मंत्रिमंडल-गोबरधन
केन्द्रीय मंत्रिमंडल ह आज तेईस हजार सात सौ इकतीस करोड़ रूपिया के राष्ट्रीय चक्रीय जैव ऊर्जा योजना-गोबरधन ल मंजूरी दे दीन। सूचना अउ प्रसारण मंत्री अश्विनी वैष्णव ह आज नई दिल्ली म किहीन कि एखर ले डेढ़ लाख रोजगार मिलही। योजना के तहत देस के कृषि अवशेष, पशु गोबर, गन्ना अपशिष्ट, नगर पालिका जैविक अपशिष्ट अउ दूसर जैव संसाधन ल स्वच्छ ईंधन, जैविक खाद म बदल के ग्रामीण आय अउ राष्ट्रीय आर्थिक मूल्य म वृद्धि के लक्ष्य हे।
ए योजना दू हजार छब्बीस-सत्ताईस ले दू हजार पैंतीस-छत्तीस तक लागू करे जाही। एखर ले कम्प्रेस्ड बायोगैस, भारत के भविष्य के ऊर्जा मिश्रण के प्रमुख आधार बनही। योजना के उद्देश्य घरेलू कम्प्रेस्ड बायोगैस उत्पादन ल करीबन दस गुना बढ़ाना, निजी निवेस ल आकर्षित करना अउ देसभर म चक्रीय जैव अर्थव्यवस्था के निर्माण करना हे।
वीबी जीरामजी-प्रेसवार्ता
मुख्यमंत्री विष्णुदेव साय ह कहिन हे कि राज्य के सरकारी स्कूल मन म नोनी मन बर सौचालय बनाय के अभियान ‘‘मेरी-बेटी-मेरा अभिमान‘‘ पन्द्रह अगस्त ले छब्बीस जनवरी तक चलाय जाही। श्री साय ह आज मंत्रालय म पत्रकार मन ले गोठबात करत बतईन कि ए अभियान विकसित भारत – जीरामजी योजना के तहत संचालित करे जाही। ओमन बतईन कि राज्य के सबो गांव म मुक्तिधाम बनाय जाही। उहें, मोर-गांव-मोर पानी अभियान के तहत राज्य म दस हजार ले जादा खराब बोरवेल बर रिचार्ज पिट बनाय जाही। मुख्यमंत्री ह किहीन कि ए तीनों काम प्राथमिकता के आधार म छब्बीस जनवरी तक पूरा करे जाही। मुख्यमंत्री ह सबो ग्राम पंचायत ले किहीन कि ओमन ह ए तीनों काम बर अपन प्रस्ताव जनपद पंचायत ल भेजय।
मुख्यमंत्री-पारस पोर्टल
मुख्यमंत्री विष्णुदेव साय के अध्यक्षता म आज मंत्रालय म पारस पोर्टल के पहिली राज्य स्तरीय समीक्षा बइठका होइस। श्री साय ह किहीन कि पारस पोर्टल सासन के योजना के प्रभावी निगरानी, पारदर्सिता अउ जवाबदेही ल नवा मजबूती दीहीं। ओमन किहीन कि अभी हरेक महीना के आखिरी मंगलवाल के पारस पोर्टल के माध्यम ले राज्य स्तर म सब्बो प्रमुख योजना अउ जनसेवा के नियमित समीक्षा करे जाही। एखर ले योजना के काम म गति आही। संगेसंग समस्या के निपटारा बेरा म होही अउ लोगन तक सासकीय सेवा के फायदा बने ढंग ले पहुंच सकही। मुख्यमंत्री ह अधिकारी मन ले किहीन कि योजना के काम म कोनों भी प्रकार के लापरवाही मंजूर नइ करे जाही।
मूविंग इक्वीपमेंट निर्माण संयंत्र
