संसद सत्र
संसद के मानसून सत्र आज ले सुरू हो गेहे। ए सत्र अवइया महिना के तेरह तारीख तक चलही।
संसद के दूनों सदन के कार्यवाही नीट परीक्षा पेपर लीक मामला म विपक्ष के हंगामा के सेति सरलग बाधित होइस अउ दूनों सदन के कार्यवाही मंझनिया कुन दू बजे चैथा स्थगन के बाद फेर सुरू होय म विपक्षीय सदस्य मनके नीट मुद्दा उपर हंगामा जारी रिहीस। सोर सराबा के बीच दूनों सदन के कार्यवाही मंझनिया कुन ढाई बजे तक बर स्थगित कर दे गीस।
प्रधानमंत्री नरेंद्र मोदी ह किहीन हे कि चाहे मानूसन हो या मानसून सत्र, सक्रिय होय म दूनों बहुत उत्पादक साबित होथे। संसद के मानसून सत्र ले पहिली संवाददाता मन संग गोठबात म श्री मोदी ह किहीन कि सिरिफ एक महिना म देस कतकोन उपलब्धि हासिल कर डरे हे, जउन ह हरेक नागरिक ल गौरवान्वित करत हे। श्री मोदी ह सबो राजनीतिक दल मन ले सकारात्मक अउ सार्थक चर्चा के आग्रह करीन।
प्रधानमंत्री-सराहना
प्रधानमंत्री नरेंद्र मोदी ह भारत के युवा मनके साहस अउ दृढ़ता के तारीफ करीन हे। सोशल मीडिया म संस्कृत के एक ठन श्लोक साझा करत श्री मोदी ह किहीन कि देस के युवा मन ह अपन साहस, आत्म विश्वास अउ मेहनत के बल म ऐतिहासिक सफलता पावत हे अउ इही ह विकाससील भारत के सबले बड़े ताकत हे।
विशेष ग्राम सभा
प्रदेस के सबो ग्राम पंचायत मन म आज बिसेस ग्राम सभा के आयोजन करे गीस। ग्राम सभा म एक जुलाई ले पूरा प्रदेस म लागू विकसित भारत रोजगार अउ आजीविका मिसन म चर्चा होइस। संगेसंग पंचायत के जरूरत के अनुसार विकास काम ल मंजूरी दे गीस। हरेक ग्राम पंचायत म ग्राम सभा बर पीठासीन अधिकारी के नियुक्ति करे गे रिहीस। बइठका के बाद विस्तृत रिपोर्ट संबंधित जिला कार्यालय ल भेजे गीस।
शाला-प्रवेशोत्सव
दुरूग जिला के जामगांव के स्वामी आत्मानंद उत्कृष्ट अंग्रेजी माध्यम स्कूल म आज प्रदेस स्तरीय साला प्रवेस उत्सव के आयोजन करे गीस। ए मउका म मुख्यमंत्री विष्णुदेव साय ह नवा भर्ती होय विद्यार्थी मन ल तिलक लगाके अउ उंखर मंुह मीठा कराके सुवागत करीन। ए दउरान ओमन ह विद्यार्थी मन ल निःसुल्क ड्रेस, पाठ्य पुस्तक अउ स्कूल बैग बांटिन। संगेसंग कक्षा नवमीं के नोनी मन ल साइकिल दे गीस। कारीकरम म सुग्घर प्रदर्सन करइया प्रतिभासाली विद्यार्थी मन ल घलो सम्मानित करे गीस।
कारीकरम म मुख्यमंत्री ह लइका मनले आह्वान करीन कि ओमन ह बने ढंग ले पढ़ई करय अउ अपन राज्य अउ देस नांव रोसन करय।
राज्यपाल-सम्मान
