विस-स्थगन
छत्तीसगढ़ विधानसभा के मानसून सत्र के दूसर दिन आज शून्यकाल म खाद अउ उन्नत बीज के कमी ल लेके विपक्ष ह स्थगन प्रस्ताव लईस। पूर्व मुख्यमंत्री भूपेश बघेल ह कहिन कि खातू अउ बीजा बर किसान मन भटकत हे। ए बछर बरसा घलो कमती होय हे, जेखर ले बोनी पिछड़ गेहे। उहें, नेता प्रतिपक्ष डॉक्टर चरणदास महंत ह कहिन कि डीएपी, पोटाश जइसन खातू मिलत नइ हे।
अपन जवाब म कृषि मंत्री रामविचार नेताम ह कहिन कि प्रदेस म खातू अउ बीजा के कोनों कमी नइ हे। ओमन बतईन कि प्रदेस म चौदह लाख मीटरिक टन ले जादा के उर्वरक के उपलब्धता सुनिश्चित कर ले गेहे, जउन ह लक्ष्य के नब्बे प्रतिशत हे। उहें, मांग के विरूद्ध छियानवे प्रतिशत बीजा के भंडारण कर ले गेहे। श्री नेताम म बतईन कि खातू के चौरानवे नमूना जिहां ले अमानक पाय गेहे, ओखर मन उपर कार्रवाई करे गेहे। मंत्री के जवाब ले असंतुष्ट विपक्षी सदस्य मन ह सदन म नाराबाजी करत गर्भगृह म पहुंच गे, जेखर बाद ओमन खुदे निलंबित होगे।
विधानसभा म आज विपक्ष ह सरकार के खिलाफ अविश्वास प्रस्ताव पेस करीस। एमा विधानसभा अध्यक्ष डॉक्टर रमन सिंह ह कहिन कि सत्र के आखिरी दिन सत्रह जुलाई के अविश्वास प्रस्ताव म चर्चा करे जाही।
मुख्यमंत्री-धन्यवाद प्रस्ताव
मुख्यमंत्री विष्णुदेव साय ह कहिन हे कि राज्य सरकार नक्सल मुक्त छत्तीसगढ़ उपर धन्यवाद प्रस्ताव लाही। ओमन कहिन कि केन्द्रीय गृहमंत्री अमित शाह के इच्छाशक्ति ले प्रदेस ले नक्सलवाद के समाप्ति होय हे। एखर बर विधानसभा म केन्द्र सरकार के प्रति धन्यवाद प्रस्ताव पारित करे जाही।
एमा नेता प्रतिपक्ष डॉक्टर चरणदास महंत ह राज्य सरकार उपर सहीद मनके अनदेखा के आरोप लगावत कहिन कि धन्यवाद प्रस्ताव म विपक्ष चर्चा म सामिल नइ होही। संगेसंग ए प्रस्ताव के विरोध म सदन के बहिष्कार करे जाही।
विधानसभा परिसर-पौधारोपण
विधानसभा परिसर म ‘एक पेड़ मां के नाम थ्री प्वॉइंट ओ‘ अभियान के तहत वृक्षारोपण कार्यक्रम के आयोजन करे गीस। ए कार्यक्रम म विधानसभा अध्यक्ष डॉक्टर रमन सिंह अउ मुख्यमंत्री विष्णुदेव ह रूद्राक्ष के पेड़ लगईन। उहें, नेता प्रतिपक्ष डॉक्टर चरणदास महंत, उपमुख्यमंत्री विजय शर्मा, उपमुख्यमंत्री अरूण साव अउ संसदीय कार्य मंत्री केदार कश्यप समेत विधानसभा के जम्मों सदस्य मन ह वृक्षारोपण करके पर्यावरण संरक्षण के संकल्प दोहरईन।
प्रधानमंत्री फसल बीमा योजना
प्रदेस म खरीफ मौसम बर प्रधानमंत्री फसल बीमा योजना के तहत बारह जुलाई ले पंजीयन के प्रक्रिया सुरू होगे हे। कृषि विभाग ह प्रदेस के किसान मन ले इकतीस जुलाई तक धान, मक्का, सोयाबीन समेत ग्यारह अधिसूचित फसल के बीमा कराय के अपील करे हे। मौसम विभाग डडार ले अल नीनो के प्रभाव ले अनियमित या कम बरसा के आसंका जताय के सेती कृषि विभाग ह केहे कि फसल बीमा किसान मन ल प्राकृतिक आपदा ले होवइया नुकसान के विरूद्ध आर्थिक सुरक्षा प्रदान करही।
