प्रधानमंत्री-पेपर लीक मामला
प्रधानमंत्री नरेंद्र मोदी ह किहीन हे कि पेपर लीक के घटना के बाद पादू ढाई महिना म कई ठिन कदम उठाय गेहे। दोषी मन ल गिरफ्तार करके जेल भेजे गेहे। काली रतिहा एक ठिन वीडियो संदेस म श्री मोदी ह किहीन कि सरकार के मुख्य जिम्मेदारी ए सुनिश्चित करना रिहीस कि विद्यार्थी मनके सैक्षणिक बछर बेकार झन जावय।
प्रधानमंत्री ह किहीन कि संबंधित विभाग मन ल फास्ट ट्रैक अदालत बर प्रस्ताव तियार करे के निरदेस दे गेहे। फास्ट ट्रैक कोर्ट अउ कठोर सजा के प्रावधान के कैबिनेट म चर्चा होही। कैबिनेट के सुझाव के बाद ओला आखिरी रूप दे जाही अउ सोमवार ले जल्दी ले जल्दी ओ बिल ल सदन म पारित कराय के परयास करे जाही।
केंद्रीय मंत्री-दिल्ली प्रदर्सन
केंद्रीय मंत्री जे.पी.नड्डा अउ जितेन्द्र सिंह ह आज नई दिल्ली म कॉक्रोच जनता पार्टी के प्रतिनिधि मंडल ले भेंट करीन। श्री नड्डा ह बतइन कि बइठका के दउरान परीक्षा प्रणाली म सुधार संबंधी पार्टी के मांग मन ल धियान पूर्वक सुने गीस। श्री नड्डा ह बतइन कि कॉक्रोच जनता पार्टी ह तीन ठिन मुख्य मांग राखिन अउ परीक्षा के उत्तर पुस्तिका के लीक होय उपर रोक लगाय बर कुछेक सुधार मनके सुझाव घलो दीन। श्री नड्डा ह किहीन कि सरकार काली प्रतिनिधि मंडल के संग एक अउ दउर के चर्चा करही।
इही बीच, प्रधिनिधि मंडल म सामिल कॉक्रोच जनता पार्टी के प्रवक्ता आशुतोष रांका ह दावा करीन कि सरकार ह ओखर दू ठिन मांग उपर सैध्दांतिक रूप ले सहमति दे गेहे।
सक्षम आंगनबाड़ी केंद्र
केंद्र सरकार ह कहे हे कि बेहतर पोषण अउ प्रारंभिक बाल्यावस्था देखभाल अउ शिक्षा गतिविधि बर पोषण अभियान के दूसरइया चरण के तहत दू लाख आंगनबाड़ी केंद्र मन ल सक्षम आंगनबाडी केंद्र म उन्नत करे जाही। महिला अउ बाल विकास राज्य मंत्री सावित्री ठाकुर ह आज लोकसभा म एक प्रश्न के लिखित उत्तर म ए जानकारी दीन।
राज्यपाल-मुलाकात
राज्यपाल रमेन डेका ले रईपुर म राज्य के निजी विश्वविद्यालय के पदाधिकारी मन ले भेंट करके छत्तीसगढ़ निजी विश्वविद्यालय स्थापना अउ संचालन संसोधन विधेयक दू हजार छब्बीस के तहत नवा निजी विश्व विद्यालय के स्थापना ले संबंधित प्रावधान उपर विचार विमर्स करीन। श्री डेका ह राज्य म गुणवत्तापूर्ण उच्च शिक्षा के विस्तार ल लेके अपन विचार साझा करीन। ए मउका म आने-आने निजी विश्वविद्यालय के कुलाधिपति अउ कुलपति मौजूद रइही।
पोषण-सीएसआर
