हाइड्रोजन ट्रेन – शुभारंभ
प्रधानमंत्री नरेंद्र मोदी ह आज हरियाणा के जींद रेलवे स्टेसन ले सोनीपत के बीच चलइया भारत के पहिली हाइड्रोजन ट्रेन ल रवाना करीन। ए रेलगाड़ी के शुभारंभ रेलवे क्षेत्र म स्वच्छ अउ टिकाऊ परिवहन ल अपनाय के दिसा म एक जरूरी कदम हे। श्री मोदी ह एक सौ संतावन किलोमीटर लंबा दिल्ली-अमृतसर-कटरा एक्सप्रेसवे ल राष्ट्र ल समर्पित करीन। ए ग्रीनफिल्ड कॉरिडोर छै सौ सड़सठ किलोमीटर लंबा दिल्ली-अमृतसर-कटरा एक्सप्रेसवे के हिस्सा हे। ए एक्सप्रेसवे ले दिल्ली अउ कटरा के बीच यात्रा के समय चौदह घंटा ले घटके लगभग छै घंटा हो जाही, फेर दिल्ली-अमृतसर के यात्रा के समय लगभग आठ घंटा ले घटके चार घंटा हो जाही।
ए बेरा म प्रधानमंत्री मोदी ह किहीन कि पाछू बारह बछर म भारतीय रेलवे म जरूरी बदलाव होय हे। श्री मोदी ह किहीन कि देस के पहिली हाइड्रोजन टेªन के सुभारंभ ह जींद ल भारत के इतिहास म एक बिसेस जघा दिलाय हे।
अमृत भारत स्टेशन योजना-लोकार्पण
प्रधानमंत्री नरेंद्र मोदी ह आज अमृत भारत रेलवे स्टेसन योजना म अवइया देसभर के पचहत्तर पुनर्विकसित रेलवे स्टेसन के वर्चुअल लोकार्पण करीन। एमा छत्तीसगढ़ के चांपा, बालोद अउ सरोना रेलवे स्टेसन घलो सामिल हे।
विस-बर्हिगमन
छत्तीसगढ़ विधानसभा के मानसून सत्र के पांचवां दिन आज प्रश्नकाल के दउरान कांग्रेस विधायक उमेश पटेल ह महतारी वंदन योजना के आंकड़ा म हेराफेरी के आरोप लगइन। ओमन ह सवाल पूछिन कि कतना पात्र माईलोगिन मन ल महतारी वंदन योजना के लाभ ए बछर जून तक मिले हे, जेला इंखर लाभ नइ मिलिस ओखर वजह का हे। एमा मंत्री लक्ष्मी राजवाड़े ह बतइन कि सुरूआत म कुल सत्तर लाख सत्ताईस हजार एक सौ चौव्वन आवेदन मिलिस, जेमा ले पात्र सत्तर लाख नौ हजार छै सौ अंठावन हितग्राही मन ल पहिली भुगतान करे गीस।
मंत्री ह बतइन कि ए बछर जून के स्थिति म अड़सठ लाख चौव्वन हजार तीन माईलोगिन मन ल महतारी वंदन योजना के लाभ दे गीस। एक लाख पचपन हजार छै सौ हितग्राही अइसन हे, जेखर मउत होगिस या ईकेवाईसी नइ होय हे। संगेसंग आयकर दाता माईलोगिन मन घलो ए योजना म सामिल नइ हे। मंत्री के जवाब के बाद कांग्रेस नेता उमेश पटेल ह मार्च दू हजार चौबीस ले महतारी वंदन योजना के पोर्टल नइ खुले के आरोप लगइन। एखर बाद मंत्री के जवाब ले असंतुष्ट कांग्रेस विधायक मन ह नारेबाजी करत सदन ले बर्हिगमन कर दीन।
विस-प्रश्नकाल
उहें, प्रश्नकाल म आज सार्वजनिक वितरण प्रणाली के तहत चांउर वितरण के मुद्दा उठिस। कांग्रेस विधायक शेषराज हरवंश ह राज्य म चांउर के जरूरत, केंद्र अउ राज्य ले मिलने वाला आपूर्ति अउ अतिरिक्त चांवल वितरण ल लेके सरकार ले सवाल करीन।
