स्वतंत्रता दिवस
काली हमर देस ह अस्सीवां स्वतंत्रता दिवस मनाही। ए मउका म प्रधानमंत्री नरेंद्र मोदी दिल्ली के लालकिला म तिरंगा झंडा फहरा के देस ल संबोधित करहीं।
ऐति, छत्तीसगढ़ म स्वतंत्रता दिवस के मउका म राज्य स्तरीय मुख्य समारोह राजधानी रइपुर के पुलिस ग्राउंड म आयोजित करे जाही, जिंहा मुख्यमंत्री विष्णुदेव साय तिरंगा फहराके परेड के सलामी लिहीं।
उहें, बिलासपुर म केंद्रीय राज्यमंत्री तोखन साहू, दुरूग म उपमुख्यमंत्री अरूण साव अउ बस्तर म उपमुख्यमंत्री विजय शर्मा झंडा फहराहीं। ऐति, विधानसभा अध्यक्ष डॉ. रमन सिंह राजनांदगांव म ध्वजारोहन करहीं।
प्रदेस के आने-आने जिला मुख्यालय म मंत्री, सांसद अउ विधायक मन झंडा फहराहीं अउ सबो मुख्य अतिथि मन ए मउका म मुख्यमंत्री के संदेस वाचन करहीं।
बतादन कि स्वतंत्रता दिवस समारोह ले पहिली खेल अउ युवा कल्याण विभाग डाहर ले आज आने-आने जिला म ‘‘स्वतंत्रता दउड‘‘़ के आयोजन करे गिस।
इही बीच, छत्तीसगढ़ राज्य वक्फ बोर्ड ह राज्यभर के जम्मो मस्जिद, दहगाह अउ मदरसा मन म घलो तिरंगा फहराय के अपील करिस हे। वक्फ बोर्ड के अध्यक्ष डॉ. सलीम राज ह बतइन कि-पंद्रह अगस्त के परब देसभक्ति, एकता, भाईचारा अउ संविधान के प्रतीक सम्मान के संग मनाय जाना चाही।
उहें, स्वतंत्रता दिवस के मउका म विधानसभा भवन काली नागरिक मन बर बिहनिया 10 बजे ले संझा 5 बजे तक खुले रइही।
स्वतंत्रता दिवस के मउका म राज्यपाल रमेन डेका ह प्रदेसवासी मन ल सुभकामना देइन हें। ओमन देस के स्वतंत्रता बर अपन सर्वस्व न्योछावर करइया स्वतंत्रता संग्राम सेनानी अउ देस के रक्षा करत सहीद होय वीर जवान मन ल नमन करिन हें।
राष्ट्रपति-संबोधन
राष्ट्रपति द्रौपदी मुर्मू ह आज संझा देस के नांव संबोधन करहीं। राष्ट्रपति के संबोधन अब ले थोरकिन देर बाद संझा 7 बजे आकाशवाणी के सबो राष्ट्रीय चैनल म परसारित करे जाही। एहा दूरदर्सन के सबो चैनल म हिंदी म परसारित होही, जेखर बाद एखर अंग्रेजी संस्करन घलो परसारित करे जाही। हिंदी-अंग्रेजी म संबोधन के परसारन के बाद एखर क्षेत्रीय भाषा म परसारन दूरदर्सन के क्षेत्रीय चैनल म करे जाही।
वीरता पुरस्कार-घोषणा
केंद्र सरकार ह स्वतंत्रता दिवस के मउका म पुलिस, अग्निसमन सेवा, होमगार्ड अउ नागरिक सुरक्षा के संग सुधार सेवा के एक हजार संतावन कर्मी मन ल वीरता अउ सेवा पदक देय बर घोसना करे हे। गृह मंत्रालय ह आज वीरता पुरस्कार के तीन सौ एक पदक मनके सूची जारी करिस। एमा पुलिस कर्मी मन बर दू सौ बहत्तर अउ अग्निसमन सेवा के कर्मी मन बर उनतीस पदक सामिल हे।
