स्वतंत्रता दिवस-एट होम
छत्तीसगढ़ के समृद्ध लोक अउ जनजातीय सांस्कृतिक विरासत ल पन्द्रह अगस्त के राष्ट्रपति भवन म आयोजित होवइया स्वतंत्रता दिवस स्वागत समारोह ‘एट होम‘ म बिसेस स्थान मिलही। भारत के स्वतंत्रता के अस्सीवां वर्षगांठ के मउका म राखे गे समारोह म छत्तीसगढ़, मध्यप्रदेश, गोवा अउ महाराष्ट्र के जीवंत लोक अउ पारंपरिक कला परंपरा के माध्यम ले संस्कृति, समुदाय अउ प्रकृति के बीच गहरा संबंध ल रेखांकित करे जाही।
छत्तीसगढ़ कोति ले गेड़ी अउ गौर माड़िया नृत्य प्रमुख आकर्षण होही। छत्तीसगढ़, मध्यप्रदेश, गोवा अउ महाराष्ट्र के लगभग पैंतीस कलाकार आने-आने लोकनृत्य अउ पारंपरिक संगीत प्रस्तुति म हिस्सा लीहीं। समारोह के संगीत प्रस्तुति ल भारत के आने-आने लोक परंपरा के एक ठिन सांस्कृतिक यात्रा के रूप म तियार करे गेहे। एखर सुरूआत बस्तर के पारंपरिक अनुष्ठानिक परंपरा म आधारित मंगल धुन ले होही।
प्रधानमंत्री युवा अपील
प्रधानमंत्री नरेन्द्र मोदी ह युवा मन ले आग्रह करीन हे कि ओमन अपन प्रिय मनखे के आत्मकथा पढ़य अउ रील्स के संघरा सोशल मीडिया इन्फ्लुएंयर्स के युग म शॉटकट अपनाय ले बाचयं। ओमन विकसित भारत के मिशन ल आगू बढ़ाय बर समर्पित युवा मनके सरलग जरूरत उपर घलो बल दीन।
बस्तर तिरंगा यात्रा
उपमुख्यमंत्री विजय शर्मा अउ वन मंत्री केदार कश्यप ह आज नारायणपुर ले ‘‘बस्तर तिरंगा यात्रा‘‘ के सुरूआत करीन। ए यात्रा ल आने-आने समाज प्रमुख मन हरा झंडा दिखाके रवाना करीन। ए मउका म श्री शर्मा ह किहीन कि ए यात्रा ओ जघा मन ले होके जाही, जिहां पहिली नक्सली घटना ह लोगन मन ल प्रभावित करे रिहीस। ओमन किहीन कि यात्रा के माध्यम ले देस अउ दुनिया ल ए संदेस दे जाही कि ए क्षेत्र म अब नक्सलवाद सिरा गेहे।
उपमुख्यमंत्री ह कहिन कि जनवरी दू हजार चौबीस ले लेके अब तक बस्तर के बहुत अकन दुर्गम गंवई मन म राष्ट्रीय परब म ध्वजारोहण करे गेहे। ए स्वतंत्रता दिवस म बस्तर संभाग के नब्बे ले जादा गांव मन म आजादी के बाद पहिली घांव तिरंगा फहराय जाही।
आज पहिली दिन तिरंगा यात्रा नारायणपुर ले सुरू होके मंुजमेटा, झारागांव, धौड़ाई, कन्हारगांव, कड़ेनार, बोदली, सातधार, बारसुर होवत दंतेवाड़ा पहुंचीस। उहें, काली दूसरइया दिन यात्रा दंतेवाड़ा ले सुकमा अउ बीजापुर जिला के आने-आने नक्सल प्रभावित क्षेत्र ले होके जाही। तीसरइया अउ आखिरी दिन चौदह अगस्त के ए यात्रा बीजापुर ले आवापल्ली, उसूर, गलगम, नंबी, ताड़पाला होवत कर्रेगुट्टा पहाड़ी पहुंचही, जहां यात्रा खतम होही।
विश्व हाथी दिवस
