राष्ट्रीय हथकरघा दिवस
राष्ट्रपति द्रौपदी मुर्मू ह किहीन हें कि- हथकरघा सिरिफ आजीविका के साधन नइये, भलुक समावेसी बिकास के सशक्त माध्यम घलो आय। आज नई दिल्ली म बारहवां राष्ट्रीय हथकरघा दिवस के मउका म कारीकरम ल संबोधित करत ओमन किहीन कि- हजारों बछर ले हथकरघा भारत के संस्कृति अउ सभ्यता के हिस्सा रेहे हे, हथकरघा ह देस के समृध्द बिरासत ल संजोय राखे के संगेसंग रोजगार, महिला सशक्तिकरण, कला संस्कृति अउ प्रकृति के प्रति प्रेम ल घलो बढ़ावा देहे।
कारीकरम म राष्ट्रपति ह बछर-दू हजार पच्चीस के संत कबीर हथकरघा पुरस्कार अउ राष्ट्रीय हथकरघा पुरस्कार देइन। ए पुरस्कार बुनकर मन ल उंखर सिल्पकला, नवाचार अउ भारत के हथकरघा परंपरा ल संजोय राखे के सेति दे गिस।
राष्ट्रीय हथकरघा दिवस के मउका म प्रधानमंत्री नरेंद्र मोदी ह अपन संदेस म किहीन कि-आजिक दिन ल देस ह अपन समृध्द अउ जीवंत हथकरघा बिरासत के जसन मनाथे। देस के बुनकर अउ कारीगर मनके कला-कौसल ल नमन करत श्री मोदी ह किहीन कि-कतकोन पइंत ले ए सिल्पकार मन देस के परंपरा ल संजो के राखिन हें। ऐति, सोसल मीडिया म एक ठन पोस्ट साझा करत श्री मोदी ह किहीन कि-सरकार ह हथकरघा क्षेत्र ल सरलग समर्थन देवत रइही, जउन ग्रामीन सशक्तिकरण अउ माईलोगिन के अगुवई म बिकास के संगेसंग आत्मनिर्भर भारत के सपना ल साकार करे बर महत्वपूर्ण स्तंभ हे।
ओमन नागरिक मन ले अपन पसंद के हाथ ले सिरजाय जिनिस ल साझा करे बर हैशटैग नेशनल हैंडलूम डे के उपयोग करके वीडियो बनाय के आग्रह करिन। ए बेरा ओमन किहीन कि-एखर ले हथकरघा ले जुड़े सिल्पकार मन ल प्रोत्साहन मिलही।
छत्तीसगढ़-हथकरघा दिवस
राष्ट्रीय हथकरघा दिवस के मउका म आज रइपुर के पंडित दीनदयाल उपाध्याय ऑडिटोरियम म राज्य स्तरीय बुनकर सम्मेलन के आयोजन करे गिस। कारीकरम म मुख्य अतिथि के रूप म मुख्यमंत्री विष्णुदेव साय सामिल होइन। ए मउका म मुख्यमंत्री ह राज्य हथकरघा संघ के माध्यम ले पात्र बुनकर परिवार मन ल आने-आने योजना के तहत दस करोड़ नब्बे लाख रूपिया ले जादा के सहायता रासि प्रदान करिस।
कारीकरम ल संबोधित करत मुख्यमंत्री ह किहीन कि- प्रधानमंत्री नरेंद्र मोदी के ‘‘वोकल फॉर लोकल‘‘ के मंत्र ल आगु बढ़ावत राज्य सरकार ह बुनकर, कारीगर अउ हस्तसिल्पकार मन ल सशक्त, आत्मनिर्भर अउ समृध्द बनाय बर प्रतिबध्द हे। बुनकर अउ कारीगर मन के सम्मान ह संस्कृति, स्वाभिमान अउ समृध्दि ल सशक्त बनाय के आधार हे।
कारीकरम ल विधानसभा अध्यक्ष डॉ. रमन ंिसंह ह घलो संबोधित करिन। ए बेरा मुख्यमंत्री अउ विधानसभा अध्यक्ष मन ग्रामोद्योग विभाग के प्रदर्सनी के घलो अवलोकन करिन।