छत्तीसगढ़ पुलिस के एक सौ इकतालीस अधिकारी मन ल वीरता पुरस्कार ले सम्मानित करे जाही। प्रदेस म नक्सलवाद के खातमा बर ए जवान मन के प्रदर्सन अउ साहस के सेति ए सम्मान दे जाही। एसो देसभर म सबले जादा वीरता पुरस्कार छत्तीसगढ़ पुलिस ल मिलत हे।
एखर अलावा पुलिस उप-महानिरीक्षक मोतीलाल कोटवानी ल उंखर बिसेस सेवा बर राष्ट्रपति पदक प्रदान करे जाही। संगेसंग राज्य के 10 झन पुलिस अधिकारी मन ल घलो उंखर संहराउंख सेवा बर राष्ट्रपति पदक ले सम्मानित करे जाही।
हर घर तिरंगा
‘‘हर घर तिरंगा‘‘ अभियान के तहत उप-मुख्यमंत्री अरूण साव के अगुवई म मंुगेली जिला के लोरमी इलाका के गांव अउ नगर म तिरंगा यात्रा निकाले गिस। मोटर साइकिल ले निकले ए तिरंगा यात्रा लोरमी के पुराना बस स्टैंड ले सुरू होके दाऊ कापा पहुंचिस। उहें, नगर म मानस मंच ले सुरू होय तिरंगा यात्रा मुंगेली चैक, हटरी चैक, नवा बस स्टैंड अउ पुराना बस स्टैंड ले होके गुजरिस। ए दउरान श्री साव ह स्वतंत्रता सेनानी अउ वीर सहीद मन ल नमन करत विकसित अउ आत्मनिर्भर भारत के निरमान म हर नागरिक के भागीदारी के संकल्प लेइन।
उहें, तिल्दा के तिरंगा यात्रा म राजस्व मंत्री टंकराम वर्मा ह सामिल होइन। ए बेरा ओमन तिरंगा के महिमा अउ देस के गौरवसाली इतिहास ल सोरियावत किहीन कि-तिरंगा के हरा रंग सांति, खुसहाली अउ समृध्दि के प्रतीक आय। उहें, असोक चक्र सरलग प्रगति के संदेस देथे। तिरंगा हमर एकता अउ अखंडता के प्रतीक हे।
विभाजन विभीषिका स्मृति दिवस
आज विभाजन विभीषिका स्मृति दिवस आय। ए मउका म देस ह बछर- उन्नीस सौ सैंतालीस के विभाजन के बेरा अपन परान गंवइया अउ पीरा झेलइया जम्मो लोगन ल श्रध्दांजलि देवत हे।
विभाजन विभीषिका स्मृति दिवस के मउका म प्रधानमंत्री नरेंद्र मोदी ह विभाजन ले प्रभावित सबो लोगन के साहस ल सुरता करिन। सोसल मीडिया पोस्ट म प्रधानमंत्री ह किहीन कि-हमन विभाजन ले प्रभावित सबो लोगन के साहस ल सुरता करथन। इतिहास के ओ छण, जेहा कतकोन जिनगी ल तहत-नहस कर दिस, अपन सगा-संबंधी दूरिहागे अउ असहनीय पीरा घलो सहे ल परिस। श्री मोदी ह कामना करिन कि-ए दिन ह हमर देस म सद्भाव अउ भाईचारा ल बनाय राखे के संकल्प ल अउ मजबूत करही अउ हम सब मिलके विकसित भारत निरमान के दिसा म आगू बाढ़बो।
ऐति, छत्तीसगढ़ के संस्कृति विभाग डाहर ले आज विभाजन विभीषिका स्मृति दिवस के मउका म राज्य स्तरीय कारीकरम के आयोजन करे गिस। राजधानी रइपुर म आयोजित कारीकरम म मुख्यमंत्री विष्णुदेव सामिल होइन। ए बेरा मुख्यमंत्री ह घलो विभाजन के पीरा ल सोरियाइन।
