रविदास जयंती-कलश वंदन अभियान
संत शिरोमणी रविदास जी के छह सौ पचासवां जयंती के मउका म राखे गे प्रदेस स्तरीय कलश वंदन अभियान के तहत वाराणसी ले लाने गे पवित्र माटी अउ जल युक्त कलश के वितरण के कार्यक्रम आज रायपुर म आयोजित करे गीस। पंडित दीनदयाल उपाध्याय ऑडिटोरियम म राखे गे ए कार्यक्रम म मुख्यमंत्री विष्णुदेव साय सामिल होइन। ए मउका म मुख्यमंत्री ह संत रविदास जी के नाम ले राज्य अलंकरण दे जाय के संगेसंग अवइया बछर माद्यी पुन्नी म उंखर जयंती म सार्वजनिक छुट्टी के घोषणा करीन।
कार्यक्रम म मुख्यमंत्री ह गुरू रविदास जी के समता अउ समरसता के संदेस ल जन-जन तक पहुंचाय बर तैयार करे गेहे बिसेस रथ ल रवाना करीन।
अरूण साव-पत्रकारवार्ता
उपमुख्यमंत्री अउ खेल युवा कल्याण मंत्री अरूण साव ह कहिन हे कि राज्य सरकार ह खेल, खिलाड़ी अउ खेल अधोसंरचना के विकास बर सरलग काम करत हे। आज नवा रायपुर म एक ठिन पत्रकारवार्ता ल संबोधित करत श्री साव ह खेल अउ युवा कल्याण विभाग के ढाई साल के उपलब्धि के बारे म बतईन। ओमन बतईन कि नवा रायपुर अउ जशपुर म तीरंदाजी अकादमी खोले के प्रक्रिया सुरू होगे हे। जल्दीच छत्तीसगढ़ म हॉकी लीग के आयोजन करे जाही। ओमन बतईन कि खेल ल बढ़ावा दे बर राज्य म वन डिस्ट्रिक्ट-वन स्पोर्ट्स के घलो आयोजन करे जाही। श्री साव ह बतईन कि मुख्यमंत्री खेल उत्कर्ष मिशन के तहत राज्य सरकार डहार ले वित्तीय बछर दू हजार छब्बीस-सत्ताईस म एक सौ करोड़ रूपिया के बजट के प्रावधान करे गेहे। एखर तहत एथलीट मैनेजमेंट सिस्टम, स्पोर्ट्स साईंस सेंटर, फीडर सेंटर, एथलीट वेलफेयर, उच्च गुणवत्ता वाले प्रसिक्षण जइसन आने-आने पहलु उपर कार्ययोजना तैयार करे जाही।
अधिकारी-कर्मचारी-कार्य पटल
राज्य सरकार के सामान्य प्रशासन विभाग ह जम्मों विभाग के विभागाध्यक्ष, संभाग आयुक्त, कलेक्टर अउ कार्यालय प्रमुख मन ल चिट्ठी जारी करके अधिकारी-कर्मचारी मनके कार्य पटल ल हर तीन बछर म परिवर्तन करे बर केहे हे। चिट्ठी म केहे गेहे कि लंबा बेरा ले एकेच जघा म या एकेच काम म काम कर्मचारी मनके जघा म बेरा-बेरा म आने कर्मचारी मन ल आने-आने काम मन म सहभागिता अउ प्रसिक्षण के मउका देना चाही।
वीबी/जीरामजी-कार्यशाला
विकसित भारत – रोजगार अउ आजीविका गारंटी मिशन ग्रामीण – वीबी जीरामजी अधिनियम के क्रियान्वयन बर रायपुर के निमोरा स्थित ठाकुर प्यारेलाल राज्य पंचायत अउ ग्रामीण विकास संस्थान म तीन अगस्त ले कार्यशाला के आयोजन करे जावत हे। पांच अगस्त तक चलइया ए कार्यशाला म राज्य के जम्मों निर्वाचित जिला पंचायत सदस्य मन भाग लेवत हे।
