विस-बुलडोजर कार्रवाई
छत्तीसगढ़ विधानसभा के मानसून सत्र के तीसर दिन आज सदन म नकटी गांव म बुलडोजर कार्रवाई के मुद्दा जोरशोर से गूंजीस। ए मुद्दा म विपक्ष कोति ले स्थगन प्रस्ताव पेस करे गीस। नेता प्रतिपक्ष डॉक्टर चरणदास महंत ह किहीन कि नकटी गांव जउन पचास ठिन घर ल तोडे़ गेहे, ओमा ले कई ठिन घर प्रधानमंत्री आवास योजना म बने रिहीस। उहें, विपक्षी सदस्य मन ह केहे हे कि घर ल तोड़े के पहिली पुनर्वास के व्यवस्था होना चाही। जुवाब म राजस्व मंत्री टंकराम वर्मा ह सदन म स्पष्ट करे हे कि ए कार्रवाई पूरा वैधानिक हे। मंत्री ह बतईन कि ए कार्रवाई ले प्रभावित लोगन मन ल प्रशासन ह नवा रईपुर म फ्लैट दिन।
राजस्व मंत्री के गोठबात सुने के बाद विधानसभा अध्यक्ष डॉक्टर रमन सिंह ह स्थगन प्रस्ताव ल अग्राह्य कर दीन। जेखर ले नाराज विपक्षी सदस्य नाराबाजी करत गर्भगृह म पहुंच गे। एखर बाद विधानसभा के नियम के मुताबिक सबो विधायक खुदे निलंबित होगीन।
नकटी विस्थापित पदयात्रा
नकटी गांव के विस्थापित मन संग प्रदेस कांग्रेस अध्यक्ष दीपक बैज आज लोकभवन तक पदयात्रा म निकलीन। ए दउरान पुलिस ह तेलीबांध चउक तीर पदयात्रा ल रोक दीन। जिहां राज्यपाल के नाव कांग्रेस ह प्रशासन ल ज्ञापन सौंपीन। श्री बैज ह सरकार ले नकटी गांव के प्रभावित मन ल मकान बनाके देके मांग करीन।
विस-यूनिक्योर इंडिया लिमिटेड
विधानसभा म आज गुजरात के ब्लैकलिस्टेड यूनिक्योर इंडिया लिमिटेड के दवा बिसाय के मामला म उठाय गीस। पूर्व मुख्यमंत्री भूपेश बघेल के अनुपस्थिति म कांग्रेस विधायक अटल श्रीवास्तव ह सवाल उठावत किहीन कि छत्तीसगढ़ म मरीज मन ल बिना गुणवत्ता वाले दवई दे जावत हे। उहें, नेता प्रतिपक्ष डॉक्टर चरणदास महंत ह किहीन कि जउन दवई गुजरात म बेन हे, ओला छत्तीसगढ़ म बैन काबर नइ करे गेहे।
एमा स्वास्थ्य मंत्री श्यामबिहारी जायसवाल ह किहीन कि छत्तीसगढ़ मेडिकल सर्विसेज कारपार्रेशन-सीजीएमएससी के नियम पहिलीच ले बने हे। एमा दवई के प्री टेस्ट नइ होवय। फेर जब दवई आ जथे त इहां के लैब म टेस्ट कराय जाथे। स्वास्थ्य मंत्री ह किहीन कि गुजरात म प्रतिबंधित दवई अउ सीजीएमएससी के बिसाय गे दवई आने-आने रिहीस। ओमन बतईन कि सीजीएमएससी ह यूनिक्योर इंडिया लिमिटेड संग अनुबंध निरस्त कर देहे।
उहें, सदन म स्वास्थ्य मंत्री ह घोषणा करीन कि अब ले प्रदेस के सबो अस्पताल के प्लेसमेंट कर्मचारी मनके पुलिस जांच होही। ओमन किहीन कि जिहां टेंडर के काम पूरा होगे हे। उहां घलो जांच कराय जाही।
विस-कानून व्यवस्था
विधानसभा म आज कांग्रेस विधायक संगीता सिन्हा ह प्रदेश म कानून-व्यवस्था के मुद्दा उठईन। ओमन हत्या, माईलोगिन अउ नाबालिग नोनी मन संग दुष्कर्म अउ आने गंभीर अपराध ल बतात सरकार ले पूछीन कि ए घटना म रोक लगाय बर का कोनों किसम के ठोस कदम उठाय जात हे।