एचपीवी टीकाकरण सप्ताह
किशोरी मन ल सर्वाइकल कैंसर ले सुरक्षित राखे बर छत्तीसगढ़ म तेरह ले अट्ठारह जुलाई तक विशेष एचपीवी टीकाकरण सप्ताह के आयोजन करे जावत हे। एखर तहत चौदह बछर के आयु के जम्मों पात्र नोनी मन ल स्वास्थ्य विभाग डहार ले निःशुल्क जीवनरक्षक एचपीवी टीका लगाय जावत हे।
राज्य टीकाकरण अधिकारी अउ उप संचालक डॉक्टर वी.आर. भगत ह बतईन कि अभियान के तहत स्कूल, आंगनबाड़ी केन्द्र, स्वास्थ्य संस्थान अउ समुदाय स्तर म जन-जागरूकता गतिविधि के आयोजन करे जात हे। डॉक्टर भगत ह अभिभावक मन ले अपील करे हे कि अपन पात्र बेटी मन ल एचपीवी टीका जरूर लगवायं।
राजिम-नगर पालिका
राज्य सासन ह राजिम नगर पंचायत ल नगर पालिका के रूप म उन्नयन कर देहे। नगरीय प्रशासन विभाग डहार ले ए बारे म अधिसूचना जारी कर दे गेहे। एखर तहत राजिम नगर पंचायत के सीमा ह राजिम नगर पालिका के सीमा होही।
उपमुख्यमंत्री अउ नगरीय प्रशासन मंत्री अरूण साव ह केहे हे कि ए फइसला ले राजिम के सुनियोजित विकास ल नवा दिसा मिलही अउ सहरी सुविधा के विस्तार बर जादा संसाधन उपलब्ध होही।
सीआरपीएफ विशेष महानिदेशक-बीजापुर
केन्द्रीय रिजर्व पुलिस बल-सीआरपीएफ के विशेष महानिदेशक दीपक कुमार ह आज बीजापुर जिला के दउरा करीन। ए दउरान ओमन सीआरपीएफ के कई ठिन कैंप मनके निरीक्षण करके अधिकारी अउ जवान मन ले भेंट करीन। उंखर संग छत्तीसगढ़ सेक्टर के सीआरपीएफ के आईजी शालिन अउ डीआईजी बीएस नेगी घलो मौजदू रिहीन। ए मउका म श्री कुमार ह किहीन कि बस्तर जइसन इलाका म काम करे बर अच्छा सारीरिक क्षमता, सही प्रसिक्षण अउ सतर्कता बहुत जरूरी हे।
हाईकोर्ट-निर्देश
रायगढ़ जिला के हाथी प्रभावित धरमजयगढ़ वन क्षेत्र म नियम अउ मानक मनके उल्लंघन करके तैंतीस केवी लाइन विस्तार ल लेके छत्तीसगढ़ उच्च न्यायालय म जनहित याचिका दायर करे गेहे। कोर्ट ह केन्द्र, राज्य सरकार अउ बिजली कंपनी ल नोटिस जारी करके जवाब देके निरदेस देहे। सुनवाई के दउरान राज्य अउ केन्द्र सरकार डहार ले उपस्थित अधिवक्ता मन ह नोटिस स्वीकार करीन, जबकि निजी कंपनी ल नियमानुसार नोटिस जारी करे के निरदेस दे गीस। कोर्ट ह राज्य सरकार ल जवाब दाखिल करे बर एक हफ्ता के बेरा दे गेहे।
मेरा युवा भारत-माय भारत
भारत सरकार के युवा कार्यक्रम अउ खेल मंत्रालय के ‘‘मेरा युवा भारत-माय भारत‘‘ के तहत दुर्ग जिला के युवा मन ल कौशल विकास, इंटर्नशिप, स्वयंसेवा अउ रोजगार के मउका ले जोड़े बर माय भारत पोर्टल म पंजीयन के काम सुरू कर दे गेहे। एखर बर जिला रोजगार अउ स्वरोजगार मार्गदर्शन केन्द्र म आवेदक मनके सुविधा बर विशेष पंजीयन काउंटर खोले गेहे। ए काउंटर म पन्द्रह ले उनतीस बछर के युवा मनके पोर्टल म निःशुल्क पंजीयन करे जाही।