अटल बिहारी वाजपेयी-पुण्यतिथि
राष्ट्र आज पूर्व प्रधानमंत्री अटल बिहारी वाजपेयी के पुण्यतिथि म ओमन ल श्रध्दांजलि देवत हे। भारतीय जनता पार्टी के वरिष्ठ नेता अउ पूर्व प्रधानमंत्री वाजपेयी के बछर दू हजार अट्ठारा म आजे के दिन निधन होय रिहीस। अटल बिहारी वाजपेयी तीन घांव देस के प्रधानमंत्री रिहीस।
राष्ट्रपति द्रौपदी मुर्मू, उपराष्ट्रपति सी.पी.राधाकृष्णन अउ प्रधानमंत्री नरेंद्र मोदी ह आज राष्ट्रीय राजधानी म पूर्व प्रधानमंत्री अटल बिहारी वाजपेयी के स्मारक ‘‘सदैव अटल‘‘ म फूल चढ़ाइन।
उहें, छत्तीसगढ़ के राज्यपाल रमेन डेका ह आज लोकभवन म अउ मुख्यमंत्री विष्णुदेव साय ह रईपुर स्थित अपन निवास म भारत रत्न अउ पूर्व प्रधानमंत्री स्वर्गीय अटल बिहारी वाजपेयी के पुण्यतिथि म फूल चढ़ाके श्रध्दांजलि दीन।
प्रधानमंत्री-महिला आरक्षण
प्रधानमंत्री नरेंद्र मोदी ह सबो राजनीतिक दल मनले अपील करे हे कि संसद अउ राज्य विधानसभा म माईलोगिन मन बर आरक्षण लागू करे के मुद्दा ल राजनीतिक लड़ाई न बनाय जाय। स्वतंत्रता दिवस के बेरा म लालकिला के प्राचीर ले राष्ट्र ल संबोधित करत हुए प्रधानमंत्री ह किहीन कि सबो दल आगू आय अउ माईलोगिन मन ल सम्मान देवत हुए ए सुनिश्चित करे कि लोकसभा अउ राज्य विधानसभा म माईलोगिन मन ल तुरते तैंतीस प्रतिसत प्रतिनिधित्व मिले।
एनटीए-यूजीसी नेट
राष्ट्रीय परीक्षा एजेंसी-एनटीए ह ए बछर जून म होय यूजीसी-नेट परीक्षा के चौरासी बिसय के आखिरी उत्तर जारी कर देहे। उम्मीदवार अट्ठारा अगस्त तक ए उत्तर ल चुनौती दे सकत हे। एखर बर यूजीसी-नेट पोर्टल म ऑनलाइन आवेदन करना होही। हर उत्तर म आपत्ति बर दू सौ रूपिया देना होही। उम्मीदवार मन ल अपन आपत्ति के समर्थन म दस्तावेज घलो जमा करना होही। एनटीए ह किहीन कि कोनो आने जरिया ले भेजे गे आपत्ति स्वीकार नइ करे जाही। एनटीए ह उम्मीदवार मन ले केवल अपन आधिकारिक वेबसाइट अउ सत्यापित सोसल मीडिया हैंन्डल म दे गे जानकारी म ही भरोसा करे ल किहीन हे।
न्यायिक-सेमिनार
छत्तीसगढ़ न्यायिक अकादमी डहार ले आज रईपुर म न्यायिक अधिकारी मन बर एक दिवसीय संभाग स्तरीय न्यायिक सेमिनार आयोजित करे गीस। एमा रईपुरा, धमतरी, बलौदा-बाजार अउ महासमुंद जिला के एक सौ इकचालीस न्यायिक अधिकारी मन ह भाग लीन। समारोह ल संबोधित करत हुए छत्तीसगढ़ उच्च न्यायालय के मुख्य न्यायाधीश रमेश सिन्हा ह न्यायिक प्रणाली ल जादा प्रभावी अउ प्रौद्योगिकीय-अनुकूल बनाय उपर जोर दीन। मुख्य न्यायाधीश ह किहीन हे कि ऑनलाइन लेनदेन, डिजीटल प्लेटफॉर्म अउ नवा तकनीक के बढ़त उपयोग ले आर्थिक अपराध जटिल होवत हे। भारतीय न्याय संहिता दू हजार तेईस के प्रावधान ल समझत हुए न्यायिक अधिकारी मन ल साक्ष्य के सावधानीपूर्वक मूल्यांकन करना चाही।
