धर्मेन्द्र प्रधान-इस्तीफा
केंद्रीय शिक्षा मंत्री धर्मेन्द्र प्रधान ह आज प्रधानमंत्री नरेंद्र मोदी ल अपन इस्तीफा सौंप दीस। सोसल मीडिया पोस्ट म श्री प्रधान ह किहीन कि-पाछू दस दिन ले छात्र मनके विरोध प्रदर्सन के बाद बने हालात ले दुखी हंव अउ एहा निजी प्रतिष्ठा के बिसय नोहय। ओमन यहू किहीन कि- जंतर-मंतर अउ जम्मों देसभर म बने हालात के लाभ राष्ट्र विरोधी ताकत मन झन उठा सकंय अउ कोनो घलो छात्र के भविष्य कानूनी झंझट म झन उलझे एखर सेति ओमन प्रधानमंत्री ल अपन इस्तीफा सौंपे के निरनय लिन। ओमन ए बेरा प्रधानमंत्री के मार्गदर्सन, विस्वास अउ सरलग सहयोग बर आभार जतावत किहीन कि-राष्ट्र सेवा जिनगी के सर्वोच्च प्राथमिकता हे अउ एखर प्रति सदा समर्पित रइही।
श्री प्रधान ह बतइन कि-नीट-यूजी परीक्षा म गड़बड़ी के बाद सरकार ह सीबीआई ल जांच सौंपिस अउ परीक्षा ल रद्द कर दीस। सरकार ह पुर्नपरीक्षा के नवा तिथि के घलो घोसना करिस। अवइया बछर ले ए परीक्षा ल कम्प्यूटर आधारित करे के निरनय लेय हे।
एनटीए-अधिकारी बर्खास्त
राष्ट्रीय परीक्षा एजेंसी-एन.टी.ए. के सैंतालीस झन अधिकारी मन ल बर्खास्त कर देय गिस। मिले जानकारी ले कुछेक अधिकारी मनके खिलाफ कानूनी अउ आपराधिक कारवाही घलो करे जाही। एहा परीक्षा बेवस्था म सुधार लाने के दिसा म बड़का कदम हे। संगेसंग पेपर लीक के मामला उपर होवत विवाद के सेति एजेंसी म करे जवइया बड़का बदलाव के हिस्सा घलो आय।
प्रधानमंत्री-पेपर लीक कानून
प्रधानमंत्री नरेंद्र मोदी ह पेपर लीक मामला म सख्त कानून लाने के गोठ कहत जारी करे गे अपन वीडियो संदेस ले मिले प्रतिक्रिया अउ सुझाव के सेति देस के युवा मन ल धन्यवाद देइन हें। श्री मोदी ह युवा मन के जबर समर्थन बर उंखर आभार घलो जतइन। बतादन कि प्रधानमंत्री के वीडियो संदेस ल अब तक तीस करोड़ तीस लाख ले जादा घांव तक देखे जा चुके हे।
वैष्णो देवी यात्रा
जम्मू-कश्मीर म भारी बरसा के सेति सरलग छै दिन ले बंद वैष्णोदेवी के यात्रा आज ले फेर सुरू होइस। अब ए रद्दा ल तीर्थयात्री मन बर सुरक्षित घोसित कर दे गेहे। उहें, तीर्थयात्री मन ल श्राइन बोर्ड अउ सुरक्षा एजेंसी मनके निरदेस के पालन करे के सलाह दे गेहे।
सहायक शिक्षक-भर्ती प्रक्रिया
प्रदेस म सहायक शिक्षक के खाली पद म भर्ती प्रक्रिया सुरू हो गेहे। छत्तीसगढ़ कर्मचारी चयन मंडल ह भर्ती परीक्षा बर ऑनलाइन आवेदन मंगाय हे, जेमा चौबीस जुलाई ले इक्कीस अगस्त तक आवेदन करे जा सकथे। लिखित परीक्षा के संभावित तिथि ग्यारा अक्टूबर के तय करे गेहे। संगेसंग प्रदेसभर के सोलह जिला म परीक्षा केंद्र बनाय जाही। ए भर्ती बर जादा जानकारी कर्मचारी चयन मंडल के आधिकारिक वेबसाइट म देख सकत हव।
मन की बात
प्रधामनंत्री नरेंद्र मोदी काली बिहनिया ग्यारा बजे आकाशवाणी ले ‘‘मन की बात‘‘ करहीं। मासिक रेडियो कारीकरम के एक सौ छत्तीसवीं कड़ी म देस अउ विदेस के लोगन ले अपन बिचार साझा करहीं। ए कारीकरम के प्रसारण आकाशवाणी अउ दूरदर्शन के जम्मो नेटवर्क, एआईआर न्यूज वेबसाइट अउ न्यूज ऑन एआईआर मोबाइल ऐप म करे जाही। एखर सोज्झे प्रसारण आकाशवाणी, दूरदर्शन, प्रधानमंत्री कार्यालय अउ सूचना-प्रसारण मंत्रालय के यू-ट्यूब चैनल म घलो होही। हिंदी प्रसारण के तुरते बाद आकाशवाणी ह क्षेत्रीय भाषा म घलो ए कारीकरम के प्रसारण करही।
सीजेपी आंदोलन खत्म
अभी मिले जानकारी के मुताबिक काकरोच जनता पार्टी- सी.जे.पी. ह आज अपन आंदोलन खतम कर दीस। केंद्रीय मंत्री जे.पी.नड्डा अउ जितेंद्र सिंह के संग सी.जे.पी. प्रवक्ता सौरभ दास अउ आशुतोष रांका ह पत्रकारवार्ता म ए जानकारी दीन। सौरभ दास ह किहीन कि जंतर-मंतर म मौजूद जम्मो प्रदर्सनकारी अब अपन घर लहुटे।
