संसद-मानसून सत्र
संसद के मानसून सत्र काली ले सुरू होही। ए सत्र ह अवइया महिना के तेरह तारीख तक चलही। ए सत्र के दउरान कतकोन महत्वपूर्ण विधेयक उपर चर्चा करे जाही।
मानसून सत्र ले पहिली सरकार ह आज सर्वदलीय बइठका बुलाय रिहीस। रक्षा मंत्री राजनाथ सिंह के अध्यक्षता म होय ए बइठका म संसदीय कार्यमंत्री किरेन रिजिजू, राज्यसभा म सदन के नेता जे.पी. नड्डा, संसदीय कार्य राज्यमंत्री अर्जुन राम मेघवाल अउ डॉ. एल. मुरूगन घलो मौजूद रिहीन।
मीडिया ले गोठबात करत केंद्रीय संसदीय कार्य मंत्री किरेन रिजिजू ह बतइन कि-ओमन विपक्ष ले आग्रह करिन कि संसद के मानसून सत्र के कार्यवाही ल सुचारू रूप ले चलाय म सहयोग करंय, संसद सबो झन के आय। सरकार ह आने-आने विधायी कारज करही अउ विधेयक घलो पेस करही। संसद ह जतेक कुसलता ले काम करही, देस बर ओतकेच बढ़िया होही।
बारिश
प्रदेस के आने-आने जिला म पाछू दू दिन ले होवइया बरसा के सेति जनजीवन परभावित होगे। उहें, कतकोन नदिया-नरवा उफान म हंे।
सूरजपुर जिला के प्रतापपुर विकासखंड म भारी बरसा के बाद धोन्धा-गोविंदपुर-रमकोला रद्दा म बने एक ठन निर्मानधीन रपटा बोहागे। एखर ले कतकोन गांव के जिला मुख्यालय ले संपर्क घलो टूटगे।
उहें, बलरामपुर जिला म सरलग बरसा ले कन्हर नदी म पानी बाढ़गे। रामानुजगंज म एनीकट के उपर ले पानी बोहावत हे। एखर सेति जल संसाधन विभाग ह सावधानी बरते बर एनीकट के दूनों गेट म ताला लगा दिस अउ लोगन मन ले कन्हर नदी के तिर-तखार म नइ जाय के अपील करे हे।
ऐति, जांजगीर-चांपा जिला के लीलागर नदी मन बने कुटीघाट के पुलिया टूटे ले मंडरावत खतरा के सेति ए रद्दा म इकतीस जुलाई तक अवई-जवई बंद कर दे गेहे।
उहें, बलौदाबाजार जिला म महानदी उफान म हे, जेखर ले लोगन मन ल सतर्क रेहे के चेतावनी देय गेहे।
ऐति, कोरबा जिला म घलो भारी बरसा के सेति एक दर्जन ले जादा पुलिया क्षतिग्रस्त होगे हें, जेखर ले कतकोन गांव के संपर्क टूट गेहे।
उहें, भारी बरसा के सेति रइपुर ले बिलासपुर, कोरबा अउ रायगढ़ रद्दा म कतकोन लोकल अउ मेमू ट्रेन ल रद्द करे गिस।
इही बीच, मौसम विभाग ह अवइया चौबीस घंटा के दउरान उत्तर छत्तीसगढ़ के कुछेक इलाका बर ऑरेंज अलर्ट जारी करत भारी ले अतिभारी बरसा होय के चेतावनी देहे। मौसम विज्ञानी ह बतइन कि बस्तर अउ रइपुर संभाग के कुछेक जिला म घलो भारी बरसा होय के संभावना हे।
वैष्णो देवी यात्रा-स्थगित