कार्यशाला ल संबोधित करत विकसित भारत – जीरामजी योजना के आयुक्त तारन प्रकाश सिन्हा ह किहीन कि विकसित भारत के लक्ष्य ल साकार करे म पंचायत प्रतिनिधि मनके भूमिका बिसेस हवय। श्री सिन्हा ह बतईन कि अधिनियम के तहत हरेक पात्र ग्रामीण परिवार मन ल हर बछर एक सौ पच्चीस दिन रोजगार के गारंटी दे गेहे।
सीएमओ-गिरफ्तार
मुंगेली जिला म पुलिस ह तखतपुर नगर पालिका के मुख्य नगर पालिका अधिकारी-सी.एम.ओ. अमरेश सिंह ल गिरफ्तार करके न्यायिक रिमांड म भेज देहे। ए कार्रवाई जिला के जरहागांव थाना क्षेत्र के ग्राम बरेला म एक अगस्त के रतिहा होय सड़क हादसा म दू झिन लोगन के मउत के बाद करे गेहे। हादसा के बाद उहां खड़े लोगन मन ह बताय रिहीस कि जउन कार ले ए हादसा होइस, ओमा सी.एम.ओ. लिखे रिहीस। इही आधार म पुलिस ह ए कार्रवाई करे हे।
पटवारी-हड़ताल
प्रदेसभर के पटवारी मन ह पदोन्नति अउ वेतन विसंगति दूर करे के मांग ल लेके काली सोमवार के हड़ताल म रिहीन। राजस्व पटवारी संघ छत्तीसगढ़ के आह्वान म प्रदेस के जम्मों जिला मुख्यालय म पटवारी मन अपन लंबित मांग ल लेके प्रदर्सन करत कलेक्टर मन ल मुख्य सचिव के नाम ज्ञापन सौंपीन। अपन दू सूत्रीय मांग ल लेके पटवारी मन ह राजधानी रायपुर के कलेक्ट्रेट म एक दिन के प्रदर्सन करीन।
विश्व स्तनपान सप्ताह
प्रदेस म एक ले सात अगस्त तक विश्व स्तनपान सप्ताह मनाय जावत हे। एखर तहत स्वास्थ्य विभाग डहार ले अस्पताल, सामुदायिक अउ प्राथमिक स्वास्थ्य केन्द्र मन म समुदाय स्तर म जागरूकता गतिविधि के आयोजन होवत हे। अभियान के माध्यम ले गर्भवती माईलोगिन अउ माता मन ल लइका मन ल दूध पिपाय के अउ ओखर वैज्ञानिक फायदा के जानकारी दे जावत हे।
कृषि विवि-काउंसिलिंग
इंदिरा गांधी कृषि विश्वविद्यालय के तहत चलत प्रदेस के सरकारी अउ प्राईवेट महाविद्यालय मन म चालू सैक्षणिक सत्र म बी.एस.सी. कृषि स्नातक पाठ्यक्रम म प्रवेस बर पहिली चरण म ऑनलाइन काउंसिलिंग के काम काली पांच अगस्त ले सुरू होही, जउन ह चौदह अगस्त क चलही। पहिली चरण के काउंसिलिंग म अट्ठारह अगस्त के ऑनलाइन पंजीयन करइया अभ्यर्थी मन ल पीएटी परीक्षा के प्रावीण्य सूची के आधार म प्रोविजनल सीट अउ महाविद्यालय म सीट दे जाही। उहें, बीस ले बाईस अगस्त तक रायपुर स्थित कृषि महाविद्यालय म दस्तावेज परीक्षण होही।
थल सेना-शारीरिक दक्षता प्रशिक्षण
भारतीय थल सेना अग्निवीर भर्ती बछर दू हजार छब्बीस-सत्ताईस के पात्र अभ्यर्थी मन ल रायपुर स्थित जिला रोजगार अउ स्वरोजगार मार्गदर्शन केन्द्र डहार ले निःशुल्क शारीरिक दक्षता प्रशिक्षण उपलब्ध कराय जाही। इच्छुक पात्र अभ्यर्थी दस अगस्त तक लोकभवन के तीर स्थित पुराना पुलिस मुख्यालय परिसर म आवेदन कर सकत हे। अभ्यर्थी मन अपन आवेदन ई-मेल के माध्यम ले घलो निश्चित बेरा तक भेज कर सकत हे।
