प्रधानमंत्री-हर घर तिरंगा
प्रधानमंत्री नरेन्द्र मोदी ह लोगन ले स्वतंत्रता दिवस ल गर्व के संग मनाय के, स्वतत्रंता सेनानी मनके सम्मान करे के अउ विकसित भारत के संकल्प के संग हर घर तिरंगा फहराय के आह्वान करीन हे।
स्वतंत्रता दिवस-युवा शक्ति
ए बछर अस्सीवां स्वतंत्रता दिवस समारोह म ‘युवा शक्ति अउ दू हजार सैंतालीस तक विकसित भारत के निर्माण म देस के युवा शक्ति के योगदान ल महत्व दे जाही। एखर संग राष्ट्रीय गीत ‘वंदे मातरम‘ के एक सौ पचास बछर पूरा होय म उत्सव घलो मनाय जाही।
रक्षा सचिव राजेश कुमार सिंह ह नई दिल्ली म संवाददाता मन ले बातचीत म किहीन कि स्वतंत्रता दिवस समारोह के अगुवई प्रधानमंत्री नरेन्द्र मोदी ह ऐतिहासिक लालकिला ले करही। प्रधानमंत्री राष्ट्रीय ध्वज फहराही अउ राष्ट्र ल संबोधित करही। ए बछर के समारोह के प्रमुख आकर्षण ‘वंदे मातरम‘ के एक सौ पचास बछर पूरा होय के उत्सव होही। पहिली घांव स्वतंत्रता दिवस समारोह के दउरान लाल किला के प्राचीर ले राष्ट्रीय गीत ‘वंदे मातरम‘ के सामूहिक गान होही। समारोह के दूसर प्रमुख थीम ‘‘युवा शक्ति-विकसित भारत – दो हजार सैंतालीस‘ की यात्रा का नेतृत्व‘ हवय।
हर घर तिरंगा
हर घर तिरंगा यात्रा के तहत प्रदेसभर म तिरंगा यात्रा निकाले जावत हे। इही कड़ी म आज कांकेर जिला म उपमुख्यमंत्री अरूण साव के अगुवई म तिरंगा यात्रा निकाले गीस। सासकीय नरहरदेव उत्कृष्ट अंग्रेजी माध्यम विद्यालय ले सुरू होय तिरंगा यात्रा आने-आने रद्दा ले होवत मिनी स्टेडियम परिसर म संपन्न होइस। ए यात्रा म जनप्रतिनिधि, पूर्व सैनिक, विद्यार्थी, अधिकारी-कर्मचारी, आम नागरिक अउ स्वयंसेवी संगठन के पदाधिकारी मन सामिल होइन। यात्रा के सुरूआत राष्ट्रगीत वंदे मातरम ले करे गीस। तिरंगा यात्रा म सामिल विद्यार्थी मन ह बयानवे फीट लंबा अउ पांच फीट चौड़ा तिरंगा ध्वज के प्रदर्शन करीन।
उहें, बिलासपुर के बहतराई के खेलो इंडिया स्टेट सेंटर ऑफ एक्सीलेंस म घलो तिरंगा यात्रा के आयोजन करे गीस। ए यात्रा म खिलाड़ी, अधिकारी अउ कर्मचारी मन ह बड़ उछाह के संग भाग लीन।
हर घर तिरंगा यात्रा के तहत जगदलपुर म घलो तिरंगा यात्रा निकाले गीस। यात्रा के दउरान प्रतिभागी मन ह देशभक्ति के नारा के संग लोगन ल राष्ट्र के एकता, अखंडता अउ गौरव के प्रतीक तिरंगा ल हर घर म सम्मानपूर्वक फहराय के संदेस दीन।
बस्तर तिरंगा यात्रा
