बस्तर प्रतिनिधिमंडल-राष्ट्रपति मुलाकात
मुख्यमंत्री विष्णुदेव साय के अगुवई म बस्तर के दू सौ नौ मनखे मनके प्रतिनिधिमंडल ह आज राष्ट्रपति भवन म राष्ट्रपति द्रौपदी मुर्मू ले मिलीन, जेमा उपमुख्यमंत्री विजय शर्मा अउ संस्कृति मंत्री राजेश अग्रवाल के के संगेसंग बस्तर पंडुम के विजेता प्रतिभागी, मांझी, चालकी, परंपरागत जनजातीय प्रतिनिधि अउ पद्मश्री ले सम्मानित विभूति मनके प्रतिनिधि मन ह सामिल होइन। ए मउका म राष्ट्रपति ह प्रतिनिधिमंडल के सदस्य मन ले गोठबात करत बस्तर के जनजातीय संस्कृति, लोक कला, पारंपरिक सामाजिक व्यवस्था, मांझी-चालकी प्रणाली अउ बस्तर पंडुम के आयोजन के बारे म जानबा लीन। ओमन किहीन कि बस्तर के सांस्कृति विरासत भारत के अमूल्य धरोहर हरय अउ ओला संजो के रखना पूरा देस के दायित्व हवय।
मुख्यमंत्री के बिनती उपर राष्ट्रपति ह अवइया बेरा म बस्तर दशहरा अउ बस्तर पंडुम म सामिल होय के इच्छा जतईन। ए मउका म केन्द्रीय गृहमंत्री अमित शाह घलो आय रिहीन। ए प्रतिनिधिमंडल मन ह राष्ट्रपति भवन ल घुमीन।
बारिश
प्रदेस के कतकोन जिला म पाछु दू-तीन दिन ले होवत सरलग बरसा के सेती कतकोन नदियां-नरवा म बाढ़ आ गेहे, जेखर सेती गाड़ी मनके अवई-जवई प्रभावित होय हे।
नारायणपुर जिला म पाछु अड़तालीस घंटा ले होवत बरसा के सेती लोगन मन परेसान हे। अबूझमाड़ के संगेसंग कतकोन जघा म घर मन म पानी भरे के स्थिति बन गेहे। त उहें, कतकोन गांव के संपर्क जिला मुख्यालय ले कट गेहे। स्थिति ल देखत जिला प्रसासन ह संवेदनसील जघा म निगरानी बढ़ा देहे। लोगन मन ल पुल के उपर पानी चले के स्थिति म रद्दा पार नइ करे के अपील करे हे।
इही बीच, नारायणपुर के धौड़ाई थाना क्षेत्र के गांव चिकपाल म पानी के हुरहा बाढ़े ले सोलह झिन गांव के लोगन मन फंस गे, जेला रेस्क्यू करके निकाले गीस।
उहें, दंतेवाड़ा जिला म सरलग बरसा के चलत भैरमगढ़ के पातरपारा म पुल के उपर ले पानी चलत हे, जेखर सेती अवई-जवई प्रभावित होय हे।
ऐति, गरियाबंद जिला म तीन दिन होवत बरसा के सेती जनजीवन अस्त-व्यस्त होगे हे। सिकासेर बांधा ले साठ हजार क्यूसेक पानी छोड़े गेहे। एखर सेती राजिम के त्रिवेणी संगम स्थित बाबा कुलेश्वर नाथ महादेव मंदिर म चारों कोति पानी भर गेहे। त उहें, पैरी नंदिया म घलो बाढ़ आ गेहे अउ एखर सेती राष्ट्रीय राजमार्ग क्रमांक-एक सौ तीस म पाछु चौबीस घंटा ले गाड़ी मनके अवई-जवई प्रभावित होय हे। जिला प्रशासन ह नंदिया के तीर-तखार म रहइया लोगन मन ल सतर्क रेहे के मुनादी कराय हे। त उहें, उदंती नंदिया उपर एक ठिन बनत पुल भारी बरसा के सेती भरभरा के गिर गे। ए पुल छत्तीसगढ़ अउ ओडिसा के बीच अवई-जवई के जरूरी माध्यम बने रिहीस।
