राष्ट्रीय-संगीत पुरस्कार
राष्ट्रपति द्रौपदी मुर्मु ह आज नई दिल्ली म आयोजित एक ठिन बिसेस समारोह म सौ ले जादा कलाकार मन ल बछर दू हजार चौबीस अउ दू हजार पच्चीस बर संगीत नाटक अकादमी के छात्रवृत्ति अउ पुरस्कार दीन। एमा पद्मश्री ले सम्मानित छत्तीसगढ़ के रायगढ़ घराना के सुप्रसिद्ध कत्थक नर्तक पंडित रामलाल बरेठ ल संगीत नाटक अकादमी फेलोशिप दे गीस। उहें, बस्तर के लुप्त होवत पारंपरिक लोकधुन ल सहेजने वाला बस्तर बैंड के अनूप रंजन पांडेय ल लोक संगीत श्रेणी म राष्ट्रीय पुरस्कार ले सम्मानित करे गीस।
ए मउका म राष्ट्रपति ह किहीन कि पुरस्कार लेवइया मन म आधुनिक भारत के प्रतिभा अउ समर्पण दिखथे। ओमन किहीन कि संगीत के अनेक प्रणाली हे, नृत्य के कई शैली हे अउ लोक रंगमंच के अनगिनत रूप हे। राष्ट्रपति ह कहिन कि कलाकार मन ह देसभर म लोक संस्कृति ल सहेजे बर अपन बड़े भूमिका निभावत हे।
छत्तीसगढ़ इंडस्ट्री डायलॉग
छत्तीसगढ़ शासन डहार ले भारतीय उद्योग परिसंघ के मदद ले रईपुर म राखे गे ‘‘छत्तीसगढ़ इंडस्ट्री डायलॉग ऑन ग्रीन स्टील‘‘ म छत्तीसगढ़ ल तेरह हजार आठ सौ चालीस करोड़ रूपिया के निवेस मिले हे। ए परियोजना ले प्रदेस म दस हजार नौ सौ ले जादा रोजगार के अवसर बने के संभावना हे। ए कार्यक्रम म मुख्यमंत्री विष्णुदेव साय मुख्य अतिथि के रूप म सामिल होइन। ए मउका म ओमन किहीन कि स्टील अउ खनन उद्योग छत्तीसगढ़ के औद्योगिक पहिचान हे। हमन लक्ष्य सिरिफ स्टील उत्पादन तक ही सीमित नइ होना चाही, बल्कि छत्तीसगढ़ म उत्पादित स्टील के अधिकतम मूल्य संवर्धन घलो प्रदेस के भीतर ही होना चाही।
रेल मंत्रालय-बजट
रेल मंत्रालय ह छत्तीसगढ़ म रेल नेटवर्क अउ बुनियादी ढांचा के विकास बर वर्तमान बछर म सात हजार चार सौ सत्तर करोड़ रूपिया के बजट आवंटित करे हे। केन्द्रीय रेल मंत्री अश्विनी वैष्णव ह लोकसभा म सांसद विजय बघेल के प्रश्न के उत्तर म ए जानकारी दीन। अमृत भारत स्टेशन योजना के तहत राज्य के बत्तीस ठन स्टेसन म विकास काम चलत हे, जेमा ले दस ठन स्टेसन के काम पूरा घलो होगे हे। दल्लीराजहरा-रावघाट नवा रेललाइन परियोजना घलो पूरा होगे हे अउ रावघाट-जगदलपुर रेललाइन म निर्माण काम चलत हे।
हर घर तिरंगा
हर घर तिरंगा अभियान के तहत ए बखत प्रदेस के आने-आने जिला म तिरंगा यात्रा निकाले जावत हे। इही कड़ी म आज सूरजपुर जिला के विश्रामपुर म महिला अउ बाल विकास मंत्री लक्ष्मी राजवाड़े के नेतृत्व म तिरंगा यात्रा निकाले गीस। ए तिरंगा यात्रा विश्रामपुर के सासकीय कन्या हाईस्कूल ले सुरू होके आने-आने रद्दा ले होवत वापस विद्यालय परिसर म संपन्न होइस। ए यात्रा म स्कूल छात्र-छात्रा, जनप्रतिनिधि अउ अधिकारी-कर्मचारी मनके संगेच आम लोगन सामिल होइन।