‘‘हर घर तिरंगा‘‘ अभियान के तहत बस्तर संभाग म काली बारह अगस्त ले ‘‘बस्तर तिरंगा यात्रा‘‘ के सुरूआत होही। उपमुख्यमंत्री अउ गृहमंत्री विजय शर्मा ह आज रायपुर म पत्रकार मन ले गोठबात करत किहीन कि ए तिरंगा यात्रा बस्तर के अति-संवेदनशील अउ माओवाद प्रभावित इलाका ले होके गुजरही। बस्तर संभाग के नब्बे ले जादा गांव मन म आजादी के बाद पहिली घांव ए स्वतंत्रता दिवस म तिरंगा फहराय जाही। यात्रा के दउरान उपमुख्यमंत्री इकतीस ठन जघा म जाही, जिहां माओवादी मन ह बड़े घटना ल अंजाम दे रिहीन।
तिरंगा यात्रा काली बारह अगस्त के नारायणपुर ले निकल के दंतेवाड़ा जाही। तेरह अगस्त के दंतेवाड़ा ले बीजापुर जाही। उहें, चौदह अगस्त के ए यात्रा बीजापुर ले निकल के आवापल्ली, उसूर, कलगम, ताड़पाला होवत कुर्रेगुटालू पहाड़ी पहुंचही, जिहां ए यात्रा के समापन होही।
उपमुख्यमंत्री ह घोषणा करीन कि यात्रा के दउरान जउन-जउन जघा म जवान मन अउ स्थानीय नागरिक मन सहीद होय के उहां के पवित्र माटी ल सकेले जाही अउ ए माटी के उपयोग रईपुर म बनइया सहीद स्मारक म करे जाही।
वंदेमातरम्
राष्ट्रीय गीत ‘वंदे मातरम्‘ के एक सौ पचास बछर पूरा होय के मउका म प्रदेसभर म कतकोन कार्यक्रम कराय जावत हे। बीजापुर के केन्द्रीय विद्यालय अउ गंुजेपरती प्राथमिक स्कूल म घलो ‘वंदे मातरम्‘ कार्यक्रम कराय गीस, जेखर सुरूआत ‘वंदे मातरम्‘ अउ देसभक्ति गीत के सामूहिक गायन ले होइस। ए दउरान केन्द्रीय रिजर्व पुलिस बल-सीआरपीएफ के दू सौ उनतीसवां वाहिनी के जवान मन ह विद्यार्थी मन ल संवाद करीन। कार्यक्रम के बाद स्कूल म पौधा लगाय गीस।
परीक्षा तिथि-बदलाव
मुख्यमंत्री विष्णुदेव साय के निरदेस म सूबेदार, उप निरीक्षक संवर्ग अउ प्लाटून कमांडर मुख्य परीक्षा-दू हजार चौबीस के तिथि म बदलाव करे गेहे। सिक्षक भर्ती परीक्षा अउ पुलिस भर्ती मुख्य परीक्षा के तारीख एक संघरा होय ले अभ्यर्थी मन ल परेसानी होवत रिहीस। छत्तीसगढ़ लोक सेवा आयोग ह अब ए मुख्य परीक्षा ल दू, तीन अउ चार नवंबर के कराय के फइसला ले हवय।
मुख्यमंत्री ह किहीन हे कि परीक्षा के तारीख संघराय ले कोनों भी पात्र युवा ल अवसर ले वंचित नइ होना चाही।
मुख्य सचिव-बैठक
मुख्य सचिव विकासशील ह राज्य सासन के सबो विभाग के भार साधक सचिव मनके बइठका लेके विभाग के काम अउ योजना के समीक्षा करीन। मुख्य सचिव ह किहीन कि सेवा निवृत्त अधिकारी-कर्मचारी मनके कतकोन मामला के निपटारा उंखर रिटायर होय के पहिलीच तैयार कर ले जाय।
पुलिस महानिदेशक-ताड़पाला
तेलंगाना के पुलिस महानिदेशक सी.वी. आनंद ह बीजापुर-तेलंगाना सीमा ले लगे ताड़पाला के एफओबी के दउरा करके सुरक्षा व्यवस्था, क्षेत्र के वर्तमान परिस्थिति अउ नक्सल विरोधी अभियान के जानकारी लीन।
हरेली-बस्तर दशहरा
