छत्तीसगढ़ म आज ले कोरोना सघन सामुदायिक सर्वे अभियान सुरू होगे हे। एमा बारह अक्टूबर तक राज्य के ग्रामीण अउ सहरी इलाका म घर-घर जाके कोरोना संक्रमण के लक्षण वाले मरीज मनके पहिचान करे जाही। ए अभियान के उद्देश्य कोरोना मरीज पहिचान करके ओमन ल आइसोलेट करके समुचित इलाज उपलब्ध करा के कोरोना संक्रमण के श्रृंखला ल तोड़ना हे।
रईपुर कलेक्टर डाॅक्टर एस. भारतीदासन ह आज जोन क्रमांक चार, पांच अउ सात के सर्विलांस दल के प्रभारी अउ सदस्य मनके बइठका लीन। ए बेरा म ओमन कम से कम पचास घर म जाके नमूना लेके नजदीकी स्वास्थ्य केन्द्र म भेजे के निरदेस दीन।
उहें, दुरूग जिला कलेक्टर ह घलो लोगन ले अपील करे हे कि ओमन सामुदायिक सर्वे काम म सहयोग करे अउ घर पहुंचइया टीम ल जरूरी जानकारी दे।
ऐति, महासमुंद जिला म घलो कलेक्टर कार्तिकेय गोयल ह बतईन कि ए अभियान बर स्थानीय लोगन के सहयोग ले जात हे।
जांजगीर-चांपा जिला म सामुदायिक सर्वे बर तीन हजार दू सौ उनचास टीम गठित करे गेहे। ए टीम म छह हजार चार सौ अंठानवे सदस्य सामिल हे।
ऐति, नारायणपुर जिला म घलो सर्वे टीम ह कामकाज चालू करीन।
मुख्य सचिव-बैठक
मुख्य सचिव आर.पी. मंडल ह प्रदेस म कुपोषण के रोकथाम अउ कोरोना संक्रमण ले बचाव बर कतकोन दिसा-निरदेस अधिकारी मन ल देहे। ओमन आज नवा रईपुर मंत्रालय ले वीडियो कान्फ्रेंसिंग के माध्यम ले मुख्यमंत्री सुपोषण अभियान अउ कोरोना संक्रमण ले बचाव बर बनत ‘‘आई.ई.सी.‘‘ कार्ययोजना के समीक्षा करीन।
बइठका म ओमन राज्य म कुपोषण दर म कमी लाय बर पन्द्रह बछर के नोनी, गर्भवती महिला अउ दू बछर के लइका मन ल लक्ष्य बनाके काम करे बर केहे हे। संगेसंग एनीमिया, मलेरिया, डायरिया, जइसे गंभीर बीमारी ले बचाय के संघरा समय-समय म क्रीमी के दवा अउ पौष्टिक भोजन देके निरदेस दीन। खासतौर ले बस्तर अउ सरगुजा संभाग के जम्मों जिला म दस-दस गांव ल चिन्हांकन करके उहां कुपोषन दूर करे के उपाय उपर जोर दीन।
पुलिस महानिदेशक-बैठक
प्रदेस के पुलिस महानिदेशक डी.एम. अवस्थी ह जम्मों पुलिस अधीक्षक मन ल माईलोगिन मन ले संबंधित अपराध म तुरंत कार्रवाई करे के निरदेस देहे। ओमन रायपुर पुलिस मुख्यालय ले वीडियो कान्फ्रेंसिंग के माध्यम से महिला मन ले जुड़े कतकोन प्रकरण मनके समीक्षा करीन। ओमन महिला संबंधित मामला अउ विभागीय जांच म उप पुलिस अधीक्षक स्तर के अधिकारी मन ले विवेचना करे बर केहे हे। संग म जल्दी ले जिलावार मेकेनिजम बनाय उपर घलो जोर दीन।
बइठका म श्री अवस्थी ह किहीन कि राज्य म अवैध सराब ड्रग्स, सट्टा, हुक्काबार, गांजा ले संबंधित अपराध म कड़ा कार्रवाई के निरदेस देहे।
हमर ग्राम सभा
पंचायत अउ ग्रामीण विकास मंत्री टी.एस. सिंहदेव ह केहे हे कि महात्मा गांधी के बताय ‘‘सर्वोदय‘‘ के मार्ग ले ही समाज अउ राष्ट्र के सही मायने म विकास हो सकत हे। काली संझा आकशवाणी रायपुर ले प्रसारित बिसेस कारीकरम ‘‘हमर ग्राम सभा‘‘ गांधीजी के विचार म केन्द्रित रिहीस। ए कारीकरम म अपन विचार प्रकट करत श्री सिंहदेव ह कहिन कि सर्वोदय के मलतब सिरिफ भौतिक प्रगति नइ हे। एखर मतलब जिनगी के जम्मों पहलू अउ क्षेत्र के विकास ले हे। हमर सोच, विचार, व्यवहार, काम करे के तरीका अउ जीवन मूल्य म सार्थक बदलाव लेही। हमन विकास के असल लक्ष्य तक पहुंच सकत हन। श्री सिंहदेव ह कहिन कि सर्वोदय बर गांव ल घलो सहर जइसे साधन संपन्न बना ल पढ़ही।
