ग्राम उत्कर्ष अभियान-गांव चयन
राज्य सरकार ह धरती आबा जनजातीय ग्राम उत्कर्ष अभियान म प्रदेस के एक सौ साठ जनजातीय गांव ल चुने के फइसला लेहे। ए गांव म सामुदायिक वन संसाधन के संरक्षण संवर्धन अउ प्रबंधन बर बिसेस योजना लागू करे जाही। आदिमजाति विभाग ह ए संबंध म सबो जिला कलेक्टर मन ल निरदेस जारी कर देहे। अभियान म चुने गे हरेक ग्रामसभा ल योजना ल बने ढंग ले चलाय बर पंद्रह लाख रूपिया के मंजूरी दे जाही। संगेसंग चुने गे गांव म सामुदायिक, वन संसाधन प्रबंधन समिति बनाय जाही जउन ग्रामसभा ले योजना चलाही। एखर बर ग्रामसभा के नाव ले राष्ट्रीयकृत बैंक म अलग ले खाता खोले जाही।
यूसीसी-समिति
राज्य सरकार ह प्रदेस म समान नागरिक संहिता यूसीसी लागू करे के जरूरत अउ ओखर रूपरेखा म सुझाव दे खातिर समिति बनाय हे। ए समिति राज्य के रहवइया मनके व्यक्तिगत सिविल मामला ले जुड़े मौजूदा कानून अउ व्यवस्था के समीक्षा करही। इच्छुक नागरिक अउ संगठन अपन सुझाव तीस सितंबर तक ईमेल यूसीसी छत्तीसगढ़ ऐट द रेट सीजीडॉट जीओवीडॉट इन या फेर डाक ले समिति ले भेज सकत हे।
गौधाम-योजना दायरा
राज्य सरकार ह गौधाम योजना के दायरा बढ़ा देहे। पशुधन विकास विभाग ह नियम म फेरबदल करत गौधाम चलाय बर ग्राम पंचायत ल प्राथमिकता दे अउ सहरी गौठान ल योजना म सामिल करे के फइसला ले गेहे। योजना म गौधाम के संचालन स्वयंसेवी संस्था पंजीयन होय गौसाला ट्रस्ट अउ ग्राम पंचायत ले करे जाही। योजना के उद्देस्य निराश्रित गौवंस ल सुरक्षित करना अउ बने देखभाल करना हे।
दिव्यांगजन उपकरण वितरण
मुख्यमंत्री विष्णुदेव साय आज रईपुर म प्रोजेक्ट सहारा-दिव्यांगजन उपकरण वितरण कारीकरम म संघरीन। समाज कल्याण विभाग अउ जिला प्रशासन कोति ले राखे गे कारीकरम म मुख्यमंत्री ह दिव्यांगजन मन ल तीन करोड़ अंठावन लाख रूपिया ले जादा के सहायक उपकरण बांटिन। ए बेरा म मुख्यमंत्री ह किहीन हे कि ए पहल सिरिफ सहायक उपकरण दे तक सीमित नो हय, भलुक दिव्यांगजन मन ल सम्मान, आत्मविस्वास अउ बने जीवन देके परयास हरय। अेामन बतइन कि ए अभियान ले अभी तक एक हजार सात सौ ले जादा दिव्यांगजन मन ल फायदा मिले हे।
मुख्यमंत्री ह सरदार बलवीर सिंह जुनेजा इंडोर स्टेडियम के मरम्मत अउ सौंदर्यीकरण बर सात करोड़ रूपिया दे के घोसना करीन।
मुख्यमंत्री-संवाद
मुख्यमंत्री विष्णुदेव साय ह काली रईपुर म राखे कारीकरम म नीट परीक्षा म सफल प्रयास आवासीय विद्यालय के विद्यार्थी मन संग गोठबात करीन। ए मउका म मुख्यमंत्री ह किहीन कि पूरा छत्तीसगढ़ बर ए गरभ के बिसय हरय कि प्रदेस म चलाय जात प्रयास आवासीय विद्यालय के पढ़इया लइका मन ह नीट जइसन कठिन परीक्षा म सफलता पाय हे।