आज विश्व हाथी दिवस हरय। ए मउका म प्रधानमंत्री नरेन्द्र मोदी ह किहीन कि हाथी भारत के पारिस्थितिक विरासत के अभिन्न हिस्सा रेहे हे। सोशल मीडिया पोस्ट म प्रधानमंत्री ह किहीन कि दुनिया के साठ प्रतिशत ले जादा जंगली एशियाई हाथी भारत म पाय जाथे। ओमन किहीन कि देस म तैंतीस ठिन एलिफेंट रिजर्व हवय, जउन हाथी मन ल सुरक्षित आवास देथे अउ ओखर के दीर्घकालिक संरक्षण के प्रयास ल मजबूत करथे।
माशिमं-फर्जी कॉल
छत्तीसगढ़ माध्यमिक सिक्षा मंडल ह बोर्ड परीक्षा परिणाम म सुधार, अंक बढ़ाय या अनुत्तीर्ण विद्यार्थी मन ल उत्तीर्ण कराय के नाव म अवइया फर्जी कॉल ले सावधान रेहे के अपील करे हे। मंडल ह केहे हे कि उत्तर पुस्तिका मनके मूल्यांकन जारी हे अउ अइसन मामला म धनराशि के मांग करइया लोगन मनके मंडल ले कोनों संबंध नइ हे। विद्यार्थी अउ अभिभावक अइसे कॉल उपर भरोसा झन करयं, कोनों तरह के लेनदेन झन करयं अउ फर्जी कॉल मिले म तुरते नजदीकी पुलिस थाना म सिकायत दरज करावयं।
हज-तिथि
हज-दू हजार सत्ताईस बर पहला किश्त जमा करे के आखिरी तारीख बढ़ा दे गेहे। छत्तीसगढ़ राज्य हज कमेटी के चेयरमैन मिर्जा एजाज बेग ह बतईन कि राज्य के चयनित आवेदक एक लाख बावन हजार तीन सौ रूपिया प्रति हाजी के पहला किश्त सत्रह अगस्त तक जमा कर सकत हे। जादा जानकारी बर रायपुर के बैरन बाजार स्थित छत्तीसगढ़ राज्य हज कमेटी के फोन नंबर – शून्य सात सात एक – चार दू छह छह छह चार छह म संपर्क करे जा सकत हे। इही बीच, हज यात्रा म जवइया हज यात्री मन ल प्रसिक्षण दे बर हज प्रसिक्षक मन ले ऑनलाइन आवेदन तेईस अगस्त तक मंगाय गेहे।
हरेली
छत्तीसगढ़ के लोक परब ‘‘हरेली‘‘ आज प्रदेसभर म पारंपरिक उछाह के संग मनाय जात हे। सावन महीना के अमावस्या म मनाय जाने वाला हरेली परब म किसान अपन कुल देवता अउ खेती म बउरे जाने वाला औजार के पूजा करीन। संघरा लइका अउ युवा मन गेड़ी चघे के आनंद लीन।
नवा रायपुर स्थित मुख्यमंत्री निवास म घलो हरेली तिहार के कार्यक्रम केे आयोजन करे गीस। ए मउका म मुख्यमंत्री विष्णुदेव साय ह भगवान शिव, गौ माता अउ कृषि औजार के पूजापाठ करके प्रदेस म अच्छा बरसा, भरपूर फसल, किसान मनके समृद्धि अउ जम्मों परिवार के सुख-खुुशहाली के कामना करीन। मुख्यमंत्री ह प्रदेसवासी मन ल हरेली तिहार के बधाई दीन।