जवाब म खाद्य मंत्री दयालदास बघेल ह बतइन कि राज्य म अंत्योदय, प्राथमिकता, निराश्रित, निसक्तजन अउ सामान्य रासन कार्डधारक मन ल चंाउर दे जात हे। ओमन ह किहीन कि राष्ट्रीय खाद्य सुरक्षा अधिनियम के तहत संतावन लाख पच्चीस हजार रासन कार्ड केंद्र के योजना म अउ पच्चीस लाख छिहत्तर हजार रासन कार्ड राज्य योजना म सामिल हे।
मंत्री ह बतइन कि राज्य सरकार प्राथमिकता रासन कार्डधारक मन ल केंद्र के निर्धारित मात्रा ले जादा चांउर घलो उपलब्ध करावत हे। एखर तहत एक सदस्य वाला परिवार ल दस किलो, दू सदस्य वाला परिवार ल बीस किलो, तीन से पांच सदस्य वाले परिवार ल पैंतीस किलो अउ पांच ले जादा सदस्य वाला परिवार ल प्रति सदस्य सात किलो चांउर हर महिना दे जावत हे।
उहें, कांग्रेस विधायक सुशांत शुक्ला ह रासन दुकान के जरिया ले पैकेट बंद मसाला बेचे के आरोप लगइन। एमा मंत्री दयालदास बघेल ह जांच कराय के आस्वासन दीन।
प्रश्नकाल म कांग्रेस विधायक अनिला भेड़िया ह मुख्यमंत्री कन्या विवाह योजना के मुद्दा उठाइन। ओमन बालोद जिला म सामूहिक बिहाव, उपहार के समान के गुणवत्ता अउ खर्च ल लेके सरकार ले सवाल करीन। एखर जवाब देवत हुए महिला अउ बाल विकास मंत्री लक्ष्मी राजवाड़े ह बतइन कि बालोद जिला म पाछू दू बछर म सात सामूहिक विवाह आयोजित करे गीस, जेमा लगभग चार सौ जोड़ा के बिहाव कराय गीस। एमा एक करोड़ निन्यानवे लाख रूपिया ले जादा खरचा करे गीस।
विस-अविश्वास प्रस्ताव
इही बीच, सदन म आज विपक्षी दल कांग्रेस ह मुख्यमंत्री विष्णुदेव साय मंत्रिमंडल के खिलाफ अविश्वास प्रस्ताव पेस करीन। ए अविश्वास प्रस्ताव म पक्ष अउ विपक्ष के सदस्य हिस्सा लेवत हे। नेता प्रतिपक्ष डॉक्टर चरणदास महंत ह एक सौ छत्तीस बिंदु के आरोप पत्र सदन म प्रस्तुत करत हुए राज्य सरकार उपर आने-आने आरोप लगइन। समाचार लिखे जाय तक सदन म अविश्वास प्रस्ताव म बहस चलत हे।
एखर पहिली, वित्त मंत्री ओपी चौधरी ह बछर दू हजार तेईस बर नियंत्रक अउ महालेखापरीक्षक के स्थानीय निकाय उपर प्रतिवेदन प्रस्तुत करीन।
आरटीई-प्रवेश
स्कूल शिक्षा विभाग के अनुसार शिक्षा के अधिकार अधिनियम-आरटीई के तहत निजी स्कूल म प्रवेस बर तीसरइया अउ आखिरी चरण बाईस जुलाई ले सुरू होही। सत्रह जुलाई ले इक्कीस जुलाई तक जिला स्तर म विद्यालयवार आरटीई के खाली सीट के बारे म बताय जाही। बाईस जुलाई ले पंाच अगस्त तक पात्र पालक आरटीई पोर्टल के जरिया ले ऑनलाइन आवेदन अउ जरूरी संसोधन कर सकही। दस अगस्त ले चौदह अगस्त तक ऑनलाइन लाटरी काउंसलिंग के जरिया ले चयनित लइका मनके सूची जारी करे जाही अउ सत्रह अगस्त ले पच्चीस अगस्त तक लॉटरी म चयनित लइका मनके संबंधित निजी स्कूल म प्रवेस सुनिश्चित कर ले जाही। ए आखिरी चरण म केवल ओमन ही पात्र लइका आवेदन कर सकही, जेला पहिली के कोनो भी चरण म प्रवेस नइ मिले हे।
राज्यपाल-ज्ञापन
