मन की बात
प्रधानमंत्री नरेंद्र मोदी ह आज देसवासी मन ले ‘‘मन की बात‘‘ करिन। ए बेरा प्रधानमंत्री ह किहीन कि- भारत ह रक्षा निर्यात, राजनीतिक सहयोग अउ मित्र देस मनके मामला म सरलग नवा ऊंचाई ल छुवत हे।
आज ‘कारगिल विजय दिवस‘ आय। ए मउका म प्रधानमंत्री ह कारगिल के वीर सहीद मन ल सोरियावत किहीन कि- आज के दिन ह देसवासी मन ल अपन बहादुर सैनिक मन के वीरता अउ बलिदान के सुरता देवाथे। ओमन यहू किहीन किहीन कि कारगिल के ऊंच-ऊंच पहाडी़, कठिन अउ बदरा मउसम, दुस्मन के चुनौती अउ हर परिस्थिति हमर सैनिक मनके आगू आइस, फेर उंखर हौसला हर चुनौती ले बड़का रिहीस, ओमन मां भारती के रक्षा बर अपन सर्वस्व अर्पित कर दीन।
प्रधानमंत्री ह ‘मन की बात‘ कारीकरम म ‘‘कैच द रेन‘‘ अभियान के गोठ करत छत्तीसगढ़ के कोरबा म जल संरक्षण बर करे गे सुग्घर उदिम ल संहराइन। ओमन किहीन कि- एहा ‘‘कैच द रेन‘‘ के सोज्झे संदेस आय कि जब बरसा होही, त ओ पानी ल उहें सकेले जाय। एखर सेति 4 जुलाई ले देसभर म एक ठन बिसेस अभियान चलाय जावत हे। एखर तहत बरसा के पानी सकलाय, अउ जुन्ना जल स्त्रोत के मरम्मत अउ पउधारोपन ल नवा गति दे जावत हे। प्रधानमंत्री ह खुसी जतावत किहीन कि-गांव होय या सहर, पंचायत होय या सामाजिक संस्था, हर जघा लोगन मन बढ़-चढ़के भागीदारी निभाइन। ओमन किहीन कि-छत्तीसगढ के कोरबा, ओडिसा के भुवनेश्वर अउ आंध्रप्रदेस के विजयनगरम म अभियान के सुग्घर परिणाम देखे बर मिलत हे।
देसभर म 7 अगस्त के ‘‘राष्ट्रीय हथकरघा दिवस‘‘ मनाय जाही। प्रधानमंत्री ह किहीन कि- ए दिन देस के बुनकर मनके कला-कौशल अउ सिरजन के सम्मान के प्रतीक आय। प्रधानमंत्री ह स्वतंत्रता दिवस ल सोरियावत सबो लोगन ले 15 अगस्त ले पहिली माय जीओवी पोर्टल म अपन बिचार अउ सुझाव भेजे के आग्रह करिन हें।
मन की बात-मुख्यमंत्री
मुख्यमंत्री विष्णुदेव साय ह आज रइपुर के फाफाडीह के दया भवन म प्रधानमंत्री के ‘मन की बात‘ कारीकरम ल सुनिन। एखर बाद मुख्यमंत्री ह किहीन कि-प्रधानमंत्री के घेरी-बेरी छत्तीसगढ़ के गोठ करइ ह प्रदेस बर गरब के बात हे। ए दारी प्रधानमंत्री ह ‘कैच द रेन‘ अभियान के तहत कोरबा म बरसा के पानी बचाय के उदिम ल गजब संहराइन। ए बेरा मुख्यमंत्री ह यहू बतइन कि-राज्य सरकार ह जल संरक्षण ल जनभागीदारी के अभियान बनाही।
लोक परीक्षा-संशोधन विधेयक
केंद्र सरकार ह काली लोकसभा म लोक परीक्षा-अनुचित साधन रोकथाम संशोधन विधेयक-दू हजार छब्बीस पेस करही। ए विधेयक सम्मार बर लोकसभा के कार्यसूची म सामिल हे। एखर उद्देस्य लोक परीक्षा-अनुचित साधन रोकथाम अधिनियम-दू हजार चौबीस म संशोधन करना हे।