कारीकरम ल प्रख्यात फिल्मकार अउ अभिनेता चंद्रप्रकाश द्विवेदी ह घलो संबोधित करिन।
सोना बरामद
दक्षिण पूर्व मध्य रेलवे के सुरक्षाबल के क्राइम ब्रांच रइपुर अउ नागपुर के टीम ह हावड़ा-मुंबई दुरंतो एक्सप्रेस ले करीबन एक करोड़ छियानबे लाख रूपिया के बिदेसी सोना बरामद करे हे। आरपीएफ क्राइम बं्राच नागपुर ल मिले सूचना के आधार म रइपुर अउ नागपुर के टीम ह डीआरआई के संग मिलके रेलगाड़ी म जांच अभियान चलाइस। इही बेरा भंडारा अउ नागपुर के बीच रेलगाड़ी के बी-12 कोच म दू झन संदिग्ध यात्री पकड़े गिन। तलासी के बेरा उंखर तिर ले करीबन एक किलो दू सौ बयालिस ग्राम बिदेसी सोना बरामद होइस, जेमा सात ठन सोना के बिस्कुट अउ एक ठन सोना के छड़ मिलिस।
दुर्घटना
उत्तराखंड के चमोली जिला म निरमानाधीन मायापुर-पीपलकोटी टनल म काली संझाकुन अचानक पानी भरे ले छत्तीसगढ़ अउ झारखंड के 7 झन मजदूर मनके मउत होगिस। उहें, टनल ले 22 झन मजदूर मन ल सुरक्षित निकाले गिस। हादसा म 11 झन घायल बताय जावत हंे, एमा झारखंड के पांच, बिहार के दू, छत्तीसगढ़ के दू, पंजाब अउ हिमाचल के एक-एक मजदूर सामिल हें। छै मजदूर अभी घलो लापता बताय जावत हें।
ऐति, मुख्यमंत्री विष्णुदेव साय ह चमोली के सुरंग हादसा म श्रमिक मनके मउत उपर दुख जताइन ह
ईओडब्ल्यू-चालान
आर्थिक अपराध अन्वेषण ब्यूरो-ईओडब्ल्यू ह नगरीय प्रशासन अउ विकास विभाग के तत्कालीन मुख्य अभियंता भागीरथी वर्मा के खिलाफ करीबन पंद्रह सौ पन्ना के चालान रइपुर के बिसेस न्यायालय म पेस करिस। मुख्य अभियंता भागीरथी वर्मा उपर बछर-दू हजार उन्नीस ले दू हजार तेईस के दउरान पद के दुरूपयोग अउ कथित अवैध कमीसन के रूप म फायदा पाय के आरोप लगाय गेहे।
सिकइत ले आने-आने नगरीय निकाय म निविदा कारज देवाय बर अउ बिल के भुगतान के एवज म कथित पच्चीस प्रतिसत कमीसन के मांग करे गे रिहीस। ईओडब्ल्यू के जांच म कुल एक करोड़ छिहत्तर लाख रूपिया ले जादा के फायदा पाय गिस।
उहें, जशपुर जिला के कुनकुरी म इक्कीस बछर जुन्ना चाउंर घोटाला मामला म ईओडब्ल्यू ह करीबन चालीस हजार पन्ना के चालान जशपुर के बिसेस न्यायालय म पेस करिस। ए मामला बछर-दू हजार पांच म कुनकुरी के छत्तीसगढ़ राज्य भंडार गृह निगम के गोदाम म भंडारित चाउंर के कमती ले जुड़े हे। जांच म गोदाम के वास्तविक स्टाक अउ अभिलेख म दर्ज चाउंर के मात्रा म भारी अंतर पाय गिस। बिस्तार ले जांच म गोदाम म बाईस हजार एक सौ अंठानबे कुंटल ले जादा चाउंर के वास्तविक कमी निर्धारित करे गिस। एखर ले सरकार ल करीबन दू करोड़ पचास लाख रूपिया ले जादा के आर्थिक नुकसान होना पाय गिस।