मुंगेली जिला म बी.ई.एम.एल. के हैवी अर्थ मूविंग इक्वीपमेंट निर्माण संयंत्र स्थापित होही। एखर बर पथरिया तहसील के ग्राम चंद्रगढ़ी म सासकीय भूमि रियायती दर म आवंटित करे के प्रस्ताव ल राज्य मंत्रिपरिषद ह मंजूरी दे देहे। ए छत्तीसगढ़ के पहिली हैवी अर्थ मूविंग इक्वीपमेंट निर्माण संयंत्र होही। एखर ले जिला म औद्योगिक निवेस, रोजगार, कौशल विकास अउ सहायक उद्योग बर नवा अवसर मिलही।
उत्कृष्ट खिलाड़ी-सूची
छत्तीसगढ़ सरकार ह उत्कृष्ट खिलाड़ी के सूची जारी कर देहे। सामान्य प्रसासान विभाग ह एखर प्रकासन राजपत्र म कर देहे। उत्कृष्ट खिलाड़ी मन ल सासकीय सेवा म नियुक्त करे के नीति के तहत बीस ठन खेल के कुल एक सौ छप्पन खिलाड़ी मन ल ए सूची म सामिल करे गेहे। ए सूची ल मुख्यमंत्री विष्णुदेव साय के अध्यक्षता म होय बइठका म मंजूरी दे गे रिहीस।
राष्ट्रपति भवन-‘झिटकू-मिटकी‘
राष्ट्रपति भवन डहार ले जारी स्वतंत्रता दिवस ‘‘एट होम‘‘ निमंत्रण पत्र म ए बछर बस्तर के ऐतिहासिक लोकगाथा ‘झिटकू-मिटकी‘ के प्रतीक-मोटिफ ल स्थान दे गेहे। एखर ले बस्तर के समृद्ध जनजातीय संस्कृति, लोक पंरपरा अउ सांस्कृतिक विरासत ल राष्ट्रीय स्तर म खास पहिचान मिले हे।
वन मंत्री केदार कश्यप ह किहीन कि राष्ट्रपति भवन के स्वतंत्रता दिवस निमंत्रण म ए प्रतीक ल जघा मिलना बस्तरवासी अउ छत्तीसगढ़वासी मन बर गौरव के क्षण हे।
ऑपरेशन सिपाही रक्षा-सूत्र अभियान
रक्षाबंधन म देस के सीमा म तैनात वीर सैनिक मन बर सम्मान अउ कृतज्ञता व्यक्त करे के उद्देश्य ले महिला अउ बाल विकास विभाग ह ऑपरेशन रक्षा-सूत्र अभियान म एक लाख ग्यारह हजार राखी बनावाय हे। गुढ़ियारी के भारत माता चौक म राखे गे कार्यक्रम म विभाग के जिला कार्यक्रम अधिकारी शैल ठाकुर अउ अभियान के संयोजक महेन्द्र प्रताप सिंह राणा ल प्रतीकात्मक रूप ले राखी सौंपे गीस।
कोंडागांव ल घलो ए अभियान म भारत स्काउट अउ गाइड जिला संघ डहार ले एक हजार ले जादा रक्षा सूत्र देस के सैनिक मनके नाव म भेजे गेहे।
मुख्यमंत्री ज्ञान प्रोत्साहन योजना
छत्तीसगढ़ म मुख्यमंत्री ज्ञान प्रोत्साहन योजना के तहत दसवीं अउ बारहवीं के मेधावी विद्यार्थी मन बर ऑनलाइन पंजीयन सुरू होगे हे। लोक सिक्षण संचालनालय के अनुसार, पात्र विद्यार्थी मन ह राज्य छात्रवृत्ति पोर्टल म आवेदन कर सकत हे। एखर बर आखिरी तारीख तीस अगस्त तय करे गेहे। विद्यार्थी मनके आवेदन के सत्यापन संबंधित स्कूल अउ जिला सिक्षा अधिकारी मन ह करही।
श्रम मंत्री-बैठक
