केन्द्रीय शिक्षा मंत्रालय ह स्कूल ल एक घांव फेर ले खोले बर मानक संचालन प्रक्रिया ल जारी कर दीन हे। केन्द्र सरकार ह पन्द्रह अक्टूबर के बाद फेर ले स्कूल खोले ले संबंधित दिसा-निरदेस घलो जारी करीन हे, जउन कि दू भाग म विभाजित हे। स्वास्थ्य मंत्रालय के दिसा-निरदेस के अनुसार स्वास्थ्य अउ सुरक्षा ल ध्यान म राखत हुए कुछु जरूरी नियम बनाय गेहे, जेमा सुरक्षित दूरी बनाय राखय अउ मास्क पहिनना सामिल हे। दिसा-निरदेस के दूसर भाग सैक्षिक अउ महामारी के बीच सिक्षण के नवा पद्धति ले संबंधित हे। सिक्षा मंत्रालय ह ए बछर बर सैक्षिक गतिविधि के वैकल्पिक कैलेंडर बनाय ल घलो जरूरी बतईन हे। सिक्षक मन ले केहे गेहे कि ओमन सूचना तकनीकी के नवा कौसल ल अपनाय, ताकि कक्षा म एखर समूचित इस्तेमाल करे जा सकय।
इही बीच, छत्तीसगढ़ सरकार ह किहीन कि प्रदेस म पन्द्रह अक्टूबर ले स्कूल नइ खोले जाही। स्कूल सिक्षा मंत्री डाॅक्टर प्रेमसाय सिंह टेकाम ह किहीन कि सबो स्कूल प्रमुख अउ पालक मन ले सहमति लेके बाद ही ए तय करे जाही कि प्रदेस म स्कूल खोले जाही या फेर नहीं।
एखर संगेसंग केन्द्र सरकार ह कोचिंग संस्था ल घलो खोले के अनुमति दे देहे। एखर बर सबो राज्य अउ केन्द्रसासित प्रदेस ल दिसा-निरदेस जारी कर दे गेहे। ए संबंध म घलो राज्य मन ल अधिकार दे गेहे।
जावड़ेकर-सिनेमा हाॅल
देसभर के सिनेमा हाॅल अवइया पन्द्रह अक्टूबर ले एक घांव फेर सुरू हो जही। केन्द्रीय सूचना प्रसारण मंत्री प्रकाश जावड़ेकर ह एखर बारे म मानक संचालन प्रक्रिया के जानकारी दीन। आज नई दिल्ली म पत्रकार मन ले गोठबात करत हुए श्री जावड़ेकर ह किहीन कि गृह मंत्रालय डहार ले जारी करे गे दिसा-निरदेस के अनुसार सिनेमा हाॅल म कुल क्षमता के आधा सीट म ही लोगन मन ल प्रवेस दे जाही। ओमन ह किहीन कि सुरक्षित दूरी के पालन करत हुए दू कुर्सी के बीच जगह घलो छोड़े जाही अउ फेस मास्क, सैनिटाईजर के उपयोग करना जरूरी होही।
उहें, फिल्म सुरू होय के पहिली अउ बीच म कोरोना ले संबंधित जागरूकता बर एक मिनट के वीडियो देखाय जाय के जानकारी घलो दीन।
संविदा स्वास्थ्यकर्मी
प्रदेस के स्वास्थ्य विभाग ह कोरोना संक्रमण ल देखत हुए आपातकालीन स्थिति ले निपटे बर तेरह सौ अटहत्तर संविदा स्वास्थ्य कर्मचारी के नियुक्ति के अनुमति दे देहे। ए नियुक्ति ह सबो जिला म उहां के मुख्य चिकित्सा अउ स्वास्थ्य अधिकारी डहार ले जरूरत के आधार म करे जाही। उहें, वर्तमान म काम करइया एक हजार छह सौ चैंतीस झिन संविदा स्वास्थ्य कर्मी मनके सेवा अवधि अवइया तीन महीना तक बढ़ाय जाय ल घलो मंजूरी दे देहे। एमा स्टाफ नर्स, लैब टैक्नीशियन, वार्ड बाॅय, डाटा एंट्री आॅपरेटर अउ स्वच्छता कर्मी जइसे पद सामिल हे।
कोरोना-सघन सर्वे अभियान
प्रदेस के मनखे मन ल कोरोना संक्रमण ले बचाय बर स्वास्थ्य विभाग के टीम ह सघन सामुदायिक सर्वेक्षण के तहत घर-घर जाके सर्वेक्षण करत हे। ए बेरा म लोगन मन ले सर्दी, बुखार, सांस ले म परेसानी अउ थकान जइसे सामान्य सवाल पूछे जात हे। ए सर्वे ल बारह अक्टूबर तक चलाय जाही।
स्वास्थ्य मंत्री टी.एस. सिंहदेव ह लोगन मन ले अपील करीन हे कि सर्वेक्षण म सामिल होवइया अधिकारी अउ कमरचारी मन ल सही जानकारी दे जाय। ए बेरा म अगर कोनों मनखे म कोरोना के लक्षण पाय जात हे, त उंखर जांच करे जाही अउ इलाज घलो तुरते सुरू हो जही। श्री सिंहदेव ह कहिन कि ए साबित हो चुके हे कि कोरोना के लक्षण जल्दी पता चले अउ तुरते इलाज सुरू होय ले कोरोना के मरीज ह पूरा तरीका ले ठीक हो सकत हे। संगेसंग ओमन ह ए अभियान ल सफल बनाय बर घलो अपील करीन।