छत्तीसगढ़ के सभ्यता अउ लोक संस्कृति म केन्द्रित लोक पर्व ‘‘हरेली‘‘ काली प्रदेसभर म मनाय जाही। इही दिन किसान मन ह पशुधन के संगेच खेती म उपयोग होवइया औजार के पूजा करथे। हरेली परब के मउका म काली बिहनिया दस बजे ले नवा रईपुर के मुख्यमंत्री निवास म विशेष कार्यक्रम के आयोजन करे जाही।
हरेली पर्व के मउका म काली गौरेला-पेण्ड्रा-मरवाही जिला म पौधारोपण अभियान चलाय जाही। अभियान म नदी, अमृत सरोवर, तालाब के तीर अउ ग्राम पंचायत, नगरीय निकाय, सरकारी स्कूल, आंगनबाड़ी केन्द्र, गौठान, प्रधानमंत्री आवास परिसर अउ दूसर सरकारी जघा म पौधा लगाय जाही।
हरेली अमावस्या के संगेच काली ले पचहत्तर दिन के विश्व प्रसिद्ध बस्तर दशहरा के घलो सुरूआत हो जही। काली पहिली दिन पाटजात्रा पूजा विधान होही। ए दउरान पारंपरिक मांझी-चालकी, पुजारी, सेवादार मन ह ठुरलू खोटला रस्म अदा करही।
एन.एस.पी.-छात्रवृत्ति
केन्द्रीय कृषि मंत्री शिवराज सिंह चौहान ह नई दिल्ली म काली राष्ट्रीय छात्रवृत्ति पोर्टल – एन.एस.पी. के माध्यम ले पूरा देस के कृषि विद्यार्थी मन बर छात्रवृत्ति अउ फेलोशिप जारी करीन। एमा छह हजार ले जादा विद्यार्थी मन ल प्रत्यक्ष लाभ अंतरण – डी.बी.टी. के माध्यम ले इक्कीस करोड़ रूपिया ले जादा के रासि दे गे हवय। ए पहल ले, कृषि विद्यार्थी मन ल अब हर महीना डीबीटी के माध्यम ले छात्रवृत्ति मिलही।
वार्तालाप-कार्यशाला
भारत सरकार के सूचना अउ प्रसारण मंत्रालय के पत्र सूचना कार्यालय पीआईबी रायपुर डहार ले मनेन्द्रगढ़ म मीडिया कार्यशाला-सह-संवाद कार्यक्रम ‘वार्तालाप‘ के आयोजन करे गीस। कार्यशाला म वरिष्ठ पत्रकार मधुकर द्विवेदी ह किहीन कि मीडिया ल नसा ले जुड़े कुरीति अउ गलत गतिविधि ल उजागर करे के संगेच युवा मनके आगू सकारात्मक विकल्प, प्रेरणादायक उदाहरण अउ सही दिसा प्रस्तुत करना चाही। ए कार्यशाला के विषय रिहीस – ‘‘ नशा मुक्त युवा फॉर विकसित भारत संकल्प अभियान‘‘।
जेम सस्टेनेबल प्रोक्योरमेंट अवॉर्ड
छत्तीसगढ़ ल गवर्नमेंट ई-मार्केटप्लेस के दसवां स्थापना दिवस समारोह म ‘जेम सस्टेनेबल प्रोक्योमेंट अवॉर्ड‘ ले सम्मानित करे गहे। नई दिल्ली म राखे गे समारोह म केन्द्रीय वाणिज्य अउ उद्योग मंत्री पीयूष गोयल के मौजदूगी म छत्तीसगढ़ ल ए पुरस्कार जेम के प्रभावी उपयोग अउ एखर माध्यम ले सरकारी खरीदी के कीमत अउ मात्रा म बढ़ोतरी बर दे गे हवय। जेम प्लेटफॉर्म म पारदर्सी निविदा प्रक्रिया के सेती वित्तीय बछर दू हजार पच्चीस-छब्बीस म छत्तीसगढ़ सरकार के एक सौ तीस करोड़ रूपिया के बचत होय हे।