कारगिल विजय दिवस
आज देसभर म ‘कारगिल विजय दिवस‘ मनाय जावत हे। ए मउका म बछर उन्नीस सौ निन्यानबे के कारगिल युध्द म देस के रक्षा करत सर्वोच्च बलिदान देवइया भारतीय सैनिक मन ल श्रध्दांजलि दे जावत हे। आज के दिन ह ऑपरेसन विजय के सफलता अउ कारगिल युध्द म पाकिस्तान उपर भारत के ऐतिहासिक जीत के प्रतीक आय।
ए मउका म राष्ट्रपति द्रौपदी मुर्मू, उपराष्ट्रपति सीपी राधाकृष्णन अउ प्रधानमंत्री नरेंद्र मोदी ह मातृभूमि बर परान देवइया वीर सैनिक मन ल श्रध्दांजलि अर्पित करिन।
ऐति, राजधानी रइपुर म घलो कारगिल विजय दिवस के मउका म सहीद मन ल श्रध्दांजलि देय बर स्मृति साइकिल रैली निकाले गिस। ए रैली मध्य भारत एरिया मुख्यालय के मार्गदर्सन म छत्तीसगढ़ अउ ओडिशा सब-एरिया के सहयोग ले आयोजित करे गिस। ए रैली रइपुर ले सुरू होके नवा रइपुर के सेंध झील पहुंचिस। एमा 100 ले जादा लोगन मन हिस्सा लिन। प्रतिभागी मन म सेना के अधिकारी अउ जवान, पूर्व सैनिक, माईलोगन, युवा अउ लइका सामिल रिहीन। ए बेरा सबो झन साइकिल चलाके कारगिल के वीर सहीद मन ल श्रध्दांजलि देवत देस भक्ति अउ एकता के संदेस दीन।
शिक्षा मंत्री-पदभार
केंद्रीय शिक्षा मंत्री प्रहलाद जोशी ह आज शिक्षा मंत्री के पदभार संभालिन। श्री धर्मेंद्र प्रधान के इस्तीफा के बाद कालिच श्री जोशी के नियुक्ति ए पद बर होय रिहीन। ओमन उपभोक्ता मामला, खाद्य अउ सार्वजनिक वितरण के संग नवीन अउ नवीकरणीय उर्जा मंत्रालय के घलो प्रभार संभालत रइहीं। पदभार ग्रहन के बाद ओमन आने-आने योजना अउ कारीकरम के जानकारी के सेति शिक्षा मंत्रालय के समीक्षा बइठका करिन। ए बेरा ओमन बतइन कि मंत्रालय के कार्यप्रणाली अउ नियम-कारीकरम ल समझे बर बइठका करत हें।
पार्षद शपथ ग्रहण
उप-मुख्यमंत्री अरूण साव अउ केंद्रीय राज्य मंत्री तोखन साहू मंुगेली जिला के पथरिया नगर पंचायत म मनोनीत पार्षद मनके सपथ ग्रहन समारोह म सामिल होइन। ए मउका म उपमुख्यमंत्री श्री साव ह किहीन कि -राज्य सरकार ह पथरिया के बिकास बर सरलग कारज करत हे। ए बेरा ओमन नगर म मांगलिक भवन, मुक्तिधाम अउ नगर पंचायत के सभाकक्ष बनाय बर 3 करोड़ 16 लाख रूपिया मंजूरी देय के घोसना करिन।
टामन सिंह सोनवानी-गिरफ्तार
छत्तीसगढ़ लोकसेवा आयोग के भर्ती मामला म प्रवर्तन निदेशालय-ईडी ह पूर्व अध्यक्ष टामन सिंह सोनवानी ल गिरफ्तार करे हे। ईडी ह ओमन ल रइपुर के बिसेस अदालत म पेस करिस। जिंहा ओमन ल सात दिन के हिरासत म ईडी ल सौंप देहे। एखर ले पहिली, ए मामला म कंेंद्रीय अन्वेषण ब्यूरो-सीबीआई ह घलो टामन सिंह सोनवानी ल गिरफ्तार करे रिहीस, जेखर जांच चलत हे।
