स्वतंत्रता दिवस-प्रधानमंत्री
देस आज अस्सीवां स्वाधीनता दिवस मनावत हे। प्रधानमंत्री नरेंद्र मोदी ह आज ऐतिहासिक लाल किला के प्राचीर ले राष्ट्रीय ध्वज फहराइन। राष्ट्र ल स्वाधीनता दिवस के सुभकामना देवत हुए प्रधानमंत्री ह किहीन कि कोनो भी राष्ट्र तब महान बनथे, जब ओहा अपन सपना, अपन संकल्प अउ अपन सामर्थ्य के दम म आगू बाढ़थे। देस अब छोटे सपना ले नही, बल्कि बड़े सपना ले चलही।
प्रधानमंत्री ह किहीन हे कि जब दू हजार सैंतालीस म स्वतंत्रता के सौ साल पूरा होही, हम विकसित भारत बनाके रिहिंगे। श्री मोदी ह किहीन कि दू हजार सैंतालीस के विकसित भारत के लक्ष्य हासिल करे बर हमला अपन कार्य संस्कृति, सोच अउ काम के गति ल बदलना होही।
प्रधानमंत्री ह घोसना करीन कि अवइया एक बछर म एक करोड़ युवा मन ल एआई कौशल म प्रसिक्षित करे जाही। ओमन कृत्रिम बुध्दिमत्ता के तीव्र विस्तार के उल्लेख करत हुए किहीन कि ए पहल भारत के युवा मन ल एआई के दुनिया म नेतृत्व करे के क्षमता प्रदान करे म सहायक होही।
प्रधानमंत्री ह किहीन कि सरकार मध्यम वर्ग के परिवार के लइका मन बर फ्री ऑनलाइन कोचिंग के व्यवस्था करत हे। ओमन किहीन कि डिजीटल सार्वजनिक अउ संरचना, उपलब्ध प्रतिभा अउ शिक्षक मन ल एके संघरा लाके देस के युवा मन ल निसुल्क कोचिंग प्रदान करे बर एक संपूर्ण नेटवर्क तैयार करे जाही।
प्रधानमंत्री ह किहीन कि नक्सलवाद ह चार दसक ले भारत के आबादी ल दबोच के राखे रिहीस। नक्सलवाद ले निपटे बर साढ़े तीन हजार ले जादा जवान मन ल अपन प्राण के आहूति देले पड़िस। श्री मोदी ह देस ल नक्सलवाद मुक्त बनाय के आह्वान करीन।
राष्ट्रपति-संबोधन
एखर ले पहिली, राष्ट्रपति द्रौपदी मुर्मू ह स्वतंत्रता दिवस के पहिली काली संझा राष्ट्र ल संबोधित करीन। राष्ट्रपति ह किहीन कि विश्व के आने-आने क्षेत्र मन म युध्द अउ अस्थिरता के प्रभाव सबो देस मन म पड़त हे। अइसे परिस्थिति म घलो भारत के अर्थव्यवस्था तेज गति ले आगू बाढ़त हे। गंभीर चुनौती बने नक्सलवाद के उल्लेख करत हुए ओमन किहीन कि भारत ल नक्सलमुक्त बनाना एक बड़े उपलब्धि हरय। अब नक्सल ग्रस्त क्षेत्र मन म विकास के धारा बहत हे। बस्तर ओलंपिक्स म खिलाड़ी मन के, बस्तर पंडुम म कलाकार मनके अउ ए आयोजन मन म दर्सक मनके भारी संख्या म भागीदारी नक्सलमुक्त क्षेत्र के प्रमाण हरय।
स्वतंत्रता दिवस-छत्तीसगढ़
