विश्व आदिवासी दिवस
आज विश्व आदिवासी दिवस हरय। ए मउका म राजधानी रईपुर समेत प्रदेसभर म आने-आने कारीकरम आयोजित करे जात हे। उहें, आने-आने जिला मन म जागरूकता रैली घलो निकाले गीस।
विश्व आदिवासी दिवस के मउका म गौरेला-पेंड्रा-मरवाही जिला के गौरेला स्थित लाइवलीहुड कॉलेज म बैगा आदिवासी युवा मन बर मोटर ड्राइविंग प्रसिक्षण के सुभारंभ करे गीस। कारीकरम के उद्देस्य बैगा समुदाय के युवा मन ल कौसल प्रसिक्षण देके रोजगार ले जोड़ना अउ ओमन ल आत्मनिर्भर बनाना हे।
आज पेंड्रा म ही आदिवासी समाज डहार ले एक ठिन रैली निकाले गीस। एमा आदिवासी समाज के लोगन मन उछाह के संग सामिल होइन।
उहें, सारंगढ़-बिलाईगढ़ जिला म घलो अइसने रैली निकाले गीस। ए रैली म आने-आने आदिवासी समुदाय के लोगन मन पारंपरिक वेसभूषा म ढोल-नगाड़ा के थाप अउ लोकगीत के संग अपन संस्कृति अउ परंपरा के झलक दिखाइन।
हर घर तिरंगा
देसभर म आज ले हर घर तिरंगा अभियान सुरू हो गेहे। सत्रह अगस्त तक चलइया ए अभियान के उद्देस्य लोगन मन ल अपन घर म तिरंगा फहराय अउ देस भक्ति के संघरा राष्ट्रीय एकता ले जुड़े कारीकरम म भाग लेबर प्रोत्साहित करना हे। ए बछर अभियान के बिसेस महत्व हे, काबर कि एहा राष्ट्रीय गीत वंदे मातरम के एक सौ पचासवंा वर्षगांठ के संग मनाय जात हे। देसभर म वंदे मातरम के सामूहिक गायन घलो होही। चैदह अगस्त के विभाजन विभीषिका स्मृति दिवस मनाय जाही।
ऐति, छत्तीसगढ़ म आज ले सत्रह अगस्त तक हर घर तिरंगा अभियान चलाय जात हे। उहें, भारतीय जनता पार्टी डहार ले प्रदेस म दस ले चैदह अगस्त तक भव्य तिरंगा यात्रा निकाले जाही। पार्टी कोति ले ग्यारा ले पंद्रह अगस्त तक हर घर, प्रतिष्ठान अउ कार्यालय मन म तिरंगा फहराय बर जनजागरण अभियान घलो चलाय जाही।
उहें, कोरिया जिला के पर्यटन स्थल झुमका म ‘‘हर घर तिरंगा, हर घर स्वच्छता अभियान‘‘ के तहत स्वच्छता अउ पर्यावरण संरक्षण बर श्रमदान कारीकरम राखे गीस। कारीकरम म जनप्रतिनिधि, अधिकारी अउ ग्रामीण मन हिस्सा लीन। जम्मो मन झुमका पर्यटन स्थल परिसर के सफई करीन अउ एला साफ-सुंदर अउ प्लास्टिक मुक्त बनाय राखे के संदेस दीन। संघरा स्वच्छता अउ पर्यावरण संरक्षण ल जन भागीदारी करके जन आंदोलन बनाय के संकल्प लीन।
प्रधानमंत्री-हर घर तिरंगा
प्रधानमंत्री नरेंद्र मोदी ह देसवासी मन ले हर घर तिरंगा अभियान म उछाह के संग भाग ले अउ विकसित भारत के निर्माण म योगदान देके दोबारा संकल्प लेके अपील करीन हे। प्रधानमंत्री ह सोसल मीडिया पोस्ट म किहीन हे कि तिरंगा देस के गरब ले अउ देस के खातिर हमेसा अपन सर्वश्रेष्ठ काम करे के प्रेरणा देथे।
