प्रधानमंत्री-आह्वान
प्रधानमंत्री नरेन्द्र मोदी ह देस म भविष्य म होवइया परीक्षा मन म पेपर लीक रोके बर जम्मों संबंधित पक्ष ल मिलके प्रयास करे के आह्वान करे हे। आज संसद भवन म राष्ट्रीय लोकतांत्रिक गठबंधन-एनडीए संसदीय दल के साप्ताहिक रणनीति बइठका के बाद संसदीय कार्य मंत्री किरेन रिजिजू ह बतईन कि श्री मोदी ह परीक्षाा पेपर लीक म सामिल लोगन मनके खिलाफ कड़ा कार्रवाई करे के अउ देस के युवा मनके हित के रक्षा करे बर सरकार के संकल्प ल दोहरईन। प्रधानमंत्री ह किहीन कि हालेच म होय नीट पेपर लीक मामला म सामिल जम्मों लोगन मन ल गिरफ्तार कर ले गेहे अउ तेरह झिन आरोपी अभी जेल म हे।
प्रधानमंत्री ह कहिन कि आगू पेपर लीक नइ होय उपर कड़ा कदम उठाय गेहे। ओमन किहीन कि पेपर लीक ह न ही राज्य के, न ही केन्द्र के संगेसंग न ही दलगत राजनीति के बिसय हरय।
डेंगू-वैक्सीन
भारत ह डेंगू के पहिली वैक्सीन ल मंजूरी दे देहे। औषधि महानियंत्रक ह टाकेडा बायोफार्मास्यूटिकल्स इंडिया डहार ले विकसित क्यूडेंगा वैक्सीन के विपणन ल मंजूरी दे देहे। कंपनी के मुताबिक ए वैक्सीन चार ले साठ बछर उमर वरग के लोगन मन बर मंजूर करे गेहे अउ एला डेंगू संक्रमण के पहिली मरीज मनके जांच के जानकारी के बाद लगाय जा सकही। एला यूरोपीय संघ, ब्रिटेन, ब्राजील, इंडोनेशिया अउ अर्जेंटीना समेत चालीस ले जादा देस मन म मंजूरी मिल गेहे।
भाजपा-बैठक
रायपुर स्थित भारतीय जनता पार्टी के प्रदेस कार्यालय कुशाभाऊ ठाकरे परिसर म आज पार्टी के प्रदेस पदाधिकारी मनके बइठका होइस। बइठका म भाजपा के राष्ट्रीय सह संगठन महामंत्री शिवप्रकाश, मुख्यमंत्री विष्णुदेव साय, प्रदेस अध्यक्ष किरण सिंह देव अउ भाजपा के राष्ट्रीय उपाध्यक्ष सरोज पांडेय समेत पार्टी के प्रदेस पदाधिकारी मौजूद रिहीस
मेरा परिवार गौव्रति परिवार अभियान
मुख्यमंत्री विष्णुदेव साय ह काली इंदिरा गांधी कृषि विश्वविद्यालय के कृषक सभागार म राखे गे गौ सेवा संगम अउ गौ विज्ञान परीक्षा पुरस्कार विरतण समारोह के मउका म प्रदेशव्यापी ‘‘मेरा परिवार गौव्रति परिवार‘‘ अभियान के सुभारंभ करीन। मुख्यमंत्री ह गौ विज्ञान परीक्षा म बढ़िया प्रदर्शन करइया विद्यार्थी मन ल सम्मानित करके पुरस्कार घलो दीन। ओमन खुसी जतावत कहिन कि ए बछर पद्रेस के स्कूल अउ महाविद्यालय मनके एक लाख चौंसठ हजार ले जादा विद्यार्थी मन ह परीक्षा म भाग लीन।
मुख्य सचिव-बैठक
मुख्य सचिव विकास शील ह मंत्रालय म गृह विभाग के अंतर्गत राष्ट्रीय अपराध अउ अपराधी ट्रैकिंग नेटवर्क सिस्टम के डैशबोर्ड के समीक्षा बइठका लीन। बइठका म राज्य के कमजोर बिन्दु मन ल चिन्हारी करके ओला तुरते सुधार करे के निरदेस दीन। ए बइठका म राज्य के डीजीपी अरूण देव गौतम घलो मौजूद रिहीन।
आरटीई-आवेदन
