अमृत भारत स्टेशन योजना-लोकार्पण
प्रधानमंत्री नरेन्द्र मोदी ह काली सत्रह जुलाई के अमृत भारत स्टेशन योजना के तहत देशभर के पचहत्तर पुनर्विकसित रेलवे स्टेशन के लोकार्पण वीडियो कॉन्फ्रेसिंग के माध्यम ले करही। एमा रायपुर रेलमंडल के बालोद अउ सरोना रेलवे स्टेशन घलो सामिल हे।
मुख्यमंत्री ह किहीन कि अमृत भारत स्टेशन योजना ह भारतीय रेलवे ल आधुनिक, सुरक्षित, सरल बनाय के दिसा म एक ठिन बढ़िया पहल हरय। ओमन विश्वास जतईन कि सरोना अउ बालोद रेलवे स्टेशन के उन्नयन ले यात्री मन ल अउ बढ़िया सुविधा मिलही।
विस-बर्हिगमन
छत्तीसगढ़ विधानसभा के मानसून सत्र के चौथा दिन आज सदन म पूर्व मुख्यमंत्री भूपेश बघेल ह अल्दा अउ देवरी-घुलघुल गांव म उद्योग स्थापना बर कथित फर्जी ग्राम सभा प्रस्ताव के मुद्दा उठईन। ओमन सरकार ले दोसी मन उपर कार्रवाई अउ कंपनी ल आवंटित जमीन ल निरस्त करे के मांग करीन। श्री बघेल जानना चाहिन कि का सरपंच अउ सचिव उपर कार्रवाई होही अउ दूनों कंपनी ल दे गे जमीन निरस्त करे जाही।
जवाब म पर्यावरण मंत्री ओ.पी. चौधरी ह बतईन कि दूनों कंपनी ह छत्तीसगढ़ पर्यावरण संरक्षण मंडल ले जल अउ वायु अधिनियम के तहत सहमति बर अरजी नइ करीन, जेखर सेती मंडल ल ग्रामसभा प्रस्ताव नइ मिलीस। ओमन मानीन कि गांव अल्दा के प्रस्ताव म जालसाजी के सिकायत के जांच त्रिस्रतीय समिति ह करे रिहीन। जांच म पाय गीस कि ग्रामसभा म सर्वसम्मति ले अनापत्ति प्रमाण पत्र नइ देके प्रस्ताव पास होय रिहीस। पुलिस ह विवेचना करत हे। जांच के बाद दोसी अउ कंपनी मन उपर कार्रवाई करे जाही। मंत्री के जवाब ले विपक्षी सदस्य मन ह संतुष्ट नइ होइन अउ ओमन सदन ले बहिर्गमन कर दीन।
उहें, सदन म आज कांग्रेस विधायक विक्रम मंडावी ह प्रधानमंत्री मातृ वंदन योजना म अनियमितता के मुद्दा उठईन। ओमन किहीन कि बस्तर संभाग के माईलोगिन मन ल ए योजना के फायदा नइ मिल पात हे। गड़बडी करइया विभागीय अधिकारी मन उपर कार्रवाई करे के मांग करीन।
जवाब म महिला अउ बाल विकास मंत्री लक्ष्मी राजवाड़े ह किहीन कि योजना के तहत जम्मों हितग्राही मन ल फायदा मिलत हे। कहूं गड़बड़ी होही, त जांच कराय जाही। एखर बाद विपक्षी सदस्य मन ह नाराबाजी करत सदन ले बहिर्गमन कर दीन।
विस-संशोधन विधेयक
राज्य विधानसभा म आज छत्तीसगढ़ अग्निशमन अउ आपातकालीन सेवा संशोधन विधेयक पेस करे गीस। संगेसंग छत्तीसगढ़ औद्योगिक निवेश प्रोत्साहन संशोधन विधेयक अउ छत्तीसगढ़ ईज ऑफ डुईंग बिजनेस विधेयक घलो पेस करे गीस। ए तीनों विधेयक ल ध्वनिमत ले पारित कर दे गीस।
विधानसभा म काली सत्रह जुलाई के विपक्ष डहार ले प्रस्तुत अविश्वास प्रस्ताव उपर चर्चा कराय जाही।
विस-उर्वरक वितरण/मछलीपालन