उहें, केन्द्रीय रिजर्व पुलिस बल-सीआरपीएफ के दू सौ इकतालीवां बस्तरिया वाहिनी सेड़वा डहार ले आज जगदलपुर म तिरंगा मार्च के आयोजन करे गीस। ए दउरान जवान मन ह ग्रामीण मन ल स्वतंत्रता दिवस के महत्व अउ राष्ट्र बर उंखर कर्तव्य के बारे म जागरूक करीन। ए मउका म सेड़वा गांव के स्कूली लइका मन ह सामूहिक रूप ले वंदे मातरम् के गायन करीन।
बस्तर तिरंगा यात्रा
बस्तर संभाग म निकाले जावत तिरंगा यात्रा के दूसर दिन उपमुख्यमंत्री विजय शर्मा अउ वन मंत्री केदार कश्यप ह आज दंतेवाड़ा के मां दंतेश्वरी मंदिर पहुंच के पूजापाठ करीन। एखर बाद तिरंगा यात्रा कार्यक्रम म उपमुख्यमंत्री ह जिला के दू सौ ग्यारह सर्वोच्च बलिदानी वीर जवान मन ल नमन करत किहीन कि बस्तर के जनता, समाज प्रमुख, जनप्रतिनिधि अउ पत्रकार मनके मदद ले नक्सलवाद के अंत संभव होय हे। ओमन किहीन कि तिरंगा यात्रा ओ क्षेत्र ले गुजरत हे, जिहां कभी नक्सल आतंक के सेती पहुंचना मुश्किल रिहीस। आज दंतेवाड़ा ले निकले ए यात्रा सुकमा अउ बीजापुर जिला के आने-आने जघा ले होके गुजरही। उहें, काली तीसर दिन तिरंगा यात्रा बीजापुर ले आवापल्ली, उसूर, गलगम, नंबी, ताड़पाला होवत कर्रेगुट्टा पहाड़ी पहुंचही, जिहां तिरंगा फहराय के संग एखर समापन होही।
स्वतंत्रता दिवस-रिहर्सल
स्वतंत्रता दिवस समारोह ले पहिली आज नई दिल्ली के लाल किला म फुल ड्रेस रिहर्सल के आयोजन करे गीस। रक्षा मंत्रालय ह सोशल मीडिया पोस्ट म किहीस कि ए रिहर्सल ले समारोह के औपचारिक वैभव, सटीकता अउ देशभक्ति के भावन प्रदर्सित होइस। ए बछर के समारोह ‘वंदे मातरम्‘ के एक सौ पचास बछर पूरा होय के उत्सव मनाही अउ एखर मुख्य थीम हवय ‘विकसित भारत दो हजार सैंतालीस के लिए युवा शक्ति‘‘।
ऐति, छत्तीसगढ़ म घलो स्वतंत्रता दिवस समारोह के तियारी अंतिम दौर म हे। आज रईपुर के पुलिस परेड मैदान म फुल ड्रेस रिहर्सल करे गीस। ए दउरान सुरक्षा व्यवस्था, परेड अउ दूसर तियारी ल आखिरी रूप दे गीस। बखत स्वतंत्रता दिवस के परेड म सत्रह ठिन टोली सामिल होवत हे। एमा बीएसएफ, सीआरपीएफ, आईटीबीपी, सीआईएसएफ, अउ एसएसबी के टुकड़ी मन सलामी दीहीं। ए बखत बिहार पुलिस के टोली घलो परेड के हिस्सा बनही। एखर अलावा छत्तीसगढ़ पुलिस के पुरूष अउ महिला टुकड़ी संग जेल पुलिस के टुकड़ी घलो परेड म सामिल होही।
स्वतंत्रता दिवस समारोह ले पहिली काली चौदह अगस्त के राज्य के आने-आने जिला म खेल अउ युवा कल्याण विभाग डहार ले स्वतंत्रता दउड़ के आयोजन करे जाही।
केन्द्रीय मंत्री-मुलाकात