खबर के मुताबिक प्रदेस म सत्रह ठिन प्रयास आवासीय विद्यालय चलाय जात हे।
एनालॉग पनीर-रोक
राज्य सरकार ह एनालॉग पनीर अउ आने डेयरी उत्पाद बनाय भंडारन, परिवहन, वितरण अउ बिक्री म तत्काल प्रभाव ले प्रतिबंध लगा देहे। ए संबंध म लोक स्वास्थ्य परिवार कल्याण विभाग ह अधिसूचना जारी करे हे। खाद्य औषधी प्रशासन विभाग के मुताबिक जांच म पाय गे कुछेक उत्पाद दूध से बने नइ होय के बादो ओला पनीर अउ डेयरी उत्पाद के रूप म बेचे जात रिहीस। प्रतिबंध ओ उत्पाद म लागू होही, जउन म दूध के जघा वनपस्ति वसा, वनपस्ति तेल या आने गैर दुग्ध सामग्री बउरे गेहे अउ जेला असली डेयरी उत्पाद असन बताय जात हे। ए प्रतिबंध बछर भर तक प्रभावी रइही। खाद्य विभाग ह केहे हे प्रतिबंधित उत्पाद ल बनाय या बेचे जाय म नियमानुसार कार्रवाई करे जाही।
ज्ञानेश्वरी यादव-सम्मानित
हालही म होय कॉमन वेल्थ गेम्स म माईलोगन मन के तिरपन किलोग्राम भारोत्तोलन स्पर्धा म रजत पदक जीत के छत्तीसगढ़ के नाम रोसन करइया ज्ञानेश्वरी यादव आज रईपुर पहुंचिन। ओमन मुख्यमंत्री निवास म मुख्यमंत्री विष्णुदेव साय ले सौजन्य भेंट करीन। मुख्यमंत्री ह ज्ञानेश्वरी यादव के सुवागत अउ अभिनंदन करत हुए घोसना करीन कि ज्ञानेश्वरी ल राष्ट्रमंडल खेल म ओखर उत्कृष्ट प्रदर्सन बर राज्य सरकार डहार ले तीस लाख रूपिया के प्रोत्साहन रासि दे जाही। संगेसंग ओला आउट ऑफ टर्न डीएसपी पद म पदोन्नति घलो दे जाही। गौरतलब हे कि ज्ञानेश्वरी यादव छत्तीसगढ़ के राजनांदगांव जिला के रहइया हवय।
विश्वविद्यालय कुल सचिव-गिरफ्तार
दुरूग जिला के हेमचंद यादव विश्वविद्यालय के एक दैनिक भोगी महिला करमचारी के वेतन म गबन के मामला म विश्वविद्यालय के कुल सचिव भूपेन्द्र कुमार कुलदीप ल पुलिस ह गिरफ्तार करे हे। पुलिस के मुताबिक जांच म पता चलिस कि फरवरी दू हजार पच्चीस ले जुलाई दू हजार छब्बीस के बीच दबाव बनाके महिला करमचारी के बैंक खाता म अवइया वेतन म एक लाख उनचास हजार रूपिया ले जादा के रकत ऑनलाइन ले दीगर खाता म भेजे गीस। विश्वविद्यालय के जांच समिति के रिपोर्ट, बैंक रिकॉर्ड अउ आने साक्ष्य के आधार म पद के दुरूपयोग अउ अमानत म खयानत के पुष्टि होय के बादे पुलिस ह आरोपी ल गिरफ्तार करे हे। मामला के जांच होवत हे।
उपसरपंच-हत्या