छत्तीसगढ़ म घलो स्वतंत्रता दिवस पूरा उछाह, उल्लास अउ देसभक्ति के भावना ले ओतप्रोत होके मनाय जात हे। मुख्यमंत्री विष्ण्ुादेव साय ह स्वतंत्रता दिवस के मउका म राजधानी रायपुर के पुलिस परेड ग्राउंड म आयोजित मुख्य समारोह म झंडा फहरा के परेड के सलामी लीन। समारोह ल संबोधित करत हुए मुख्यमंत्री ह किहीन हे कि प्रधानमंत्री नरेंद्र मोदी के साहसिक नेतृत्व अउ कंेद्रीय गृह मंत्री अमित शाह के दृढ संकल्प ले नक्सलवाद के विरूध्द ऐतिहासिक सफलता मिले हे। माओवाद ले मुक्त बस्तर म आज तिरंगा यात्रा के माध्यम ले आजादी के उत्सव मनाय जात हे। जउन क्षेत्र कभू हिंसा अउ भय ले प्रभावित रिहीस हे, उंहा आज सांति, विस्वास अउ विकास के नवा बिहनिया होय हे। ओमन किहीन कि बस्तर के सर्वांगीन प्रगति डबल इंजन सरकार के सर्वोच्च प्राथमिकता मन म हे।
मुख्यमंत्री ह किहीन कि राज्य सरकार ह पांच सौ करोड़ रूपिया के ‘‘छत्तीसगढ़ राज्य एआई मिशन‘‘ ल मंजूरी देहे। एखर अंतर्गत सौ एआई डेटा लैब, पांच सेंटर ऑफ एक्सीलेंस अउ पचास ले जादा एआई आधारित सेवा मन ल विकसित करे जाही। एखर तहत छै लाख विद्यार्थी अउ डेढ़ लाख शासकीय कर्मचारी मन ल एआई के प्रसिक्षण दे जाही।
मुख्यमंत्री ह किहीन हे कि प्रदेस के खिलाड़ी वैश्विक मंच म तिरंगा लहरावय, एखर बर खेल अधोसंरचना ल मजबूत करे के संगेसंग ‘‘मुख्यमंत्री खेल उत्कर्ष मिशन‘‘ सुरू करे जात हे। ओमन किहीन कि ‘‘मुख्यमंत्री पर्यटन मिशन‘‘ के माध्यम ले बस्तर अउ सरगुजा म पर्यटन सुविधा मनके तेजी ले विस्तार करे जाही।
स्वतंत्रता दिवस के मउका म राज्यपाल रमेन डेका ह आज लोकभवन म राष्ट्रीयध्वज फहराके परेड के सलामी लीन। बिलासपुर म कंेद्रीय राज्य मंत्री तोखन साहू, दुरूग म उपमुख्यमंत्री अरूण साव अउ बस्तर म उपमुख्यमंत्री विजय शर्मा ह ध्वजारोहण करीन। उहें, विधानसभा अध्यक्ष डॉ. रमन सिंह ह राजनांदगांव म ध्वजारोहन करीन।
प्रदेस के दूसर जिला मुख्यालय मन म मंत्री, सांसद अउ विधायक मन स्वतंत्रता दिवस समारोह म ध्वजारोहण कर परेड के सलामी लीन।
जिले की चिट्ठी
आकाशवाणी रईपुर के प्रादेशिक समाचार एकांश, डहार ले प्रस्तुत कार्यक्रम “जिले की चिट्ठी“ के प्रसारण काली संझा छह बजके पांच मिनट ले छह बजके दस मिनट तक करे जाही। ए कार्यक्रम ल छत्तीसगढ़ के सबो आकाशवाणी केन्द्र एके संघरा रिले करही। ए बखत के अंक म ‘‘सुकमा’’ जिला के गतिविधि के बारे में जानकारी दे जाही।
मुख्यमंत्री-छायाचित्र प्रदर्शनी
मुख्यमंत्री विष्णुदेव साय ह आज रायपुर के टाउन हॉल म जनसंपर्क विभाग डहार ले आयोजित सात दिवसीय छायाचित्र प्रदर्सनी के सुभारंभ करीन। ए प्रदर्सनी म स्वतंत्रता संग्राम म छत्तीसगढ़ के योगदान, अमर सेनानी मनके शौर्य अउ बलिदान, ‘वंदे मातरम्‘ के एक सौ पचास बछर के गौरवसाली यात्रा अउ राज्य म सुशासन अउ विकास के उपलब्धि मन ल प्रदर्सित करे गेहे।