ए सर्वेक्षण बर नगरीय क्षेत्र म रायपुर नगर निगम के आयुक्त सौरभ कुमार अउ ग्रामीण क्षेत्र म रायपुर जिला पंचायत के सीईओ गौरव कुमार सिंह ल नोडल अधिकारी बनाय गेहे। उहें, डिप्टी कलेक्टर मुकेश कोठारी ए अभियान बर पूरा रायपुर जिला के सहायक नोडल अधिकारी होही।
इही बीच, कोंडागांव जिला म सघन सामुदायिक सर्वेक्षण बर स्थानीय विधायक मोहन मरकाम आज प्रचार करे वाले गाड़ी ल हरा झंडी दिखाके रवाना करीन।
मोर बिजली-ऐप
मुख्यमंत्री भूपेश बघेल ह बिजली बिल जमा कराय के संगेसंग अउ कतकोन सुविधा देवइया नवा मोबाइल ऐप के सुरूवात करीन। मोर बिजली ऐप ले उपभोक्ता मन घर बइठे बिजली बिल जमा करा सकथे।
इहां बतादन कि छत्तीसगढ़ देस के पहिली राज्य बन गेहे, जिहां मोबाइल ऐप ले बिजली बिल जमा कराय के सुविधा दे गेहे। ए मोबाइल ऐप म बिजली ले जुड़े सिकायत घलो करे जा सकत हे। उहें, बिजली बिल के पुराना जानकारी घलो कतको बेरा देखे जा सकथे।
कोरोना जागरूकता अभियान
प्रदेस म ए दिन जिहां एक कोति कोरोना संक्रमण उपर नियंत्रण बर सर्वें करा के घर-घर जा के संक्रमित मनके पहिचान करे जात हे। त उहें, दूसर कोति ए महामारी ले बाचे बर एक ठिन बड़का पैमाना म जागरूकता बर अभियान घलो चलाय जात हे। एखर तहत आने-आने जिला म उहां के स्थिति के अनुसार आने-आने कार्यक्रम आयोजित करे जात हे।
इही बीच, महासमुंद के लोगन मन ल कोरोना संक्रमण ले बचाव बर हांका अभियान चलाय जात हे। एखर तहत छत्तीसगढ़ी अउ हिन्दी म पहिली ले रिकार्ड करे गे अपील ल स्पीकर के माध्यम ले बस्ती अउ मोहल्ला म लोगन मन ल सुनाय जात हे।
उहें, जांजगीर-चांपा के पंतोरा गांव म ग्राम पंचायत के पदाधिकारी डहार ले जागरूकता अभियान चलाय जात हे। एखर बारे म गांव के सरपंच रूपा मिर्झा ह बतईन कि पंचायत पदाधिकारी घर-घर म जाके लोगन मन ल जागरूक करे के संगेसंग पाॅम्पलेट अउ ब्रोसर घलो बांटे जात हे।
मरवाही-उपचुनाव
मरवाही विधानसभा उपचुनाव ल देखत पेण्ड्रा-गौरेला-मरवाही के कलेक्टर अउ जिला निर्वाचन अधिकारी डोमन सिंह ह किहीन कि चुनाव के प्रक्रिया संपन्न होय तक आदर्श आचार संहिता के पालन जरूरी रूप ले करे जाय। आज कलेक्ट्रेट सभा कक्ष म सेक्टर अधिकारी मनके कारीकरम ल संबोधित करत हुए ओमन किहीन कि सबो सेक्टर अधिकारी अपन-अपन क्षेत्र के मतदान केन्द्र के दउरा करके ए सुनिश्चित करय कि उहां मतदाता मन बर मूलभूत सुविधा उपलब्ध कराय जाय।
जिला निर्वाचन अधिकारी ह किहीन कि मतदान केन्द्र म बिजली-पानी के बेवस्था के संगेसंग मतदान केन्द्र ल सैनिटाईज घलो करे जाय। ओमन यहू बतईन कि मतदान दल ल गलब्स, मास्क, सैनिटाईजर पाउच, पीपीई किट जइसे साधन उपलब्ध कराय जाय। एखर अलावा मतदान केन्द्र म सैनिटाईजर अउ साबुन पानी के व्यवस्था घलो करे जाय।
कृषि मंत्री-उद्यानिकी विवि
दुरूग जिला के सांकरा म हाल ही म सुरू करे गे महात्मा गांधी उद्यानिकी विश्वविद्यालय म इही सत्र ले स्नातक पाठ्यक्रम म प्रवेस सुरू कर दे जाही। ए नवा विश्वविद्यालय के अंतर्गत स्नातक महाविद्यालय के स्थापना घलो जल्दी करे जाही। कृषि मंत्री रविन्द्र चैबे ह विभागीय समीक्षा बइठका के दउरान किहीन कृषि अउ कामधेनू विश्वविद्यालय के अंतर्गत बैकलाॅग के खाली पद म भर्ती के प्रक्रिया जल्दी सुरू करे जाही।
एखर बाद श्री चैबे ह इंदिरा गांधी कृषि विश्वविद्यालय रायपुर अउ कामधेून विश्वविद्यालय दुरूग के कुलपति अउ महात्मा गांधी उद्यानिकी विश्वविद्यालय के विशेष अधिकारी मनके बइठका लेके प्रदेस म कृषि अउ उद्यानिकी के क्षेत्र म अनुसंधान समेत आने-आने बिसय म गोठबात करीन। ए दउरान ओमन खरीफ फसल म कीड़ा के प्रकोप ल रोके बर किसान मन ल दवा के इस्तेमाल करे के जानकारी दे जाय के घलो बात किहीन।