हर घर तिरंगा-अभियान
हर घर तिरंगा अभियान म आज रईपुर म प्रदेस स्तरीय तिरंगा यात्रा राखे गीस। सरदार बलबीर सिंह जुनेजा इंडोर स्टेडियम ले सुभाष स्टेडियम तक निकले ए यात्रा म मुख्यमंत्री विष्णुदेव साय, उपमुख्यमंत्री अरूण साव अउ उपमुख्यमंत्री विजय शर्मा, मंत्रिमंडल के सदस्य सांसद विधायक, संासद विधायक जनप्रतिनिधि अउ आम लोगन संघरीन। ए बेरा म मुख्यमंत्री ह किहीन कि प्रधानमंत्री के आह्वान म देसभर म हर घर तिरंगा, घर घर तिरंगा अभियान चलाय जात हे। एखर उद्देस्य अवइया पीढ़ी ल स्वतंत्रता अउ राष्टध्वज के महत्ता बताना हे। मुख्यमंत्री ह प्रदेसवासी मनले अपन घर म तिरंगा फहराय के आह्वान करत किहीन कि ए दिन हमर वीर सहीद मन ल सुरता करे के दिन हे।
तिरंगा यात्रा के दउरान हाथ म राष्ट्रध्वज लेके बड़ संख्या म लोगन मन भारत माता की जय अउ वंदे मातरम् के नारा लगइन। ए यात्रा म युवा अउ स्कूल पढ़इया लइका मन ह उछाह के संग भाग लीन।
महिला जनप्रतिनिधि-नियुक्त
राज्य के कोनो भी नगरीय निकाय म अब निर्वाचित महिला जनप्रतिनिधि के पति, पुत्र-पुत्री, भाई-बहिनी या कोनो तीर के पारिवारिक सदस्य नातेदार ल उंखर परोक्ष प्रतिनिधि के रूप म नियुक्त नइ करे जाही। राज्य सरकार ह छत्तीसगढ़ नगर पालिका निगम अधिनियम उन्नीस सौ छप्पन अउ उन्नीस सौ इकसठ कोति ले देगे सक्ति के प्रयोग करत बछर दू हजार बाईस के अधिनियम म संसोधन कर देहे। ए संबंध म नगरीय प्रशासन विभाग कोति ले राजपत्र म अधिसूचना जारी कर दे गेहे। राजपत्र म प्रकासन के संगेसंग ए प्रतिबंध जम्मो नगरीय निकाय मन म लागू हो गेहे।
बाढ़ आपदा-बैठक
प्रदेस म संभावित बाढ़ आपदा ले निपटे के तियारी ल परखे खातिर अवइया बीस तारीख के मॉकड्रिल राखे जाही। उहें, अट्ठारा अगस्त के राज्य स्तरीय टेबल टॉप एक्सरसाइज होही। आज राष्ट्रीय आपदा प्रबंधन प्राधिकरण के उच्च स्तरीय बइठका म ए फइसला ले गीस। राजस्व अउ आपदा प्रबंधन विभाग के सचिव शम्मी आबिदी ह जिला आपदा प्रबंधन प्राधिकरण के अधिकारी मन ल टेबलटॉप एक्सरसाइज अउ आपदा प्रबंधन ल बने ढंग ले चलाय बर ओला समझे के निरदेस दीन। बइठका म बाढ़ के स्थिति होय म आने-आने विभाग संग बने तालमेल के संग राहत अउ बचाव काम के तियारी के समीक्षा करे गीस। बइठका म प्रदेस के सबो जिला के नोडल अधिकारी ऑनलाइन जुड़िन।
महिला बाल विकास मंत्री-निर्देश
