आतंकवादी हमला-मजदूर मौत
जम्मू कश्मीर के कुलगाम जिला म काली संझा आतंकवादी हमला म छत्तीसगढ़ के दू झन मजदूर मनके मउत होगे। आतंकवादी मन ह ए हमला केलम इलाका म करीन। आतंकी मनके हमला म एक झन मजदूर के मउका म ही मउत होगे उहें, गंभीर रूप ले घायल दूसर मजदूर ह इलाज के दउरान अस्पताल म दम तोड़ दीस।
छत्तीसगढ़ के रहइया ए दूनों मजदूर केलम म ईंटा भट्ठी म काम करे बर गे रिहीन। हमला म मारे गे श्रमिक मनके नाम दीपक रात्रे अउ भूपेन्द्र भैना रिहीस। दीपक रात्रे सक्ति जिला के बंुदेली गांव अउ भूपेन्द्र भैना सारंगढ़-बिलाईगढ़ जिला के धनसीर छुईहा गांव के रहइया रिहीन।
मुख्यमंत्री विष्णुदेव साय ह ए घटना ल अत्यंत पीड़ादायक बताय हे। ओमन मृतक श्रमिक मन ल विनम्र श्रध्दांजलि देवत हुए किहीन कि छत्तीसगढ़ सरकार पीड़ित परिवार मन संग खड़े हे। मुख्यमंत्री ह दूनों मृतक के परिजन मन ल राज्य सरकार डहार ले बीस-बीस लाख रूपिया देके घोसना करे हे।
उपमुख्यमंत्री विजय शर्मा ह अपन दिल्ली प्रवास के दउरान दूनों दिवंगत के परिजन मन ले दूरभाष म चर्चा करीन। ओमन पीड़ित परिवार मन ल ए कठिन समय म राज्य सरकार डहार ले हरसंभव मदद के भरोसा दिलाइन।
उहें, नेता प्रतिपक्ष डॉक्टर चरणदास महंत ह आतंकी हमला म प्रदेस के एडीजी अमित कुमार से घलो चर्चा कर घटना के जानकारी लीन अउ मृतक मनके परिजन मन के सहायता बर जरूरी निरदेस दीन।
प्रधानमंत्री-संदेश
प्रधानमंत्री नरेंद्र मोदी ह काली सोशल मीडिया म एक ठन वीडियो संदेस जारी कर युवा मन ले गाली-गलौच अउ नफरत ले दूरिहा रहय के अपील करे हे। ओमन किहीन कि गाली देले कोनो समस्या के समाधान नइ होवय। जंतर-मंतर के हाल के घटना के जिक्र कतर हुए ओमन किहीन कि कुछेक लइका मन अइसे भाषा के इस्तेमाल करे हे, जउन ह कोनो भी सभ्य समाज बर उचित नइ हे। ओमन किहीन कि उंखर अउ उंखर दिवंगत माता के बारे म घलो अपशब्द केहे गेहे, फेर बचपन म गलती हो जथे अउ ओला सुधारे के अवसर घलो मिलना चाही।
प्रधानमंत्री ह किहीन कि लइका मन ल सजा देना या समाज म अपमानित करे के बजाय उनला सही रास्ता दिखाना चाही। ओमन किहीन कि ओमन ए लइका मन ल क्षमा करत हे अउ समाज ले घलो उनला सुधारे के अवसर देके अपील करत हे। ओमन किहीन कि देस आगू बाढ़त हे अउ ओमन चाहथे कि देस के युवा मन घलो आगू बाढ़य अउ राष्ट्र निर्माण म अपन भागीदारी निभावय।
केंद्र सरकार-कर राशि
केंद्र सरकार ह आज राज्य मन ल कर हस्तांतरण के रूप म एक लाख नौ हजार उन्नीस करोड़ रूपिया के अतिरिक्त किस्त जारी करे हे। ए रासि दस अगस्त के निर्धारित नियमित मासिक हस्तांतरण के अतिरिक्त हरय। एमा छत्तीसगढ़ ल तीन हजार छै सौ दू करोड़ रूपिया जारी करे गेहे। केंद्रीय वित्त मंत्रालय ह केहे हे कि ए अतिरिक्त किस्त के उद्देस्य राज्य मन ल पूंजी अउ विकास व्यय म तेजी लाय बर जादा अवसर प्रदान करना हरय।