महिला अउ बाल विकास विभाग ह कॉर्पोरेट सोसल रिस्पॉन्सिबिलिटी-सीएसआर के माध्यम ले राज्य म पोषण, बाल विकास अउ महिला सशक्तिकरण ल कारीकरम ल गति दे के पहल सुरू करे हे। इही उद्देस्य ले रईपुर म विभाग अउ आने-आने औद्योगिक संस्थान के प्रतिनिधि मन संग राज्य स्तरीय बइठका आयोजित करे गीस। बइठका के अध्यक्षता करत विभाग के प्रमुुख सचिव शहला निगार ह उद्योग मनके आह्वान करत किहीन कि सरकार के योजना ल अउ जादा प्रभावी बनाय म ओखर भागीदारी बहुत महत्वपूर्ण हे।
विभाग के संचालक डॉक्टर रेणुका श्रीवास्तव ह किहीन कि-सीएसआर के सहयोग के माध्यम ले आंगनबाड़ी केंद्र म आधारभूत सुविधा के विकास करे के संघरा नवाचार आधारित गतिविधि के विस्तार करे जा सकत हे।
सड़क हादसा-समझौता ज्ञापन
प्रदेस म सड़क दुघर्टना मन म कमी लाय बर राज्य शासन अउ आईआईटी मद्रास के सड़क सुरक्षा उत्कृष्टता केंद्र के बीच समझौता ज्ञापन म हस्ताक्षर करे गेहे। एखर तहत डेटा आधारित हाइपर लोकल सड़क सुरक्षा कारीकरम सुरू करे जाही। पहिली चरण म सड़क दुर्घटना के दृष्टि ले सबले संवेदनसील दस जिला मन म ए कारीकरम लागू होही। संजय प्लेटफार्म के माध्यम ले चिन्हित ब्लैक स्पॉट अउ दुर्घटना संभावित जघा मन म समयबध्द अउ कम लागत वाला सड़क सुरक्षा उपाय करे जाही।
एसीबी-गिरफ्तार
सक्ति जिला म एंटी करप्शन ब्यूरो के टीम ह जिला अस्पताल सक्ति के प्रभारी सिविल सर्जन डॉक्टर संतोष कुमार पटेल ल एक लाख रूपिया रिस्वत लेवत रंगेहाथ गिरफ्तार करे हे। प्रभारी सिविल सर्जन उपर आरोप हे कि ओमन अपनेच अधिनस्थ कर्मचारी के पे डेटा भेजे के बदले रिस्वत मांगे रिहीस।
उहें, एसीबी के टीम ह बस्तर जिला के कोड़ेनार थाना म पदस्थ महिला आरक्षक तिलेश्वरी साहू ल दस हजार रूपिया के रिस्वत लेवत रंगेहाथ गिरफ्तार करे हे।
शिक्षक-निर्देश
राज्य सरकार ह हड़ताल करत अतिथि शिक्षक मन ल सत्ताईस जुलाई तक काम म लहुटे के निरदेस देहे। ए संबंध म लोक शिक्षण संचालनालय ले जारी आदेस म कहे गेहे कि हड़ताल के सेति स्कूल मन म लइका मन के पढ़ई प्रभावित होवत हे। एखर सेति यदि कोई अतिथि शिक्षक तय बेरा तक काम म नइ लहुटही त उंखर सेवा तत्काल प्रभाव ले खतम कर दे जाही।
अभी अभी मिले समाचार मुताबिक सरकार ले मिले आश्वासन के बाद अतिथि शिक्षक मन ह अपन हड़ताल खतम कर देहे।
पुलिस जवान-घायल
सूरजपुर जिला के मदन नगर-धरमपुर इलाका म भूमि अधिग्रहण अउ कोयला खदान के सर्वे करे पहुंचे पुलिस अउ प्रशासन के टीम ल ग्रामीन मनके विरोध के सामना करे बर पड़िस हे। जानकारी के अनुसार ग्रामीण मनके पथराव म पुलिस के करीबन चौबीस जवान घायल हो गेहे। एमा महिलाकर्मी घलो सामिल हे। घायल मन ल अस्पताल म भर्ती कराय गेहे। स्थिति म नियंत्रण रखे बर मउका म बड़का संख्या म पुलिस बल तैनात करे गेहे।
