संसद-मानसून सत्र
संसद के मानसून सत्र, बीस जुलाई ले सुरू होवत हे। तेरह अगस्त तक चलइया ए सत्र ले पहिली सरकार ह काली सर्वदलीय बइठका बलाय हे। बइठका म सरकार सबो राजनीतिक दल मन ले संसद के दूनों सदन के कार्यवाही सुचारू ढंग ले चलाय बर सहयोग के अपील करही। सत्र के दउरान कई ठन महत्वपूर्ण विधेयक मन उपर चर्चा अउ उनला पारित करे जाय के संभावना हे।
विस-अविश्वास प्रस्ताव
छत्तीसगढ़ विधानसभा के मानसून सत्र के आखिरी दिन काली राज्य सरकार के विरूध्द विपक्ष डहार ले लाय गे एक सौ छत्तीस बिन्दु मन उपर अविश्वास प्रस्ताव ध्वनिमत ले अस्वीकृत होगे।
एखर पहिली, अविश्वास प्रस्ताव उपर चर्चा के जवाब देवत हुए मुख्यमंत्री विष्णुदेव साय ह किहीन हे कि ए प्रस्ताव सरकार के विरूध्द नोहय बल्कि, प्रदेस के तीन करोड़ जनता के विश्वास अउ जनादेस के विरूध्द हरय। ओमन किहीन कि पाछू ढाई बछर म राज्य सरकार ह जनता ले लेगे वादा ल पूरा करे के काम करे हे। ओमन किहीन की सरकार के उपलब्धि स्वयं उंखर कार्यसैली अउ जन विश्वास के प्रमाण हरय।
बतादन कि अविश्वास प्रस्ताव सदन म चौदह घंटा छब्बीस मिनट तक पक्ष-विपक्ष के बीच तीखा नोंकझोंक होवत रिहीस। हंगामा के सेति एक घांव कार्यवाही स्थगित घलो करेल पड़िस। आखिर म रतिहा करीब दू बजके छत्तीस मिनट म अविश्वास प्रस्ताव ल अस्वीकृत कर दे गीस। चर्चा म पक्ष विपक्ष के अट्ठारा झन सदस्य मन भाग लीन। एखर बाद विधानसभा अध्यक्ष डॉक्टर रमन सिंह ह सदन के कार्यवाई ल अनिश्चितकाल बर स्थगित करे के घोसना करीन। ओमन किहीन कि दिसंबर के आखिरी हफ्ता म सीतकालीन सत्र प्रस्तावित हे।
समान नागरिक संहिता
प्रदेस सरकार ह राज्य म समान नागरिक संहिता-यूसीसी लागू करे अउ एखर प्रारूप के मसौदा तैयार करे बर एक उच्च स्तरीय समिति के गठन करे हे। समिति के अध्यक्षता सेवानिवृत्त न्यायामूर्ति रंजना प्रकाश देसाई करही। समिति म सेवानिवृत्त आईएएस अधिकारी शत्रुहन सिंह अउ एम.के. राउत के अलावा वरिष्ठ अधिवक्ता मोहन पवार अउ सेवानिवृत्त प्राचार्या ज्योति रानीसिंह ल सदस्य के रूप म सामिल करे गेहे। ए समिति राज्य म समान नागरिक संहिता लागू करे के संबंध म वर्तमान विधिक स्थिति के अध्ययन करही। समिति समान नागरिक संहिता के प्रारूप तैयार कर राज्य शासन ल प्रस्तुत करही।
पीएसवाय-उत्कृष्टता सम्मान