राष्ट्रपति-लोक परीक्षा
राष्ट्रपति द्रौपदी मुर्मू ह लोक परीक्षा-अनुचित साधन निवारण संशोधन विधेयक-दू हजार छब्बीस ल मंजूरी दे देहे। ए विधेयक गुरूवार के संसद डहार ले पारित करे गेहे, एखर उद्देस्य कठोर दंड मनके प्रावधान करना अउ फास्ट ट्रैक अदालत के स्थापना करके लोक परीक्षा मन म अनुचित गतिविधि मन उपर अकुंश लगाना हरय। अधिनियम म कई ठन महत्वपूर्ण प्रावधान सामिल हे, जेमा दस बछर तक के कैद, दस करोड़ रूपिया तक के जुर्माना अउ दोषी अपराधी मनके संपत्ति के जब्ती अउ कठोर दंड सामिल हे।
मुख्यमंत्री-प्रहलाद जोशी मुलाकात
मुख्यमंत्री विष्णुदेव साय ह काली नई दिल्ली म केंद्रीय उपभोक्ता मामला, खाद्य अउ सार्वजनिक वितरण मंत्री प्रहलाद जोशी ले मुलाकात कर राज्य ले पांच लाख मीट्रिक टन चांउर के शीघ्र उठाव अउ हर महिना पर्याप्त रेलवे रैक उपलब्ध कराय के आग्रह करे हे। मुख्यमंत्री ह किहीन कि एखर ले चांउर के परिवहन म तेजी आही अउ किसान मन ले धान खरीदी के प्रक्रिया सुचारू होही। केंद्रीय मंत्री ह जरूरी सहयोग के आस्वासन देहे।
उहें, मुख्यमंत्री ह नई दिल्ली म भारतीय जनता पार्टी के राष्ट्रीय अध्यक्ष नितिन नबीन ले घलो मुलाकात करीन। ए दउरान आने-आने संगठनात्मक अउ जनहित ले जुड़े बिसय उपर चर्चा होइस।
नशा मुक्त युवा-विकसित भारत संकल्प
प्रधानमंत्री नरेंद्र मोदी काली दू अगस्त के ‘‘नशा मुक्त भारत‘‘ अउ ‘‘विकसित भारत दू हजार सैंतालीस‘‘ के विजन ल साकार करे बर ‘‘नशा मुक्त युवा-विकसित भारत संकल्प अभियान‘‘ के सुरूआत करही। ए अभियान सौ सप्ताह तक चलइया राष्ट्रव्यापी जन-जागरूकता अभियान होही।
छत्तीसगढ़ के आने-आने जिला मन म घलो ‘‘नशा मुक्त युवा-विकसित भारत संकल्प अभियान‘‘ के सुरूआत होही। ए दउरान अलग-अलग जागरूकता कारीकरम के आयोजन करे जाही। संगेसंग युवा मन ल नशा मुक्त जीवन अपनाय बर प्रेरित करे जाही।
मुख्यमंत्री-दिल्ली प्रवास
मुख्यमंत्री विष्णुदेव साय ह आज रायपुर म पत्रकार मनले गोठबात करत हुए बतइन कि नई दिल्ली प्रवास के दउरान प्रधानमंत्री नरेंद्र मोदी ले उंखर मुलाकात होइस। श्री साय ह किहीन कि ओमन प्रधानमंत्री ल बस्तर माओवाद प्रभावित क्षेत्र मन होवत विकास कार्य मन के जानकारी दीन। ओमन बस्तर के चार सौ इकसठ अविद्युतीकृत गांव मन म बिजली पहुंचाय के प्रस्ताव ल मंजूरी दे के आग्रह करीन। एखर अलावा राजनांदगांव म यूरिया संयंत्र स्थापित करे अउ प्रदेस म आयुर्वेद के एम्स खोले के घलो अनुरोध करीन। ओमन प्रधानमंत्री ल प्रस्तावित लखपति दीदी सम्मेलन म सामिल होय के आमंत्रण घलो दीन। मुख्यमंत्री ह बतइन कि प्रधानमंत्री ह ए सबो बिसय उपर सकारात्मक आश्वासन दीन हे।
मानवाधिकार आयोग-संज्ञान