महिला बाल विकास अउ समाज कल्याण मंत्री लक्ष्मी राजवाड़े ह विभाग ले रिटायर होवइया अधिकारी अउ करमचारी मनके प्रकरण के समय राहत निराकरण करे के निरदेस दीन हे। ओमन किहीन कि रिटायर होय के दिन म ही संबंधित करमचारी मन ल पेंसन ग्रेज्युटी छुट्टी के पइसा अउ आने सबो भुगतान होना चाही। मंत्री ह विभाग के संचालक अउ प्रमुख सचिव ल सेवा निवृत्ति प्रकरण के पहिलीच ले तियारी सुनिश्चित करे के निरदेस दीन। ओमन किहीन कि सेवा सत्यापन अनापत्ति प्रमाण पत्र समेत आने दस्तावेज के काम बेरा म पूरा करे जाय।
मुख्य सचिव-पोषण
मुख्य सचिव विकाससील ह आज मंत्रालय म लइका मन के स्वास्थ्य अउ पोषण कारीकरम ल लेके यूनिसेफ अउ आने-आने विभाग के अधिकारी मनके संयुक्त बइठका लीन। बइठका म लइका मनके पोषणा, स्वास्थ्य, शिक्षा, पिये के पानी अउ स्वच्छता सेवा ल बने प्रभावी बनाय उपर गोठबात होइस।
उहें, कुपोषण एनीमिया, मातृ अउ शिशु स्वास्थ्य जइसन मुद्दा के समीक्षा करे गीस। मुख्य सचिव ह लइका मन बर जरूरी पोषक तत्व, विटामिन अउ आयरन के उपलब्धता सुनिश्चित करे के निरदेस दीन। बइठका म टेक होम रासन के गुणवत्ता सुधारे, लइका मन ल पुष्टई जिनिस देवाय अउ ग्राम पंचायत स्तर म अनाज बैंक के अवधारना उपर गोठबात होइस हे।
कृमि मुक्ति दिवस
राष्ट्रीय कृमि मुक्ति दिवस के मउका म आज प्रदेस म उन्नीस बछर तक के लइका अउ किशोर-किशोरी मन ल एल्बेंडाजोल के दवई खवाय गीस। एखर बर सरकारी अउ प्राइवेट स्कूल, आंगनबाड़ी केंद्र अउ आने संस्थान ले दवा खवाय के बेवस्था कराय गे रिहीस। कहू कोनो लइका आज दवई खाय ले चुक गेहे, त ओला मॉप-अप दिवस माने सत्रह अगस्त के कृमि नासक दवई दे जाही। ए अभियान म प्रदेस म एक करोड़ दस लाख लइका अउ किशोर मन ल एल्बेंडाजोल के खुराक दे के लक्ष्य राखे गेहे।
स्वतंत्रता दिवस-समारोह
छत्तीसगढ़ म स्वतंत्रता दिवस के मुख्य समारोह के तियारी सुरू हो गेहे। मुख्य मंत्री विष्णुदेव साय पंद्रह अगस्त के राजधानी रईपुर के पुलिस मैदान म राखे गे राज्य स्तरीय समारोह म झंडा फहरा के परेड के सलामी लिही। बिलासपुर म केंद्रीय राज्य मंत्री तोखन साहू, दुरूग म उपमुख्यमंत्री अरूण साव अउ बस्तर म उपमुख्यमंत्री विजय शर्मा झंडा फहराही। विधानसभा अध्यक्ष डॉ. रमन सिंह राजनांदगांव म ध्वजारोहन करही। प्रदेस के आने जिला मुख्यालय मन म मंत्री सांसद, विधायक स्वतंत्रता दिवस समारोह म ध्वजारोहन करही। उहें, सबो माईपहुना ए बेरा म मुख्यमंत्री के संदेस पढ़ही।
तीजन बाई-लोकसंगीत