ए मउका म मुख्यमंत्री विष्णुदेव साय अउ विधानसभा अध्यक्ष डॉक्टर रमन सिंह ह मुख्यमंत्री निवास परिसर म पारिजात के पौधा लगईन। मुख्यमंत्री ह कार्यक्रम स्थल म लगाय गे कृषि अउ दूसर विभागीय स्टॉल के अवलोकन घलो करीन। ओमन रायपुर के किसान इंद्र कुमार वर्मा ल हार्वेस्टर म मिलने वाला सब्सिडी के रूप म सोलह लाख रूपिया के चेक दीन। कार्यक्रम म लोक कलाकार मन मांदर, ढोलक अउ पारंपरिक वााद्ययंत्र के थाप के बीच छत्तीसगढ़ी गीत अउ नृत्य के प्रस्तुति दीन। उहें, ठेठरी, खुरमी, बरा समेत आने-आने छत्तीसगढ़ी व्यंजन के स्टॉल घलो लगाय गे रिहीस।प्रदेस के आने-आने जिला म घलो हरेली परब उछाह के संग मनाय जात हे।
बस्तर दशहरा
हरेली अमावस्या के मउका म पाटजात्रा पूजा विधान के संग आज ले पचहत्तर दिन तक चलइया विश्व प्रसिद्ध बस्तर दशहरा पर्व सुरू होगे हे। ए रसम के तहत बस्तर के आराध्य देवी मां दंतेश्वरी मंदिर के आगू ग्राम बिलोरी के जंगल ले लाय गे साल रूख के साखा के विधि-विधान पूर्वक पूजा-पाठ करे गीस। ए मउका म महापौर संजय पांडे, जिला पंचायत उपाध्यक्ष बलदेव मंडावी, कलेक्टर आकाश छिकारा समेत बस्तर दशहरा समिति के सदस्य, पारंपरिक मांझी-चालकी, मेम्बर-मेम्बरीन, पुजारी, पटेल, नाईक-पाईक अउ सेवादार मौजूद रिहीन।
आकाशीय बिजली-मौत
ओडिशा के सुंदरगढ़ जिला म गाज के चपेट म आय ले दू महिला मजदूर मनके मउत होगे हे। उहें, बीस झन ले जादा महिला झूलस गेहे। ए जम्मों छत्तीसगढ़ के जशपुर जिला के रहवासी हरय।
मिले जानकारी के अनुसार जशपुर जिला के तुमला थाना क्षेत्र के बरडीह समेत तीर-तखार के गांव मन ले महिला मजदूर धान के रोपाई बर ओडिशा गे रिहीन। जब ए मन तलसरा थाना क्षेत्र के बालिशंकरा स्थित भाटीपाड़ा के खेत म धान के रोपाई करत रिहीन। इही दउरान अचानक मौसम बदल गे अउ गरज-चमक के संग खेत म गाज गिर गे, जेखर चपेट म आय ले दू महिला मनके मउत होगे। उहें, बीस ले जादा महिला झूलस गेहे। जेमा ले कुछ के हालत गंभीर बने हुए हे। जम्मों झन ल उपचार बर सबडेगा सामुदायिक स्वास्थ्य केन्द्र म भर्ती कराय गेहे।
ईएसआईसी अस्पताल
बिलासपुर जिला के ग्राम रहंगी, बिल्हा म सौ बिस्तर वाला कर्मचारी राज्य बीमा निगम-ई.एस.आई.सी. अस्पताल के स्थापना बर पांच एकड़ भूमि ल मंजूरी मिले गेहे। ए ह सौ करोड़ रूपिया ले जादा के स्वास्थ्य परियोजना हे। अस्पताल बने ले बिलासपुर अउ तीर-तखार के क्षेत्र ल ई.एस.आई.सी. ले जुड़े पंजीकृत श्रमिक अउ ओमन के परिवार ल बेहतर अउ अच्छा स्वास्थ्य सुविधा मिल सकही।
ईडी-रिमांड
पहिली ले जेल म बंद कांग्रेस के पूर्व कोषाध्यक्ष रामगोपाल अग्रवाल ल प्रवर्तन निदेशालय-ईडी ह सराब घोटाला म गिरफ्तार करके कड़ा-सुरक्षा व्यवस्था के बीच रायपुर कोर्ट म पेस करीस, जिहां ले ओमन ल पांच दिन के कस्टोडियल रिमांड म भेज दे गेहे। अब ईडी अवइया पांच दिन तक उंखर ले सराब घोटाला अउ ओखर ले जुड़े मनी लॉड्रिंग मामला म पूछताछ करही।