श्रम मंत्री लखनलाल देवांगन ह आज नवा रायपुर म छत्तीसगढ़ भवन अउ अन्य सन्निर्माण कर्मकार मंडल के बइठका करीन। बइठका म चालू वित्तीय बछर बर अटल उत्कृष्ट शिक्षा योजना के तहत राज्य के बीस चयनित विद्यालय म दू सौ निर्माण श्रमिक मनके लइका मन ल कक्षा छठवीं म निःशुल्क शिक्षा उपलब्ध कराय के मंजूरी दीन। उहें, निर्माण श्रमिक मनके लइका मन ल इंजीनियरिंग, मेडिकल, प्रबंधन अउ आने व्यावसायिक पाठ्यक्रम म पढ़ई बर देवइया सैक्षणिक सहायता रासि के एकरूपीकरण कराय के घलो फइसला ले गीस। बइठका म अटल करियर निर्माण योजना के तहत एक हजार निर्माण श्रमिक मनके लइका मन ल नीट अउ जेईई जइसन प्रतियोगी परीक्षा के तैयारी बर निःशुल्क कोचिंग देवाय के अनुमोदन करे गीस।
खरीफ फसल-गिरदावरी
राजस्व अउ आपदा प्रबंधन विभाग ह प्रदेस के सबो जिला कलेक्टर मन ल खरीफ फसल के शत-प्रतिशत अउ त्रुटिरहित गिरदावरी निश्चित करे के निरदेस देहे। सासन ह स्पष्ट करे हे कि ए काम म कोनों भी प्रकार के लापरवाही बर्दास्त नइ करे जाही। ए नवा व्यवस्था म पटवारी मन ह शत-प्रतिशत रकबा के सत्यापन करही। उहें, राजस्व निरीक्षक अउ कृषि विस्तार अधिकारी पच्चीस-पच्चीस प्रतिशत अउ तहसीलदार अउ नायब तहसीलदार ल दस प्रतिशत अउ अनुविभागीय अधिकारी ल पांच प्रतिशत रकबा के सत्यापन के जिम्मेदारी सौंपे गेहे।
गिरदावरी के काम बीस सितंबर तक पूरा करके खसरा अउ भूईंया सॉफ्टेवेयर म प्रविष्टि अउ त्रुटिसुधार के प्रक्रिया पूरा करे जाही।
संक्षिप्त समाचार
– केन्द्रीय माध्यमिक सिक्षा बोर्ड-सीबीएसई ह बछर दू हजार छब्बीस म आयोजित करे गे कक्षा दसवीं बोर्ड परीक्षा के उत्तर पुस्तिका के स्कैन कॉपी ले बर ऑनलाइन आवेदन के प्रक्रिया सुरू कर देहे। मुख्य बोर्ड परीक्षा अउ दूसर बोर्ड परीक्षा म सामिल विद्यार्थी मन ह पांच अगस्त तक नौ अगस्त तक आवेदन कर सकत हे।
– छत्तीसगढ़ स्टेट माकेर्टिंग कॉपोरेशन लिमिटेड-सी.एस.एम.सी.एल. घोटाला के सिलसिला म कारोबारी अनवर ढेबर ल सुप्रीम कोर्ट ह सशर्त अंतरिम जमानत दे देहे। कोर्ट के निरदेस के अनुसार जेल ले रिहाई के बाद अनवर ल छत्तीसगढ़ छोड़ना होही। ए निर्वासन सुनवाई पूरा होवत तक जारी रइही।
– छत्तीसगढ़ उच्च न्यायालय ह लोक सेवा आयोग के दू हजार इक्कीस म होय राज्य सेवा परीक्षा म प्रश्न पत्र लीक अउ भर्ती घोटाला म गिरफ्तार आयोग के पूर्व सचिव अउ सेवानिवृत्त आईएएस अधिकारी जीवन किशोर धु्रव के नियमित जमानत याचिका खारिज कर देहे।
– आबकारी आयुक्त ह राज्य के आने-आने जिला म सराब दुकान म निर्धारित दर ले जादा कीमत म बिक्री अउ नियंत्रण म लापरवाही के मामला म दू झिन आबकारी उप निरीक्षक मन ल निलंबित कर देहे।
अउ
– सक्ती जिला के चिस्दा-हसौद के जवाहर नवोदय विद्यालय म अवइया सैक्षणिक सत्र म कक्षा छठवीं म प्रवेस बर आयोजित होवइया चयन परीक्षा के ऑनलाइन आवेदन के आखिरी तारीख बढ़ाके सात अगस्त कर दे गेहे।