मुख्यमंत्री-प्रधानमंत्री मुलाकात
मुख्यमंत्री विष्णुदेव साय ह आज संसद भवन म प्रधानमंत्री नरेंद्र मोदी ले सौजन्य भेंट करके छत्तीसगढ़ के समग्र विकास, बस्तर के कायाकल्प अउ राज्य के महत्वपूर्ण अधोसंरचना के संगेसंग औद्योगिक परियोजना के संबंध म विस्तार से चर्चा करीन। मुख्यमंत्री ह प्रधानमंत्री के आगू बदलत छत्तीसगढ़ अउ बिसेस रूप ले बस्तर के विकास के रोडमैप प्रस्तुत करत राज्य के तीन ठिन महत्वपूर्ण परियोजना बर केंद्र सरकार ले सहयोग के आग्रह करीन।
मुख्यमंत्री ह राजनांदगांव म प्रस्तावित लगभग दस हजार पांच सौ करोड़ के गैस आधारित यूरिया परियोजना, बस्तर समेत संवेदनसील क्षेत्र के चार सौ इकसठ गांव मन ल स्थायी विद्युत ग्रिड ले जोड़े अउ रईपुर या बस्तर म ऑल इंडिया इंस्टीट्यूट ऑफ आयुर्वेद के स्थापना बर सहयोग करे के आग्रह करीन। मुख्यमंत्री ह उम्मीद जतइन कि ए परियोजना के मंजूरी ले प्रदेस म औद्योगिक निवेस, प्रत्यक्ष अउ अप्रत्यक्ष रोजगार के संगेसंग सहायक आर्थिक गतिविधि ल नवा गति मिलही।
मुख्यमंत्री-निर्देश
मुख्यमंत्री विष्णुदेव साय ह सरलग होत बरसा अउ मउसम विभाग के चेतावनी ल देखत जम्मो जिला मन ल हाई अलर्ट म रहे के निरदेस दीन हे। ओमन जिला कलेक्टर, पुलिस अधीक्षक अउ संबंधित विभाग के अधिकारी मनले संवेदनसील क्षेत्र मन के सरलग निगरानी राखे अउ बाढ़ के संघरा जल भराव के आसंका वाला इलाका मन म बेरा उपर रहत अउ बचाव कार्य सुनिश्चित करे बर किहीन हे।
इही बीच, सरलग बरसात के सेति प्रदेस म नदिया-नरवा उफान म हे, अउ कई ठिन गांव के सड़क संपर्क कट गेहे। बीजापुर जिला म सरलग बारिस के सेति इंद्रावती नदिया खतरा के निसान ले उपर बोहात हे। बाढ़ के गंभीर स्थिति ल देखत जिला कलेक्टर अउ पुलिस अधीक्षक ह भोपालपटनम क्षेत्र के बाढ़ प्रभावित गंवई मनके दउरा करीन। अधिकारी मन राहत सिविर म पहुंचके प्रभावित ग्रामीण मन ले मुलाकात करीन अउ सब जरूरी सहायता के भरोसा दिलाइन। उहें, उसूर ब्लाक म तालपेरू नदी म फंसे नवजात शिशु अउ ओखर महतारी समेत पर्यटक मन ल एसडीआरएफ अउ राजस्व अमला ह सुरक्षित बचाके बाहिर निकालीन।
अइसने, बलौदाबाजार के तुरमा गांव म गुरूवार रतिहा चार झिन ग्रामीण बाढ़ म फंस गे रिहीन। घटना के जानकारी मिलतेच नगर सेना के टीम ह मउका म पहुंचके जम्मो ल निकाल के सुरक्षित जघा म पहुंचाइस।
इही बीच, नदी मनके जल स्तर सरलग बाढ़े के सेति रईपुर-धमतरी अउ गरियाबंद जिला म तटीय क्षेत्र रहइया लोगन मन ल सतर्क करे गेहे।
मुख्यमंत्री-संचार मंत्री मुलाकात