ओति, बालोद जिला म घलो बरसा के सेती कतकोन जघा म सड़क उपर पानी भर गेहे। सियादेवी मंदिर के तीर नहर के पानी पुल के उपर ले बोहात हे, जेखर सेती गाड़ी मनके अवई-जवई बंद होगे हे। चीचा, टाटेंगा, घुमका क्षेत्र म जुझारा नरवा म बाढ़ आय हे अउ एखर सेती गाड़ी मनके अवई-जवई प्रभावित होय हे। खेत मन म जादा पानी के भरे ले फसल मनके नुकसान होय के संभावना जताय गेहे। कतकोन स्कूल अउ आंगनबाड़ी केन्द्र मन म घलो पानी भर गेहे।
उहें, दुरूग जिला म शिवनाथ नंदिया के पानी घलो सरलग बाढ़त हे। चार ठिन बांधा मोंगरा, घुमरिया, सूखा नाला अउ खाटूटोला ले पानी छोड़े जाय के सेती महमरा एनीकट के उपर ले सात फीट छह इंज पानी चलत हे। जिला प्रसासन ह नंदिया के तीर बसे गांव मन ल सतर्क रेहे के निरदेस देहे।
ओति, सक्ती जिला म भारी बरसा ले महानदी उफान म हवय। एला देखत कलमा बैराज के जम्मों छियासठ गेट खोल दे गेहे। जिला प्रशासन ह नंदिया के तीर बसे गांव मन ल सतर्क रेहे के अपील करे हे।
उहें, महानदी के सरलग बाढ़त पानी के सेती आरंग क्षेत्र के तटीय गांव निसदा म बाढ़ के पानी घुस गेहे। एसडीआरएफ के टीम ह बयालीस झिन परिवार मन ल सुरक्षित बाहिर निकाल के राहत सिविर म पहुंचा देहे।
एनालॉग पनीर-बैन
छत्तीसगढ़ म एनालॉग पनीर के बेचे उपर रोक लगा दे गेहे। स्वास्थ्य मंत्री श्याम बिहारी जायसवाल ह आज नवा रईपुर म एक ठिन पत्रकारवार्ता ल संबोधित करत ओमन ए घोसना करीन। ए बारे म जल्दीच आदेस जारी कर दे जाही। श्री जायसवाल ह किहीन कि खाद्य सुरक्षा मानक के उल्लंघन करइया उपर नियम के मुताबिक कार्रवाई करे जाही।
जानबा के मुताबिक एनालॉग पनीर एक प्रकार ले नकली या सिथेंटिक पनीर हरय, जेला दूध के जघा म वनस्पित तेल अउ स्टार्च ले बनाय जाथे। ए दिखे अउ स्वाद म असली पनीर जइसे लगथे।
स्वास्थ्य मंत्री-प्रेसवार्ता
स्वास्थ्य मंत्री श्याम बिहारी जायसवाल ह आज रईपुर म पत्रकार मन ले गोठबात करत किहीन कि हाल के दिन म मलेरिया के कुछ मामला आगू आय के बाद स्वास्थ्य विभाग ह सरलग काम करत हे। स्वास्थ्य कार्यकर्ता, मितानिन, एएनएम अउ मैदानी अमला मन ह गांव-गांव जाके जांच, इलाज अउ जन-जागरूकता जइसन काम करत हे। स्वास्थ्य मंत्री ह बतईन कि सरलग निगरानी अउ लोगन मनके मदद के सेती बस्तर संभाग के मलेरिया पॉजिटिविटी दर चार दशमलव छह प्रतिशत ले घटके शून्य दशमलव चार-आठ प्रतिशत रहि गेहे। ओमन किहीन कि मलेरिया ले एको झन मनखे के मउत झन होवय, यहू सरकार के लक्ष्य हे।ओमन बतईन कि प्रदेस के जम्मों दस मेडिकल कॉलेज मन म पैरा मेडिकल पाठ्यक्रम सुरू करे जाही।
तोखन साहू-नितिन गडकरी