शिक्षा के अधिकार अधिनियम-आरटीई के तहत प्रदेस के निजी स्कूल म प्रवेस बर तीसर अउ आखिरी चरण काली बाईस जुलाई ले सुरू होही। बाईस जुलाई ले पांच अगस्त तक पात्र पालक आरटीई पोर्टल के माध्यम ले ऑनलाइन आवेदन अउ जरूरी संसोधन कर सकही। दस अगस्त ले चौदह अगस्त तक ऑनलाइन लॉटरी काउंसलिंग के माध्यम ले चुने लइका मनके सूची जारी करे जाही अउ सत्रह अगस्त ले पच्चीस अगस्त तक लॉटरी ले चुने गे लइका मनके निजी स्कूल भर्ती करे जाही।
सीएजी-आईसीएसआर प्रतियोगिता
भारत के नियंत्रक अउ महालेखा परीक्षक-सीएजी कार्यालय अउ इंडियन काउंसिल ऑफ सोशल साईंस रिसर्च के मदद ले एक अगस्त ले तीस सितंबर तक सीएजी-आईसीएसआर रिसर्च आर्टिकल प्रतियोगिता आयोजित करे जाही। ए प्रतियोगिता के उद्देश्य ऑटिड के नतीजा अउ सार्वजनिक वित्त ले जुड़े मुद्दा उपर आधारित, नीति बर उपयोगी अउ मौलिक रिसर्च ल बढ़ावा देना हे। ए प्रतियोगिता बर प्रतिभागी ऑनलाइन आवेदन कर सकत हे। प्रतियोगिता के विजयी प्रतिभागी मन ल राज्य अउ राष्ट्रीय स्तर म इनाम दे जाही।
बारिश
प्रदेस के आने-आने जिला म पाछु दू-तीन दिन ले होवत बरसा के सेती कतकोन नदी-नरवा उफान म हवय।
रायगढ़ म सरलग होवत बरसा के सेती केलो डेम के चार गेट खोल दे गेहे। उहें, शहर के पैठू डबरी, चंद्रनगर के नामदेव गली अउ वार्ड नंबर अट्ठारह के कई ठिन घर म पानी घुस गेहे।
उहें, जांजगीर-चांपा जिला के बिलारी-कचंदा नाला के पानी पाछु पन्द्रह दिन म तीसर बार पुलिया ले उपर बोहावत हे। एखर सेती पुलिया के उपर अवई-जवई बंद कर दे गेहे।
आज मंझनिया बाद राजधानी रायपुर समेत प्रदेस के कई ठिन जिला म तेज बरसा होय के समाचार मिले हे।
इही बीच, मौसम विभाग ह अवइया चौबीस घंटा के दउरान बिलासपुर, रायपुर अउ दुरूग संभाग म आरेंज अलर्ट जारी करत कुछेक जघा म भारी ले अतिभारी बरसा होय के चेतावनी देहे। मौसम विज्ञानी डॉक्टर गायत्री वाणी ह आकाशवाणी समाचार ल बतईन कि प्रदेस ए स्थिति अवइया चार दिन तक बने रइही।
हाईकोर्ट-कम्प्यूटर ऑपरेटर राहत
छत्तीसगढ़ उच्च न्यायालय ह राज्य के ग्यारह नगरीय निकाय मन म पाछु करीबन दस बछर ले काम करत कम्प्यूटर ऑपरेटर मनके सेवा खतम अउ कई महीना ले तनखा नइ मिले के मामला म राहत देवत केन्द्र सरकार अउ राज्य सहरी विकास अभिकरण ल छह हफ्ता के भीतर फइसला लेके निरदेस देहे। कोर्ट ह कर्मचारी मन ल नवा अभ्यावेदन प्रस्तुत करे के मंजूरी देवत कहिन कि सक्षम अधिकारी मेरिट के आधार म ओमा विचार करके तर्कसंगत आदेस पारित करयं। ए आदेस न्यायाधीश बिभु दत्त गुरू के एकल पीठ ह अमित कुमार वर्मा समेत ग्यारह कम्प्यूटर ऑपरेटर डहार ले दायर याचिका के सुनवाई के दउरान पारित करीन।
हज-आवेदन
