लोक परीक्षा संशोधन विधेयक
लोकसभा म आज लोक परीक्षा अनुचित साधन निवारण संशोधन विधेयक पेस करे गीस। पहिली स्थगन के बाद सदन के कार्यवाही फेर सुरू होय म कार्मिक, लोक सिकायत अउ पेंसन राज्य मंत्री डॉक्टर जितेन्द्र सिंह ह ए विधेयक ल सदन प्रस्तुत करीन।
विधेयक पेस करे के दउरान विपक्षी सदस्य मन ह नीट मुद्दा म विद्यार्थी मनके विरोध प्रदर्सन के दउरान पुलिस के कथित कार्रवाई उपर चर्चा के मांग करत हंगामा करीन। एमा लोकसभा अध्यक्ष ओम बिरला ह किहीन कि परीक्षा म सुधार के दिसा म ए विधेयक ह पहिली बड़े कदम हे अउ एखर उपर चर्चा होना चाही। फेर हंगामा जारी रहे म सदन के कार्रवाही ल स्थगित कर दे गीस।
प्रधानमंत्री-परीक्षा सुधार
इही बीच प्रधानमंत्री नरेंद्र मोदी ह काली परीक्षा सुधार बर उच्च स्तर के कार्यबल के गठन के घोसना करीन। एखर अध्यक्षता प्रख्यात प्रौद्योगिकीय विशेषज्ञ नंदन नीलेकनी करही। ए कार्यबल म पूर्व आईबी निदेशक तपन डेका, पूर्व इसरो अध्यक्ष डॉ. एस. सोमनाथ, आईआईटी मद्रास के निदेशक वी.कामकोटि, पूर्व शिक्षा सचिव अनिता करवाल अउ आपूर्ति श्रृंखला प्रबंधन विशेषज्ञ अमृतलाल मीणा घलो सामिल हे।
प्रधानमंत्री ह अपन वीडियो संदेस म किहीन कि ए कार्यबल परीक्षा प्रणाली ल अउ मजबूत बनाय उपर काम करही। ओमन किहीन कि सरकार ह प्रतियोगी परीक्षा मन म निष्पक्षता बनाय राखे बर अउ करोड़ो विद्यार्थी मनके भविष्य के रक्षा बर पूरा तरीका ले प्रतिबध्द हे।
मुख्यमंत्री-कार्यालय अधिकारी बैठक
मुख्यमंत्री विष्णुदेव साय ह आज नवा रईपुर के एसआईआरडी परिसर, निमोरा म आयोजित प्रदेस के सबो जिला पंचायत के मुख्य कार्यपालन अधिकारी मन के उच्च स्तरीय बइठका लीन। बइठका म मुख्यमंत्री ह किहीन कि ग्राम पंचायत मनके सिरिफ योजना मनके क्रियान्वयन के इकाई नइ, बल्कि सामाजिक परिवर्तन, आर्थिक समृध्दि अउ आत्मनिर्भर ग्रामीण अर्थव्यवस्था के केंद्र के रूप म विकसित करना होही।
बस्तर पंडुम-सम्मान
बस्तर पंडुम-दू हजार छब्बीस के विजेता प्रतिभागी अउ जनजातीय प्रतिनिधी मन ल सम्मान तीस जुलाई के राष्ट्रपति भवन म करे जाही। मुख्यमंत्री विष्णुदेव साय के नेतृत्व म दू सौ नौ सदस्यीय प्रतिनिधिमंडल नई दिल्ली म राष्ट्रप्रति द्रौपदी मुर्मू ले शिष्टाचार भेंट करही। प्रतिनिधि मंडल म उप मुख्यमंत्री विजय शर्मा, संस्कृति मंत्री राजेश अग्रवाल, बस्तर पंडुम के विजेता, परंपरागत जनजातीय नेतृत्व व्यवस्था के प्रतिनिधि अउ पद्मश्री सम्मानित विभूति मन सामिल होही।
सीआरपीएफ-स्थापना दिवस
केंद्रीय रिजर्व पुलिस बल के आज स्थापना दिवस हे। ए मउका म उपराष्ट्रपति सी.पी.राधाकृष्णन, रक्षा मंत्री राजनाथ सिंह अउ कंेंद्रीय गृहमंत्री अमित शाह ह सबो जवान मन ल सुभकामना दीन। ओमन किहीन कि राष्ट्र सीआरपीएफ के वीर जवान मनके बहादुरी, बलिदान अउ कर्तव्य निष्ठा ल नमन करथे।