विधानसभा म आज कांग्रेस विधायक दलेश्वर साहू ह खातू ले जुड़े मुद्दा उठईन। ओमन आरोप लगईन कि कतकोन जिला म जादा खातू दे गेहे, जेखर जांच कराय जाना चाही।
जवाब म कृषि मंत्री रामविचार नेताम ह बतईन कि केन्द्र सरकार के आवंटन के मुताबिक उर्वरक कंपनी ह सहकारी संग्रहण केन्द्र अउ निजी थोक विक्रेता मन ल खातू देथे।
उहें, सदन म आज कांग्रेस विधायक कुंवर सिंह निषाद ह मछली पालन पट्टा आवंटन के मुद्दा उठावत पूछीन कि प्रदेस म कतका समिति अउ समूह मन ल पात्र माने जाथे अउ ए बेरा कोन से मछली पालन नीति लागू हे।
जवाब म मंत्री श्री नेताम ह बतईन कि प्रदेस म नवीन मछली पालन नीति दू हजार बाईस प्रभावशील हे। ओमन मानीन कि जांजगीर-चांपा जिला के बम्हनीडीह के गांव सरहर अउ नगर पंचायत बलौदा म पट्टा आवंटन म गड़बड़ी के सिकायत मिले रिहीस। फेर जांच समिति ह सिकायत ल निराधार बतईन।
शिवराज चौहान-आईसीएआर
केन्द्रीय कृषि अउ किसान कल्याण मंत्री शिवराज सिंह चौहान ह सत्त कृषि विकास ल सुनिश्चित करे बर किसान मनके बीच एकीकृत कृषि पद्धति ल बढ़ावा देके जरूरत उपर बल देहे। नई दिल्ली म भारतीय कृषि अनुसंधान परिषद-आई.सी.ए.आर. के स्थापना दिवस म ओमन किहीन कि किसान अउ वैज्ञानिक मनके सामूहिक मेहनत ले बढ़िया परिणाम मिलत हे। ओमन किहीन कि अनुसंधान ले किसान मन ल बेरा म लाभ मिलना चाहिए। केन्द्रीय मंत्री ह किहीन कि देस ह तीन सौ छिहत्तर करोड़ टन खाद्यान्न उत्पादन के रिकॉर्ड बनाय हे।
रथयात्रा
आज पूरा देस म भगवान जगन्नाथ के रथयात्रा निकाले गेहे। छत्तीसगढ़ म घलो रथयात्रा के परब भक्तिभाव के संग मनाय जात हे। आज बिहनियाच ले मंदिर मन म पूजापाठ करइया लोगन मनके भीड़ बाढ़ गेहे। प्रदेश म आज जघा-जघा भगवान जगन्नाथ, बलभद्र अउ देवी सुभद्रा ल रथ म बइठा के यात्रा कराए जात हे।
राज्यपाल रमेन डेका अउ मुख्यमंत्री विष्णुदेव साय ह आज रईपुर के गायत्री नगर स्थित जगन्नाथ मंदिर म राखे गे महाप्रभु जगन्नाथ के रथयात्रा महोत्सव म सामिल होइन। ए मउका म ओमन पूजापाठ करके ‘छेरा-पहरा‘ के रस्म निभईन। राज्यपाल अउ मुख्यमंत्री ह प्रदेस के लोगन मन ल रथयात्रा के सुभकामना देवत किहीन कि भगवान जगन्नाथ के रथयात्रा सनातम संस्कृति, सामाजिक समरसता, लोकपरंपरा अउ जन-जन के आस्था के महापरब हरय। ए उत्सव ह समाज के लोगन मन ल सेवा, समर्पण अउ लोककल्याण के संदेस देथे।
ए मउका म सांसद बृजमोहन अग्रवाल, विधायक पुरंदर मिश्रा के संगेसंग आने जनप्रतिनिधि अउ बड़ संख्या म श्रद्धालु मन सामिल होइन।
दुर्घटना
दुर्ग-रायपुर राष्ट्रीय राजमार्ग क्रमांक-तिरपन म कुम्हारी थाना क्षेत्र म आज बिहनिया होय सड़क दुर्घटना म एकेच परिवार के चार झिन लोगन के मउत होगे। अउ एक झिन आठ साल के लइका गंभीर रूप ले घायल होगे हे।