उहें, आशुतोष रांका ह बतइन कि पाछू कुछेेक दिन म केंद्र सरकार ले तीन घांव गोठबात होइस। ओमन किहीन कि हमर तीनों मांग ल मान ले गेहे। एमा केंद्रीय शिक्षा मंत्री धर्मेन्द्र प्रधान के इस्तीफा सबो केस वापस अउ नीट पीड़ित ल एक करोड़ रूपिया मुआवजा सामिल हे।
महतारी वंदन वृक्षारोपण अभियान
प्रदेस म पहिली घांव ‘महतारी वंदन वृक्षारोपण अभियान‘ के आयोजन तीस जुलाई के करे जाही। एक पेड़ मां के नाम अभियान ले प्रेरित ए अभियान के उद्देस्य मातृशक्ति ल पर्यावरण संरक्षण ले जोड़ना हे। बालोद जिला म राखे गे ए वृहद पउधारोपन कारीकरम म महतारी वंदन योजना ले लाभान्वित माईलोगिन मन ह सामिल होहीं।
विस्फोटक बरामद
नारायणपुर जिला म ओरछा थाना इलाका के पदगंुडा-करसेनार के जंगल ले भारी मात्रा म माओवादी मनके लुकाय गे बिस्फोटक जिनिस ल तलासी अभियान के बेरा बरामद करे गिस।
उहें, बीजापुर जिला के पीडिया-मुतवंडी इलाका के हिरमागुंडा गांव के जंगल ले घलो सुरक्षाबल मन अब्बड़ अकन बिस्फोट जिनिस बरामद करिन। एमा आईईडी, कॉर्डेक्स वायर, डेटोनेटर, गन पाउडर संचार उपकरण अउ रेडियो सेट के संग आने-आने जिनिस सामिल हे।
गांजा-बरामद
अंतरराज्यीय गांजा तस्करी के खिलाफ महासमुंद पुलिस ह बड़का कारवाही करे हे। एक ठन कार ले करीबन अड़तीस किलो गांजा के संग तस्कर ल गिरफ्तार करिस जउन बिहार के कैमूर के रहइया बताय गिस।
स्लीपर सेल सदस्य-गिरफ्तार
जांजगीर-चांपा जिला के अकलतरा म पुलिस ह आई.एस.आई. स्लीपर सेल के एक सदस्य ल गिरफ्तार करे हे। आरोपी ल पंाच दिन के हिरासत म लेके पूछताछ करे के बाद जेल भेज दे गिस। पुलिस अधीक्षक विजय पांडे ह बतइन कि पंजाब के रहइया आरोपी ल बीस जून के गिरफ्तार करे गे रिहीस। एखर खिलाफ गैर कानूनी गतिविधि रोकथाम अधिनियम के तहत कारवाही करे जावत हे।
डीन-मृत्यु
बिलासपुर के गुरू घासीदास केंद्रीय विश्वविद्यालय के डीन-प्रोफेसर शैलेन्द्र कुमार के निधन हो गिस। मिले जानकारी ले एक ठन कारीकरम म गीत प्रस्तुत करत रिहीन, उही बेरा उंखर तबीयत बिगड़े के बाद ओमन ल तुरते अस्पताल पहंुचाय गिस, फेर ओमन ल नइ बचाय जा सकिस।
जिले की चिट्ठी
प्रादेशिक समाचार एकांश आकाशवाणी रइपुर डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल छत्तीसगढ़ के जम्मो आकाशवाणी कंेंद्र एके संघरा रिले करहीं अउ ए दारी के अंक म ‘‘बीजापुर‘‘ जिला के गतिविधि के जानकारी दे जाही।
अउ अब थोरकुन समाचार सार म –
– छत्तीसगढ़ कर्मचारी चयन मंडल डहार ले आयोजित प्रयोगशाला परिचारक के खाली पद बर भर्ती परीक्षा के आयोजन काली छब्बीस जुलाई के करे जाही। परीक्षा बिहनिया दस बजे ले मंझनिया सवा बारह बजे तक होही।
– दुरूग जिला के पुलगांव थाना इलाका के गनियारी-पीपरछेड़ी गांव म घटना हो गिस। शिवनाथ नदी म नहावत बेरा दू झन युवक बोहा गिन, जेमा एक झन के शव बरामद, दूसर के तलास करे जावत हे।
– बलौदाबाजार जिला के सकरी गांव के तिर एक ठन यात्री बस अउ टरक के बीच जोरदार टक्कर होइस, जेमा सोलह झन यात्री घायल होइन, जेमा तीन के हालत गंभीर बताय जावत हे।
– महादेव सट्टा ऐप अउ मनी लॉन्ड्रिंग मामला म गिरफ्तार कारोबारी विकास गर्ग ल ईडी ह दस दिन के हिरासत के बाद आज रइपुर के बिसेस अदालत म पेस करिस, जिंहा ले ओला चौदह दिन कि न्यायिक हिरासत म भेज दे गिस।
अउ
– सांरगढ़-बिलाईगढ़ जिला के सरिया थाना पुलिस ह देवगांव के तिर भारी मात्रा म कोडीन सिरप के संग तीन झन आरोपी गिरफ्तार करिस।