प्रधानमंत्री-संबोधन
प्रधानमंत्री नरेन्द्र मोदी सामाजिक ससक्तिकरण बर उत्तरदायी आर्टिफिशियल इंटेलिजेंस यानि रेज शिखर सम्मेलन के अब ले थोरकिन देर बाद उद्घाटन करही।
प्रधानमंत्री के संबोधन के सेती आकाशवाणी केन्द्र रायपुर के प्रादेशिक समाचार एकांश डहार ले हर दिन रतिहा सात बजके पांच मिनट म प्रसारित होवइया हिन्दी समाचार बुलेटिन आज रतिहा नौ बजे प्रसारित करे जाही।
मुख्यमंत्री सुपोषण अभियान
राष्ट्रपिता महात्मा गांधी के एक सौ पचासवां जयंती के उपलक्ष्य म छत्तीसगढ़ म दू अक्टूबर दू हजार उन्नीस ले सुरू करे म प्रदेसव्यापी मुख्यमंत्री सुपोषण अभियान ल एक बछर पूरा होगे हे। ए बेरा म महिला अउ बाल विकास मंत्री अनिला भेंडिया ह बतईन कि ए योजना के सुरू होय के समय प्रदेस म लगभग चार लाख बयानवे हजार लइका कुपोषित रिहीस, जेमा ले सड़सठ हजार ले जादा लइका मन कुपोषण ले मुक्त होगे हे। अइसने, कुपोषित लइका मन म करीबन तेरह दशमलव सात नौ प्रतिसत के कमी आय हे।
उहें, प्रदेस म कोरोना संक्रमण के रोकथाम बर जम्मों आंगनबाड़ी अउ मिनी आंगनबाड़ी केन्द्र के बंद होय के बाद भी लइका अउ महतारी मन ल घर-घर जा के रेडी टू ईट पोषक आहार वितरित करे गेहे।
रानी दुर्गावती-जयंती
वीरांगना रानी दुर्गावती के आज जयंती हे। ए बेरा म राज्यपाल अनुसुईया उइके अउ मुख्यमंत्री भूपेश बघेल ह ओमन ल नमन करे हे। मुख्यमंत्री ह अपन संदेस म केहे हे कि तत्कालीन गोंडवाना साम्राज्य के रानी दुर्गावती साहस अउ वीरता के मिसाल हे। ओमन भारतीय नारी सक्ती के प्रतीक हे। श्री बघेल ह कहिन कि मातृभूमि के रक्षा बर रानी दुर्गावती ह अपन प्राण तक ल न्यौछावर कर दीन।
किसान-आत्महत्या
गृह मंत्री ताम्रध्वज साहू ह आज दुर्ग जिला के ग्राम मातरोडीह मचांदूर पहुंच के आत्महत्या करइया किसान दुर्गेश निषाद के परिजन मन ले मुलाकात करीन अउ चार लाख रूपिया के आर्थिक सहायता देके घोसना करीन। ओमन कृषि विभाग के अधिकारी मन ल फसल खराब होय के कारण अउ नुकसान के आंकलन करे के निरदेस घलो दीन।
खबर हे कि किसान दुर्गेश निषाद ह फसल खराब होय के सेती पाछु सनिचर के खेत म फांसी लगाके आत्महत्या करे रिहीस।
रविन्द्र भेंडिया-निधन
प्रदेस के सेवानिवृत्त आईपीएस अधिकारी रविन्द्र भेंडिया के पाछु रतिहा निधन होगे। ओमन महिला एवं बाल विकास मंत्री अनिला भेंडिया के पति रिहीन। रविन्द्र भेंडिया के अंतिम संस्कार आज उंखर गृह ग्राम बालोद जिला के पीपरछेड़ी म होईस।
राज्यपाल अनुसुईया उइके, मुख्यमंत्री भूपेश बघेल अउ गृह मंत्री ताम्रध्वज साहू ह पूर्व आईजी रविन्द्र भेंडिया के निधन म दुख व्यक्त करे हे।
जेईई एडवांस-नतीजा
भारतीय प्रौद्योगिकी संस्थान ह जेईई एडवांस दू हजार बीस के रिजल्ट के घोसना कर देहे। जेईई एडवांस बर कुल एक लाख पचास हजार आठ सौ अड़तीस उम्मीदवार मन ह परीक्षा दे रिहीन, जेमा ले तिरालीस हजार दू सौ चार उम्मीदवार सफल होय हे।
केन्द्रीय सिक्षा मंत्री रमेश पोखरियाल निशंक ह परीक्षा के सफल आयोजन अउ समय म रिजल्ट के घोसना बर संस्थान ल बधाई देहे।