नशा-मुक्त युवा संकल्प अभियान
प्रधानमंत्री नरेंद्र मोदी ह आज विकसित भारत बर ‘‘नशा मुक्त युवा‘‘ संकल्प अभियान के सुरूआत करिन। वर्चुअल माध्यम ले आयोजित ए कारीकरम म ओमन किहीन कि विकसित भारत बर युवा मन के शारीरिक रूप ले स्वस्थ, मानसिक रूप ले मजबूत अउ आत्मबिस्वास ले भरपूर होना जरूरी हे। हम सब ल ए संकल्प लेना हे, हमर युवा नशा के खतरा ल समझंय, जागरूक रहंय अउ ओखर ले दुरिहा रहे बर संकल्प लेवंय।
प्रधानमंत्री ह यहू किहीन कि-नशा मुक्ति बर सौ हफ्ता के ‘जन-भागीदारी‘ सुरू करे जाही अउ देसभर म हर इतवार के सप्ताहिक कारीकरम होहीं।
ए बेरा श्री मोदी ह यहू किहीन कि-नशा जिनिस के लत ह लोगन ल अपन लक्ष्य ले भटकाथे अउ एखर ले देस के ताकत घलो कमजोर होथे। ए बेरा प्रधानमंत्री ह आग्रह करिन कि-सामाजिक बदनामी के डर ले नसा जिनिस के सेवन के मामला ल झन लुकाव। परिवार मन ल सुरूआती चरण म ही चेतावनी के संकेत के चिन्हारी करके खुल के गोठबात करके माहौल बनाना चाही।
प्रधानमंत्री ह यहू घलो किहीन कि-अलग-थलग रैहे, आने बेवहार, गोठबात ले बांचे बर, अधरतिहा ले बाहिर रेहे या फेर घेरी-बेरी पइसा मांगे जइसन आदत नसा जिनिस सेवन के सुरूआती संकेत हो सकथें। ओमन स्कूल, कालेज अउ विश्वविद्यालय के शिक्षक मन ले घलो अपील करिन कि-ओमन नसा जिनिस ले होवइया खतरा उपर सरलग लइका मनले गोठबात करंय। बतादन कि ए कारीकरम म 28 हजार जघा ले एक करोड़ ले जादा युवा मन हिस्सा लेइन।
ऐति, छत्तीसगढ़ म घलो ‘‘नसा मुक्त युवा‘‘ संकल्प अभियान के तहत राजधनी रइपुर के लोकभवन म राज्य स्तरीय कारीकरम के आयोजन करे गिस। कारीकरम म राज्यपाल रमेन डेका अउ मुख्यमंत्री विष्णुदेव साय के संग अब्बड़ झन युवा, पढ़इया लइका, स्वयंसेवी संगठन के संग आने-आने युवा संगठन के सदस्य सामिल होइन। ए बेरा कारीकरम म प्रतिभागी मन नसा मुक्ति के सपथ लेवत समाज ल नसा के दुस्प्रभाव ले मुक्त कराय बर अपन भूमिका निभाय के संकल्प ल दोहराइन।
ए मउका म युवा मन ल नसा जिनिस ले होवइया दुस्प्रभाव के जानकारी दे गिस। संगेसंग ओमन ल स्वस्थ जीवनसैली अपनाय के संग सकारात्मक सोच राखत राष्ट्र निरमान म भागीदारी निभाय के संदेस दे गिस।
बतादन कि ए अभियान के तहत स्कूल-कालेज, विश्वविद्यालय, राष्ट्रीय सेवा योजना, राष्ट्रीय कैडेट कोर, माय भारत युवा संगठन के संगेसंग आने-आने युवा संगठन के मदद ले जन-जागरूकता कारीकरम आयोजित करे जाही।
नये कानून-कार्यशाला
