलिस ह गिरफ्तार करे हे। ए आरोपी मन ल महाराष्ट्र अउ मध्यप्रदेश ले पकड़े गेहे। आरोप हे कि ए मन ह छत्तीसगढ़ के तीन झिन मनखे ले करोड़ों रूपिया के ठगी करे हे। तीनों झिन आरोपी मन ल गिरफ्तार करके रायपुर लाय गेहे। पुलिस आरोपी मन ले जब्त मोबाइल के जांच करत हे।
मुख्यमंत्री लोक कलाकार प्रोत्साहन योजना
संस्कृति अउ राजभाषा संचालनालय ह मुख्यमंत्री लोक कलाकार प्रोत्साहन योजना बर प्रदेस के लोक कलाकार मन ले इकतीस अगस्त तक आवेदन मंगाय हे। योजना के तहत नृत्य संगीत, लोक नाट्य, लोकगाथा, छत्तीसगढ़ी गीतकार, वाद्ययंत्र वादक, शिल्प कलाकार, छत्तीसगढ़ी पाक कला अउ छत्तीसगढ़ी सौंदर्यकला ले जुड़े कलाकार मन ह आवेदन कर सकत हे। पात्र कलाकार मन ल चिन्हारी पोर्टल म पंजीयन कराना जरूरी होही। चुने गे कलाकार मन ल हर बछर बारह ले चौबीस हजार रूपिया तक तक प्रोत्साहन रासि दे जाही।
पावस प्रसंग
संस्कृति विभाग डहार ले रायपुर के महंत घासीदास संग्रहालय परिसर म इक्कीस ले पच्चीस अगस्त तक ‘पावस प्रसंग‘‘ के आयोजन करे जाही। कार्यक्रम म वर्षा ऋतु के प्राकृतिक सुंदरता, उमंग, उल्लास अउ संवेदना मन ल शास्त्रीय नृत्य अउ संगीत के माध्यम ले अभिव्यक्त करे जाही। कार्यक्रम हर दिन संझा सात बजे ले सुरू होही।
रेडियो श्रोता सम्मेलन
छत्तीसगढ़ श्रोता मंच कोति ले भिलाई म काली ले अखिल भारतीय रेडियो श्रोता सम्मेलन के आयोजन करे जाही। दू दिन के ए सम्मेलन के पहिली दिन काली उन्नीस अगस्त के भिलाई के सेक्टर-छै स्थित डॉक्टर बाबा साहेब अंबेडकर सभागार म अउ बीस अगस्त के भिलाई के सिविक सेंटर स्थित महात्मा गांधी कला मंदिर म कार्यक्रम के आयोजन करे जाही।
साइबर सुरक्षा जागरूकता कार्यक्रम
‘‘साइबर जागृति अभियान‘‘ के तहत रायपुर के सासकीय दंत चिकित्सा महाविद्यालय म आज छात्र-छात्रा अउ इंटर्न्स बर बिसेस साइबर सुरक्षा जागरूकता कार्यक्रम के आयोजन करे गीस। ए दउरान पुलिस अधिकारी मन ह युवा मन ल साइबर अपराध के नवा तरीका, ऑनलाइन धोखाधड़ी ले बचाव अउ बुनियादी साइबर सुरक्षा के विषय म जागरूक करीन। कार्यक्रम के दउरान युवा मन ल अभियान के मुख्य थीम ‘‘साइबर जागृति की एक सेल्फी‘‘ ले जोड़े गीस।
आरडीए-टाउनशिप योजना
रायपुर विकास प्राधिकरण-आरडीए ह टाउनशिप योजना सुरू करे हे। नवा रायपुर के तीर पिरदा अउ तुलसी गांव के करीबन तीन सौ पचपन एकड़ भूमि म प्रस्तावित ए टाउनशिप बर भू-स्वामी मन ले दावा आपत्ति मंगाय गेहे। योजना के तहत आठ सौ उनयासी भू-स्वामी मन ले दावा-आपत्ति मांगे गेहे।
आरडीए के सीईओ अवनीश शरण ह बतईन कि प्रस्तावित योजना म भू-स्वामी मन ल चालीस प्रतिशत विकसित जमीन ल लहुटाय के प्रावधान हे, जउन ल दिसंबर महीना तक पूरा करे के लक्ष्य राखे गेहे।
अउ अब थोरकुन समाचार सार म –
– राज्य शासन के सामान्य प्रशासन विभाग ह अट्ठाईस अगस्त के राखी तिहार ल देखत प्रदेस के कोषालय अउ जम्मों बैंक मन बर सार्वजनिक छुट्टी के घोषणा करे हे।
– मुख्यमंत्री विष्णुदेव साय ह काली जशपुर जिला के बगिया म जशपुर वनमंडल के जन-जागरूकता अभियान म आधारित ‘‘गजरथ यात्रा-भाग-दो‘‘ के विमोचन करीन।
– रायगढ़ जिला म नजूल पट्टा नवीनीकरण के प्रक्रिया अब सरल होगे हे। जिला प्रशासन ह ई-नजूल व्यवस्था लागू करे हे। एखर तहत नजूल पट्टाधारक मन ह मोबाइल फोन ले घर बइठे पट्टा नवीनीकरण बर आवेदन कर सकही।
– दक्षिण-पूर्व मध्य रेलवे के चक्रधर मंडल म पांचवां लाइन के कमिश्निंग बर पच्चीस सितंबर ले चौदह अक्टूबर तक नॉन इंटरलॉकिंग के काम होही। एखर सेती पच्चीस सितंबर ले चौदह अक्टूबर तक सोलह ठिन ट्रेन रद्द रइही। उहें, कुछेक ट्रेन मनके रूट म बदलाव करे जाह
– सामान्य भविष्य निधि ले जुड़े लंबित प्रकरण के निराकरण बर दुरूग स्थित जिला कोषालय अधिकारी कार्यालय म काली ले तीन दिन के सिविर के आयोजन करे जाही।
बारिश-आंकड़ा
राजस्व अउ आपदा प्रबंधन विभाग ह प्रदेसभर म अब तक होय बारिश के आंकड़ा जारी करे हे। एखर मुताबिक अब तक औसतन सात सौ इकतीस मिलीमीटर ले जादा बरसा दर्ज करे जा चुके हे, जउन ह पाछु दस बछर के औसत बारिस के करीबन निन्यानवे प्रतिशत हवय। विभाग के मुताबिक सारंगढ़-बिलाईगढ़ जिला म सबले जादा पानी गिरे हे। उहें, कांकेर अउ सुकमा जिला म बरसा के आंकड़ा सामान्य ले कमती हवय।