मुख्यमंत्री विष्णुदेव साय ह राज्य म डिजीटल भारत निधी के तहत प्रस्तावित दू हजार तीन सौ पांच नवा मोबाइल टावर के स्थापना बर केंद्र सरकार ले मंजूरी मांगिन हे। ए सिलसिला म नई दिल्ली प्रवास के दउरान मुख्यमंत्री श्री साय ह केंद्रीय संचार मंत्री ज्योतिरादित्य सिंधिया ले भेंट करीन। ए दउरान मुख्यमंत्री ह किहीन कि राज्य सरकार के परयास हे कि तकनीक के फायदा केवल सहर तक सीमित न रहे, बल्कि दूर-दराज के वनांचल अउ जनजातीय क्षेत्र के हरेक नागरिक तक पहुंचय।
मुख्यमंत्री-रेलमंत्री मुलाकात
प्रदेस के कटघोरा-डोंगरगढ़ नवा रेलवे लाइन परियोजना ल रेल मंत्रालय अउ राज्य सरकार के संयुक्त उपक्रम के माध्यम ले विकसित करे म सहमति बन गेहे। मुख्यमंत्री विष्णुदेव साय ह अपन नई दिल्ली प्रवास के दउरान काली केंद्रीय रेल मंत्री अश्विनी वैष्णव ले भेंट करके ए परियोजना के संघरा प्रदेस म रेलवे अधोसंरचना के विस्तार ल लेके चर्चा करीन। बइठका के दउरान बताय गीस कि लगभग दू सौ पंचानवे किलोमीटर लंबा कटघोरा-डोंगरगढ़ परियोजना के रेल लाइन कटघोरा, करतला, मंुगेली, कवर्धा अउ खैरागढ़ होत डोंगरगढ़ तक जाही।
केंद्रीय मंत्रिमंडल-निर्णय
केंद्रीय मंत्रिमंडल ह दू हजार छब्बीस-सत्ताईस ले दू हजार तीस इकतीस तक प्रधानमंत्री किसान सम्मान निधि योजना ल जारी राखे के मंजूरी दे दीन हे। मीडिया ले गोठ करत सूचना अउ प्रसारण मंत्री अश्विनी वैष्णव ह किहीन कि ए योजना बर पांच साल के अवधि म कुल तीन लाख पंद्रह हजार करोड़ रूपिया के वित्तीय आवंटन मंजूर करे गेहे।
कृषि मंत्री-प्रेसवार्ता
प्रदेस म खाद के कालाबाजारी करे के मामला म चार सौ सत्तर ले जादा जघा म कारवाई करे गेहे। ए जानकारी कृषि मंत्री रामविचार नेताम ह आज रईपुर म एक प्रेसवार्ता के दउरान दीन। ओमन यहू किहीन कि किसान मन ल गुणवत्ता वाला बीजा अउ खातू देे म लापरवाही के सिकायत मिले म दोषी मनके खिलाफ कड़ा कारवाई करे जाही।
वर्णिका शर्मा-बैठक
राज्य बाल संरक्षण आयोग के अध्यक्ष डॉक्टर वर्णिका शर्मा ह निरदेस दीन हे कि खेल मैदान के व्यावसायिक इस्तेमाल म रोक लगाके ओला तुरते लइका मनके खेलकूद बर उपलब्ध कराय जाय। धमतरी म समीक्षा बइठका लेके ओमन प्रदेस के जम्मों सरकारी अउ निजी स्कूल के दिवाल अउ प्रमुख जघा मन म चाइल्ड हेल्पलाइन नंबर-एक सून्य नौ आठ लिखे के निरदेस दीन।
परीक्षा-समय सारिणी