यूसीसी-अनुसूचित जनजाति
उप-मुख्यमंत्री विजय शर्मा ह किहीन हे कि- अनुसूचित जनजाति समाज ल समान नागरिक संहिता-यूसीसी के दायरा ले बाहिर राखे जाही। ओमन किहीन कि प्रदेस म समान नागरिक संहिता लागू करे के तियारी बर एक समिति गठित करके काम करे जावत हे। समिति ह एखर ले जुड़े आने-आने पहलु मन के अध्ययन करत हे।
विश्व स्तनपान सप्ताह
रइपुर विश्व स्तनपान सप्ताह के तहत काली राज्य स्तरीय कारीकरम आयोजन करे गिस। ए मउका म छत्तीसगढ़ के पहिली ‘‘मातृ दूध कोष‘‘ याने ‘‘ह्यूमन मिल्क बैंक‘‘ के स्थापना के घोसना करे गिस। ए बेरा स्वास्थ्य श्याम बिहारी जायसवाल ह किहीन कि-ए उदिम ह नान्हे लइका मन ल सुरक्षित ढंग ले महतारी के दूध देवाय म महत्वपूर्ण होही। कारीकरम म आने-आने जिला के दस झन महतारी मन ल ‘‘माता यशोदा सम्मान‘‘ दे गिस। बतादन कि ए कारीकरम के उद्देस्य स्तनपान के महत्व के प्रति जागरूकता बढ़ाना अउ मातृ-शिशु स्वास्थ्य सेवा ल मजबूत करना रिहीस।
कम्प्रेस्ड बायोगैस
छत्तीसगढ़ ह कम्प्रेस्ड बायोगैस-सीबीजी इकोसिस्टम के बिकास बर भारत सरकार ले पचास करोड़ रूपिया के प्रोत्साहन रासि पवइया देस के पहिली राज्य बन गेहे। ए रासि पंूजीगत निवेस बिसेस सहायता योजना के तहत स्वीकृत करे गिस। ऐति, मुख्यमंत्री विष्णुदेव साय ह किहीन कि-एखर ले स्वच्छ ऊर्जा, किसान मन के आय, ग्रामीन अर्थबेवस्था अउ पर्यावरण संरक्षण ल बढ़ावा मिलही।
धर्म स्वातंत्र्य
राजपत्र म प्रकासन के संगे प्रदेस म घलो धर्म स्वातंत्र्य अधिनियम-दू हजार छब्बीस लागू हो गेहे। राजपत्र म अधिनियम के नियम के प्रकासन के संग एहा जम्मो राज्य म प्रभावी हो गेहे। नवा नियम कानून के क्रियान्वयन के प्रक्रिया, प्रावधान अउ प्रशासनिक बेवस्था ल स्पष्ट रूप ले निर्धारित करे गेहे।
पीएससी-खंडन
छत्तीसगढ़ लोक सेवा आयोग ह एसआई संवर्ग अउ प्लाटून कमांडर भर्ती परीक्षा बछर-दू हजार चैबीस के प्रारंभिक परिनाम ल लेके सोसल मीडिया म बगरे अफवाह के खंडन करिस हे। आयोग ह स्पष्ट रूप ले किहीस हे कि- परिनाम म उही नांव प्रदर्सित करे गेहे, जउन अभ्यर्थी मन अपन ऑनलाइन आवेदन दर्ज करे रिहीन।
ऐति, आयोग ह अभ्यर्थी अउ आम लोगन ले अपील करिस हे कि-ओमन भ्रामक जानकारी उपर बिस्वास झन करंय अउ परीक्षा ले जुड़े जानकारी सिरिफ आयोग के आधिकारिक वेबसाइट उपर ही भरोसा करंय।
नीट-काउंसिलिंग
प्रदेस म एमबीबीएस अउ बीडीएस प्रवेस के पहिली चरन काउंसिलिंग बर ऑनलाइन आवेदन 9 अगस्त ले सुरू होही। सरकारी अउ निजी मेडिकल के संग डेंटल कॉलेज म प्रवेस बर छात्र मन 16 अगस्त तक आवेदन कर सकही। उहें, च्वाइस फिलिंग अउ लॉकिंग प्रक्रिया 9 अगस्त ले 17 अगस्त तक चलही।