राष्ट्रीय मानवाधिकार आयोग ह कांकेर जिला म तेरह दिन के भीतर मलेरिया ले पांच झन के मउत के खबर म छत्तीसगढ़ के मुख्य सचिव ल नोटिस जारी करे हे। घटना के स्वतः संज्ञान लेवत, आयोग ह ए मामला म दू हफ्ता के भीतर विस्तृत रिपोर्ट मांगे हे। आयोग ह किहीन हे कि अगर समाचार रिपोर्ट म दे गे जानकारी सही हे, त एहा मानवाधिकार के उल्लंघन के गंभीर मामला हरय।
एलपीजी-कीमत
सार्वजनिक क्षेत्र के तेल विपणन कंपनी मन ह आज उन्नीस किलोग्राम वाले वाणिज्यिक एलपीजी सिलेंडर के कीमत लगभग दू सौ रूपिया कम कर देहे। इंडियन ऑयल कॉर्पोरेशन लिमिटेड के अनुसार, वाणिज्यिक सिलेंडर के नवा कीमत आज ले लागू हो गेहे। ए फइसला ले रेस्टोरेंट, ढाबा, होटल अउ खाय-पिये के कारोबार ले जुड़े लोगन मन ल राहत मिलही।
जिले की चिट्ठी
प्रादेशिक समाचार एकांश, आकाशवाणी रायपुर डहार ले प्रस्तुत कार्यक्रम “जिले की चिट्ठी“ का प्रसारण काली संझा छह बजके पांच मिनट ले छह बजके दस मिनट तक करे जाही। ए कार्यक्रम ल छत्तीसगढ़ स्थित आकाशवाणी के सबो केन्द्र एके संघरा रिले करही। ए बखत के अंक में ‘‘कोंडागांव’’ जिला के गतिविधि मन के बारे में जानकारी दे जाही।
उल्लास महा-चैपाल
स्वतंत्रता दिवस के मउका म पंद्रह अगस्त के राज्यभर म उल्लास महा-चैपाल के आयोजन करे जाही। ए अभियान के उद्देस्य साक्षरता ल देसभक्ति ले जोड़ना अउ पंद्रह बछर ले जादा उमर के गैर साक्षर वयस्क मन ल सशक्त बनाना हरय। स्कूल शिक्षा विभाग के सचिव डॉ. कमलप्रीत सिंह ह ए संबंध म विस्तृत दिसा निरदेस जारी करे हे। ए अभियान के तहत पंद्रह अगस्त के पाछू संझा बेरा ग्राम पंचायत मन म साक्षरता नारा के संग मोबाइल टार्च रैली अउ मसाल रैली निकाले जाही।
न्याय व्यवस्था-कार्यशाला
‘‘नवीन आपराधिक कानूनों के माध्यम से डिजिटल न्याय व्यवस्था को सशक्त बनाना‘‘ बिसय उपर काली दू अगस्त के रायपुर म राज्य स्तरीय कार्यशाला के आयोजन करे जाही। कार्यक्रम मुख्य अतिथि के रूप म मुख्यमंत्री विष्णुदेव साय उपस्थित रइही। कार्यक्रम के अध्यक्षता उच्च न्यायालय के मुख्य न्यायाधीश रमेश सिन्हा ह करही। कार्यशाला म छत्तीसगढ़ राज्य के न्यायिक सेवा अधिकारी, सबो जिला के पुलिस अधीक्षक, पुलिस महानिरीक्षक, पुलिस महानिदेशक समेत पुलिस अउ न्यायिक तंत्र के अधिकारी मन सामिल होही।
गांजा-बरामद
सुकमा जिला म पुलिस ह अड़सठ किलोग्राम गांजा बरामद करे हे। एखर कीमत करीबन साठ लाख रूपिया आंके गेहे। ए मामला म तीन आरोपी मन ल गिरफ्तार करे गेहे। मुखबिर ले मिले सूचना उपर पुलिस के टीम ह एर्राबोर बाजार करा वाहन मनके तलासी लीन। ए दउरान दू ठन वाहन ले अड़सठ किलोग्राम गांजा ले जावत हुए तीन झन आरोपी मन ल गिरफ्तार करे गेहे। आरोपी मन करा ले वाहन मन के फर्जी नंबर प्लेट, नगद अउ आने दस्तावेज घलो बरामद करे गेहे।