स्पोर्ट्स कॉन्क्लेव-शुभारंभ
उपमुख्यमंत्री खेल अउ युवा कल्याण मंत्री अरूण साव ह आज छत्तीसगढ़ के राजधानी रईपुर म पहिली घांव होवत स्पोर्ट्स कॉन्क्लेव के सुभारंभ करीन। ‘‘वीजन टू विक्ट्री‘‘ थीम म राखे गे ए कॉन्क्लेव म देसभर के खेल प्रशासक, विशेषज्ञ स्पोर्ट्स साइंटिस, जानेमाने खिलाड़ी अउ खेल संघ के पदाधिकारी भाग लेवत हे। कॉन्क्लेव म मुख्यमंत्री विष्णुदेव साय घलो सामिल होइन। श्री साय एसो मार्च-अप्रैल म राखे गे खेलो इंडिया ट्राइबल गेम्स म पदक जीतइया छत्तीसगढ़ के खिलाड़ी मन ल इनाम दीन।
कॉन्क्लेव म आने-आने सत्र म राज्य म खेल अउ खिलाड़ी मन बर बने माहौल तियार करे, खेल प्रतिभा ल तरासे अउ ओमन ल बने सुविधा देवाय के संग राष्ट्रीय अउ अंतरराष्ट्रीय प्रतियोगिता बर तियार करे खातिर गोठबात होवत हे।
कॉन्क्लेव के पहिली सत्र म बोलत उपमुख्यमंत्री श्री साव ह किहीन कि समर्थ विकसित छत्तीसगढ़ बनाय बर खेल जरूरी हे। ओमन किहीन कि खिलाड़ी प्रसिक्षण देवइया अउ खेल संघ ल हरसंभव मदद दे जाही। श्री साव ह सबो जिला म खेल संघ के गठन उंखर बने व्यवस्था अउ मजबूत ढांचा के संग साफगोई कामकाज म जोर दीन।
ए मउका म खेल अउ युवा कल्याण विभाग के सचिव यशवंत कुमार ह किहीन कि कॉन्क्लेव म होवइया गोठबात के नतीजा ल राज्य के नवा खेल नीति सामिल करे जाही।
कॉन्क्लेव ल अंतरराष्ट्रीय फुटबालर अउ खेलो इंडिया ट्राइबल गेम्स म स्वर्ण पदक जीतइया छत्तीसगढ़ के महिला फुटबाल टीम के कप्तान किरन पिस्दा ह घलो गोठबात करीन।
पीएम ई-बस सेवा
केंद्रीय सहरी आवासन मंत्रालय कोति ले देसभर म ई-बस चलाय बर पीएम ई-बस सेवा सुरू करे गेहे। एमा बिलासपुर जिला बर पचास एसी बस के मंजूरी दे गेहे। एखर बाद बिलासपुर जिला अर्बन पब्लिक सर्विस सोसायटी कोति ले आमलोगन, पढ़इया लइका अउ करमचारी मन ले सुझाव मांगे गेहे। सुझाव ई-मेल आईडी ‘‘बी.डी.यू.ए.एस. बिलासपुर एट द रेट जीमेल डॉट कॉम‘‘ म या फेर नगर निगम कार्यालय विकास भवन के अर्बन सोसायटी म आके दे जा सकत हे।
बस्तर प्रतिनिधिमंडल दिल्ली
बस्तर ले एक सौ चौसठ मनखे मनके प्रतिनिधि मंडल आज दिल्ली बर रवाना होइस। ए प्रतिनिधि मंडल तीस जुलाई के राष्ट्रपति भवन म राखे गे कारीकरम म राष्ट्रपति द्रौपदी मुर्मू ले भेंट करही। ए दउरान राष्ट्रपति ल बस्तर के सुग्घर सांस्कृतिक विरासत, लोक परंपरा अउ सामाजिक व्यवस्था के संबंध म बताही। ए प्रतिनिधि मंडल म बस्तर के परगना, मंाझी, चालकी, समाज प्रमुख, बस्तर के पंडुम के परसिध्द जनजातीय युवा कलाकार अउ बस्तर के पद्मश्री सम्मान ले सम्मानित लोगन सामिल हे।
