आज दिनभर के खबर ल अपन गुरतुर छत्तीसगढ़ी भाखा म पढ़व

केंद्रीय स्वास्थ्य मंत्रालय ह अवइया तिहार म कोविड महामारी के रोकथाम के उपाय बर मानक संचालन प्रक्रिया जारी कर देहे। देशभर म अक्टूबर ले दिसंबर तक कतकोन तिहार मनाये जाथे। ये मउका म लोगन मन सामूहिक पूजापाठ, मेला, रैली, प्रदर्शनी अउ सांस्कृतिक कार्यक्रम करथे। केंद्रीय स्वास्थ्य मंत्रालय ह केहे हे कि कोविड महामारी के संक्रमण ल रोके बर अइसन कार्यक्रम म पैंसठ बछर ले जादा के सियान, रोगी, गर्भवती माइलेागिन अउ दस साल के कमती उमर के लइका मन ल भीड़भाड़ ले दूरिहा रेहे के सलाह दे गेहे।
संगेसंग रैली अउ विसर्जन समारोह के बेरा तय संख्या म लोगन मन रहय अउ एक दूसर ले सुरक्षित दूरी राखे के संगेसंग मास्क पहिने बर केहे गेहे। दिशा निर्देश के मुताबिक सिरिफ कंटेनमेंट जोन के बाहिर उत्सव मनाये के मंजूरी होही। कंटेनमेंट जोन म रहइया लोगन मन अपन घर भीतरी रहिके तिहार मनाही। लोगन मन ल सलाह दे गेहे कि एक दूसर ले कम ले कम छै फुट के दूरी बनाय रखय।

छत्तीसगढ़ म कोरोना संक्रमण ल देखत अवइया जम्मों तिहार बर राज्य सरकार ह विशेष दिशा निर्देश जारी करे हे । एखर बर जम्मों जिला कलेक्टर मन ल उंहा के स्थिति ल देखत काम करे बर केहे गेहे। रायपुर जिला बर जारी निर्देश म कलेक्टर डॅाक्टर एस. भारतीदासन ह कीहिन कि नवरात्र परब के बेरा मंदिर म जोत जलाय के मंजूरी कुछएक शरत संग दे जाही। एमा मंदिर भीतरी तय जगा म जात जलाय जाही। फेर जोत दर्शन बर श्रद्धालु मन मंदिर भीतरी नइ जा सकय। कलेक्टर ह यहू कीहिन कि प्रशासन कोति ले देगे निर्देश के पालन जउन मंदिर नइ करही, वो मंदिर प्रबंधन के खिलाफ कार्रवाई करे जाही।
इही बीच नवरात्र परब ल लेके बिलासपुर जिला कलेक्टर सारांश मित्तर ह मंदिर ट्रस्ट अउ नगर के प्रमुख लोगन के बइठका लीन। बइठका म ये फैसला ले गीस कि ये सो रतनपुर महामाया मंदिर म भक्त मन माता के सोझे दर्शन नइ कर सकय, उंखर बर वर्चुअल दर्शन के बेवस्था कराय जाही।

केंद्रीय स्वास्थ्य मंत्री डॅाक्टर हर्षवर्धन ह कोविड महामारी के प्रबंधन बर आज आयुर्वेद अउ योग म आधारित राष्ट्रीय नैदानिक प्रबंधन प्रोटोकाल जारी करे हे। ओमन केहे हे कि रोकथाम अउ उपचार बर ये दिशा निर्देश कोरोना के संगेसंग कतकोन स्वास्थ्य समस्या के समाधान बर जरूरी हे। श्री हर्षवर्धन ह आयुर्वेद के महत्ता ल बतात कीहिन कि ये भारत के ही नही भलुक विश्व के सबले प्राचीन ज्ञान हे।
प्रधानमंत्री नरेंद्र मोदी ह अपन ट्वीट म कीहिन कि कोरोना के प्रबंधन आयुर्वेद अउ योग म आधारित राष्ट्रीय नैदानिक प्रबंधन प्रोटोकाल बने परयास हवय। ओमन यहू कीहिन कि ये प्रोटोकाल म शरीर के रोग प्रतिरोधक क्षमता बढ़ाय बर केहे गेहे।

केंद्रीय वित्तमंत्री निर्मला सीतारमन ह कीहिन हे कि केंद्र सरकार कोति ले संसद म पारित कराय गे किसानी ले जुड़े तीन ठिन नवा कानून ले किसान अपन उपज म लगे बिक्री संबंधी रोक ले छूट जाही। ये तीनो कानून बनाय के पहिली कृषि विशेषज्ञ किसान अउ खेती ले जुड़ें आने लोगन संग गोठबात करे गेहे।
वित्तमंत्री ह कीहिन कि किसान मन अपन उपज ल कहूं भी अउ कोनो भी व्यापारी ल बेचे के मंजूरी मिले के बादो न्यूनतम समर्थन मूल्य प्रणाली जारी राखे जाही। ओमन कीहिन कि न्यूनतम समर्थन मूल्य म बीस ले जादा कृषि उत्पाद शामिल रीहिस फेर एखर घोषणा गहूं अउ धान जइसन उत्पाद बर करे जात रीहिस। जेखर ले किसान मन तिलहन अउ दलहन के जगा धान अउ गहूं जादा बोवयं। जेखर ले देश ल तिलहन के आयात करे बर पड़त रीहिस।