राज्यपाल रमेन डेका ह आज लोकभवन म इंस्पायर अवार्ड मानक योजना के अंतर्गत जापान के सकुरा साइंस हाई स्कूल प्रोग्राम म सामिल होके लहुटे विद्यार्थी अउ ओखर शिक्षक मनके सम्मान करीन। सम्मानित विद्यार्थी मन म धमतरी, बलौदाबाजार, जांजगीर-चांपा जिला के सुनैना साहू, समीक्षा साहू, गगन दास मानिकपुरी अउ सैय्यद कशफ अली सामिल रिहीन। ए विद्यार्थी मन के चयन इंस्पायर अवार्ड-मानक योजना के आने-आने चरण म सुग्घर प्रदर्सन के आधार म अंतरराष्ट्रीय वैज्ञानिक अध्ययन भ्रमण बर होय रिहीस। विद्यार्थी मन ह जापान प्रवास के दउरान टोक्यो विश्वविद्यालय, जैक्सा, आने-आने सैक्षणिक अउ वैज्ञानिक संस्थान अउ सांस्कृतिक स्थल के भ्रमण के अनुभव साझा करीन।
राष्ट्रीय फिल्म पुरस्कार
रामनामी समुदाय के जीवन, आस्था अउ सांस्कृतिक विरासत उपर आधारित डाक्यूमेंटी फिल्म रामनामी ल बहत्तरवां राष्ट्रीय फिल्म पुरस्कार म सर्व श्रेष्ठ डाक्यूमेंट्री के सम्मान मिले हे। एखर निर्देशन प्रसिध्द फिल्मकार भरतबाला गणपति ह करीन हे। मुख्यमंत्री विष्णुदेव साय ह डाक्यूमेंट्री फिल्म रामनामी ल ए सम्मान मिले म अपन खुसी जाहिर करत एला पूरा प्रदेसबर गौरव के बिसय बतइन हे।
मुख्य न्यायाधीश-निरीक्षण
छत्तीसगढ़ उच्च न्यायालय के मुख्य न्यायाधीश रमेश सिन्हा ह कांकेर जिला अउ सत्र न्यायालय के निरीक्षण करीन। ए दउरान ओमन आने-आने न्यायालय अउ सेंट्रल प्रोसेस अनुभाग समेत आने-आने अनुभाग के निरीक्षण करीन। मुख्य न्यायाधीश ह सबो न्यायालय मनके व्यवस्था ल सुग्घर करे के निरदेस दीन।
मुख्य न्यायाधीश श्री सिन्हा ह न्यायालय परिसर म ‘एक पेड़ मां के नाम‘ अभियान के अंतर्गत पौधा रोपण घलो करीन।
उपमुख्यमंत्री-आश्वासन प्रमाण पत्र
उपमुख्यमंत्री विजय शर्मा ह काली कवर्धा म राखे गे कारीकरम म जिला के आठ ठन स्वास्थ्य संस्थान ल राष्ट्रीय गुणवत्ता आश्वासन मानक प्रमाण पत्र प्रदान करीन। ए मउका म ओमन किहीन कि राज्य सरकार के उद्देस्य हरेक नागरिक ल गुणवत्तापूर्ण अउ सुलभ स्वास्थ्य सेवा उपलब्ध कराना हे। ओमन किहीन कि राष्ट्रीय गुणवत्ता आश्वासन प्रमाणन सिरिफ एक उपलब्धि नइ, फेर स्वास्थ्य संस्थान के सुग्घर कार्यप्रणाली अउ मरीज मन बर संवेदनसील सेवा के प्रमाण हवय।
तबादला
गृह विभाग ह राज्य पुलिस सेवा संवर्ग के अधिकारी मनके तबादला आदेस जारी करे हे। जारी सूची के अनुसार ओपी शर्मा ल पुलिस अधीक्षक, मुख्यमंत्री सुरक्षा के पद म पदस्थ करे गेहे। अइसने, अतिरिक्त पुलिस अधीक्षक अउ उप पुलिस अधीक्षक संवर्ग के बयानवे अधिकारी मनके नवा पद स्थापना करे गेहे।
सर्पदंश रिपोर्ट-डॉक्टर गिरफ्तार
