मुख्यमंत्री-सेन शक्ति सम्मेलन
मुख्यमंत्री विष्णुदेव साय ह आज रईपुर म राखे गे सेन शक्ति सम्मेलन अउ केश शिल्पी सम्मान समारोह म सामिल होइन। ए मउका म ओमन सेन समाज के भवन बनाय बर पचास लाख रूपिया देहे अउ संत शिरोमणि सेन महाराज के नांव म नवा रईपुर म एक ठिन चैक के नामकरण करे घोसना करीन। कारीकरम ल संबोधित करत हुए मुख्यमंत्री ह किहीन कि सेन समाज ह सनातन परंपरा अउ सामाजिक समरसता के मजबूत आधार हवय।
ग्रेन-एटीएम
खाद्य मंत्री दयालदास बघेल ह आज रईपुर म स्वचालित अनाज वितरण मसीन यानी गे्रन एटीएम के वर्चुअल सुभारंभ करीन। रईपुर के बिरगांव, बिलासपुर अउ दुरूग जिला म पायलेट प्रोजेक्ट के रूप म ग्रेन एटीएम के सुरूआत करे गेहे।
श्री बघेल ह किहीन कि सार्वजनिक वितरण प्रणाली यानी पीडीएस ल आधुनिक अउ पारदर्सी बनाय बर गे्रन एटीएम सुरू करे गेहे। छत्तीसगढ़ ह देस के पांचवां राज्य हे, जिंहा रासनकार्ड धारक ह चांउर निकाले बर एटीएम के उपयोग कर सकही। ग्रेन एटीएम के सुरक्षा बर सीसीटीवी कैमरा अउ सुरक्षा कर्मी के बेवस्था करे गेहे।
राष्ट्रीय कृमि मुक्ति दिवस
राष्ट्रीय कृमि मुक्ति दिवस म दस अगस्त सम्मार के प्रदेस म एक ले उन्नीस बछर तक के लइका अउ किशोर-किशोरी मन ल एल्बेंडाजोल के दवई खवाय जाही। एखर बर सरकारी अउ प्राइवेट स्कूल, आंगनबाड़ी अउ आने-आने संस्था मनके माध्यम ले दवई खवाय के बेवस्था करे गेहे। प्रसिक्षित स्वास्थ्य कार्यकर्ता, शिक्षक अउ आंगनबाड़ी कार्यकर्ता मन के निगरानी म ए दवई खवाय जाही।
फेर, कोनो लइका अगर दस अगस्त के कुछु कारन ले दवई नइ खा पाही त, ओला मॉप-अप दिवस सत्रह अगस्त, सम्मार के दिन कृमिनाशक दवई खवाय जाही। ए अभियान म प्रदेस म एक करोड़ दस लाख लइका अउ किशोर मन ल एल्बेंडाजोल के खुराक देके लक्ष्य राखे गेहे।
हर घर तिरंगा
प्रदेस म ‘हर घर तिरंगा‘ अउ ‘वंदे भारत‘ अभियान के तहत सत्रह अगस्त तक राज्य स्तरीय देशभक्ति कारीकरम आयोजित होही। सात ले पंद्रह अगस्त तक ‘वंदे मातरम‘ गायन, नौ ले सत्रह अगस्त तक ‘हर घर तिरंगा‘ अभियान अउ चैदह अगस्त के ‘विभाजन विभीषिका स्मरण दिवस‘ मनाय जाही।
उहें, बीजापुर जिला म सात अगस्त ले ही ‘हर घर तिरंगा‘ अभियान के सुरूआत हो गेहे। कलेक्टर विश्वदीप अउ पुलिस अधीक्षक उमेश प्रसाद गुप्ता ह कीर्ति चक्र ले सम्मानित अमर शहीद सोढ़ी नारायण के घर म उंखर परिजन मन ल तिरंगा देके ए अभियान के सुभारंभ करीन।