राज्यपाल रमेन डेका ह आज रायपुर म आयोजित पीएसवाय राष्ट्रीय उत्कृष्टता सम्मान समारोह म प्रदेस के अलग-अलग जिला के मेधावी विद्यार्थी अउ उत्कृष्ट जिला शिक्षा अधिकारी मन ल सम्मानित करीन। ए मउका म राज्यपाल ह किहीन हे कि आज इंटरनेट अउ एआई के युग म सुविधा बाढ़े हे, फेर विद्यार्थी मन ल अपन मौलिक सोच अउ अध्ययन के आदत ल बनाय राखना चाही। ओमन विद्यार्थी मन ले कोनो भी प्रकार के लत ले दूरिहा रहे के आह्वान करत हुए किहीन कि डिजीटल एडिक्शन घलो आने नसा मन कस हानिकारक हे। श्री डेका ह किहीन कि मोबाइल के उपयोग केवल जरूरी अध्ययन अउ उपयोगी काम तक सीमित होना चाही।
निर्वाचन आयोग-मीडिया सम्मेलन
भारत निर्वाचन आयोग ह नई दिल्ली म पहलइया अखिल भारतीय मीडिया सम्मेलन-दू हजार छब्बीस के आयोजन करीन। ‘‘हितधारकांे को जोड़ना, लोकतंत्र को मजबूत करना, चुनाव में मीडिया की भूमिका‘‘ बिसय उपर आयोजित ए सम्मेलन म देसभर के राज्य अउ केंद्रशासित प्रदेस ले तीन सौ अस्सी ले जादा मीडिया पेसेवर सामिल होइन। मुख्य चुनाव आयुक्त ज्ञानेश कुमार ह किहीन कि भारत म चुनाव, संविधान, चुनावी कानून अउ निर्वाचन आयोग के निरदेस मनके अनुरूप पूरा पारदर्सिता के संग कराय जाथे। ओमन किहीन कि पंचानवे करोड़ मतदाता वाला मतदाता सूची एक जीवंत दस्तावेज हरय। सम्मेलन म चुनावी प्रक्रिया, तकनीक के भूमिका अउ मीडिया के जिम्मेदारी मन उपर घलो विस्तार ले जानकारी दे गीस। एमा छत्तीसगढ़ के आने-आने मीडिया संस्थान के वरिष्ठ पत्रकार मन घलो भाग लीन।
पेंशनर-राहत
छत्तीसगढ़ अउ मध्यप्रदेस के सरकार ह पेंशनर मन ल बड़का राहत देवत हुए महंगाई भत्ता बर दूनों राज्य मनके बीच आपसी सहमति के अनिवार्यता ल खतम कर देहे। हालांकि केंद्र सरकार डहार ले तय दर ले जादा महंगाई भत्ता राज्य नइ दे सकय। वित्तमंत्री ओपी चौधरी ह बतइन कि ए निर्णय मध्यप्रदेस सरकार ले सहमति प्राप्त कर ले गेहे।
बारिश-01
मौसम विभाग ह अवइया अड़तालीस घंटा के दउरान प्रदेस के कुछेक जघा म भारी ले अतिभारी बरसा होय के चेतावनी देहे। संगेसंग कुछेक जघा म गाज गिरे के संभावना जताय हे। मौसम विज्ञानी डॉक्टर गायत्री वाणी ह बतइन कि उत्तर अउ मध्य छत्तीसगढ़ म कुछेक जघा म मध्यम ले तेज बरसा होय के आरेंज अलर्ट जारी करे हे।
इही बीच, बिलासपुर म भारी बरसा के सेति बाढ़ जइसे हालात बन गेहे। नेशनल हाइवे उनचास म कई जघा म पानी भरे हुए हे, जेखर ले आवागमन प्रभावित होवत हे। उहें, रेलवे ट्रेक म पानी भरे के सेति पांच मेमू ट्रेन रद्द कर दे गेहे, जबकि तीन ट्रेन मनके रूट बदल दे गेहे।
उहें, बलौदाबाजार-भाटापारा जिला म पाछू चौबीस घंटा ले होवत लगातार तेज बरसा के सेति महानदी अउ शिवनाथ नदी समेत कई ठन छोटे-बड़े नदी नाला उफान म हे। जिला कलेक्टर ह संभावित बाढ़ के स्थिति ल देखत हुए सुरक्षा व्यवस्था कड़ा करे के संगेसंग संवेदनसील क्षेत्र मन म निगरानी रखे अउ बाढ़ आपदा, होमगार्ड अउ रेस्क्यू टीम ल अलर्ट मोड म रहे के निरदेस देहे।