जुवाब म उपमुख्यमंत्री अउ गृहमंत्री विजय शर्मा ह बतईन कि एक जुलाई दू हजार चौबीस ले तीस जून दू हजार छब्बीस के बीच प्रदेस म एक हजार नौ सौ बहत्तर हत्या, सात सौ उनतीस लूट अउ सात हजार चार सौ तिरालीस अपहरण के घटना दरज करे गेहे। श्री शर्मा ह किहीन कि राज्य सरकार अपराध म प्रभावी रोक लगाय खातिर सरलग कार्रवाई करत हे।
जेल अभिरक्षा-मौत
उपमुख्यमंत्री अउ गृहमंत्री विजय शर्मा ह कांग्रेस विधायक उमेश पटेल ल आज विधानसभा म लिखित जवाब पेश करीन। बताय गे आंकड़ा के मुताबिक पाछु पांच बछर म जेल अभिरक्षा म तीन सौ पचहत्तर कैदी के मउत होय हे। एमा ले तीन सौ तिहत्तर मामला म दंडाधिकारी जांच के आदेश दे गेहे। तीन सौ ग्यारह मामला के जांच रिपोर्ट मिल गेहे। उहें, बासठ ठन रिपोर्ट अभी घलो लंबित हे।
विस-ध्यानाकर्षण
सदन म आज ध्यानाकर्षण ले नेता प्रतिपक्ष डॉक्टर चरणदास महंत ह इंद्रावती टाईगर रिजर्व म बाघ मनके सिकार के मामला उठईन। ओमन वन विभाग के लापरवाही ले बाघ के सरलग सिकार होय के बात किहीन। डॉक्टर महंत ह जानना चाहिन कि बाघ के सिकार के मामला म गिरफ्तार आईबी के जवान के नाव सार्वजनिक काबर नइ करे गीस। ए मुद्दा म विधायक शेषराज हरवंश, विक्रम मंडावी अउ लखेश्वर बघेल ह घलो सवाल करीन। ओमन वन मंत्री ल घेरत किहीन कि इंद्रावती टाईगर रिजर्व म पांच झन ल गिरफ्तार करके दू ठन बाघ के खाल जब्त करे गेहे।
ए बात म वन मंत्री केदार कश्यप ह बतईन कि छत्तीसगढ़ म बाघ के संख्या बाढ़त हे। ओमन किहीन कि दोषी मन उपर कार्रवाई करे जाही। श्री कश्यप ह किहीन कि कोनों ल बचाय के प्रयास नइ करे गेहे अउ न ही काखरो नाव लुकाय गीस। ओमन किहीन कि वन्यजीव के रक्षा बर वन विभाग सक्रिय हे। वनमंत्री ह बतईन कि बाघ के सिकार के आने-आने मामला म चौदह झिन आरोपी मन ल गिरफ्तार करे गेहे।
बिजली बिल भुगतान समाधान योजना
मुख्यमंत्री बिजली बिल भुगतान समाधान योजना म अब न्यायालय म लंबित बिजली बिल संबंधी प्रकरण के निपटारा करे जाही। एखर बर संबंधी उपभोक्ता मन ल पहिली न्यायालय ले अपन प्रकरण वापिस ले बर पड़ही। एखर बाद ओमन योजना के तहत बकाया मूल राशि अउ अधिभार म मिलइया छूट के फायदा ले सकही। छत्तीसगढ़ स्टेट पावर डिस्ट्रीब्यूशन कंपनी ह योजना के अवधि ल बढ़ाके तीस सितंबर तक कर देहे।
गोंचा महापर्व
बस्तर म गोंचा महापरब के तियारी जोरदरहा चलत हे। काली सोलह जुलाई के भगवान जगन्नाथ, बलभद्र अउ सुभद्रा के बाईस विग्रह तीन बड़े रथ म सवार होके नगर म घुमही। ए बेरा म तुपकी के पारंपरिक सलामी दे जाही। पच्चीस जुलाई तक चलइया ए आयोजन म हरेक दिन कतकोन कार्यक्रम होही।इही बीच, बस्तर जिला के कलेक्टर आकाश छिकारा ह रथयात्रा गोंचा परब म स्थानीय अवकाश के अवकाश के घोषणा करीन हे।