केन्द्रीय आवासन अउ सहरी कार्य राज्यमंत्री तोखन साहू ह काली नई दिल्ली म केन्द्रीय गृहमंत्री अमित शाह ले भेंट करीन। ए दउरान ओमन ह अपन त्रैमासिक कार्य प्रगति रिपोर्ट ल श्री शाह ल सौंपीन अउ मंत्रालय अउ संसदीय क्षेत्र के काम के जानकारी दीन।
उहंें, छत्तीसगढ़ के आदिम जाति मंत्री रामविचार नेताम ह घलो काली नई दिल्ली म केन्द्रीय रेल मंत्री अश्विनी वैष्णव ले भंेंट करके बलरामपुर जिला मुख्यालय म रेलवे रिजर्वेशन काउंटर खोले के मांग करीन। केन्द्रीय रेल मंत्री ह एखर उपर सहमति जतावत जल्दी सुविधा ल सुरू कराय के आश्वासन दीन।
सहायक ग्रंथपाल-परिणाम
छत्तीसगढ़ लोक सेवा आयोग-सी.जी.पी.एस.सी. ह सहायक ग्रंथपाल प्रारंभिक परीक्षा-दू हजार छब्बीस के परिणाम घोषित कर दे गेहे। छत्तीसगढ़ उच्च न्यायालय के अंतर्गत सहायक ग्रंथपाल के कुल सात ठन खाली पद म भर्ती बर होय ए प्रारंभिक लिखित परीक्षा म एक सौ पन्द्रह अभ्यर्थी मन ल मुख्य परीक्षा बर पात्र पाय गेहे।
ईडी-छापा
प्रवर्तन निदेशालय-ईडी के टीम ह आज बिहनिया राजनांदगांव के कारोबारी मनीष भंसाली अउ नाहटा समूह के घर अउ कार्यालय म छापा मार कार्रवाई करे हे। रईपुर अउ भोपाल ले पहुंचे ईडी के टीम ह डीएमएफ घोटाला ले जुड़े मामला म ए कार्रवाई करे हे। टीम डहार ले दस्तावेज के जांच करे जावत हे।
अउ अब थोरकुन समाचार सार म –
– केन्द्रीय माध्यमिक सिक्षा बोर्ड-सीबीएसई ह कक्षा बारहवीं के पूरक परीक्षा परिणाम ल घोषित कर देहे। विद्यार्थी मन ह अपन रिजल्ट ल डिजीलॉकर रिजल्ट पोर्टल म देख सकत हे।
– रईपुर के सासकीय दंत चिकित्सा महाविद्यालय म ‘‘दस करोड़ नशामुक्ति प्रतिज्ञा महाभियान‘‘ के तहत विशेष जागरूकता कार्यक्रम के आयोजन करे गीस, जेमा विद्यार्थी, चिकित्सक अउ कर्मचारी मन ह नशा ले दूर रेहे के अउ समाज ल नशामुक्त बनाय म योगदान देके सपथ लीन।
– प्रदेस के आने-आने जिला ले पहुंचे अतिथि व्याख्याता मन ह काली नवा रईपुर म प्रदर्सन करीन। ए मन ह सासकीय कॉलेज म नियुक्ति अउ सेवा ले जुड़े दूसर मांग ल लेके प्रदर्सन करत रिहीन।
– रईपुर नगर निगम ह जोन क्रमांक-आठ के वार्ड क्रमांक – एक, दू अउ इक्कीस म आठ ठन व्यावसायिक परिसर ल सील कर देहे। उहें, कार्रवाई के दउरान दू लाख रूपिया ले जादा बड़े बकायादार मन ह पांच लाख चौबीस हजार रूपिया ले बकाया रासि के भुगतान कर दीन।
– कोरबा जिला के पाली थाना क्षेत्र के चैतमा तीर होय सड़क हादसा म दू झन के मउत होगे अउ तीन झन गंभीर रूप ले घायल होगे हे।
अउ
– कबीरधाम जिला म पुलिस ह गांजा तस्करी के आरोप म तीन झन ल गिरफ्तार करे हे। आरोपी मनके कब्जा ले करीबन बारह लाख रूपिया के बारह किलोग्राम ले जादा गांजा जब्त करे गेहे।