सेमिनार म आर्थिक अपराध, दस्तावेज साक्ष्य, जीरो एफआईआर, ई-एफआईआर अउ चेक अनादरण ले जुड़े कानूनी बिसय म चर्चा करे गीस।
मुख्यमंत्री-कैंसर इंस्टीट्यूट शुभारंभ
मुख्यमंत्री विष्णुदेव साय आज रईपुर स्थित एक निजी अस्पताल म कैंसर इंस्टीट्यूट के सुभारंभ करीन। ओमन ह संस्थान म उपलब्ध उपचार सुविधा अउ आधुनिक मसीनरी के अवलोकन करीन। मुख्यमंत्री ह किहीन कि कैंसर मरीज ल अब एक ही जघा म जांच उपचार अउ जरूरी चिकित्सा सुविधा मिल सकही। ओमन ह किहीन कि ए संस्थान अवइया समय म हजारों- लाखों लोगन मन ल अच्छा कैंसर उपचार देवाय म जरूरी भूमिका निभाही।
कारीकरम ल विधानसभा अध्यक्ष डॉ. रमन सिंह अउ स्वास्थ्य मंत्री श्याम बिहारी जायसवाल ह घलो संबोधित करीन।
स्वतंत्रता दिवस-लोकभवन/बस्तर
मुख्यमंत्री विष्णुदेव साय ह काली स्वतंत्रता दिवस के मउका म लोकभवन पहुंचके राज्यपाल रमेन डेका ले सौजन्य भेंट करीन। ए मउका म मुख्यमंत्री विष्णुदेव साय ह असम म आय भीषण बाढ़ ले प्रभावित लोगन मन के सहायता के बर छत्तीसगढ़ सरकार कोति ले पांच करोड़ रूपिया के सहायता रासि के चेक राज्यपाल रमेन डेका ल सौंपिन।
महिला पर्यवेक्षक-भर्ती
वित्त विभाग ह पर्यवेक्षक मनके पचास खाली पद बर सीधा भर्ती ल मंजूरी दे देहे। एखर बाद महिला अउ बाल विकास विभाग ह भर्ती प्रक्रिया बर आदेस जारी कर देहे। ए नियुक्ति ले आंगनबाड़ी केंद्र के संचालन, पोषण अभियान के निगरानी अउ विभागीय योजना के मैदानी स्तर म अच्छा काम बर मदद मिलही।
उहंे, सरगुजा म नवा क्षेत्रीय महिला प्रसिक्षण संस्थान के स्थापना ल मंजूरी दे दे गेहे। संस्थान के संचालन बर बारह नवा पद के सेटअप ल घलो स्वीकृति मिले हे। एमा उप संचालक, सहायक संचालक, सहायक लेखाधिकारी अउ डाटा एंट्री ऑपरेटर के संग आने पद सामिल हे।
महिला अउ बाल विकास मंत्री लक्ष्मी राजवाड़े ह किहीन कि नवा नियुक्ति ले विभाग के काम करे के क्षमता बाढ़ही अउ माईलोगिन मन के संग लइका मन ले जुड़े योजना के लाभ जादा प्रभावी ढंग ले हितग्राही मन तक पहुंचाय जा सकही।
गैस रिसाव
दुरूग जिला के भिलाई म पाछू रतिहा एक सीएनजी टैंकर ले अचानक गैस के रिसाव होय ल लगिस। सूचना मिलत ही दुरूग पुलिस मउका म पहुंचिस अउ टैंकर ल सुरक्षा घेरा म लेके बाद नेहरू नगर गुरूद्वारा तिराहा ले अवई-जवई डायवर्ट करे गीस। सुरक्षा ले देखत हुए नेशनल हाइवे म गाड़ी मनके अवई-जवई घलो रोक दे गीस। गैस रिसाव रूके के बाद टैंकर के वॉल ठीक करे गीस अउ ओला सुरक्षित जघा बर रवाना करे गीस। एखर बाद हाइवे म अवई-जवई चालू कर दे गीस।