माता वैष्णो देवी श्राइन बोर्ड ह खराब मौसम के सेति यात्रा ल अस्थाई रूप ले रोक देय हे। श्राइन बोर्ड के सूचना के अनुसार तीर्थ यात्री मनके सुरक्षा बर ए निरनय लेय गेहे। उहें, श्रद्धालु मन ल धैर्य राखे के संग श्राइन बोर्ड के जरूरी सूचना के पालन करे के सलाह देय गिस हे। जानकारी ले मौसम के स्थिति सुधरही ओखर बाद यात्रा फेर सुरू करे जाही।
एनटीए-परामर्श
राष्ट्रीय परीक्षा एजेंसी-एन.टी.ए. ह छात्र अउ पालक मन ल ओ.एम.आर.सीट के जांच बर सिरिफ असली सीट ही जमा करे के सलाह देहे। फर्जी या ए.आई. ले बनाय गे ओ.एम.आर. सीट देय म कानूनी कारवाही हो सकत हे। एखर सेति, छात्र अउ पालक मन ले अपील करे गेहे कि ओमन जांच बर सिरिफ असली ओएमआर सीट ही जमा करंय। परीक्षा एजेंसी के अनुसार- हाल ही म जांच बर भेजे गे कतकोन ओएमआर सीट फर्जी पाय गे रिहीस, एखर सेति अब हर सिकायत अउ ओएमआर सीट के सावधानी ले जांच करे जावत हे।
विशेष लोक अदालत
काली रइपुर म आयोजित बिसेस लोक अदालत म आठ सौ सैंतालिस ठन चेक बाउंस के प्रकरण के निराकरन करे गिस। एखर बर रइपुर जिला न्यायालय म उन्नीस ठन बिसेस खंडपीठ के गठन करे गे रिहीस, जेमा करीबन एक हजार आठ सौ मामला राखे गिस। बतादन कि बिसेस लोक अदालत के उद्घाटन छत्तीसगढ़ उच्च न्यायालय के मुख्य न्यायाधीश रमेश सिन्हा ह वीडियो कॉन्फ्रेंसिंग ले करिन।
राज्य स्तरीय शाला प्रवेशोत्सव
दुरूग जिला के जामगांव म स्वामी आत्मानंद अंग्रेजी स्कूल म काली राज्य स्तरीय प्रवेश उत्सव के आयोजन करे जाही। ए कारीकरम म मुख्यमंत्री विष्णुदेव साय मुख्य अतिथि अउ उपमुख्यमंत्री विजय शर्मा बिसेस अतिथि के रूप म सामिल होहीं। कारीकरम के अध्यक्षता स्कूल शिक्षा मंत्री गजेंद्र यादव ह करहीं। ए मउका म मुख्यमंत्री ह नवा लइका मन ल तिलक लगाके सुवागत करहीं।
उपमुख्यमंत्री-वृक्षारोपण
उपमुख्यमंत्री विजय शर्मा ह आज कवर्धा के निर्माणाधीन मेडिकल कालेज परिसर म आयोजित कारीकरम म सामिल होइन। ए बेरा वृक्षारोपण अभियान के तहत पउधा लगाके पर्यावरण संरक्षण के संदेस देइन। ए मउका म श्री शर्मा ह किहीन कि-निर्माणधीन मेडिकल कालेज सिरिफ एक ठन भवन नइ भलुक, जिला के अवइया पीढ़ी के धरोहर आय। ओमन अधिकारी मन ल निर्धारित बेरा म मेडिकल कालेज निर्माण के कारज ल पूरा करे के निरदेस देइन। ए बेरा उपमुख्यमंत्री ह यहू बतइन कि-एसो ले ही पचास सीट संग मेडिकल कालेज संचालन सुरू करे जाही।
धमतरी-ड्रोन कृषि सेवा मॉडल