शिक्षा मंत्री-समीक्षा
केंद्रीय शिक्षा मंत्री प्रहलाद जोशी ह आज राष्ट्रीय परीक्षा एजेंसी-एनटीए ले जुड़े मामला ल लेके शिक्षा मंत्रालय के सचिव अउ वरिष्ठ अधिकारी मन संग बइठका लीन। श्री जोशी ह सोसल मीडिया पोस्ट म किहीन कि ओमन संस्थागत व्यवस्था ल मजबूत करे, प्रक्रिया सुचारू बनाय अउ विद्यार्थी मन के प्रति जवाबदेही सुनिश्चित करे ले जुड़े महत्वपूर्ण मुद्दा मन उपर विचार-विमर्स करीन। श्री जोशी ह किहीन कि सरकार के मुख्य धियान मजबूत, पारदर्सी अउ विश्वसनीय परीक्षा व्यवस्था बनाय उपर हे, ताकि हरेक विद्यार्थी के इच्छा पूरा हो सकय।
शिक्षक-भर्ती
लोक शिक्षण संचालनालय के अंतर्गत शिक्षक मनके एक हजार छै सौ चैव्वन पद म भर्ती बर आवेदन के प्रक्रिया सुरू हो गेहे। छत्तीसगढ़ कर्मचारी चयन मंडल के माध्यम ले भर्ती परीक्षा आयोजित करे जाही। मंडल कोति ले जारी परीक्षा कारीकरम के अनुसार अभ्यर्थी दू सितंबर संझा पांच बजे तक मंडल के वेबसाइट म ऑनलाइन आवेदन कर सकत हे। तीन ले पांच सितंबर तक आवेदन म कोनो तरह के गलती होय म सुधार करे जा सकही। परीक्षा बर सोलह ठिन जिला मुख्यालय म केंद्र बनाय जाही। बिसयवार शिक्षक के भर्ती ई अउ टी दूनों संवर्ग बर होही।
केन्द्र सरकार-यूपीआई
केंद्र सरकार ह स्पष्ट करे हे कि उपभोक्ता मन बर यूपीआई निसुल्क रइही अउ जम्मो व्यक्तिगत लेनदेन निसुल्क बने रइही। केंद्रीय वित्त मंत्रालय ह केहे कि यूपीआई के माध्यम ले भुगतान करे के बेरा उपभोक्ता मन ल कोनो भी तरह के लेनदेन सुल्क नइ देना होही, जबकि अधिकांस व्यापारी लेनदेन घलो निसुल्क रइही। मंत्रालय ह केहे हे कि यदि व्यापारी छूट दर सुल्क लागू करे जाथे त एहा केवल एक निश्चित सीमा ले जादा के सीमित व्यापारी लेनदेन म नाम मात्र दर ले लागू होही।
जैव विविधता-राशि
राष्ट्रीय जैव विविधता प्राधिकरण-एनबीए ह तैंतीस ठन राज्य जैव विविधता बोर्ड, केंद्र शासित प्रदेस के जैव विविधता परिषद अउ राष्ट्रीय संस्थान मन ल लाभ साझा करन अउ सुलभता के तहत तीन करोड़ रूपिया ले जादा के रासि वितरित करे हे। पर्यावरण, वन अउ जलवायु परिवर्तन मंत्रालय ह बताय हे कि ए रासि भारत के कृषि अउ पशुपालन क्षेत्र के जैव विविधता संरक्षण बर घलो हे। एखर तहत छत्तीसगढ़ ल लगभग उन्नीस लाख रूपिया मिलही। मंत्रालय ह बताय हे कि एनडीए डहार ले अब तक एक सौ छैंसठ करोड़ रूपिया ले जादा के वितरण करे गेहे। मंत्रालय ह केहे हे कि हरेक वितरण जैव विविधता संरक्षण, वैज्ञानिक अनुसंधान अउ भारत के समृध्द जैविक संसाधन के संरक्षण म जुटे समुदाय मनके आजीविका के बीच संबंध ल अउ मजबूत करथे।