बिलासपुर जिला के तोरवा थाना क्षेत्र म सर्पदंश ले मउत के फर्जी रिपोर्ट बनाके मुआवजा देवाय के मामला म पुलिस ह डॉक्टर प्रियंका सोनी ल गिरफ्तार करे हे। ओखर उपर दू ठन आने-आने मामला म सांप कांटे ले मउत होय के फर्जी पोस्टमार्टम रिपोर्ट बनाय के आरोप हे। पुलिस के अनुसार तहसील कार्यालय के नायब नाजिर के सिकायत म महमंद निवासी निसार खान अउ लता सूर्यवंशी के संदिग्ध मउत के मामला म केस दर्ज करके जांच सुरू करे गे रिहीस। जांच म पाय गीस कि दूनों शव के पोस्ट मार्टम तत्कालीन सिम्स चिकित्सक डॉक्टर प्रियंका सोनी ह करे रिहीन अउ स्नैक बाइट ले मउत होय के फर्जी रिपोर्ट तियार करे गे रिहीस। एखर बाद फरार डॉक्टर ल गिरफ्तार करके जेल भेज दे गीस। ए मामला म दूनों मृतक के परिवार वाला अउ एक झन वकील संघरा तीन झन आरोपी मन ल पहिलीच ले जेल भेज दे गे हवय।
शिक्षक-हत्या
बलरामपुर जिला के त्रिकुंड थाना क्षेत्र म आज स्कूल जाय बर निकले एक झन प्रधान अध्यापक के हत्या कर दे गीस। ए मामला म पुलिस ह मृतक के दू झन चचेरा भाई मन ल गिरफ्तार करे हे। पुलिस ह हत्या के मामला दर्ज करके आरोपी मन के खिलाफ वैधानिक कार्रवाई सुरू कर देहे। बताय जावत हे कि जमीन विवाद के चलत ए हत्या होय हे।
अउ अब पेस हे मौसम के हाल…
मौसम विभाग ह अवइया चैबीस घंटा के दउरान मध्य अउ उत्तर छत्तीसगढ़ म कुछेक जघा म भारी ले अतिभारी बरसा होय के चेतावनी देहे। उहें, प्रदेस के कतकोन जघा म गरज-चमक के संग बरसा होय के संभावना घलो जताय हे। मौसम विभाग के अनुसार उत्तरीय तटीय आंध्रप्रदेस अउ ओखर ले लगे दक्षिण छत्तीसगढ़ के उपर एक ठन चक्रवाती घेरा बने हे, जेखर असर ले प्रदेस म बरसा के गतिविधि तेज होय हे। पाछू चैबीस घंटा म प्रदेस के कतकोन जघा म बरसा होय हे।
इही बीच, जशपुर जिला के परसिध्द पर्यटन स्थल देस देखा म आकाशीय बिजली गिरे ले एक झन युवक के मउत होगे, फेर तीन झन दूसर मन घायल होगिन। पुलिस के अनुसार कुनकुरी क्षेत्र के चार झन दोस्त मन इतवार के पिकनिक मनाय बर देस देखा गे रिहीन। इही दउरान अचानके मौसम खराब होइस अउ आकाशीय बिजली गिरे ले एक झन युवक गंभीर रूप ले घायल होगिस, जेला जिला अस्पताल ले जाय गीस उंहा डॉक्टर मन ह ओला मृत घोसित कर दीन। घटना म तीन झन दूसर युवक मन घलो झूलस गेहे, जेखर इलाज चलत हे।
स्पेशल-ट्रेन
श्रावणी मेला के दउरान बाबाधाम जवइया श्रध्दालू मनके सुविधा बर रेलवे ह स्पेशल ट्रेन चलाय के फइसला करे हे। रेलवे प्रशासन ह नेता जी सुभाष चंद्र बोस इतवारी अउ मधुपुर के बीच श्रावणी मेला सप्ताहिक स्पेशल ट्रेन चलाय के घोसना करे हे। ए गाड़ी ह दूनों डहार पांच-पांच ठन फेरा लगाही। ए ट्रेन नेता जी सुभाष चंद्र बोस इतवारी ले एक अगस्त ले उनतीस अगस्त तक हरेक शनिवार के चलही। उहें, ए ट्रेन मधुपुर ले दू अगस्त ले तीस अगस्त तक हरेक रविवार के रवाना होही। दुरूग-रईपुर अउ भाटापारा स्टेसन संघरा दक्षिण पूर्व मध्य रेलवे के कतकोन प्रमुख स्टेसन म ए ट्रेन के स्टापेज रइही।