बिलासपुर सहर ल ट्रैफिक जाम के समस्या ले स्थायी राहत दिलाय बर केन्द्रीय आवासन अउ सहरी कार्य राज्यमंत्री अउ बिलासपुर के सांसद तोखन साहू ह केन्द्रीय सड़क परिवहन अउ राजमार्ग मंत्री नितिन गडकरी ले मिलके बिलासपुर बर प्रस्तावित फोर-लेन रिंग रोड परियोजना के मंजूरी अउ एला बनाय म तेजी लाय के बिनती करीन।
नशा मुक्त युवा-विकसित भारत संकल्प
प्रधानमंत्री नरेन्द्र मोदी ह अवइया इतवार के ‘नशा मुक्त भारत‘ अउ ‘विकसित भारत दू हजार सैंतालीस‘ के विजन ल साकार करे बर ‘नशा मुक्त युवा – विकसित भारत संकल्प अभियान‘ के सुरूआत करही। आज राज्यसभा म प्रश्नकाल के दउरान पूरक सवाल के जवाब देवत केन्द्रीय युवा कार्यक्रम मंत्री डॉक्टर मनसुख मांडविया ह कहिन कि देस ल नसा-मुक्त बनाय बर जम्मांें आध्यात्मिक संगठन, कॉलेज, विश्वविद्यालय अउ ‘मेरा भारत‘ के युवा मन एके ठिन मंच म आवत हे। ए अभियान सौ हफ्ता तक चलइया राष्ट्रव्यापी जन-जागरूकता अभियान होही।
राष्ट्रीय बाल पुरस्कार/फसल बीमा
प्रधानमंत्री राष्ट्रीय बाल पुरस्कार बर नामांकन के आखिरी तारीख काली इकतीस जुलाई राखे गेहे। ए पुरस्कार बर पांच ले अट्ठारह साल के लइका मन अरजी कर सकथे।
उहें, राष्ट्रीय दिव्यांगजन पुरस्कार बर घलो इकतीस जुलाई तक अरजी मंगाय गेहे। ए पुरस्कार दिव्यांगजन सशक्तिकरण के क्षेत्र म बढ़िया काम करइया मनखे अउ संस्था मन ल दे जाथे।
ऐति, प्रधानमंत्री फसल बीमा योजना अउ पुनर्गठित मौसम आधारित फसल बीमा योजना के तहत ऋणी अउ अऋणी किसान मन बर पंजीयन कराय के आखिरी तारीख काली तक हवय।
त उहें, डॉक्टर खूबचंद बघेल कृषक रत्न पुरस्कार बर किसान मन ले इकतीस जुलाई तक अरजी मंगाय गेहे।
औद्योगिक पार्क
प्रदेस म उद्योग अउ रोजगार ल बढ़ावा दे बर राज्य सरकार ह चार ठिन नवा औद्योगिक पार्क बनाय के फइसला लेहे। मुख्य सचिव विकासशील के अगुवई म होय औद्योगिक विकास योजना के राज्य स्तरीय समिति के बइठका म ए प्रस्ताव ल मंजूरी दे गीस। औद्योगिक पार्क राजनांदगांव, धमतरी, जांजगीर-चांपा अउ बस्तर जिला म बनाय जाही।
संक्षिप्त समाचार
– सावन महीना के वार्षिक कावंड़ यात्रा आज ले सुरू होगे। प्रदेस म अमरकंटक ले भोरमदेव मंदिर तक होवइया कांवड़ यात्रा बर पूरा तियारी कर ले गेहे। श्रद्धालु मनके सुविधा बर प्रसासन ह जम्मांे व्यवस्था करे हे।
अउ
– प्रदेस के खेल अउ युवा कल्याण विभाग ह बछर दू हजार पच्चीस-छब्बीस बर शहीद राजीव पांडेय पुरस्कार, शहीद कौशल यादव पुरस्कार, वीर हनुमान सिंह पुरस्कार, शहीद पंकज विक्रम सम्मान, शहीद विनोद चौबे सम्मान, मुख्यमंत्री ट्रॉफी अउ डाइट मनी बर पांच अगस्त तक अरजी मंगाय गेहे।