मुख्यमंत्री ह किहीन कि ए प्रदर्सनी ह न केवल इतिहास के स्मरण कराथे, बल्कि विरासत ले प्रेरणा लेके विकसित छत्तीसगढ़ अउ विकसित भारत के निर्माण के संकल्प ल घलो सुदृढ़ करत हे। ए मउका म मुख्यमंत्री ह सहर के ऐतिहासिक धरोहर-टाउन हॉल अउ सहीद स्मारक भवन के संरक्षण, साज-सज्जा अउ नवीनीकरण बर पचास-पचास लाख रूपिया प्रदान करे के घोसना करीन।
ए चित्र प्रदर्सनी इक्कीस अगस्त तक हर दिन बिहनिया साढ़े दस बजे ले रतिहा आठ बजे तक आम नागरिक मन बर खुले रइही।
अइसने, भारत सरकार के केंद्रीय संचार ब्यूरो डहार ले सरगुजा जिला के करजी गांव म ‘नशामुक्त युवा फॉर विकसित भारत संकल्प अभियान‘ उपर केंद्रित दू दिवसीय चित्र प्रदर्सनी अउ जन-जागरूकता कार्यक्रम के आयोजन करे गीस। कार्यक्रम म ‘‘हर घर तिरंगा‘ अभियान ल नशामुक्ति के संदेस ले जोड़त हुए छात्र मन ल अउ ग्रामीण मन ल देसभक्ति अउ सामाजिक जागरूकता के संदेस दे गीस।
स्वतंत्रता दिवस-स्कूली विद्यार्थी प्रस्तुति
रायपुर म आयोजित राज्य स्तरीय स्वतंत्रता दिवस समारोह म लगभग साढ़े आठ सौ स्कूली छात्र मन छत्तीसगढ़ के लोककला अउ संस्कृति उपर आधारित प्रस्तुति दीन। एमा सरगुजा संभाग के स्कूली छात्र मन पहलइया, दुरूग संभाग के छात्र मन दूसरइया अउ रायपुर संभाग ल तीसरइया स्थान प्राप्त होइस। मुख्यमंत्री विष्णुदेव साय ह शील्ड-मेडल देके सबो विजेता मन ल सम्मानित करीन।
पुलिस/नगर सेना-सम्मानित
स्वतंत्रता दिवस के मउका म रायपुर म आयोजित राज्य स्तरीय समारोह म मुख्यमंत्री विष्णुदेव साय ह छत्तीसगढ़ पुलिस अउ नगर सेवा के अधिकारी अउ जवान मन ल उंखर कर्तव्यनिष्ठा, असाधारण कार्य कुसलता अउ विशिष्ट सेवा मन बर प्रतिष्ठित पदक अउ राज्य स्तरीय पुरस्कार मन ले अलंकृत करीन। समारोह म रक्षित केंद्र धमतरी के सहायक उपनिरीक्षक रामअवतार सिंह राजपूत ल ‘‘राष्ट्रपति के विशिष्ट सेवा पदक‘‘ ले सम्मानित करे गीस। एखरे संग ही सराहनीय सेवा, अपराध नियंत्रण, कानून व्यवस्था अउ आधुनिक नवाचार मन बर भारतीय पुलिस सेवा के अधिकारी मन संग दस झन पुलिस कर्मी मन ल ‘‘भारतीय पुलिस पदक‘‘ प्रदान करे गीस। उहें, आपदा प्रबंधन, राहत कार्य अउ जनसेवा मन म अद्वितीय भूमिका निभाय बर नगर सेना राजनांदगांव के उत्तम कुमार साहू अउ रायपुर के लांस नायक जोगेश्वर कुमार धीवर ल ‘गृह रक्षक तथा नागरिक सुरक्षा सराहनीय सेवा पदक‘ प्रदान करे गीस।