उपमुख्यमंत्री अउ गृह मंत्री विजय शर्मा ह दिल्ली जावत बस्तर के प्रतिनिधि मंडल ल सुभकामना दीन। ओमन किहीन कि ए प्रतिनिधि मंडल सिरिफ बस्तर के नइ भलुक पूरा छत्तीसगढ़ के संस्कृति, परंपरा अउ गौरवसाली विरासत के अगुवई करही।
जल जीवन मिशन-बैठक
नई दिल्ली के छत्तीसगढ़ सदन म ‘‘जल जीवन मिशन-टू प्वॉइंट ओ‘‘ ल बने ढंग ले चलाय ल लेके केंद्रीय जल शक्ति मंत्री सीआर पाटिल के अगुवई म समीक्षा बइठका होइस। बइठका म छत्तीसगढ़ के लोक स्वास्थ्य यांत्रिकी मंत्री अरूण साव अउ राज्य के लोकसभा, राज्यसभा सांसद सामिल होइन। बइठका म गांव गवई म हरेक घर तक पिये के पानी पहुंचाना, योजना म तेजी लाय अउ गुणवत्ता सुनिश्चित करे खातिर गोठबात होइस।
सहकारिता मंत्री-बैठक
प्रदेस म सहकारिता आंदोलन ल नवा गति दे अउ बैकिंग सेवा ल जादा प्रभावी बनाय खातिर सहकारिता मंत्री केदार कश्यप ह आज नवा रईपुर म समीक्षा बइठका लीन। ए बइठका म छत्तीसगढ़ अपेक्स बैंक अउ जिला सहकारी केंद्रीय बैंक के अध्यक्ष अउ बड़का अधिकारी संघरीन। ए दउरान सहकारी बैंक के कामकाज म सुधार लाय के संगेसंग डिजीटल बैंंिकंग सेवा के संबंध म गोठबात होइस। बइठका म प्रदेस के किसान मन ल बने आधुनिक बैंकिंग सुविधा देवाय के संबंध म बिसेस रूप ले जोर दे गीस।
ज्ञानेश्वरी यादव-पदक
कॉमनवेल्थ गेम्स के तिरपन किलोग्राम महिला वेटलिफ्टिंग प्रतियोगिता म राजनांदगांव के खिलाड़ी ज्ञानेश्वरी यादव ह रजत पदक जीते हे। मुख्यमंत्री विष्णुदेव साय ह ओमन ल रजत पदक जीते म बधाई दीन हे। मुख्यमंत्री ह किहीन कि ए उपलब्धि छत्तीसगढ़ के प्रतिभा, मिहनत अउ दृढ़ संकल्प के सम्मान हवय। ओमन किहीन कि उंखर सफलता ले प्रदेस के युवा बिसेस रूप ले बेटी मन ल खेल म आगू बाढ़े के प्रेरणा मिलही।
नारायणपुर-अंतर्राज्यीय समन्वय बैठक
छत्तीसगढ़ अउ महाराष्ट्र के सीमावर्ती क्षेत्र म चलत नक्सल विरोधी अभियान के समीक्षा खातिर आज नारायणपुर म अंतरराज्यीय समन्वय बइठका होइस। बइठका म दूनों राज्य के पुलिस अउ सुरक्षाबल के बीच नक्सल विरोधी अभियान अउ जरूरी जानकारी ल एक-दूसर तक पहुंचाय म सहमति बनिस। उहें, सीमावर्ती क्षेत्र म सरलग निगरानी राखे जुरमिल के काम करे अउ वामपंथी उग्रवाद के खिलाफ अभियान ल तेज करे उपर गोठबात होइस।
मुख्यमंत्री-भोरमदेव
मुख्यमंत्री विष्णुदेव साय आज कवर्धा के ऐतिहासिक भोरमदेव मंदिर जाके उंहा भगवान भोलेनाथ के पूजा पाठ करत प्रदेसवासी मन के सुख समृध्दि के मानता मानिन। ए बेरा म मुख्यमंत्री ह किहीन कि भोरमदेव छत्तीसगढ़ के सांस्कृतिक विरासत, सनातन परंपरा अउ आध्यात्मिक चेतना के गौरवसाली चिन्हारी हे।