कॉलेज-प्रवेश तिथि
छत्तीसगढ़ म सैक्षणिक सत्र दू हजार छब्बीस-सत्ताईस बर कॉलेज म प्रवेस के आखिरी तारीख बढ़ाके इकतीस अगस्त कर दे गेहे। उच्च शिक्षा विभाग ह ए संबंध म आदेस जारी करे हे। अब राज्य के जेन शासकीय अउ निजी महाविद्यालय मन म सीट खाली हे, उहें, लइका मन दाखिला ले सकही। एखर पहिली प्राचार्य स्तर म प्रवेस के आखिरी तारीख इकतीस जुलाई अउ कुलपति के अनुमति ले चौदह अगस्त निर्धारित रिहीस।
उच्च शिक्षा मंत्री टंकराम वर्मा ह किहीन हे कि दूर-दराज अउ ग्रामीण क्षेत्र के कतकोन छात्र समय म प्रवेस नइ ले सके रिहीन। छात्र मनके हित ल धियान म राखत हुए ए निर्णय ले गेहे, जेखर ले योग्य विद्यार्थी मन के एक बछर खराब न हो अउ ओमन उच्च शिक्षा ले छूटे झन।
बारिश
कोरबा जिला म सरलग बरसा के बीच मिनीमाता बांगो बांध के सात गेट खोल दे गेहे। बांध ले करीब पच्चीस हजार क्यूसेक पानी हसदेव नदी म छोड़े जावत हे। एखर चलत नदी तीर के निचला इलाका म बाढ़ के स्थिति बने के आसंका हे। प्रशासन ह करीब पैंतीस गांव बर बाढ़ के अलर्ट जारी करे हे। लोगन मन ल सतर्क रहे अउ सुरक्षित जघा म जाय के सलाह दे गेहे।
ओति, तेज बरसा के कारण सूरजपुर जिला के प्रतापपुर विकासखंड के गांव धोंधा तीर नदी म बने पूल बहे गीस। ए पूल ल करीब दस करोड़ रूपिया के लागत ले बनाय गे रिहीस। पूल बहे जाय ले गांव के लोगन मनके अवई-जवई प्रभावित होय हे। ए घटना के बाद स्थानीय लोगन निर्माण एजेंसी उपर गुणवत्ता म लापरवाही अउ भ्रष्टाचार के आरोप लगावत हे।
उहें, महासमुंद जिला के मुडमार बांध म काली पंद्रह अगस्त के नहावत समय एक मनखे के डूबे ले मउत होगिस। जानबा के अनुसार ए मनखे अपन पांच दोस्त मनके संग मुडमार बांध घूमे बर गे रिहीस।
इही बीच, मौसम विभाग ह अवइया दू दिन के दउरान उत्तरीय छत्तीसगढ़ के कुछेक जघा म भारी ले अतिभारी बरसा होय के चेतावनी दे हे। उहें, प्रदेस के कतकोन जघा म हल्का ले मध्यम बरसा होय के संभावना जताय हे। आज मंझनिया के बाद राजधानी रईपुर के संग प्रदेस के कतकोन जघा म जादा बरसा होइस।
अउ अब थोरकुन समाचार सार म –
– बलरामपुर जिला के रामानुजगंज वन परिक्षेत्र के शिवपुर के जंगल म आज हाथी मन ह एक मनखे उपर हमला कर दीस, जेखर ले उंखर मउका म ही मउत होगिस
अउ
– धमतरी जिला के श्याम तराई नाका चौक के तीर अज्ञात गाड़ी के टक्कर ले बाइक सवार एक मनखे के मउत होगिस।