ऐति, धमतरी जिला म आज साइकिल तिरंगा यात्रा निकाले गीस। जिला प्रशासन डहार ले आयोजित ए यात्रा म अधिकारी-कर्मचारी, युवा, विद्यार्थी अउ आने-आने सामाजिक संगठन मनके प्रतिनिधि अउ आम नागरिक मन ह हिस्सा लीन। ए दउरान राष्ट्रीय एकता, स्वस्थ जीवनशैली, पर्यावरण संरक्षण अउ नशामुक्ति के संदेस दे गीस।
स्वच्छता दीदी-हड़ताल
प्रदेस म स्वच्छता दीदी मन कोति ले आने-आने मांग ल लेके पादू एक अगस्त ले सुरू होय हड़ताल ल लेके राज्य सरकार ह कड़ा रूख अपनाय हे। राज्य सहरी विकास अभिकरण यानी सूडा ह सबो नगर निगम आयुक्त, नगर पालिका परिसर अउ नगर पंचायत के मुख्य नगर पालिका अधिकारी मन ल निरदेस जारी करत हुए कहे हे कि अनुबंध के सरत अनुसार हड़ताल म सामिल होय स्वयं सहायता समूह के अनुबंध ल खतम करे अउ संबंधित सदस्य के सेवा समाप्ति के कारवाई करे जा सकत हे।
पत्र म ए घलो केहे गेहे कि अगर हड़ताल के सेति कोनो निकाय म साफ-सफाई नइ होही त, ओ निकाय प्रमुख के खिलाफ अनुशासनात्मक कारवाई करे जा सकत हे। सबो नगरीय निकाय ल निरदेस दे गेहे कि अपन क्षेत्र म हर हाल म सफई बेवस्था बनाय राखे।
एमओयू
योजना आर्थिक सांख्यिकी विभाग अउ आईआईएम रईपुर के बीच एक समझौता ज्ञापन उपर हस्ताक्षर होय हे। ए एमओयू के तहत प्रसिक्षण, क्षमता निर्माण, नीति अनुसंधान, परामर्स, डेटा एनालिटिक्स, सोध अउ दस्तावेजीकरण समेत आने-आने क्षेत्र म सहयोग करे जाही। उहें, सरकारी अधिकारी मन बर नेतृत्व विकास, मिड-कैरियर एग्जीक्यूटिव अउ कस्टमाइज्ड मैनेजमेंट डेवलपमेंट प्रोग्राम आयोजित करे जाही। एखर अलावा इकोनोमेट्रिक्स, रिसर्च मेथडोलॉजी, डेटा एनालिटिक्स, आर्टिफिसियल इंटेलिजेंस, पब्लिक पॉलिसी, नेतृत्व अउ प्रबंधकीय कौशल जइसन क्षेत्र म घलो प्रसिक्षण देवाय जाही।
स्टेट पावर कंपनी-भर्ती विज्ञापन
छत्त्तीसगढ़ स्टेट पावर कंपनीज ह एक हजार दू सौ पैंतीस पद म भर्ती बर विज्ञापन जारी करे हे। एमा सहायक अभियंता ले लेके कनिष्ठ अभियंता अउ संयंत्र परिचारक ले लेके डाटा एंट्री ऑपरेटर, चिकित्सक, पैरामेडिकल स्टाफ, फायर ऑफिसर्स अउ स्टाफ, विधि अधिकारी, वित्त अधिकारी, सुरक्षा अधिकारी जइसन पद सामिल हे। आवेदन अउ परीक्षा तारीख के विस्तृत विवरण अलग ले जारी करे जाही।
शिक्षक-तबादला
स्कूल शिक्षा विभाग ह शिक्षक मनके स्थानांतरण ल लेके एक ठिन आदेस जारी करे हे। विभागीय स्तर म तियार करे गे सूची म सात सौ शिक्षक मनके ट्रांसफर करे गेहे। स्थानांतरण प्रक्रिया म विद्यालय मनके सैक्षणिक बेवस्था अउ पढ़इया लइका मनके लाभ ल सबले पहिली प्राथमिकता दे गेहे। एखर संगेसंग शिक्षा विभाग कोति ले आने-आने राज्य म लागू ऑनलाइन स्थानांतरण प्रणाली मनके अध्ययन घलो करे जावत हे।
