प्रधानमंत्री/केन्द्रीय मंत्री-पेपर लीक मामला
प्रधानमंत्री नरेन्द्र मोदी ह घोषणा करे हे कि केन्द्र सरकार ह परीक्षा प्रश्न पत्र लीक मामला म सामिल लोगन मन ल सजा देवाय बर फास्ट ट्रैक अदालत बनाही। छात्र मनके भविष्य के रक्षा करना सरकार के पहिली प्राथमिकता हरय। प्रधानमंत्री के बयान परीक्षा प्रश्नपत्र लीक मामला म दिल्ली के जंतर-मंतर म चलत छात्र मनके विरोध प्रदर्शन के बीच आय हे। प्रधानमंत्री ह किहीन कि ओमन एखर ले जुड़े अधिकारी अउ पदाधिकारी मन ल ए बारे म जरूरी कदम उठाय के निरदेस देहे।
उहें, केन्द्रीय गृहमंत्री अमित शाह ह फास्ट ट्रैक अदालत के स्थापना के माध्यम ले पेपर लीक मामला म सुनवाई म तेजी लाय अउ दोसी मनके खिलाफ कड़ा कार्रवाई कराय के प्रधानमंत्री के फइसला के प्रसंसा करे हे। सोशल मीडिया पोस्ट म ओमन किहीन कि युवा मनके कल्याण अउ उंखर बढ़िया भविष्य मोदी सरकार के पहिली प्राथमिकता हरय।
हाईकोर्ट-जाति प्रमाण पत्र/एन.डी.पी.एस.
छत्तीसगढ़ उच्च न्यायालय ह किहीन हे कि यदि कोनों परिवार के सदस्य के वैध जाति प्रमाण पत्र पहिली ले जारी हे, त सिरिफ बछर उन्नीस सौ पचास के दस्तावेज के आभाव म परिवार के आने पात्र लइका मन ल जाति प्रमाण पत्र ले अलग नइ करे जा सकय। कोर्ट ह एखर ले जुड़े अधिकारी मन ल यहू निरदेस दीन कि जाति प्रमाण पत्र बर पेस अरजी के संग जरूरी दस्तावेज लेके दू महीना के भीतर मामला के निपटारा करत जाति प्रमाण पत्र जारी करे जाय। न्यायाधीश ए.के. प्रसाद के सिंगल बेंच ह ए याचिका के सुनवाई के दउरान फइसला सुनईन।
उहें, होईकोर्ट ह एन.डी.पी.एस. एक्ट के तहत दरज मामला के जांच म पुलिस अधिकारी मन डहार ले करे जात लापरवाही उपर नाराजगी जतईन। कोर्ट ह एन.डी.पी.एस. एक्ट के एक ठिन मामला म निचली अदालत डहार ले सात झिन आरोपी मन ल सुनाय गे दस ले पन्द्रह साल के कठोर कारावास अउ जुर्माना के सजा ल रद्द करत ए टिप्पणी करीन।
केन्द्रीय राज्यमंत्री-मुलाकात
केन्द्रीय आवासन अउ सहरी कार्य राज्यमंत्री तोखन साहू ह काली नई दिल्ली म केन्द्रीय जल शक्ति मंत्री सी.आर. पाटिल ले मिलीन। ए दउरान ओमन छत्तीसगढ़ अउ ओड़िशा के बीच अब्बड़ बेरा ले चलत महानदी जल विवाद ल लेके गोठबात करीन। बइठका म केन्द्रीय जल शक्ति राज्यमंत्री डॉक्टर राजभूषण चौधरी घलो आय रिहीन।
राष्ट्रीय प्रसारण दिवस
आज राष्ट्रीय प्रसारण दिवस हरय। इही दिन बछर उन्नीस सौ सत्ताईस म मुंबई ले देस के पहिली रेडियो प्रसारण सुरू होइस।