धमतरी जिला म बनाय गे देस के पहिली प्राथमिक कृषि साख सहकारी समिति-पैक्स आधारित ड्रोन कृषि सेवा मॉडल ल राष्ट्रीय स्तर म सम्मानित करे गिस। कोलकाता म आयोजित कॉमन सर्विस सेंटर ई-गवर्नेंस सर्विेसेज इंडिया लिमिटेड के सत्रहवां स्थापना दिवस समारोह म ए मॉडल ल ग्रामीण भारत म कृषि आधुनिकीकरण के सुग्घर उदाहरण माने गिस। कारीकरम के बेरा ‘‘बेहतर कृषि सेवाओं की उपलब्धता के लिए पैक्स का सशक्तिकरण‘‘ बिसय उपर पैनल चर्चा आयोजित करे गिस, जेमा भाग लेवत धमतरी जिला पंचायत के मुख्य कार्यपालन अधिकारी ह ड्रोन कृषि सेवा मॉडल उपर अपन बिचार साझा करिन।
बतादन कि धमतरी ह देस के अइसन पहिली जिला आय जउन सहकारी समिति के जरिया ले किसान मन ल सोज्झे ड्रोन सेवा उपलब्ध कराइस।
कोरबा-रन फॉर ग्रीन मैराथन
‘एक पेड़ मां के नाम‘ अभियान के तहत कोरबा जिला प्रशासन डहार ले काली ‘रन फॉर ग्रीन‘ मैराथन के आयोजन करे गिस। ए कारीकरम म जनप्रतिनिधि अउ अधिकारी मनके संगेसंग युवा, पढ़इया लइका, सामाजिक संगठन, खेल प्रेमी अउ आम नागरिक हिस्सा लेइन। मैराथन म भारतीय महिला फुटबाल टीम के खिलाड़ी अउ खेलो इंडिया ट्राइबल गेम्स म छत्तीसगढ़ विजेता टीम के कप्तान किरण पिस्दा घलो सामिल होइन। ए बेरा मैराथन म बढ़िया प्रदर्सन करइया प्रतिभागी मन ल पुरस्कार देय गिस।
उहें, मैराथन के बाद प्रतिभागी मन ‘एक पेड़ मां के नाम‘ अभियान के तहत पउधा रोपन करिन। संगेसंग स्वच्छता अभियान चलाके पर्यावरण संरक्षण के संदेस देइन।
बस ऑपरेटर-नोटिस
उच्चतम न्यायालय के निरदेस के बाद घलो व्हीकल लोकेशन ट्रैकिंग डिवाइस नइ लगइया प्रदेस के एक सौ उनचास बस संचालक मन ल परिवहन विभाग ह नोटिस जारी करके सबो झन ल तेईस जुलाई तक जवाब मांगे हे। एखर बाद बने ढंग के जवाब नइ मिलही या फेर निर्धारित बेरा म नियम के पालन नइ करइया बस मन के अनुमति ल रद्द करे जा सकथे।
अउ अब थोरकुन समाचार सार म –
– केंद्रीय माध्यमिक शिक्षा बोर्ड ह दसवीं कक्षा के दूसरइया बोर्ड परीक्षा के परिणाम घोसित कर देहे। छात्र मन डिजी लॉकर के रिजल्ट पोर्टल म परिणाम देख सकत हें।
– इंदिरा गांधी राष्ट्रीय मुक्त विश्वविद्यालय ह जुलाई सत्र ओडीएल पाठ्यक्रम म प्रवेस बर आखिरी तिथि पंद्रह जुलाई ले बढ़ाके इकतीस जुलाई कर देहे।
– नारायणपुर म इंश्योरेंस क्लेम देवाय के नांव ले कमीसन मांगे के आरोप म पूर्व थाना प्रभारी सुरेश चंद्र यादव ल गिरफ्तार करे के जेल भेजे गिस।
– जांजगीर पुलिस ह देसभर म म्यूल अकाउंट उपलब्ध करइया गिरोह के पांच सदस्य ल गिरफ्तार करिस।
अउ
– कोरबा जिला म वन विभाग के टीम ह करीबन दस लाख रूपिया के सरई लकड़ी के हेराफेरी मामला म एक आरोपी ल गिरफ्तार करिस।