आईएसएफ-तबादला
राज्य सरकार ह भारतीय वन सेवा के सात झन अधिकारी मनके तबादला करे हे। जारी आदेस म संजीता गुप्ता ल छत्तीसगढ़ राज्य लघुवनोपज संघ के प्रभारी प्रबंध संचालक बनाय गे हवय। अमरनाथ प्रसाद ल वन अउ जलवायु परिवर्तन विभाग के सचिव के संगेसंग छत्तीसगढ़ राज्य वन विकास निगम के उपराहा प्रभार दे गे हवय। एखर अलावा एस. वेंकटाचलम, अभिषेक कुुमार सिंह, गुरूनाथ एन., प्रणय मिश्रा अउ रमेश कुमार जांगड़े के घलो तबादला करे गे हवय।
ऑपरेशन सिपाही रक्षा-सूत्र अभियान
रक्षा बंधन के मउका म प्रदेस म ‘‘ऑपरेशन सिपाही रक्षा-सूत्र अभियान‘‘ सुरू करे गेहे। महिला अउ बाल विकास मंत्री लक्ष्मी राजवाड़े ह प्रदेस के माता, बहिनी अउ लइका मनले ए अभियान म भाग लेके अपील करीन हे। ओमन किहीन कि लोगन अपन हाथ ले बने राखी, सैनिक मन बर सुभकामना संदेस अउ अपन आंगन के एक चुटकी मिट्टी तीस जुलाई तक नजदीकी आंगनबाड़ी केंद्र या महिला अउ बाल विकास विभाग के परियोजना कार्यालय म जमा करा सकत हे। ओमन बतइन कि एकत्रित रक्षा-सूत्र अउ संदेस पूर्व सैनिक महासभा के माध्यम ले सेना मुख्यालय भेजे जाही, जिंहा ले एला देसभर म तैनात सैनिक मन तक पहुंचाय जाही।
राज्यपाल-सिंधी पंचायत
राज्यपाल रमेन डेका ह किहीन हे कि सिंधी समाज ह स्वाभिमान, आत्मनिर्भरता अउ उद्यमसीलता के मिसाल हे। ओमन किहीन कि विभाजन के कठिन परिस्थिति के बावजूद सिंधी समाज ह अपन परिश्रम अउ दृढ़ संकल्प ले देस के विकास म महत्वपूर्ण योगदान दे हवय। राज्यपाल काली रईपुर म पूज्य छत्तीसगढ़ सिंधी पंचायत डहार ले आयोजित ‘‘मुखी संवाद‘‘ कारीकरम म बोलत रिहीन। ए कारीकरम म प्रदेस के एक सौ अट्ठाईस सिंधाी पंचायत के प्रतिनिधि मन सामिल होइन।
गलत अंकसूची-नोटिस
बस्तर जिला म पांचवी अउ आठवीं कक्षा के चार सौ पचयासी विद्यार्थी मन ल गलत अंकसूची जारी करे के मामला आगू आय हे। कलेक्टर ह ए मामला म संबंधित विकासखंड शिक्षा अधिकारी अउ सहायक विकासखंड शिक्षा अधिकारी ल कारण बताओ नोटिस जारी करे हे। कलेक्टर आकाश छिकारा ह बतइन कि जउन क्षेत्र म गलत अंकसूची बांटे गेहे उंहा जल्दीच सही अंकसूची देवाय जाही।
अग्निवीर भर्ती-प्रशिक्षण
गौरेला-पेण्ड्रा-मरवाही जिला के अग्निवीर भर्ती के लिखित परीक्षा म सफल होय बयालिस झन अभ्यर्थी मन ल अब निसुल्क शारीरिक दक्षता प्रसिक्षण दे जाही। जिला रोजगार अउ स्व-रोजगार मार्गदर्सन केंद्र ह बतइस कि ए प्रसिक्षण ल पूर्व सैनिक मनके मार्गदर्सन म आयोजित करे जाही, जेखर ले अभ्यर्थी मन ह अवइया शारीरिक परीक्षा के बने तियारी कर सकय।
मौसम
