मंत्रिपरिषद निर्णय
राज्य सरकार, आर्टिफिशियल इंटेलीजंेस-एआई के मदद ले सुशासन, नवा तकनीक, कौशल विकास अउ डिजिटल अर्थव्यवस्था ल बढ़ावा देहे। एखर बर आज मुख्यमंत्री विष्ण्ुादेव साय के अध्यक्षता म मंत्रालय म होय राज्य मंत्रिपरिषद के बइठका म ‘‘छत्तीसगढ़ राज्य सरकार, आर्टिफिशियल इंटेलीजंेस-एआई मिशन‘‘ ल मंजूरी दे गीस। बइठका के बाद पत्रकार मनले चर्चा करत हुए उपमुख्यमंत्री अरूण साव ह बतइन कि ए मिसन पांच बछर बर होही, जेमा पांच सौ करोड़ रूपिया खर्च करे जाही।
इंखर अलावा मंत्रिपरिषद ह राज्य के ऊर्जा अधोसंरचना ल मजबूती दे अउ आम लोगन मन के संग संस्थागत निवेसक मनके भागीदारी बढ़ाय के उद्देस्य ले छत्तीसगढ़ स्टेट पॉवर जनरेसन कंपनी लिमिटेड के सेयर बाजार म लिस्टिंग के फइसला लेहे। एखर तहत सरकार कंपनी ल स्टाक एक्सचेंज म सूचीबध्द करे बर दू सौ करोड़ रूपिया तक के नॉन-कन्वर्टिबल डिबेंचर बॉन्ड जारी करे हे। एखर बर राज्य सरकार मूलधन अउ ब्याज भुगतान म अपन गारंटी देके संग प्रत्याभूति सुल्क म छूट देहे। एखर ले राज्य के ऊर्जा क्षेत्र म निवेस ल प्रोत्साहन मिले के संग बिजली उत्पादन अउ वितरण प्रणाली मजबूत होही।
उहें, छत्तीसगढ़ म हैवी अर्थ मूविंग इक्वीपमेंट मैन्युफैक्चरिंग संयंत्र के स्थापना बर भारत अर्थ मूवर्स लिमिटेड ल रियायती दर म भूमि आवंटित करे के प्रस्ताव ल घलो मंजूरी देहे। ए निर्णय ले राज्य म निवेस ल बढ़ावा मिले के संग स्थानीय युवा मन बर रोजगार के नवा अवसर बनही।
मंत्रिपरिषद ह लोक निर्माण विभाग म निर्माण काम के डिजिटल प्रबंधन बर वर्क्स एण्ड अकाउंट मैनेजमेंट इन्फॉर्मेंशन सिस्टम लागू करे के पहिली चरण ल मंजूरी देहे। उहें, मुख्यमंत्री ग्राम सड़क अउ विकास योजना म अवइया बारहमासी सड़क के निर्माण बर जारी दिसा-निरदेस म संसोधन ल मंजूरी दे देहे। बइठका म वित्त विभाग के ओ प्रस्ताव के अनुमोदन करे गीस, जेखर तहत एशियन डेव्हलपमेेंट बैंक ले छत्तीसगढ़ अंजोर विजन दू हजार सैंतालीस के क्रियान्वयन बर पन्द्रह करोड़ रूपिया के अनुदान ले जाही। बइठका म राज्य के योजना बर स्टेट सिंगल नोडल एजेंसी मॉडल लागू करे के प्रस्ताव ल मंजूरी दे गीस।
गौधाम-स्थापना
प्रदेस म एक हजार चार सौ साठ गौधाम के स्थापना करे जाही। पशु चिकित्सा सेवा ले मिले जानबा के अनुसार घुमइया अउ बेघर पशुधन के व्यवस्थापन बर छत्तीसगढ़ राज्य गौ सेवा आयोग ल प्रदेसभर म गौधाम योजना के तहत एक हजार चार सौ साठ गौधाम के स्वीकृति दे गीस। पहिली चरण म अइसन गौठान के चयन करे गेहे, जउन राष्ट्रीय राजमार्ग तीर हे अउ जिहां सबो जरूरी व्यवस्था हवय।