ए मउका म प्रसार भारती के मुख्य कार्यकारी अधिकारी गौरव द्विवेदी ह किहीन कि पाछु निन्यानवे साल म प्रसारण के विकास रेडियो ले टेलीविजन अउ अब डिजिटल स्ट्रीमिंग तक होय हे। आकाशवाणी समाचार ले विशेष गोठबात म ओमन किहीन कि प्रसारण भारती ह देस-विदेस म दर्सक मन बर हर प्रकार के मनोरंजक, सूचनात्मक अउ सैक्षिक सामग्री प्रस्तुत करत रइही।
कैच द रेन-कोरबा
केन्द्रीय आवास अउ सहरी कार्य मंत्रालय के पहल ‘‘कैच द रेन – वेयर इट फॉल्स, व्हेन इट फॉल्स‘‘ के तहत जल संरक्षण, भूजल पुनर्भरण अउ जल निकाय मनके कायाकल्प म छत्तीसगढ़ के कोरबा जिला ह राष्ट्रीय स्तर म पहिचान बनाय हे। हसदेव नदी के तट म होय के बाद जल संकट ले जूझत कोरबा ल आवास अउ सहरी कार्य मंत्रालय ह ‘‘कैच द रेन‘‘ अभियान ले जोड़ीन।
कोरबा जिला के कलेक्टर कुणाल दुदावत ह बतईन कि ‘‘कैच द रेन‘‘ अभियान अउ ‘‘जल संचय – जन भागीदारी‘‘ मिशन के तहत पूरा जिला म पानी बचाय ल पहिली प्राथमिकता दे जात हे। ओमन बतईन कि जिला म एसो बीस हजार जल संरक्षण संरचना तियार करे के लक्ष्य राखे हे।
पत्रकारवार्ता
आज रायपुर म इलेक्ट्रॉनिक्स अउ सूचना प्रौद्योगिकी विभाग डहार ले पत्रकारवार्ता के आयोजन करे गीस। ए मउका म विभाग के सचिव अंकित आनंद ह किहीन कि भारत नेट परियोजना के तीसर चरण म ग्राम पंचायत मन ल उच्च गुणवत्ता वाले ब्रॉडबैंड नेटवर्क ले जोड़े जाही। ए परियोजना बर केन्द्र सरकार ह तीन हजार नौ सौ अट्ठाईस करोड़ रूपिया मंजूर करे हे।
यूनिसेफ-कार्यशाला
यूनिसेफ के रायपुर इकाई डहार ले आज राजधानी रायपुर म एक ले सात अगस्त तक मनाय जवइया विश्व स्तरनपान सप्ताह अउ स्वस्थ आहार बिसय उपर केन्द्रित कार्यशाला के आयोजन करे गीस। कार्यशाला के उद्देश्य स्तनपान के महत्व अउ स्वस्थ आहार के प्रति लोगन मन ल जागरूक करना रिहीस।
कार्यशाला ल संबोधित करत स्वास्थ्य विभाग के उप निदेशक वी.आर. भगत ह बतईन कि नेशनल फैमिली हेल्थ सर्वे के रिपोर्ट म छत्तीसगढ़ ह पूरा भारत म एक्सक्लूजिव ब्रेस्ट फीडिंग म बढ़िया प्रदर्सन करे हे।
उहें, यूनिसेफ के पोषण विशेषज्ञ अपर्णा देशपांडे ह घलो कार्यशाला ल संबोधित करत स्तनपान के महत्व अउ ओखर ले जुड़े आने-आने पहलु के बारे म जानबा दीन।
पूर्व क्रिकेटर-एफआईआर
दुरूग जिला के अदालत ह पूर्व क्रिकेटर राजेश चौहान के खिलाफ सत्रह लाख बावन हजार रूपिया के कथित धोखाधड़ी के मामला म एफआईआर दरज करे के आदेस देहे। आरोप हे कि ओमन एक झिन ठेकेदार ल ओड़िशा स्थित जिंदल इस्पात लिमिटेड म ट्रांसपोर्ट के काम देवाय के झांसा देके पइसा लीन। बाद म जांच म कथित वर्क ऑर्डर अउ आने कागजात मन फर्जी पाय गीस। अदालत ह मोहन नगर पुलिस ल मामला दरज करके निष्पक्ष जांच के निरदेस देहे।
दुर्ग-डिजिटल एफआईआर प्रणाली