कोरोना संक्रमण के कड़ी ल तोड़े खातिर छत्तीसगढ़ के कतकेान जिला म जागरूकता अभियान शुरू करे गेहे। एमा लोगन ले कोरोना संक्रमण ले बचाव बर जरूरी सावधानी राखे के अपील करे जात हे।
छत्तीसगढ़ के महासमुंद जिला म लाउड स्पीकर ले शहर अउ गांव के गली गली म जाके लोगन ल मास्क लगाय, दू गज के दूरी बनाय राखे अउ घेरी बेराी हाथ धोय बर पे्ररित करे जात हे। ये संदेश हिंदी के संगेसंग छत्तीसगढ़ी म घलो सुनाय जात हे।

धरसा विकास योजना

प्रदेस म खेत-खलिहान के बीच धरसा रद्दा ल पक्का रद्दा म बदले खातिर धरसा विकास योजना शुरू करे गेहे। मुख्यमंत्री भूपेश बघेल ह काली स्वामी आत्मानंद के जयंती म घोषणा करे रीहिन । ये योजना ल पूरा करे खातिर राज्य सरकार ह आज तीन विभाग के सचिव के एक समिति बनाय हे। पंचायत अउ ग्रामीण विकास विभाग के प्रमुख सचिव के संग लोक निर्माण अउ राजस्व आपदा प्रबंधन के सचिव ल ये समिति के सदस्य बनाय गेहे।
ये समिति योजना ल लागू करे बर एक हप्ता के भीतरी शासन ल प्रतिवेदन दीही। समिति के पहिली बइठका नौ अक्टूबर के होही।

प्रदेस म किसान मनके आने आने मंाग ल लेके भाजपा ह आज जम्मों विकासखंड म धरना प्रदर्शन करीन। रायपुर म होय प्रदर्शन म प्रदेश भाजपा         अध्यक्ष विष्णुदेव साय, रायपुर के लोकसभा सांसद सुनील सोनी, पार्टी विधायक बृजमोहन अग्रवाल, अजय चंद्राकर, पूर्व विधायक राजेश मूणत समेत बड़का नेता सामिल होइन।
ओति बिल्हा विकासखंड के धरना प्रदर्शन म नेता प्रतिपक्ष धरमलाल कौशिक संघरीन। प्रदर्शन के बेरा कार्यकर्ता मन संग बोलत पार्टी नेता मन कीहिन कि राज्य सरकार ह किसान मनले जउन वादा करे रीहिन ओला अभी तक पूरा नइ करे गेहे। एखर सेती प्रदेश के किसान मन दुखी अउ परसान हे ।
दुर्ग जिला के मचांदूर म पाछू दिन एक किसान के आत्महत्या बर भाजपा नेता मन ह राज्य सरकार ल जिम्मेवार बताइन हे।

पचहत्तर दिन तक चलइया विश्व प्रसिद्ध बस्तर दशहरा बर रथ बनाये के काम शुरू होगे हे। एखर बर झार उमरगांव अउ बेड़ा उमरगांव ले करीबन सौ झिन कारीगर मन ल बलाय गेहे अउ लकड़ी घलो मंगाय गेहे।
खबर के मुताबिक एसो कोरोना संक्रमण के सेती बस्तर दशहरा म श्रद्धालु मनके सुरक्षा ल देखत थोरिक फेरबदल करे गेहे। एमा ए बछर आठ चक्का के रथ बनाय जाही जउन आने बछर ले छोटे रथ होही। बस्तर दशहरा म अवइया सोला अक्टूबर के काछनगुड़ी म पूजा पाठ संग कलश स्थापना,  करे जाही। इही दिन जोगी बिठाई, अउ रथ परिक्रमा, होही। एखर बाद अइवया बाकी दिन न बाकी रसम करे जाही। उंहें इकतीस अक्टूबर के बस्तर दशहरा के आखरी कार्यक्रम होही, जेमा मावली माता अउ दंतेवाड़ा ले आये देवी के बिदाई के रसम होही।

अब पेस हे मौसम के हाल-
अवइया चैबीस घंटा म प्रदेश के आने आने जगा म छींटा बौछार होय के संभावना हावय। मौसम विभाग के मुताबिक तटीय आंध्रप्रदेश के उपर एक चक्रीय चक्रवाती घेरा बने हे। उंहें आंध्रप्रदेश ले लेके ओडिशा हेात पश्चिम बंगाल तक एक द्रोणिका बने हे। जेखर परभाव ले प्रदेश म कतकोन जगा म हल्का ले मध्यम बरसा अउ गरज चमक संग छींटा बौछार होय के संभावना हवय।
उंहें दक्षिण अउ मध्य छत्तीसगढ़ के एक दू जगा म गाज गिरे के चेतावनी दे गेहे।
एति राजनांदगंाव जिला के बमनी भाटागांव म गाज गिरे ले उनचालीस झिन मवेशी के मउत होगे अउ कोरिया जिला के बैकुण्ठपुर म काली तेज बरसा ले कतकोन किसान मनके फसल ल नकसान पहुंचे हे।