मुख्यमंत्री विष्णुदेव साय ह आज रइपुर म ‘‘नवीन आपराधिक विधियों के माध्यम से डिजिटल न्याय को सशक्त बनाने‘‘ के बिसय उपर आयोजित कार्यसाला म सामिल होइन। ए मउका म ओमन किहीन कि-हाल बेरा ए जरूरत ल चेत म राखत तियार करे गे नवा आपराधिक कानून देस के न्याय बेवस्था म ऐतिहासिक बदलाव के वाहक बने हे। ए कानून के उद्देस्य सिरिफ अपराधी मन ल दंड देना नइ हे, भलुक आम नागरिक ल तुरते सुरक्षा अउ न्याय देवाना हे।
ए मउका म छत्तीसगढ़ उच्च न्यायालय के मुख्य न्यायाधीस रमेश सिन्हा ह किहीन कि-ए तीनों नवा आपराधिक कानून के प्रभावी क्रियान्वयन ले प्रदेस के न्याय प्रणाली जादा पारदर्सी अउ तकनीक आधारित बनही। ओमन यहू किहीन कि ए कानून मनके सफलता सिरिफ उंखर लागू होय म नइ, भलुक एखर ले जुरे सबो संस्था मन डहार ले प्रभावी क्रियान्वयन म निहित हे।
कारीकरम ल उप-मुख्यमंत्री अउ गृह मंत्री विजय शर्मा के संग विधि-विधायी कारज मंत्री गजेंद्र यादव घलो संबोधित करिन।
प्रधानमंत्री फसल बीमा योजना-तिथि
प्रधानमंत्री फसल बीमा योजना के तहत बीमा कराय के आखिरी तारीख 14 अगस्त तक बढ़ा दे गेहे। एखर ले अइसन किसान जउन निर्धारित बेरा 31 जुलाई तक अपन फसल के बीमा नइ कराय पाय रिहीन, तहू मन अब उपराहा बेरा के लाभ उठाके योजना ले जुड़ सकहीं।
कृषि विभाग के अधिकारी मन बतइन कि-ग्राम स्तर म धान सिंचित- असिंचित, मक्का अउ सोयाबीन के संगे राजस्व निरीक्षक मंडल स्तर म मूंगफली, राहेर, उरीद, मूंग, कोदो-कुटकी अउ रागी ल प्रधानमंत्री फसल बीमा योजना के तहत अधिसूचित करे गेहे।
केंद्रीय स्वास्थ्य मंत्री-सारथी परियोजना
केंद्रीय स्वास्थ्य अउ परिवार कल्याण मंत्री जेपी नड्डा ह देसभर के अस्पताल अउ चिकित्सा संस्थान मन म सारथी परियोजना के विस्तार के समीक्षा करिन। ए बेरा देसभर के अस्पताल म ए सारथी परियोजना ल लागू करे बर बड़का अउ स्थायी ढंाचा तियार करे उपर गोठबात होइस। स्वास्थ्य मंत्रालय ह बतइस हे कि सारथी परियोजना के लक्ष्य प्रसिक्षित युवा स्वयंसेवक मनके जरिया ले मरीज मनके अनुभव लेके सार्वजनिक स्वास्थ्य सेवा म सामुदायिक भागीदारी ल मजबूत करना हे।
नीट-पीजी परीक्षा
केंद्रीय स्वास्थ्य अउ परिवार कल्याण मंत्री जेपी नड्डा ह राष्ट्रीय पात्रता सह-प्रवेस परीक्षा-स्नातकोत्तर-नीट-पीजी के तियारी के समीक्षा करिन। ए बेरा श्री नड्डा ह किहीन कि परीक्षा ल निस्पक्ष, पारदर्सी अउ अभ्यर्थी हितैसी बनाय बर सबो जरूरी कदम उठाय जाय। बतादन कि परीक्षा 30 अगस्त के एके पारी म करीबन 340 सहर अउ एक हजार तीन सौ ले जादा परीक्षा केंद्र म आयोजित करे जाही।
मुख्यमंत्री-अग्रिम कर हस्तांतरण