ईडी-छापा
प्रवर्तन निदेशालय अउ आयकर विभाग के टीम ह बलौदाबाजार म पीतल उद्योग ले जुड़े कारोबारी राजकुमार सराफ के घर अउ आने-आने ठिकाना म छापामार कारवाही करिस। एखर तहत अधिकारी मन दस्तावेज अउ लेनदेन के जांच करत हें।
नशा-संपत्ति फ्रीज
धमतरी पुलिस ह नसा के अवैध कारोबार के खिलाफ कारवाही करत करीबन 35 लाख 85 हजार रूपिया के अवैध संपत्ति ल रोक दीस। ए कारवाही एन.डी.पी.एस. अउ सेफेमा कानून के तहत करे गिस। पुलिस के अनुसार, जांच म दू मामला म आरोपी मनके बैंक खाता, फिक्स डिपॉजिट, गाड़ी अउ आने-आने संपत्ति के जांच करे गिस। पुलिस के कहना हे कि आगू घला नसा के अवैध कारोबार ले सकेले गे अवैध संपत्ति मनके चिन्हारी करके अइसन कारवाही करे जाही।
आकाशीय बिजली-मौत
कोरबा जिला के कटघोरा ले लगे सलोरा छुरी गांव म खेत म बूता करत बेरा गाज गिरे ले तीन लोगन के मउत होगे। मिले जानकारी ले 25 ले 30 ग्रामीन खेत म बूता करत रिहीन, इही बेरा मउसम बदलिस अउ गाज गिरे ले तीन लोगन ओखर चपेट म आ गिन।
ओति, कोरिया जिला के बैंकुंठपुर म घलो खेत म गाज गिरिस। ए बेरा खेत म बूता करइया छै माईलोगन झुलस गिन, जेमन ल तुरते इलाज बर जिला अस्पताल म भर्ती कराय गिस। जिंहा दू झन के हालत गंभीर बताय जावत हे।
ऐति, सरगुजा जिला के लखनपुर थाना के बिनिया गांव म घलो खेत म रोपा लगावत बेरा गाज गिरे ले एक झन नानचुन नोनी के मउत होगिस। उहें, दू झन आने लोगन झुलस गिन। जिंकर अस्पताल म इलाज चलत हे।
राज्यपाल-पर्यावरण अभियान
राज्यपाल रमेन डेका ह आज प्रजापिता ब्रम्हकुमारी ईश्वरीय विश्वविद्यालय डहार ले पर्यावरण संरक्षण अउ आपदा प्रबंधन बर चलाय जवइया राष्ट्रीय अभियान के सुभारंभ करिन। 9 अगस्त तक चलइया ए यात्रा छत्तीसगढ़ अउ मध्यप्रदेस के आने-आने इलाका म पर्यावरण संरक्षण अउ आपदा प्रबंधन बर जन-जागरूकता के संदेस देवत जबलपुर पहुंचही।
हॉकी प्रतियोगिता
जशपुर जिला के एस्ट्रोटर्फ हॉकी स्टेडियम म आज ले 26वीं राज्य स्तरीय शालेय हॉकी प्रतियोगिता के सुभारंभ होइस। ए प्रतियोगिता 29 जुलाई तक चलही। प्रतियोगिता के उद्घाटन जशपुर विधायक रायमुनी भगत ह करिन। ए प्रतियोगिता म प्रदेस के पांच संभाग मनके दू सौ चालीस खिलाड़ी मन भाग लेवत हे।
अब जानव मौसम के हाल…
मौसम विभाग के अनुसार उत्तर-पश्चिम बंगाल के खाड़ी अउ ओखर ले लगे पश्चिम बंगाल अउ उत्तरी ओडिशा के तट म एक निम्न दाब के परभाव ले
अवइया दू दिन तक प्रदेस के कतकोन जघा म हल्का ले मध्यम बरसा होय के संभावना हे। उहें, कुछेक जघा म गरज-चमक के संग भारी ले अति भारी बरसा होय के घलो चेतावनी देय गेहे।