जल जीवन मिशन
केन्द्रीय जल शक्ति मंत्री गजेन्द्र सिंह शेखावत ह काली स्कूल इउ आंगनबाड़ी केन्द्र मन म पाईप के माध्यम ले पीये के साफ पानी देवाय के सौ दिन के अभियान के सुरूवात करीन। प्रधानमंत्री नरेन्द्र मोदी ह उनतीस सितंबर के जल जीवन मिशन लागू करे बर ग्राम पंचायत अउ जल समिति मन बर मार्गदर्शिका जारी करत ए अभियान के सुरूवात करीन।
अभियान के दउरान राज्य अउ केन्द्र सासित प्रदेस ल ए निश्चित करना हे कि जल्दी ले जल्दी ग्रामसभा म ए संबंध म प्रस्ताव पारित कराय जाय। ए मिसन के उद्देश्य बछर दू हजार चैबीस तक ग्रामीण भारत के हरेक घर म नल के माध्यम ले पानी पहुंचाना हे। एमा माईलोगिन अउ लइका मन उपर बिसेस ध्यान दे जावत हे।
प्रधानमंत्री-वैभव सम्मेलन
प्रधानमंत्री नरेन्द्र मोदी किहीन हे कि आत्मनिर्भर भारत कार्यक्रम म पूरा विश्व के भलई हवय। ओमन ह आत्मनिर्भर भारत के लक्ष्य ल पाय म मदद बर सोधकर्ता अउ सिक्षाविद मन ल नेवता दीन हे। काली संझा वीडियो कान्फ्रेंसिंग के माध्यम ले वैश्विक भारतीय वैज्ञानिक सम्मेलन म प्रधानमंत्री ह किहीन कि भारत ह अभी कतकोन सुधार लागू करे हे, जेखर ले उद्योग अउ सिक्षा जगत म नवा मउका मिलही। ओमन किहीन कि भारतीय विज्ञान के समृद्धि इतिहास ल बढ़ाय के जरूरत हे। प्रधानमंत्री ह विज्ञान के पढ़ई बर लइका मनके रूचि बढ़ाय के अपील करीन। वैभव सम्मेलन ल बौद्धिक प्रतिभा मनके संगम बतावत श्री मोदी ह किहीन कि सम्मिलित प्रयास ले सोध बर सुघ्घर मउका मिलही अउ समृद्धि के दुआर खुलही।
साइबर थाना
नवा रईपुर अटल नगर के पुलिस मुख्यालय म राज्य स्तरीय साइबर पुलिस थाना सुरू होगे हवय। मुख्यमंत्री भूपेश बघेल ह वीडियो कान्फ्रेंसिंग के माध्यम ले ए साइबर थाना के उद्घाटन करीन। ए मउका म मुख्यमंत्री ह किहीन कि प्रदेस म होवइया साइबर अपराध ल रोके बर पुलिस विभाग डहार ले बने पहल होय हे। एखर ले कतकोन प्रकार के साइबर अपराध ल सुलझाय म मदद मिलही। संगेसंग दूसर पुलिस थाना मन ल घलो ए बारे म जरूरी मार्गदर्शन मिल सकही। मुख्यमंत्री ह साइबर थाना ल लोगन मन ल साइबर अपराध बर जागरूक करे के निरदेस घलो दीन, जेखर ले ओमन ह सोसल मीडिया के माध्यम ले होवइया अपराध अउ धोखाधड़ी ले बच सकय।
विशेष पुलिस महानिदेशक आर.क.े विज ह बतईन कि राज्य साइबर पुलिस थाना डहार ले बड़े मामला ल पंजीबद्ध करके ओखर जांच करे जाही अउ साइबर अपराध के दूसर प्रकरण मन सामान्य थाना म पंजीबद्ध होही। बताय गे हवय कि सबो पुलिस रेंज मुख्यालय म घलो जल्दीच साइबर पुलिस थाना सुरू करे जाही।
कृषि संशोधन विधेयक
केन्द्र सरकार डहार ले पारित कृषि संशोधन विधेयक के विरोध म प्रदेश के आने-आने जिला मुख्यालय म कांग्रेस के पदाधिकारी मन डहार ले धरना-प्रदर्शन करे जावत हे। कोंडागांव जिला के केशकाल म पार्टी पदाधिकारी मन ह संशोधन विधेयक ल निरस्त करे के मांग ल लेके अनुविभागीय अधिकारी राजस्व के कार्यालय म राष्ट्रपति के नाव ज्ञापन सौंपीन।
उहें, मुंगेली जिला म घलो कांग्रेस कार्यकर्ता मन ह कृषि सशोधन विधेयक के विरोध म एक दिवसीय धरना-प्रदर्शन करीन। ए दउरान कांग्रेस नेता मन ह अनुविभागीय अधिकारी मन ल राष्ट्रपति के नाव ज्ञापन सौंप के ए संशोधन विधेयक ल निरस्त करे जाय के मांग करीन।