मुख्यमंत्री विष्णुदेव साय ह केंद्र सरकार डहार ले राज्य मन ल अग्रिम कर हस्तांतरन के निरनय के सुवागत करिन हे। ओमन किहीन कि राज्य मन के बिकास अउ जरूरत ल चेत म राखत बेरा ले पहिली ‘कर‘ हिस्सादारी उपलब्ध कराना केंद्र सरकार के संवेदनसील, दूरदर्सी अउ बिकासउन्मुखी सोच के परिचायक हे। मुख्यमंत्री ह यहू किहीन कि छत्तीसगढ़ ल अग्रिम कर हस्तांतरन के रूप म तीन हजार छै सौ दू करोड़ रूपिया मिले ले प्रदेस म अधोसंरचना बिकास, जन कल्याणकारी योजना अउ आने-आने बिकास परियोजना के कारज ल अउ गति मिलही।
शिक्षा मंत्री-वीएसके ऐप
स्कूल शिक्षा मंत्री गजेंद्र यादव ह किहीन हें कि वीएसके ऐप म अवइया तकनीकी समस्या के सेति कोनो घलो शिक्षक मनके वेतन नइ काटे जाही। ओमन अधिकारी अउ तकनीकी टीम ल पंद्रह अगस्त तक ऐप के सबो समस्या के समाधान करे के निरदेस देइन हें। शिक्षा मंत्री ह यहू किहीन हें कि- शिक्षक मनके सुझाव के आधार म वीएसके ऐप ल अउ बेहतर बनाय जाही।
वायुसेना-अग्निपथ भर्ती
भारतीय वायुसेना ह अग्निपथ योजना के तहत अग्निवीर वायु अयोध्दी भर्ती के नोटिफिकेसन जारी कर देहे। ए भर्ती हॉस्पिटैलिटी अउ हाउसकीपिंग स्ट्रीम बर होही। एखर बर उम्मीदवार मन 17 अगस्त तक ऑफलाइन आवेदन कर सकत हे। आवेदन फारम आई.ए.एफ के वेबसाइट ले डाउनलोड करके डाक या ड्रॉप बॉक्स के जरिया ले निर्धारित वायुसेना के स्टेसन भेजे ल परही। आवेदक मन बर दसवीं पास होना जरूरी हे।
खेल पुरस्कार-आवेदन
राज्य ‘‘खेल अउ युवा कल्याण‘‘ विभाग ह बछर- दू हजार पच्चीस-छब्बीस बर राज्य खेल अलंकरन, मुख्यमंत्री ट्रॉफी, नगद पुरस्कार, प्रेरणा निधि अउ खेलवृत्ति बर पात्र खिलाड़ी मन के संग प्रसिक्षक अउ निर्णायक मनले आवेदन मंगाय हे। राज्य खेल संघ मनके अनुसंसा के संगे आवेदन ल जिला कार्यालय या संचालनालय म पांच अगस्त तक जमा करे जा सकत हे। उहें, पुरस्कार नियम के अनुसार जेन खिलाड़ी मनके मान्यता प्राप्त खेल संघ डहार ले अनुसंसा नइ करे गेहे, फेर उंखर उपलब्धि जादा हे, तहू मन निर्धारित प्रारूप म अपन आवेदन जमा कर सकथंे।
भाजपा-सहयोग केंद्र
भारतीय जनता पार्टी के प्रदेस इकाई डहार ले सहयोग केंद्र ल फेर सुरू करे जावत हे। काली सम्मार दिन याने तीन अगस्त ले भाजपा प्रदेस कार्यालय कुशाभाऊ ठाकरे परिसर म आयोजित सहयोग केंद्र म प्रदेस के मंत्री, कार्यकर्ता अउ आमजन के समस्या ल सुनहीं। ए कारीकरम सात अगस्त तक चलही। एखर बर कार्यकर्ता मन ल मंझनिया दू बजे ले तीन बजे तक प्रदेस कार्यालय पहुंचके पंजीयन कराय ल परही। ओखर बाद मिले टोकन के आधार म सुनवाई करे जाही।
हाथी विचरण
रायगढ़ जिला के बंगुरसिया के तिर रायगढ़-पलीघाट रद्दा म 28 ठन जंगली हाथी मन के दल किंजरत हे। खबर मिलतेच वन विभाग ह इलाका म हाथी मन उपर निगरानी बढ़ा देहे। उहें, विभाग ह रायगढ़-पलीघाट रद्दा म अवइया-जवइया अउ गाड़ी चलइया मन ले बिसेस रूप ले सतर्क रहे के अपील करे हे।