खबर के मुताबिक जुलाई महीना म भारतीय थल सेना ह ऑनलाइन सामान्य प्रवेस परीक्षा-सीईई के परिणाम घोषित करे रिहीस हे। ए परीक्षा म रायपुर जिला के एक सौ सत्तर अभ्यर्थी सारीरिक दक्षता परीक्षा बर पात्र घोषित होय हे।
बैडमिंटन-प्रतियोगिता
नेपाल म छब्बीस ले इकतीस जुलाई तक राखे गे ग्यारहवां अंतर्राष्ट्रीय बैडमिंटन प्रतियोगिता म जांजगीर-चांपा जिला के जैजेपुर स्थित स्वामी आत्मानंद उत्कृष्ट विद्यालय के कक्षा बारहवीं के छात्र आदित्य प्रभु दुबे ह एकल बैडमिंटन स्पर्धा म स्वर्ण पदक जीते हे। ए प्रतियोगिता म जिला के मौली शर्मा, अंजलि कश्यप अउ फातिमा बख्शी ह रजत पदक जीतीन। उहें, कराटे प्रतियोगिता म ओम साहू ह स्वर्ण पदक अउ स्पर्श पांडे ह फुटबॉल प्रतियोगिता म स्वर्ण पदक जीते हे।
अंडर-नाइंटीन वर्ग म राखे गे ए जम्मों प्रतियोगिता म सुघ्घर प्रदर्सन बर जांजगीर अउ सक्ती जिला के ए खिलाड़ी मनके लहुटे म क्षेत्रवासी मन ह जोरदार स्वागत करीन।
महानदी गंगा आरती
सावन के पहिली सोमवार के काली धमतरी स्थित महानदी के चित्रोत्पला घाट म पहिली घांव ‘महानदी गंगा आरती‘ के आयोजन करे गीस। ए दउरान रूद्री घाट ह शंखनाद, वैदिक मंत्र अउ घंटी के आवाज ले गूंज उठीस। ए मउका म संस्कृति अउ पर्यटन विभाग ह बीस करोड़ रूपिया के लागत ले प्राचीन रूद्रेश्वर महादेव मंदिर परिसर के कायाकल्प के संकल्प लीन।
अउ अब थोरकुन समाचार सार म –
– मुख्यमंत्री विष्णुदेव साय के अगुवई म काली पांच अगस्त के मंत्रालय म राज्य मंत्रिपरिषद के बइठका होही।
– गौरेला-पेण्ड्रा-मरवाही जिला के गौरेला स्थित आयुष्मान आरोग्य मंदिर चनाडोंगरी ह राष्ट्रीय गुणवत्ता आश्वासन मानक के तहत राष्ट्रीय गुणवत्ता प्रमाणन हासिल करे हे।
– रायपुर के विधानसभा रद्दा म आज बिहनिया स्कूल बस के चपेट म आय ले दू बछर के एक झिन लइका के मउत होगे। घटना के बाद गुस्साय परिवार अउ क्षेत्रवासी मन ल चालक के खिलाफ कार्रवाई के मांग करत विधानसभा थाना के घेराव करीन।
– जिला रोजगार अउ स्वरोजगार मार्गदर्शन केन्द्र, रायपुर डहार ले काली पांच अगस्त के बिहनिया ग्यारह बजे ले मंझनिया तीन बजे तक जोरा स्थित लाइवलीहुड कॉलेज म रोजगार मेला के आयोजन करे जाही।
अउ
– वन्य जीव अपराध नियंत्रण ब्यूरो मध्य क्षेत्र भोपाल अउ राज्य उड़नदस्ता दल ह रायपुर अउ बलरामपुर वनमंडल के सामलात टीम ह हाथी दांत तस्करी के आरोप म तीन झिन लोगन मन ल गिरफ्तार करे हे। इंखर तीर ले तीन ठन हाथी के दांत बरामद करे गहे।
आगजनी
बलरामपुर-रामानुजगंज के स्टेट बैंक रोड स्थित एक ठिन कपड़ा दुकान म आज बिहनिया आगी लगे ले लाखों रूपिया के सामान जलके राख होगे। आग लगे के कारण के जांच करे जावत हे।
उहंे, जगदलपुर के अनुपमा चउक स्थित एक बुक डिपो म पाछु रतिहा लगे आगी म काबू पा ले गेहे। ए आगजनी म लाखों रूपिया के सामान जलके खाक होगे हे।