दुरूग जिला छत्तीसगढ़ के पहिली अइसन जिला बन गेहे, जिहां डिजिटल एफआईआर प्रणाली लागू कर दे गेहे। जिला के जम्मों विवेचक मन अब ई-साइन के माध्यम ले एफआईआर के काम पूरा करत हे। उहें, थाना भिलाई नगर म प्रार्थी के पहिली ई-साइन घलो करे गीस। विवेचक अउ प्रार्थी दूनों के डिजिटल हस्ताक्षर के संग एफआईआर के काम पेपरलेस होगे हे।
ठगी
जांजगीर-चांपा जिला म पुलिस ह शेयर बाजार म निवेस करके रकम दोगुना करे के लालच देके करोड़ों रूपिया के ठगी करइया पति-पत्नी ल गिरफ्तार कर लेहे। पुलिस ह दूनों के तीर ले लैपटॉप, टैबलेट, मोबाइल फोन अउ चेकबुक ल जब्ती करे हे। जानबा के मुताबिक चांपा के ही रहइया हेमदत्त केशरवानी ह चौबीस मई के आरोपी मन ल डहार ले दू करोड़ चौरानवे लाख रूपिया ले जादा के ठगी के रिपोर्ट दरज कराय रिहीन।
दुर्घटना
दुरूग जिला के भिलाई टाउनशिप म आज बिहनिया होय सड़क हादसा म कार म बइठे दू झिन मनखे के मउत होगे। ए घटना गुंडिचा मंडप के आगू कार के एक ठिन पेड़ ले टकराय ले होइस।
ओति, बालोद जिला के दल्लीराजहरा थाना क्षेत्र म एक ठिन कार ह अनते-तनते होके बिजली के खंभा ले टकरा गे। ए घटना म इंजीनियरिंग छात्रा के मउकाच म मउत होगे अउ पांच झिन आने मनखे मन गंभीर रूप ले घायल होगे हे।
उहें, कोंडागांव जिला के गिरोला-रांधन रद्दा म आज बिहनिया होय सड़क दुर्घटना म एक झिन युवक के मउत होगे अउ एक झिन आने मनखे गंभीर रूप ले घायल होगे हे।
छू लो आसमान/नीट यूजी
दंतेवाड़ा जिला के आवासीय कोचिंग संस्था ‘छू लो आसमान‘ के बावन झिन छात्र मन ह नीट-यूजी दू हजार छब्बीस के परीक्षा पास करे हे, जेमा ग्यारह झिन छात्र मनके एमबीबीएस अउ ग्यारह छात्र मनके बीडीएस, बीएएमएस अउ आने चिकित्सा पाठ्यक्रम मन म प्रवेस पक्का माने जात हे।
अउ अब थोरकुन समाचार सार म –
– छत्तीसगढ़ कैडर के भारतीय वन सेवा अधिकारी सातोविशा समाजदार ल केन्द्र सरकार ह राष्ट्रीय मानवाधिकार आयोग म निदेशक पद म नियुक्त करे हे।
– बिलासपुर के गुरू घासीदास केन्द्रीय विश्वविद्यालय म पेपर लीक मामला म विश्वविद्यालय प्रशासन ह बीए-एलएलबी छठवां सेमेस्टर के मुख्य परीक्षा ल रद्द कर देहे।
– दुरूग जिला के गांव चिंगरी म कृषि विभाग ह दू ठिन गोदाम ल सोल करके बड़ मात्रा म कीटनाशक, खातू, रॉ-मटेरियल अउ पैकिंग मसीन जब्त करे हे।
अउ
– रायपुर स्थित पंडित जवाहर लाल नेहरू स्मृति चिकित्सा महाविद्यालय अउ डॉक्टर भीमराव अंबेडकर स्मृति चिकित्सालय के ईएनटी विभाग ह बैचलर ऑफ ऑडियोलॉजी एंड स्पीच लैंग्वेज पैथोलॉजी पाठ्यक्रम के पहिली साल म प्रवेस बर दस अगस्त तक अरजी मंगाय गेहे।