बस्तर वन मंडल थर्मल इमेजिंग ड्रोन
बस्तर वन मंडल म जंगल अउ वन्यजीव के सुरक्षा खातिर थर्मल इमेजिंग ड्रोन ले हाईटेक निगरानी सुरू करे गेहे। एखर ले वन के अवैध कटई अउ जंगली जनावर मनके सिकार उपर नजर राखे जात हे। बस्तर वन मंडल के डीएफओ उत्तम गुप्ता ह बतइन कि थर्मल इमेजिंग तकनीक ले ड्रोन अंधियार म घलो जिनावर या संदिग्ध लोगन ल खोज लेथे। अभी हाले म माचकोट अउ बिलोरी के जंगल म वन विभाग ह सुरक्षा अउ तलासी खातिर ए ड्रोन ल तैनात करे हे। अभी कांकेर वन मंडल के मदद ले थर्मल ड्रोन बउरे जात हे अउ जल्दीच बस्तर वन मंडल ल अपन थर्मल ड्रोन मिल जही।
लौह स्क्रैप चोरी-जवान निलंबित
दुरूग के भिलाई इस्पात संयंत्र म कथित लौह स्क्रैप चोरी के मामला म केंद्रीय औद्योगिक सुरक्षा बल के सात झिन जवान मन ल निलंबित कर दे गेहे। उंखर मन उपर ड्यूटी के बेरा कोताही बरते के आरोप हे। पुलिस के मुताबिक अभी तक ए मामला म सोलह झिन ल गिरफ्तार करे गेहे। एमा भिलाई इस्पात संयंत्र के कुछेक अधिकारी अउ करमचारी घलो सामिल हे। जांच म करीबन दू सौ पचास टन लौह स्क्रैप अउ ऑस्ट्रेलियन कोक के चोरी के बात आगू आय हे।
माओवादी सामग्री-बरामद
कांकेर जिला म गट्टाकाल-दरवीकोड़ो गांव के जंगल म सुरक्षा बल ह माओवादी मन कोति ले लुका के राखे गे हथियार, गोला-बारूद, बीजीएल सेल, डेटोनेटर समेत आने-आने जिनीस बरामद करे हे। बम निरोधक दस्ता के टीम ह विस्फोटक जिनीस ल मउकाच म नष्ट कर दीस।
उहें, नारायणपुर जिला के ओरछा थाना क्षेत्र के कसोड़-कुमेरादी के जंगल म सुरक्षा बल सर्चिंग अभियान के दउरान दू सौ संतानवे ठिन जिंदा कारतूस बरामद करे हे।
गांजा-बरामद
सुकमा जिला के कांेटा पुलिस ह आज गांज तस्करी के मामला म तीन झिन आरोपी ल गिफ्तार करके उंखर तीर ले दू सौ तेईस किलो गांजा बरामद करीन हे। जब्त गांजा के कीमत करीबन एक करोड़ ग्यारा लाख रूपिया बताय गेहे। खबर के मुताबिक आरोपी गांजा ल ओडिसा के मलकानगिरी ले छत्तीसगढ़ होवत राजस्थान के भीलवाड़ा ले जात रिहीन। तीनों आरोपी भीलवाड़ा के रहवइया बताय जात हे। पुलिस ह इंखर तीर ले मोबाइल, नगदी रकम अउ आने दस्तावेज बरामद करे हे।
आकाशीय बिजली-मौत
मनेन्द्रगढ़-भरतपुर-चिरमिरी जिला के खड़गंवा ब्लॉक के शिवपुर म आज धान रोपाई के बेरा गाज गिरे ले दू झन के मउत होगे।
उहें, ग्राम पंचायत मंगोरा म घलो गाज गिरे ले एक चरवाहा के मउत होगे हे अउ पांच झिन झुलस गेहे, जउन मन ल इलाज बर खड़गवां के सामुदायिक स्वास्थ्य केन्द्र म भर्ती कराय गेहे।