नई दिल्ली के इंडिया हैबिटेट सेंटर म आज पद्म विभूषित छत्तीसगढ़ के जानेमाने पंडवानी गायिका स्वर्गीय तीजन बाई के सुरता म आईएचसी लोक संगीत सम्मेलन के सुभारंभ होइस। ए मउका म पंडवानी कलाकार प्रभा यादव ह पंडवानी के प्रस्तुति दीन। कारीकरम म पंडवानी ल राष्ट्रीय अउ अंतरराष्ट्रीय मंच तक पहुंचाय म तीजन बाई के योगदान ल सुरता करे गीस। ए मउका म मुख्यमंत्री के सलाहकार आर. कृष्णदास धरसींवा विधायक अनूज शर्मा, इंडिया हैबिटेट सेंटर के निर्देशक प्रोफेसर डॉ. के.जी. सुरेश मौजूद रिहीन।
डिप्लोमा पाठ्यक्रम-अवधि
तकनीकी शिक्षा विभाग ह वर्तमान सत्र के डिप्लोमा पाठ्यक्रम म भर्ती बर पंजीयन के आखिरी तारीख ग्यारा अगस्त संझा छै बजे तक बढ़ा दे हे। ए सुविधा डिप्लोमा इंजीनियरिंग आर्किटेक्चर सी डी डी एम/आई डी एम ओ एम /एच एम सी टी अउ डिप्लोमा इंजीनियरिंग लेटरल एंट्री समेत सबो चार पाठ्यक्रम बर लागू होही। आईटीआई के नतीजा घोसित होय के बाद पास होय उम्मीदवार मन ल डिप्लोमा पाठ्यक्रम म संघरे के मउका देबर ए बेरा ल बढ़ाय गेहे।
सावन सोमवार
आज सावन के दूसर सम्मार हे। ए मउका म राजधानी रईपुर समेत प्रदेसभर के शिव मंदिर म भक्त मन के भीड़ उमड़े हे श्रध्दालू भिंसरहाच ले भगवान भोलेनाथ के जलाभिषेक करके पूजापाठ करत हे। मंदिर के तीर-तखार म नरियर, फूल पान, बेल पत्र के दुकान सजे हे। उहें, बुढ़ेश्वर, हटकेश्वर महादेव समेत आने शिव मंदिर म सुग्घर सजावट करे गेहे। भक्त मनके कतार सबो मंदिर म देखे जा सकत हे। जिंहा लोगन मानता मानत हे। ऐति, कांवड़िया मन पवित्र जल लेके भगवान भोलेनाथ के अभिषेक खातिर मंदिर पहुंचत हे।
अउ अब जानन मौसम के हाल…
मौसम विभाग ह अवइया चैबीस घंटा के दउरान प्रदेस के सूरजपुर अउ बलरामपुर जिला म बारिस के आरेंज अलर्ट जारी करे हे। ए जिला के कुछेक जघा म भारी बरसा हो सकत हे। उहें, मनेन्द्रगढ़-चिरमिरी-भरतपुर, जशपुर, कोरिया, कोरबा, सरगुजा, बस्तर अउ बीजापुर समेत ग्यारा ठिन जिला म यलो अलर्ट जारी होय हे। प्रदेस के बांकी जिला मन म हल्का ले मध्यम बरसा हो सकत हे।
इही बीच, सरलग बरसा के सेति मुंगेली जिला म मनियारी अउ आगर नदिया उफान म हवय, जेखर ले जिला के उन्नीस ठन गंाव के संपर्क रद्दा टूट गेहे। एसडीआरएफ ह राहत अउ बचाव काम चलाके बाढ़ म फंसे करीबन दू सौ लोगन ल सुरक्षित राहत सिविर तक पहुंचाय हे।
बैडमिंटन प्रतियोगिता
राजनांदगांव के दिग्विजय स्टेडियम म पचीसवां छत्तीसगढ़ स्टेट जूनियर रैंकिंग बैडमिंटन प्रतियोगिता सुरू हो गेहे। एखर सुभारंभ विधानसभा अध्यक्ष डॉ. रमन सिंह अउ उपमुख्यमंत्री अरूण साव ह करीन। ए प्रतियोगिता तेरह अगस्त तक चलही, जेमा अंडर नाइंनटीन बालक अउ बालिका वरग के खिलाड़ी भाग लेवत हे।