दूसर कोति, भारतीय जनता पार्टी ह कृषि संशोधन विधेयक ल किसान हितैषी अउ आत्मनिर्भर भारत के दिशा म महत्वपूर्ण कदम बतईन हे। महासमुंद लोकसभा क्षेत्र के भाजपा सांसद चुन्नीलाल साहू ह पत्रकारवार्ता म कृषि संशोधन विधेयक के बारे म विस्तार ले जानकारी दीन अउ किहीन कि ए विधेयक के लागू होय ले किसान मन मजबूत होही। ओमन आरोप लगाईन कि समर्थन मूल्य ल लेके विपक्ष डहार ले भ्रम फैलाय जावत हे।
उहें, राष्ट्रपिता महात्मा गांधी अउ पूर्व प्रधानमंत्री स्वर्गीय लाल बहादुर शास्त्री के जयंती के मउका म कृषि संशोधन विधेयक ल लेके जन-जागरण अभियान म भाजपा डहार ले महासमुंद म वेबीनार कराय गीस। ए मउका म मुख्य वक्ता के रूप म पूर्व विधायक रूप कुमारी चैधरी ह किहीन कि प्रधानमंत्री नरेन्द्र मोदी ह कोरोना संक्रमण के बावजूद बीस लाख करोड़ रूपिया के आत्मनिर्भर भारत बर आर्थिक पैकेज के घोषणा करीन हे।
वन अधिकार पत्र
मुख्यमंत्री भूपेश बघेल ह वीडियो कान्फ्रेंसिंग के मायध्म ले कबीरधाम जिला म आदिवासी समूह मन ल सामुदायिक वन अधिकारी पत्र अउ सामुदायिक वन संसाधन अधिकार पत्र दीन। ए मउका म मुख्यमंत्री ह किहीन कि राष्ट्रपिता महात्मा गांधी के सपना ल साकार करे बर राज्य सरकार ह ग्रामीण अर्थव्यवस्था ल मजबूत बनाय खातिर सुराजी गांव योजना लागू करीन हे। अइसने, वन क्षेत्र के निवासी मनके आजीविका के साधन बर अब सामुदायिक के संग वन प्रबंधन के घलो अधिकार दे जावत हे, जेखर ले जंगल के सुरक्षा तो होही, संगेसंग वनवासी मन बर आय के साधन घलो मिलही।
ग्रामोद्योग-छूट
प्रदेस म ग्रामोद्योग ले बने जिनीस के खरीदी म अब आम लोगन ल दस प्रतिसत के बिसेस छूट दे जाही। मुख्यमंत्री भूपेश बघेल ह काली महात्मा गांधी के एक सौ इंक्यावनवां जयंती के मउका म ए घोसना करीन। विभागीय अधिकारी मनके अनुसार ग्रामोद्योग के अंतर्गत आने-आने प्रकार के कपड़ा, मास्क, सैनेटाईजर, गोबर ले बने गमला, दीया संघरा दूसर कलाकृति मनके विक्रय करे जाथे। आम लोगन कोरोना संक्रमण ले सुरक्षा बर उपयोगी सामग्री ग्रामोद्योग ले खरीद सकत हे। प्रदेस म ग्रामोद्योग सामग्री के विक्रय ल बढ़ावा दे बर अउ नौ ठन ग्रामोद्योग सामग्री विक्रय केन्द्र सुरू करे जाही। ए केन्द्र रईपुर, दुरूग, बिलासपुर, अंबिकापुर, जगदलपुर, बैकुंठपुर, कोरबा, राजनांदगांव, सक्ती अउ दंतेवाड़ा म खोले जाही।
रावण दहन
कोरोना संक्रमण उपर नियंत्रण ल देखत दशहरा परब के दउरान आने-आने जघा म रावण के पुतला दहन करे के संबंध म राज्य सासन डहार ले दिसा-निरदेस जारी करे गेहे। रईपुर अउ जांजगीर-चांपा जिला कलेक्टर डहार ले जारी आदेस के मुताबिक पुतला दहन कारीकरम बर आयोजक मन ल सपथ पत्र देय म ही अनुमति दे जाही। उहें, कंटनेमेंट जोन म पुतला दहन के मंजूरी नइ होहीं। दस फीट ले जादा ऊंचाई के पुतला दहन नइ करे जा सकही। संगेसंग पुतला दहन कारीकरम म समिति के मुख्य पदाधिकारी समेत पचास ले जादा मनखे सामिल नइ हो सकही। सांस्कृतिक अउ दूसर जम्मों परकार के आयोजन उपर रोक रइही।
बस्तर दशहरा
पचहत्तर दिन तक चलइया विश्व प्रसिद्ध बस्तर दशहरा कोरोना संक्रमण के बावजूद घलो ए बखत पंरपरा अउ विधि-विधान के संग मनाय जाही। ए संबंध म बस्तर राजपरिवार के सदस्य कमलचंद भंजदेव ह किहीन कि कोरोना संक्रमण ले बस्तर घलो अछूता नइ हे। ओमन ह लोगन ले बस्तर दशहरा पर्व म भीड़ नइ बढ़ाय के अपील करीन हे। अवइया सोलह अक्टूबर के काछनगुड़ी म पूजा विधान के संग कलश स्थापना, विधान जोगी बिठाई अउ ओखर बाद रथ परिक्रमा ए बछर घलो पंरपरा के अनुसार होही। एखर अलावा दूसर रस्म घलो पंरपरा अनुसार होही।