प्रदेस के सरकारी अउ अनुदान प्राप्त स्कूल मन म पहिली कक्षा ले बारहवीं कक्षा तक के परीक्षा एके समय म होही। ए साल तिमाही परीक्षा इक्कीस सितंबर ले तीस सितंबर तक जबकि छैमाही या अर्धवार्षिक परीक्षा एक दिसंबर ले बारह दिसंबर के बीच राखे जाही। ए जानकारी लोक शिक्षण संचालनालय ह चालू सैक्षणिक सत्र बर जारी करे गे परीक्षा के समय-सारिणी म देहे। एखरे संग जम्मो जिला मन म परीक्षा संचालन अउ मूल्यांकन के एकरूपता सुनिश्चित करे बर जिला स्तर म परीक्षा समिति गठित करे के निरदेस घलो दे गेहे।
रविदास जयंती-कलश यात्रा
संत शिरोमणि रविदास के छै सौ पचासवीं जयंती के मउका म आयोजित ‘‘समरसता संकल्प अभियान‘‘ के तहत वाराणसी ले पवित्र माटी युक्त कलश लेके निकले भाजपा के प्रतिनिधिमंडल आज राजधानी रईपुर पहुंचिस। बंजारी माता मंदिर ले ए यात्रा सहर के प्रमुख जघा ले होवत श्रीराम मंदिर पहुंचिस, जिहां विधि-विधान अउ वैदिक मंत्रोच्चार के संग पूजा कर के कलस के स्थापना करे गीस।
भाजयुमो सदस्यता-अभियान
भारतीय जनता युवा मोर्चा डहार ले प्रदेस म ‘‘ज्वॉइन बीजेवायएम‘‘ सदस्यता अभियान चलाय जात हे। पार्टी के प्रदेस अध्यक्ष राहुल टिकरिहा ह रईपुर म पत्रकार मन ले गोठबात करत बतइन कि ए अभियान तेईस जुलाई ले सुरू होय हे, जउन बीस सितंबर तक चलही। अवइया दिन म प्रदेस म अभियान के तहत आने-आने कारीकरम आयोजित करे जाही।
हज यात्रा-चयन
हज कमेटी ऑफ इंडिया ह हज दू हजार सत्ताईस बर ऑन लाइन डिजीटल रैंडम चयन प्रक्रिया पूरा कर लेहे। राज्य हज कमेटी के चेयर मेन मिर्जा एजाज बेग ह बतइन कि राज्य ले सात सौ सत्यासी यात्री मन के चयन करे गेहे, जबकि दू सौ इकतालीस आवेदक मन ल प्रतीक्षा सूची म राखे गेहे। चयन सूची हज कमेटी के वेबसाइट म जारी कर दे गेहे।
मत्स्य भर्ती परीक्षा-रद्द
राज्य के सहायक मत्स्य अधिकारी भर्ती परीक्षा-दू हजार पच्चीस के चयन प्रक्रिया अउ परीक्षा परिणाम ल छत्तीसगढ़ उच्च न्यायालय ह निरस्त कर देहे। कोर्ट ह भर्ती प्रक्रिया म गंभीर कमी अउ अपन पहिली के आदेस के अनदेखी पाय जाय के बाद पूरा प्रक्रिया ल नवा सिरा ले करे के आदेस देहे।
बातों-बातों-में
प्रादेशिक समाचार एकांश के समसामयिक बिसय उपर आधारित कारीकरम ‘‘बातों-बातों-में‘‘ ए बखत विश्व स्तनपान हफ्ता उपर यूनिसेफ के पोषण आहार बिसेसज्ञ डॉ. अपर्णा देशपांडे ले लेगे भेंटवार्ता के प्रसारण करे जाही। एखर प्रसारण काली एक अगस्त के आकाशवाणी केंद्र रइपुर डहार ले एफ.एम. अउ प्रायमरी चैनल म बिहनिया नौ बजे ले करे जाही। एला छत्तीसगढ़ स्थित आकाशवाणी के जम्मों केंद्र रिले करहीं।
कांग्रेस-प्रदर्शन
राज्य म बिजली के दर म कमी अउ स्मार्ट मीटर वापस लेके मांग ल लेके कांग्रेस पार्टी काली एक अगस्त ले आंदोलन करही। ए जानकारी आज रईपुर म पत्रकार वार्ता ल संबोधित करत प्रदेस कांग्रेस अध्यक्ष दीपक बैज ह दीन।