अनुच्छेद-तीन सौ सत्तर
अनुच्छेद-तीन सौ सत्तर ल निरस्त करे जाय के आज सातवां वर्षगांठ हे। बछर दू हजार उन्नीस म आजे के दिन संसद म जम्मू-कश्मीर ल बिसेस दर्जा देवइया अनुच्छेद-तीन सौ सत्तर के प्रावधान ल खतम करे गे रिहीस।
सोशल मीडिया पोस्ट म प्रधानमंत्री नरेन्द्र मोदी ह कहिन कि सात बछर पहिली अनुच्छेद-तीन सौ सत्तर अउ पैंतीस-ए ल निरस्त करे जाय के बाद ले जम्मू-कश्मीर अउ लद्दाख के लोगन मनके जीवन म बड़का बदलाव आय हे। ओमन ह कहिन कि दूनों केन्द्रसासित प्रदेस म बुनियादी ढांचा के विस्तार होय हे। अउ सिक्षा, स्वास्थ्य सेवा, उद्यमिता अउ खेल जइसन क्षेत्र म अवसर बाढ़े हे।
उहें, छत्तीसगढ़ के मुख्यमंत्री विष्णुदेव साय ह कहिन कि प्रधानमंत्री नरेन्द्र मोदी के दूरदर्शी नेतृत्व अउ केन्द्रीय गृहमंत्री अमित शाह के दृढ़ संकल्प ले अनुच्छेद-तीन सौ सत्तर अउ पैंतीस-ए के बिसेस प्रावधान ल निष्प्रभावी करके जम्मू-कश्मीर अउ लद्दाख ले समान अधिकार, समान अवसर अउ विकास के मुख्यधारा ले जोड़े गीस। ए निर्णय ‘‘एक भारत-श्रेष्ठ भारत‘‘ के राष्ट्रीय संकल्प ल साकार करइया युगांतकारी कदम रिहीस।
ग्रामीण कृषि कार्य अनुभव कार्यक्रम
रायपुर स्थित इंदिरा गांधी कृषि विश्वविद्यालय डहार ले संचालित ग्रामीण कृषि कार्य अनुभव कार्यक्रम के तहत ग्राम पिरदा म ग्राम सूचना केन्द्र अउ पौध स्वास्थ्य परामर्श केन्द्र के सुभारंभ करे गेहे। ए कार्यक्रम के उद्देश्य किसान मन तक वैज्ञानिक कृषि तकनीकी के प्रसार, फसल संबंधी समस्या के समाधान, नवा कृषि जानकारी उपलब्ध कराना हे। कार्यक्रम म किसान मन ल वर्मी कम्पोस्ट आधारित ट्राइकोडर्मा जैव एजेंट किट के नमूना बांटे गीस।
युवा संगम-पोर्टल
शिक्षा मंत्रालय ह ‘एक भारत-श्रेष्ठ भारत‘ म अवइया युवा संगम बर ऑनलाइन पंजीकरण पोर्टल खोल देहे। एमा अट्ठारह ले तीस बछर के इच्छुक युवा पंजीकरण करा सकत हे। चयनित प्रतिभागी अपन संबंधित राज्य अउ केन्द्रसासित प्रदेस म पांच ले सात दिन के शैक्षिक अउ सांस्कृतिक यात्रा करही।
स्कूल-चयन
रायपुर म शांति नगर स्थित पी.जी. उमाठे उत्कृष्ट शासकीय विद्यालय के चयन प्रतिष्ठित ब्रिक्स स्कूल जियोपोलिटिकल प्रोजेक्ट शोकेस बर करे गे रिहीस। छत्तीसगढ़ ले चयनित ए एके ठिन विद्यालय हे, जेमा अंतर्राष्ट्रीय मंच म अपन नवाचार जियोस्पेशियल परियोजना के प्रदर्सन करके प्रदेस के नाम रोशन करीन।
ए उपलब्धि म कलेक्टर डॉक्टर गौरव सिंह ह काली कलेक्टोरेट परिसर स्थित रेडक्रॉस सभाकक्ष म शिक्षिका रीता मंडल के संगेसंग छात्रा वर्तिका पाटिल अउ उमेश्वरी साहू ल सॉल अउ प्रेरणादाई पुस्तक भेंट करके सम्मानित करीन।