सघन जांच अभियान
कोंडागांव जिला के फरसगांव म पुलिस ह संदिग्ध गतिविधि अउ अवैध रूप ले रहत लोगन मनके पहिचान बर सघन जांच अउ सत्यापन अभियान चलाइस। ए अभियान म करीबन डेढ़ सौ पुलिस अधिकारी-कर्मचारी मनके इक्कीस टीम सामिल होइन। पुलिस ह फरसगांव नगर पंचायत के जम्मो पंद्रह वार्ड समेत तीर-तखार के जघा मन म बारह सौ ले जादा घर अउ एक सौ साठ ले जादा प्रतिष्ठान के जांच करीस। अभियान के दउरान एक सौ तिहत्तर संदिग्ध मनखे मन ल पूछताछ अउ दस्तावेज के सत्यापन बर थाना लाय गीस। पुलिस ह पहिचान पत्र अउ दूसर दस्तावेज मनके जांच के संघरा संबंधित थाना मनले घलो जानकारी जुटाईस। पुलिस ह मकान मालिक मनले किरायादार मनके जानकारी दरज कराय बर कहिस।
म्यूल खाताधारक-गिरफ्तार
जांजगीर-चांपा जिला के साइबर थाना पुलिस ह म्यूल बैंक खाता के जरिया ठगी करइया गिरोह के खिलाफ कारवाई करत पांच खाता धारक मन ल गिरफ्तार करे हे। जम्मो आरोपी मन ल न्यायिक रिमांड म जेल भेज दे गेहे। पुलिस के अनुसार ए आरोपी कमीसन के लालच म अपन नांव ले बैंक खाता खोलवाके साइबर अपराधी मन ल लेनेदेन के सुविधा देवात रिहीन।
कृमि मुक्ति दिवस
राष्ट्रीय कृमि मुक्ति दिवस म काली दस अगस्त के प्रदेस म एक ले उन्नीस बछर तक के लइका अउ किसोर-किशोरी मन ल एल्बेंडाजोल के दवा खवाय जाही। एखर बर शासकीय अउ निजी विद्यालय, आंगनबाड़ी केंद्र अउ दूसर संस्थान के माध्यम ले दवा खिलाय के व्यवस्था करे गेहे। कोनो लइका दस अगस्त के कोनो कारण से दवा नइ ले पाही त, ओला मॉप-अप दिवस सत्रह अगस्त के कृमि नासक दवा खिलाय जाही। ए अभियान के तहत प्रदेस म एक करोड़ दस लाख लइका अउ किसोर मन ल एल्बेंडाजोल के खुराक देके लक्ष्य राखे गेहे।
अउ अब पेस हे मौसम के हाल…
अवइया चैबीस घंटा के दउरान प्रदेस के कुछेक जघा म भारी ले अतिभारी बरसा होय के चेतावनी दे गेहे। मौसम विभाग के अनुसार पश्चिम बंगाल अउ ओडिसा के तट म एक ठिन कम दबाव के क्षेत्र बने होय हे। एखर सेति, आज प्रदेस के आने-आने जघा म हल्का ले मध्यम बरसा होय के संभावना हे। मौसम विभाग ह सरगुजा, जशपुर, कोरिया, मनेन्द्रगढ़-चिरमिरी-भरतपुर अउ कोरबा जिला बर यलो अलर्ट अउ सूरजपुर अउ बलरामपुर बर आरेंज अलर्ट जारी करे हे। बतादन कि पाछू चैबीस घंटा म बलरामपुर अउ बीजापुर जिला म भारी बारिस दरज करे गेहे। उहें, राजधानी रईपुर म घलो काली संझा ले लेके देर रतिहा तक बरसा होइस।
इही बीच, बिलासपुर जिला के सीपत थाना क्षेत्र के सेलर-बरभाठा गांव म रोपा लगाय के बाद लहुटत महिला के गाज के चपेट म आय ले मउत होगे। उहें, ए घटना म एक झिन ग्रामीन झुलस गे।