रईपुर म नकटी गांव म होय तोड़फोड़ के घटना ल लेके कांग्रेस के एक प्रतिनिधि मंडल ह आज राज्यपाल ले मुलाकात कर ज्ञापन सौंपिन। प्रतिनिधि मंडल के संग प्रभावित गांव के लोगन मन के प्रतिनिधि घलो मौजूद रिहीन।
ज्ञापन म कांग्रेस ह गांव नकटी मामला के न्यायिक या उच्च स्तरीय एजेंसी ले निष्पक्ष जांच कराय, दोषी मनके खिलाफ कार्रवाई करेा, प्रभावित परिवार मन ल मुआवजा, पुनर्वास दे अउ मामला के सुनवाई फास्ट ट्रैक अदालत म कराय के मांग करे हे। संगेसंग टूटे घर ल दुबारा बनाय के घलो मांग करे गीस।
एम्स-बर्न यूनिट
एम्स रईपुर म जल्दी ही अत्याधुनिक एडवांस बर्न यूनिट स्थापित करे जाही। एखर जानकारी विश्व प्लास्टिक सर्जरी दिवस म आयोजित कारीकरम म संस्थान के कार्यपालक निदेशक लेफ्टिनंेट जर्नल अशोक जिंदल ह दीन।
बीएसपी-एमओयू
भिलाई इस्पात संयंत्र अउ अडाणी टोटल गैस लिमिटेड के बीच पाइप्ड नेचुरल गैस यानी पीएनजी के आपूर्ति बर समझौता ज्ञापन म हस्ताक्षर करे गेहे। ए समझौता के तहत संयंत्र अउ भिलाई टाउनसिप म स्वच्छ अउ सुरक्षित पीएनजी के आपूर्ति करे जाही।
बातों-बातों-में
प्रादेशिक समाचार एकांश के समसामयिक बिसय उपर आधरित कारीकरम ‘‘बातों-बातों-में‘‘ ए दारी कैच द रेन अभियान अउ जनसंरक्षण म छत्तीसगढ़ के जाने-माने जल संरक्षण विशेषज्ञ विपिन दुबे ले लेय गे भेंटवार्ता के प्रसारण करे जाही। एखर प्रसारण काली अट्ठारा जुलाई के आकाशवाणी केंद्र रइपुर डहार ले एफ.एम. अउ प्रायमरी चैनल म बिहनिया नौ बजे करे जाही। एला छत्तीसगढ़ के जम्मो आकाशवाणी केंद्र एके संघरा रिले करहीं।
अउ अब पेस हे मौसम के हाल…
राजधानी रईपुर के संग प्रदेस के आने-आने जिला म काली रतिहा रूक-रूक के बरसा होवत हे। रईपुर जिला के निचला बस्ती मन म पानी भर के गेहे, जेखर ले जनजीवन अस्त-व्यस्त हो गेहे। राजस्व अउ आपदा प्रबंधन विभाग के अनुसार एक जून ले सत्रह जुलाई तक राज्य म औसतन दू सौ तिरानवे दसमलव छै मिलीमीटर बरसा होय हे, जेन प्रदेस म सामान्य बरसा के इक्यासी प्रतिसत हे।
मौसम विभाग ह अवइया दू-तीन दिन बर मध्य अउ दक्षिण छत्तीसगढ़ म कुछेक जघा म मध्यम ले तेज बरसा होय के यलो अलर्ट जारी करे हे। मौसम विभाग के अनुसार उत्तर-पश्चिम बंगाल के खाड़ी अउ ओखर ले लगे ओडिसा- पश्चिम बंगाल के तट म एक कम दबाव के क्षेत्र बने होय हे।
सर्पदंश-बचाव
बरसात के मौसम म सांप कांटे के घटना ल देखत हुए स्वास्थ्य विभाग ह लोगन मन ले अंधविश्वास ले बचे अउ समय म अस्पताल पहुंचे के अपील करे हे। विभाग ह किहीन हे कि सांप कांटे ले होवइया जादा मउत इलाज म देरी के सेति होथे। स्वास्थ्य विभाग के अनुसार प्रदेस के सबो तैंतीस जिला के अस्पताल मन म एंटी स्नेक वेनम के पर्याप्त उपलब्धता सुनिश्चित करे गेहे। अभी के बेरा म एक लाख ले जादा वायल उपलब्ध हे, ताकि जरूरत पड़े म मरीज मन के तुरते उपचार करे जा सके।