शिक्षा विभाग-प्रतिनियुक्ति
स्कूल शिक्षा विभाग ह कलेक्टर अउ संभागीय आयुक्त कार्यालय मन म कर्मचारी मनके कमी दूर करे बर स्कूल के गैर-सैक्षणिक कर्मचारी, लिपिक अउ भृत्य के प्रतिनियुक्ति के बेवस्था करे हे। विभाग ह एखर बर प्रक्रिया तय करत हुए निरदेस जारी करे हे। आवश्यकता आधार म रिक्त पद मनके विरूध्द प्रतिनियुक्त के प्रस्ताव भेजे जा सकही। संगेसंग ए सुनिश्चित करे जाही कि कोनो भी स्कूल के बेवस्था प्रभावित झन होवय।
बाढ़ आपदा प्रबंधन-कॉन्फ्रेंस
राष्ट्रीय आपदा प्रबंधन प्राधिकरण ह काली रईपुर म बाढ़ आपदा प्रबंधन के तियारी ल लेके कॉन्फ्रेंस आयोजित करे गिस। एमा सबो जिला के आपदा प्रबंधन अधिकारी मन ल बाढ़ ले निपटे बर जरूरी दिसा-निरदेस दे गेहे। राज्य म अट्ठारा अगस्त ल टेबल टॉप एक्सरसाइज अउ बीस अगस्त के मॉक एक्सरसाइज होही। बइठका म आने-आने विभाग के समन्वय, राहत अउ बचाव काम के तियारी के समीक्षा घलो होही।
जिले की चिट्ठी
आकाशवाणी रईपुर के प्रादेशिक समाचार एकांश, डहार ले प्रस्तुत कार्यक्रम “जिले की चिट्ठी“ के प्रसारण काली संझा छह बजके पांच मिनट ले छह बजके दस मिनट तक करे जाही। ए कार्यक्रम ल छत्तीसगढ़ के सबो आकाशवाणी केन्द्र एके संघरा रिले करही। ए दारी के अंक म आपमन ‘‘नारायणपुर’’ जिला के गतिविधि के बारे में जानकारी सुनिहा।
चिकित्सा महाविद्यालय-आवेदन
चिकित्सा शिक्षा विभाग के आयुक्त ह प्रदेस के शासकीय अउ निजी चिकित्सा अउ दंत चिकित्सा महाविद्यालय म संचालित स्नातक पाठ्यक्रम म भर्ती के पहिली काउंसिलिंग बर ऑनलाइन आवेदन मंगाय हे। आवेदन ल निर्धारित फीस के संग नौ अगस्त ले सोलह अगस्त तक भरे जा सकत हे। ऑनलाइन आवेदन ले जुड़े जानकारी विभाग के वेबसाइट म उपलब्ध हवय।
पूर्व माओवादी-गिरफ्तार
जशपुर पुलिस ह एक पूर्व माओवादी ल मुंबई ले गिरफ्तार करे हे। पुलिस के मुताबिक आरोपी दू महिना पहिली बूमतेल-सरनाटोली जंगल ले पुलिस चकमा देके इंसास रायफल अउ आने हथियार छोड़के भाग गे रिहीस। पुलिस ह बतइन कि गिरफ्तार आरोपी ह पहिली नक्सल संगठन के सदस्य रह चुके हे अउ ओखर ले हथियार मनके बारे म जरूरी जानकारी मिले हे।
शालेय क्रीड़ा प्रतियोगिता
गौरेला-पेंड्रा-मरवाही जिला म अट्ठारह ले इक्कीस अगस्त तक छब्बीसवां राज्य स्तरीय शालेय क्रीड़ा प्रतियोगिता के आयोजन करे जाही। ए प्रतियोगिता म प्रदेस के सबो संभाग के चैदह ले उन्नीस बछर के लगभग चार सौ चालीस खिलाड़ी भाग लिही। प्रतियोगिता म जिम्नास्टिक, क्रिकेट, ताईक्वांडो अउ कबड्डी जइसन खेल आयोजित होही।