भालू हमला-मौत
कांकेर जिला म आज भालू डहार ले करे गे हमला म दू अलग-अलग घटना म तीन लोगन के मउत होगे।पहिली घटना नरहरपुर रेंज के लारगांव-मरकाटोला के हे, जिहां भालू के हमला ले बड़पारा निवासी भाई-बहिनी के मउत होगीस। उहें, एक आने नोनी गंभीर रूप ले घायल होगे हे, जेला इलाज बर अस्पताल म भर्ती कराय गेहे। घटना के जानबा मिलत ही विधायक आशाराम नेताम मउका म पहुंचीन अउ ओमन ह पीड़ित परिवार ल हरंसभव मदद करे के भरोसा दिलईन। बाद म वन विभाग के टीम ह भालू के रेस्क्यू करीन।
उहें, एक आने घटना म भालू ह सिहारीनाला म खेत जावत सियान उपर हमला कर दीस, जेखर ले ओखर मउत होगीस।
गांजा-बरामद
महासमुंद पुलिस ह तीन अंतर्राज्यीय गांजा तस्कर ल गिरफ्तार करके उंखर तीर ले एक सौ चौदह किलोग्राम गांजा बरामद करे हे। जब्त गांजा के कीमत करीब संतावन लाख रूपिया बताय गेहे। कोमाखान पुलिस ह मुखबिर ले मिले जानबा के आधार म राष्ट्रीय राजमार्ग क्रमांक-तीन सौ तिरपन स्थित कोमाखान चौकड़ी तीर घेराबंदी करके एक कार ल रोकीन। जांच के दउरान कार ले गांजा बरामद करे गीस। पुलिस ह आरोपी मनके खिलाफ एनडीपीएस एक्ट के तहत मामला दर्ज करके जांच सुरू कर देहे।
कोमाखान थाना क्षेत्र म ही पुलिस ह स्कूटी ले गांजा तस्करी करत दू अंतर्राज्यीय तस्कर ल घलो गिरफ्तार करे हे। आरोपी मन तीर ले करीब बाईस किलो गांजा बरामद करे गेहे।
ठगी आरोपी-गिरफ्तार
रायपुर पुलिस ह एक करोड़ तेरह लाख रूपिया के निवेस के नाम म धोखाधड़ी के मामला म ‘वॉश एंड वॉश ब्लैक मनी स्कैम‘ ले जुड़े अंतर्राज्यीय गिरोह के दू झिन माईलोगिन आरोपी मन ल महाराष्ट्र के नागपुर ले गिरफ्तार करे हे। आरोपी मन ह एक कारोबारी ल पैंतालीस करोड़ रूपिया के निवेस दिलाय के झांसा देके विदेशी तकनीक अउ नकली केमिकल के जरिया ले काला नोट ल असली नोट म बदले के झूठा प्रदर्सन करीन अउ आने-आने तरीका ले रूपिया ठग लीन। पुलिस के सुरूआती पूछताछ म गिरोह डहार ले नागपुर, लखनऊ समेत कई ठिन जघा म अइसने निवेस अउ फंड रिलीज कराय के नाम म ठगी करे के पता चले हे।
शीघ्रलेखन-मुद्रलेखन-परीक्षा
लोक शिक्षण संचालनालय म अवइया शीघ्रलेखन अउ मुद्रलेखन कम्प्यूटर कौशल परीक्षा परिषद डहार ले अंग्रेजी अउ हिन्दी कम्प्यूटर मुद्रलेखन कौशल परीक्षा के आयोजन तय दिन म ही करे जाही। परिषद के अनुसार आठ अगस्त के अंग्रेजी कम्प्यूटर मुद्रलेखन आठ परीक्षा केन्द्र म, नौ अगस्त के हिन्दी कम्प्यूटर मुद्रलेखन नौ परीक्षा केन्द्र म, सोलह अगस्त के बिलासपुर अउ सरगुजा संभाग म एक-एक परीक्षा केन्द्र म आयोजित करे जाही।