दुर्ग के वरिष्ठ पुलिस अधीक्षक विजय अग्रवाल ह बतईन कि एक फटफटी म बइठ के पांच झिन लोगन मन भिलाई ले रायपुर जावत रिहीन। इही दउरान दशमेश ढाबा के तीर सड़क किनारे खड़े एक ठिन ट्रैक्टर ले जा टकईस। घटना के बाद चार झिन लोगन के मउकाच म मउत होगे। घायल लइका के इलाज रायपुर के एम्स म चलत हे।
ओति, बलरामपुर जिला म शंकरगढ़ थाना क्षेत्र के जारगीम गांव के तीर महिला मजूर मन ले भरे एक ठिन पिकअप गाड़ी ह अनते-तनते होके पलट गे। ए घटना म दू झन लोगन के मउत होगे अउ करीबन दस झिन लोगन मन घायल होगे हे।
बच्चे-मौत
राजनांदगांव जिला के डोंगरगढ़ विकासखंड के बोरतालाव के आश्रित गांव गांधीनगर म काली संझा पानी ले भरे गढ्ढा म बुड़े ले तीन झिन लइका के मउत होगे। जानबा के मुताबिक ए घटना असइन गढ्ढा म होइस, जिहां रेलवे ले जुड़े काम बर ठेकेदार डहार ले खनन के काम करे गे रिहीस। गांव के लोगन मन ह आरोप लगाय हे कि गहरा गढ्ढा ल सुरक्षित नइ राखे गे रिहीस, जेखर सेती ए घटना होइस।
गांजा-बरामद
कांेंडागांव जिला के केशकाल पुलिस ह एक ठिन कार ले एक सौ दो किलो ले जादा के गांजा बरामद करे हे। जब्ती करे गे गांजा के भाव करीबन इंक्यावन लाख रूपिया बताय जात हे। पकड़े गे आरोपी उत्तरप्रदेश के बागपत जिला के रहइया हरय। पुलिस के मुताबिक गांजा ओड़िशा ले रायपुर कोति लाय जात रिहीस। सूचना मिले के बाद केशकाल घाटी म नाकाबंदी के दउरान कार के डिक्की ले गांजा के बीस ठिन पैकेट बरामद करे गीस। आरोपी के खिलाफ एनडीपीएस एक्ट के तहत मामला दर्ज करे गेहे।
योग युक्त बस्तर अभियान
छत्तीसगढ़ योग आयोग बस्तर म ‘‘योग युक्त बस्तर‘‘ अभियान सुरू करही। आयोग के अध्यक्ष संजय अग्रवाल ह अपन बीजापुर प्रवास के दउरान किहीन कि प्रसिक्षित योग प्रसिक्षक मनके माध्यम ले लइका, जवान, सियान अउ गर्भवती माईलोगिन मन ल रोजे योग के प्रसिक्षण दे जाही।
संक्षिप्त समाचार
– सर्वोच्च न्यायालय ह जम्मों राज्य अउ केन्द्रसासित प्रदेस मन ल सियान या गंभीर बीमारी ले ग्रसित कैदी मन ल बेरा ले पहिली रिहाई बर जरूरी नीति बनाय अउ लागू करे के निरदेस देहे।
– मुख्यमंत्री विष्णुदेव साय ह माउंट एवरेस्ट चढ़ईया जांजगीर-चांपा के पर्वतारोही अमिता श्रीवास ल बधाई दे हवय।
– केन्द्रीय वस्तु अउ सेवा कर-जीएसटी कोति ले जम्मों राज्य मन ल भेजे गे चिट्ठी म मकान, बंगला, फ्लैट बिसाय या कोनांें कार्यक्रम बर बुकिंग कराय के बाद ओला रद्दा कराय उपर काटे गे जीएसटी ल वापिस करे के निरदेस देहे।
अउ
– महिलोगिन अउ नोनी मनके सुरक्षा ल अउ जादा मजबूत बनाय बर दुरूग पुलिस ह ‘‘पिंक पेट्रोलिंग‘‘ गश्त अभियान के सुरूआत करे हे।