बातों-बातों-में
प्रादेशिक समाचार एकांश के समसामयिक बिसय उपर आधरित कारीकरम ‘‘बातों-बातों-में‘‘ ए दारी ‘नशा मुक्त युवा विकसित भारत संकल्प अभियान‘ उपर केन्द्रित कारीकरम के प्रसारण करे जाही। एखर प्रसारण काली आठ अगस्त के आकाशवाणी केंद्र रइपुर डहार ले एफ.एम. अउ प्रायमरी चैनल म बिहनिया नौ बजे करे जाही। जेला छत्तीसगढ़ के जम्मो आकाशवाणी केंद्र एके संघरा रिले करहीं।
हॉकी टीम-चयन
छत्तीसगढ़ के दू खिलाड़ी मधु सिदार अउ गाती यादव के चयन भारतीय महिला जूनियर हॉकी टीम म होय हे। दुनों खिलाड़ी 30 अगस्त ले 13 सितंबर तक चीन के मोको म होवइया जूनियर एशिया कप म देस के अगुवई करहीं। ओमन बिलासपुर के खेलो इंडिया स्टेट संेटर ऑफ एक्सीलेंस म प्रसिक्षन देवत हंे। ऐति, खेल मंत्री अरूण साव ह दुनों खिलाड़ी मन ले वीडियो कॉल म गोठबात करके प्रतियोगिता बर सुभकामना देइन।
रेणुका गोस्वामी- आमंत्रण
धमतरी जिला के नवागांव के रेणुका गोस्वामी ल पंद्रह अगस्त के दिन राष्ट्रपति भवन म आयोजित स्वतंत्रता दिवस कारीकरम म सामिल होय बर नेवता मिले हे। एखर बाद उप-मुख्यमंत्री विजय शर्मा ह ओमन ल बधई अउ सुभकामना देवत किहीन कि-ए सम्मान छत्तीसगढ़ के बेटी, ग्रामीन युवा अउ कौसल बिकास के सफलता के प्रतीक आय। रेणुका गोस्वामी ह पंडित दीनदयाल उपाध्याय ग्रामीन कौसल बिकास योजना के तहत प्रसिक्षण लेके अपन चिन्हारी बनाइस।
तिरंगा यात्रा
रइपुर के भाजपा कार्यालय म ‘‘हर घर तिरंगा अभियान‘‘ अउ ‘‘तिरंगा यात्रा‘‘ उपर बइठका आयोजित करे गिस। एखर बाद पत्रकार मन ले गोठबात करत उप-मुख्यमंत्री अरूण साव ह किहीन कि- हर घर तिरंगा अभियान के तहत प्रदेस म 10 ले 14 अगस्त तक भव्य तिरंगा यात्रा निकाले जाही। उहें, 11 ले 15 अगस्त तक हर घर, प्रतिष्ठान अउ कार्यालय मन म तिरंगा फहराय बर जनजागरन अभियान चलाय जाही। ओमन किहीन कि-भाजपा कार्यकर्ता गांव-गांव अउ गली-गली जाके लोगन ल तिरंगा बांटही अउ घर म फहराय बर कइहीं।
श्री साव ह किहीन कि-बस्तर के माओवाद प्रभावित इलाका म जिंहा कभू तिरंगा नइ फहरिस, उंहा बिसेस रूप ले ए अभियान चलाय जाही।
शालेय-क्रीडा प्रतियोगिता
गौरेला-पेंड्रा-मरवाही जिला म 18 ले 21 अगस्त तक 26वां राज्य स्तरीय शालेय क्रीडा प्रतियोगिता के आयोजन करे जाही। प्रतियोगिता म प्रदेस के पांचों संभाग ले 14 ले 19 बछर के करीबन पांच सौ चालीस खिलाड़ी सामिल होहीं। ए प्रतियोगिता म जिम्नास्टिक, क्रिकेट, ताईक्वांडो अउ कबड्डी के स्पर्धा होहीं।