दुरूग जिला म काली रतिहा कुन धमधा रोड म लूट के वारदात ल अंजाम देबर पहुंचे चार झिन बदमास मन ह विरोध करइया गांव तुमाकला के उपसरपंच प्रकाश सिंह कश्यप के धारदार हथियार ले हत्या कर दीन। वारदात के बाद आरोपी मन उंखर तीर के मोबाइल फोन अउ करीबन चार हजार रूपिया नगदी लूट के फरार होगे। पुलिस के मुताबिक घटना जेवरा सिरसा थाना क्षेत्र म करहीडीह ले चिखली चौक के बीच होइस हे।
जेवरा सिरसा चौकी प्रभारी समित मिश्रा ह बतइन कि सुरूआती जांच म मामला लूट के दउरान हत्या के लागत हे। आरोपी मनके पहिचान बर तीर-तखार म लगे सीसीटीवी कैमरा के फुटेज खंगालत हे।
पार्षद-धोखाधड़ी मामला
भिलाई नगर निगम के महिला पार्षद रीता सिंह उंखर पति रमेशचंद सिंह राजपूत अउ पुत्र मानवचंद सिंह के खिलाफ करोड़ो रूपिया के भुंइया अउ खनन संपत्ति सौदा म कथित धोखाधड़ी के मामला दरज करे गेहे। न्यायालय के आदेस के बाद उतई थाना पुलिस ह भारतीय न्याय संहिता के आने-आने धारा म अपराध दरज करके मामला के जांच सुरू कर देहे।
ईडी-संपत्ति जब्त
भारतमाला परियोजना के तहत भूमि अधिग्रहण मुआवजा घोटाला म प्रवर्तन निदेशालय-ईडी ह बारह करोड़ अठहत्तर लाख रूपिया के बांसठ ठिन चल-अचल संपत्ति अस्थायी रूप ले कुर्क करे हे। ए संपत्ति म करीबन चार करोड़ उनहत्तर लाख रूपिया के सेयर अउ म्यूचुअल फंड निवेस सामिल हे। खबर के मुताबिक रईपुर-बिशाखापट्टनम राष्ट्रीय राजमार्ग बर भुंईया अधिग्रहण म होय फर्जीवाड़ा अउ मनि लॉन्ड्रिंग के मामला म ईडी ह ए कार्रवाई करे हे।
सावन सोमवार
आज सावन के पहिली सम्मार हे। ए मउका म राजधानी रईपुर समेत प्रदेसभर के शिव मंदिर म भक्त मन के भीड़ उमड़े हे श्रध्दालू भिंसरहाच ले भगवान भोलेनाथ के जलाभिषेक करके पूजापाठ करत हे। रईपुर म कांवड़िया मन ह महादेवघाट के हटकेश्वर महादेव म जल चढ़ाइन हे। उहें, बुढ़ेश्वर महादेव समेत आने शिव मंदिर म सुग्घर सजावट करे गेहे। भक्त मनके कतार सबो मंदिर म देखे जा सकत हे। जिंहा लोगन मानता मानत हे।
काली इतवार के अमरकंटक ले निकले कांवड़ यात्रा म हजारों शिव भक्त पवित्र जल लेके भगवान भोलेनाथ के अभिषेक खातिर भोरमदेव पहुंचिन। उपमुख्यमंत्री विजय शर्मा के पहल म अमरकंटक के मृत्युंजय आश्रम म कांवड़ यात्री मन बर मुफत म भोजन परसादी अउ जरूरी सुविधा के बिसेस व्यवस्था करे गे रिहीस।
रविदास जयंती
भारतीय जनता पार्टी डहार ले संत शिरोमणि रविदास जी के छै सौ पचासवां जयंती के मउका म आयोजित प्रदेस स्तरीय कलस वंदन अभियान के तहत वाराणसी ले लाय गे पवित्र माटी अउ जल युक्त कलस के वितरण के कारीकरम काली चार अगस्त के रईपुर के पंडित दीनदयाल ऑडिटोरियम म आयोजित करे जाही। ए मउका म मुख्यमंत्री विष्णुदेव साय के संगे कतकोन साधु संत अउ आने-आने समाज के प्रमुख उपस्थित रइही।