दिवंगत कर्मचारी-अनुकंपा नियुक्ति
राज्य सरकार ह विघटित परिवहन निगम के दिवंगत कर्मचारी के आश्रित मन ल अनुकंपा नियुक्ति दे बर नवा नीति बनाय के फइसला लेहे। सामान्य प्रशासन विभाग के सचिव के अगुवई म सात सदस्यीय समिति बनाय गेहे, जउन महीना भर म अपन रिपोर्ट सौंपही।
दुर्घटना
प्रदेस म पाछु चौबीस घंटा के दउरान होय आने-आने रद्दा दुर्घटना म सात झन के मउत होगे हे। उहें, तीन झन घायल हे।
कोरबा जिला के बांगो थाना क्षेत्र के पोड़ी बस स्टैंड तीर आज आज एक टैंकर ह दुपहिया सवार तीन झिन स्कूल पढ़ईया लइका मन ल अपन चपेट म ले लीस। ए हादसा म दू झिन लइका के मउकाच म मउत होगे। उहें, उंखर संग मौजूद तीसर लइका गंभीर रूप ले घायल हे, जउन ल अस्पताल म भर्ती कराय गेहे। घटना ले गुस्साय गांव के लोगन अउ परिवार वाले मन ह बांगो-अंबिकापुर राजमार्ग म चक्काजाम कर दीन। प्रशासन के समझाईश के बादे यातायात सामान्य होइस।
उहें, पेंड्रा नगर म आज मुख्य मार्ग म राय पेट्रोल पंप तीर कोयला ले भरे तेज रफ्तार ट्रेलर के टक्कर ले स्कूटी सवार बाप-बेटा के मउकाच म मउत होगे। उहें, एक महिला गंभीर रूप ले घायल हे।
एखर संगेसंग जांजगीर-चांपा जिला के घटोली चौक तीर ट्रक अउ फटफटी के बीच होय भिंड़त म दू झिन मनखे के मउत होगे अउ एक घायल हे।
बिलासपुर-रईपुर राष्ट्रीय राजमार्ग म चौपहिया गाड़ी के टक्कर ले दुपहिया सवार एक मनखे के मउत होगे हे।
ईडी-कार्रवाई
महादेव सट्टा ऐप मामला म प्रवर्तन निदेशालय-ईडी ह दिल्ली ले व्यवसायी विकास गर्ग ल हिरासत म लेहे अउ रायपुर लाके पूछताछ करे जात हे। आरोप हे कि महादेव सट्टा मामला ले जुड़े पइसा हवाला ले विकास तक पहुंचत रिहीस। ईडी ह विकास गर्ग अउ उंखर परिवार ले जुड़े करीबन नौ सौ चालीस करोड़ रूपिया के संपत्ति पहिलीच अटैच कर चुके हे।
अपचारी बालक-फरार
अंबिकापुर के कन्या परिसर रोड बिसुनपुर के बाल संप्रेक्षण गृह ले पाछु रतिहा तेरह झिन अपचारी बाल फरार होगे। सूचना मिले म गांधी नगर पुलिस अउ प्रशासनिक अधिकारी मउका म पहुंच के तीर-तखार के क्षेत्र म लइका मनके खोज करे जात हे। फरार होय सबो लइका आने-आने अपराध म बंद रिहीन। एखर पहिली तेईस जून के घलो तेरह झिन अपचारी बालक खिड़की तोड़के फरार होगे रिहीन। ए महीना म बाल संप्रेक्षण गृह ले लइका मनके भागे के ए दूसर घटना हे।
मोबाइल इमर्जिंग टेक्नोलॉजी लैब
मुख्यमंत्री विष्णुदेव साय अउ विधानसभा अध्यक्ष डॉक्टर रमन सिंह ह आज विधानसभा परिसर ले ‘भावना दीदी की साईंस पाठशाला‘‘ के तहत चलाय जात निःशुल्क मोबाइल इमर्जिंग टेक्नोलॉजी लैब ल हरियर झंडी दिखाके रवाना करीन। ए मोबाइल लैब पंडरिया विधानसभा क्षेत्र के विद्यालय तक पहुंच के पढ़ईया लइका मन ल आधुनिक तकनीक के प्रशिक्षण दीही।