प्रदेस ले हज यात्रा म जवइया लोगन मन अब चौबीस जुलाई तक ऑनलाइन आवेदन कर सकत हे। छत्तीसगढ़ राज्य हज कमेटी के अध्यक्ष मिर्जा एज़ाज बेग ह बतईन कि हज बर आवेदन करे के आखिरी तारीख पहिली बीस जुलाई रिहीस। ओमन बतईन कि हाजी मनके चयन बर हज कमेटी ऑफ इंडिया डहार ले तीस जुलाई के कुर्राह के आयोजन करे जाही। कुर्राह म चुने गे हज आवेदक मन डहार ले हजयात्रा के पहिली किश्त के रासि दस अगस्त तक जमा कराए जाही।
पर्यटन मंडल-बैठक
छत्तीसगढ़ पर्यटन मंडल के अध्यक्ष नीलू शर्मा के अगुवई म काली रायपुर म संचालक मंडल के अड़तीसवां बइठका होइस। बइठका म पर्यटन क्षेत्र के विकास, वर्तमान योजना के प्रगति, नवा पर्यटन पहल अउ अवइया गतिविधि के बारे म गोठबात करे गीस। बइठका म ए बात उपर घलो सहमति बनीस कि प्रदेस के प्राकृतिक, सांस्कृतिक, धार्मिक अउ जनजातीय पर्यटन संपदा ल राष्ट्रीय अउ अंतर्राष्ट्रीय स्तर म प्रभावी ढंग ल पेस करे बर मिलजुल के काम करे जाही।
ट्रेन परिचालन
दक्षिण पूर्व मध्य रेलवे के रायपुर मंडल के भाटापारा-हथबंध स्टेसन के बीच तीसर लाइन सेक्शन म ऑटो सिग्निलिंग कमीशनिंग बर एन.आई. के काम करे जाही। एखर सेती तेईस अउ चौबीस जुलाई के रायपुर, बिलासपुर, कोरबा अउ गेवरा रोड के बीच चलइया मेमू पैसेंजर ट्रेन रद्द रइही। उहें, तेईस जुलाई के झारसुगुड़ा अउ गोंदिया ले चलइया झारसुगुड़ा-गोंदिया-झारसुगुड़ा मेमू पैसेंजर बिलासपुर स्टेसन तक चलही।
दुर्घटना
बिलासपुर जिला म आज होय एक सड़क हादसा म दू झिन लोगन के मउत होगे। उहें, पांच झिन आने लोगन गंभीर रूप ले घायल होगे हे।
मिले खबर के मुताबिक जिला के हिर्री थाना क्षेत्र म मुड़पार के तीर एक ठिन ट्रैक्टर अनते-तनते होके पलट गीस। ए हादसा म ट्रॉली म बइठे उन्नीस झिन म ले दू झिन के मउका म मउत होगे। गंभीर रूप ले घायल पांच झिन लोगन मन ल इलाज बर अस्पताल म भर्ती कराय गेहे।
अतिथि शिक्षक-हड़ताल
अपन मांग ल लेके प्रदर्सन करत प्रदेस के अतिथि सिक्षक मन ह काली रतिहा दुरूग स्थित राज्य के सिक्षा मंत्री के घर के आगू धरना दीन। एखर पहिली, ए सिक्षक मन ह रैली निकालीन। संविलियन के मांग करत ए सिक्षक मन ह पाछु करीबन बीस दिन ले हड़ताल म हवय।
अउ अब थोरकुन समाचार सार म –
– मुख्यमंत्री विष्णुदेव साय के अगुवई म काली बाईस जुलाई के बिहनिया साढ़े ग्यारह बजे ले मंत्रालय म राज्य मंत्रिपरिषद के बइठका होही।
– बलौदाबाजार-भाटापारा जिला के पांच प्राथमिक कृषि साख सहकारी समिति म ड्रोन स्प्रेयर सुविधा सुरू करे गेहे। राजस्व मंत्री टंकराम वर्मा ह आज नवा कृषि उपज मंडी परिसर म राखे गे कार्यक्रम म ए सुविधा के सुभारंभ करीन।
– बिलासपुर जिला के गुरू घासीदास केन्द्रीय विश्वविद्यालय के कुलपति प्रोफेसर आलोक चक्रवाल के कार्यकाल एक बछर बर बढ़ा दे गेहे।
अउ
– बेमेतरा जिला के निनवा गांव के पटवारी अम्बा उपाध्याय ल राजस्व रिकॉर्ड म गड़बड़ी करे के आरोप म निलंबित करे गेहे।