ओति, सरगुजा जिला म लुंड्रा थाना क्षेत्र के ग्राम नागम म काली संझा गाज गिरे ले दू झन लइका मनके मउका म मउत होगे। उहें, दू झन दूसर लइका मन झुलस गेहे। घायल लइका मन ल अस्पताल म भर्ती कराय गेहे।
इही बीच, मुख्यमंत्री विष्णुदेव साय ह बिलासपुर अउ जांजगीर-चांपा जिला म होय भारी बरसा अउ जलभराव के स्थिति के गंभीरता ल देखत हुए प्रभावी क्षेत्र मन म राहत अउ बचाव काम म कोनो भी प्रकार के सिथिलता नइ बरते के निरदेस देहे। मुख्यमंत्री ह अधिकारी मन ल इहू निरदेस देहे कि प्रभावित क्षेत्र मन म राहत सामग्री, भोजन, पेयजल, चिकित्सा समेत सबो आवश्यक सुविधा बिना कोनो देरी के उपलब्ध कराय जाय।
आत्महत्या-मौत
राजधानी रायपुर के टिकरापारा थाना क्षेत्र के संजय नगर इलाका म काली देर रात एक झन कारोबारी ह अपन पत्नी अउ तीन झन लइका मन ल कथित तौर म भोजन म जहर देके मार डरिस अउ बाद म खुद आत्महत्या कर लीस। मिले जानकारी के अनुसार ए व्यक्ति ह पुराना बैटरी के खरीदी बिक्री के कारोबार करत रिहीस। पुलिस ह मृतक मनके शव बरामद कर जांच सुरू कर देहे।
खेल पुरस्कार-आवेदन
खेल अउ युवा कल्याण विभाग ह बछर-दू हजार पच्चीस-छब्बीस के खेल पुरस्कार, मुख्यमंत्री ट्रॉफी, प्रेरणा निधी, नगद पुरस्कार अउ डाइट मनि बर आवेदन आमंत्रित करे हे। पात्र खिलाड़ी, प्रसिक्षक अउ निर्णायक पांच अगस्त तक आवेदन कर सकत हे। आवेदन जिला खेल कार्यालय, खेल संचालनालय अउ राज्य खेल संघ मनके माध्यम ले घलो जमा करे जा सकत हे।
एचपीवी-टीकाकरण
राज्य सरकार डहार ले तेरह जुलाई ले आयोजित एचपीवी टीकाकरण सप्ताह के तहत गौरेला-पेण्ड्रा-मरवाही जिला ह पूरा प्रदेस म सर्वाधिक एचपीवी टीकाकरण कर उल्लेखनीय सफलता हासिल करे हे। जिला ल करीब चार हजार नोनी मनके टीकाकरण के लक्ष्य मिले रिहीस। स्वास्थ्य विभाग ह जिला के चौहत्तर विद्यालय मन म व्यापक स्तर म टीकाकरण अभियान चलाके राज्य म सर्वाधिक एचपीवी टीकाकरण के नवा उपलब्धि दर्ज करे हे।
कार्यशाला
बत्तीसवां राष्ट्रीय बाल विज्ञान कांग्रेस के तहत जिला समन्वयक अउ रिसोर्स शिक्षक मन बर काली रायपुर म एक दिवसीय राज्य स्तरीय उन्मुखीकरण कार्यसाला के आयोजन करे गीस। कार्यशाला के उद्देस्य प्रदेसभर के शिक्षक अउ जिला समन्वयक मन ल राष्ट्रीय बाल विज्ञान कांग्रेस के नवा थीम, परियोजना निर्माण प्रक्रिया, वैज्ञानिक अनुसंधान पध्दति अउ मूल्यांकन प्रणाली ले अवगत कराना रिहीस, ताकि विद्यार्थी मन स्थानीय समस्या मन उपर आधारित वैज्ञानिक परियोजना तैयार कर राष्ट्रीय स्तर तक अपन प्रतिभा के प्रदर्सन कर सकय।