मौसम विभाग ह अवइया दू दिन म मध्य छत्तीसगढ़ के कुछेक जिला म भारी ले अतिभारी बरसा होय के चेतावनी देहे। रायुपर, दुरूग अउ बिलासपुर संभाग म भारी बरसा बर आरेंज अलर्ट जारी करे गेहे। इही बीच आज राजधानी रईपुर म मंझनिया बाद तेज बरसा होइस। राजस्व अउ आपदा प्रबंधन विभाग डहार ले सत्ताईस जुलाई के स्थिति म प्रदेस म एक जून ले अभी तक औसतन चार सौ इक्कीस मिली मीटर बरसा दर्ज करे गेहे।
बारिश-मौत
सारंगढ़-बिलाईगढ़ जिला के माधोपल्ली क्षेत्र म काली नाला पार करे के दउरान एक ठन कार ह तेज बहाव म बहे गे। हादसा म एक झन मनखे के बहे के संका जताय जावत हे। पुलिस अउ ग्रामीण मनके मदद ले सर्च ऑपरेसन सुरू करे गीस,
उहें, बिलासपुर जिला के अरपा नदी म एक झन अज्ञात युवक के शव मिले हे, जेला पोस्टमार्टम बर सिम्स भेज दे गेहे। कोनी पुलिस ह मामला के जांच करत हे।
ऐति, दुरूग जिला के अमलेश्वर थाना क्षेत्र म खारून नदी म डूबे एक झन युवक के शव ल बरामद करे गेहे। युवक ह अपन संगवारी मन संग काली ग्राम जमराव म पिकनिक मनाय बर गे रिहीस।
मलेरिया-मौत
कांकेर जिला म पाछू दू दिन म मलेरिया ले दू झन लइका मनके मउत हो गेहे। मामला इरादाह अउ मर्दापोटी छात्रावास के बताय जावत हे। इही जिला के ग्यारा झन छात्र मन ह मलेरिया पॉजिटीव पाय गे हवय।
इही बीच, स्वास्थ्य विभाग ह केहे हे कि प्रभावित क्षेत्र म जांच, उपचार अउ सरलग निगरानी करे जावत हे। विभाग के अनुसार दूनों मामला म लइका मन के समय म जांच, दवा अउ जरूरत पड़े म रेफरल के व्यवस्था करे गे रिहीस।
आरोपी-लुक आउट सर्कुलर
जांजगीर-चांपा जिला म शेयर ट्रेडिंग के नाव म करोड़ो रूपिया के ठगी के मामला म फरार आरोपी पीयूष जायसवाल के खिलाफ केंद्रीय गृह मंत्रालय ह लुक आउट सर्कुलर जारी करे हे। पुलिस ह आरोपी के तलास करत हे अउ लोगन ले ओखर जानकारी मिले म तुरते पुलिस ल सूचना देके अपील करे हे।
ट्रेन-परिचालन
लाइन दोहरीकरण काम के सेति बिलासपुर-ओखा एक्सप्रेस के परिचालन आंसिक रूप ले प्रभावित रइही। दक्षिण पूर्व मध्य रेलवे ले चलइया बिलासपुर-ओखा एक्सप्रेस ल आज अउ तीन अगस्त के परिवर्तित मार्ग ले चलाय जाही।
नशीला पदार्थ-गिरफ्तार
दुरूग जिला के कुम्हारी पुलिस ह नसीला पदार्थ के तस्करी के आरोप म एक झन मनखे ल गिरफ्तार करे हे। आरोपी तीर ले एक हजार अल्प्राजोलम टैबलेट, एक लाख रूपिया नगद, एक ठन कार अउ मोबाइल फोन संघरा आठ लाख रूपिया ले जादा के सामान जब्त करे हे।
अउ अब थोरकुन समाचार सार म –
– पूर्व राष्ट्रपति अउ प्रख्यात वैज्ञानिक डॉक्टर ए.पी.जे.अब्दुल कलाम के पूण्यतिथि म आज कृतज्ञ राष्ट्र ओमन ल श्रध्दांजलि देवत हे। प्रधानमंत्री नरेंद्र मोदी, गृह मंत्री अमित शाह अउ लोकसभा अध्यक्ष ओम बिरला ह पूर्व राष्ट्रपति ए.पी.जे.अब्दुल कलाम के पुण्यतिथि म ओमन ल अपन श्रध्दांजलि दीन हे।
अउ
– प्रधानमंत्री राष्ट्रीय बाल पुरस्कार के तहत प्रदेस के प्रतिभासाली, नवाचारी अउ प्रेरणादायी लइका मनले इकतीस जुलाई तक आवेदन मंगाय गे हवय।