खरसिया-नया रायपुर-परमलकसा-रेललाइन
छत्तीसगढ़ म प्रस्तावित खरसिया-नवा रईपुर-परमलकसा नवा दोहरा लाइन परियोजना ल अइसने डिजाइन करे गेहे कि एखर ले जादा दबाव वाला बिलासपुर, रईपुर अउ दुरूग स्टेसन ल बाईपास करइया माल गाड़ी अउ यात्री ट्रेन के सुगम अउ तेज अवई-जवई हो सकही। ए जानकारी केंद्रीय रेल मंत्री अश्विनी वैष्णव ह आज राज्य सभा म एक लिखित उत्तर के माध्यम ले दीन।
ए रेल मार्ग छत्तीसगढ़ के आठ प्रमुख जिला ले होके गुजरही अउ एला औद्योगिक अउ खनिज क्षेत्र ल आपस म जोड़े के उद्देस्य ले तियार करे गेहे। ए कॉरिडोर के मुख्य धियान बलौदाबाजार जिला ल रेल नेटवर्क ले जोड़ना हे।
बतादन कि रेल मंत्रालय ह सात हजार आठ सौ चौव्वन करोड़ रूपिया के अनुमानित लागत ले दू सौ अठहत्तर किलो मीटर लंबा खरसिया-नवा रईपुर-परमलकसा नवा दोहरा रेल लाइन के निर्माण ल पाछू साल अप्रैल महिना म मंजूरी दे रिहीस।
ब्रिक्स-स्कूल चयन
रईपुर के शंाति नगर स्थित पी.जी.उमाठे उत्कृष्ट शासकीय विद्यालय के चयन ब्रिक्स-दू हजार छब्बीस स्कूल जियोस्पेशियल परियोजना शोकेस बर होय हे। जिला कलेक्टर डॉक्टर गौरव सिंह ह के उपलब्धि बर विद्यार्थी अउ शिक्षक मन ल बधई दीन। ए अंतरराष्ट्रीय मंच ले छत्तीसगढ़ ले केवल एके स्कूल ल कोनो परियोजना बर चयनित होय के मउका मिले हे।
बातों-बातों-में
प्रादेशिक समाचार एकांश के समसामयिक बिसय उपर आधारित कारीकरम ‘‘बातों-बातों-में‘‘ ए बखत बरसात के मौसम म होवइया बीमारी अउ बचाव उपर एम्स रईपुर के डॉक्टर तुषार भरत जगजापे ले लेगे भेंटवार्ता के प्रसारण करे जाही। एखर प्रसारण काली पच्चीस जुलाई के आकाशवाणी केंद्र रइपुर डहार ले एफ.एम. अउ प्रायमरी चैनल म बिहनिया नौ बजे ले करे जाही। एला छत्तीसगढ़ स्थित आकाशवाणी के जम्मों केंद्र रिले करहीं।
अउ अब पेस हे मौसम के हाल…
मौसम विभाग ह अवइया चार दिन तक प्रदेस म बरसा के गतिविधि म कमी आय के संभावना जताय हे। संघरा अधिकतम तापमान म एक ले तीन डिग्री सेल्सियस तक बढ़ोत्तरी हो सकत हे। मौसम विभाग के अनुसार प्रदेस म हाल फिलहाल कहू भी भारी बारिस होय के आसार नइ हे।
अउ अब थोरकुन समाचार सार म –
– छत्तीसगढ़ राज्य हस्तसिल्प विकास बोर्ड के अध्यक्ष शालिनी राजपूत ह कोंडगांव स्थित सिल्पनगरी के दउरा करके सिल्पकार मन ले गोठबात करीन अउ चालीस झन सिल्पी मन ल आधुनिक टूल कीट बांटिन।
अउ
– जांजगीर-चांपा जिला के पनगांव म सांप के डसे ले एक झिन पंद्रह साल के लइका के मउत हो गेहे। अइसने, जिला के बाराद्वार म घलो एक ग्रामीण के सांप के डसे ले मउत होगे।