पौधारोपण अभियान
देशभर म आज पौधारोपण के बड़का अभियान चलाय गीस। केंद्रीय मंत्री शिवराज ंिसंह चौहान ह किहीन कि सरलग भविष्य सुनिश्चित करे खातिर अउ पर्यावरण संरक्षण खातिर पउधा लगाय जाना जरूरी हवय। नई दिल्ली म वृक्ष मित्र अउ पर्यावरण संरक्षण संकल्प कारीकरम म श्री चौहान ह किहीन कि आज पूरा विश्व जलवायु परिवर्तन अउ पृथ्वी के तापमान बाढ़े ले चिंता म हवय।
विस-मानसून सत्र
छत्तीसगढ़ विधानसभा के पांच दिन के मानसून सत्र काली बिहनिया 11 बजे ले सुरू होही। ए सत्र 17 जुलाई तक चलही। ए सत्र के दउरान कुल 5 ठिन बइठका आयोजित करे जाही। सत्र के दउरान प्रश्नकाल अउ वित्तीय काम के संगेसंग 8 ले जादा संशोधन विधेयक मन उपर चर्चा अउ बिचार करे जाही।
इही बीच, मानसून सत्र के तियारी ल लेके नेता प्रतिपक्ष डॉ. चरणदास महंत के अध्यक्षता म आज रईपुर म कांग्रेस विधायक दल के बइठका चलत हवय।
मोर गांव-मोर पानी
प्रदेस म ‘‘मोर गांव-मोर पानी‘‘ अभियान के जरिया जल संरक्षण ल जन आंदोलन बनाय जावत हे। विकसित भारत-जी राम जी योजना के तहत जम्मो जिला मन म रोजगार जल संरक्षण अउ हरित विकास के काम तेजी ले करे जावत हे। इही कड़ी म मनेन्द्रगढ़-चिरमिरी-भरतपुर के ग्राम पंचायत बरदर म जन सम्मेलन ‘एक पेड़ मां के नाम‘ वृक्षारोपण अउ जनभागीदारी कारीकरम के आयोजन करे गीस। कारीकरम म लोक स्वास्थ्य मंत्री श्याम बिहारी जायसवाल ह पउधारोपण करीन अउ कंटूर ट्रेंच के खुदाई कर जल संरक्षण के संदेस दीन।
जानबा के मुताबिक ग्राम पंचायत बरदर म 52 एकड़ क्षेत्र म समेकित जल संरक्षण अउ हरित विकास मॉडल विकसित करे जावत हे। इंहा जल संरक्षण के संगेसंग तकरीबन दू हजार पउधा लगाय जावत हवय। ‘‘मोर गांव-मोर पानी‘‘ अभियान के तहत करे गे काम ले ए क्षेत्र म तकरीबन दू सौ लाख लीटर भू-जल रिचार्ज क्षमता विकसित होय हवय।
माफी योजना-2026
कर्मचारी भविष्य निधि संगठन ई.पी.एफ.ओ. ह माफी योजना-2026 सुरू करीन हवय। एखर तहत छूट मिले भविष्य निधि ट्रस्ट चलइया प्रतिष्ठान मन ल अपन स्थिति नियमित करे के एकमुस्त मउका दे गे हवय। केंद्रीय श्रम अउ रोजगार मंत्रालय ह बतइन कि ए योजना 6 महिना तक चलही। एखर लाभ अइसन प्रतिष्ठान ल मिलही जउन आयकर अधिनियम 1961 के तहत मान्यता प्राप्त भविष्य निधि ट्रस्ट के संचालन करत हवय। अइसन ट्रस्ट म कर्मचारी भविष्य निधि के प्रबंधन सीधा ई.पी.एफ.ओ. के बजाय संबंधित प्रतिष्ठान अपन निजी ट्रस्ट के जरिया ले करथे।
शूटिंग-प्रतियोगिता
राजधानी रईपुर के माना कैंप के सूटिंग रेंज म काली 25वीं छत्तीसगढ़ राज्य सूटिंग मीट के सुभारंभ करे गीस। छत्तीसगढ़ प्रदेस राइफल एसोसिएसन डहार ले आयोजित ए राज्य स्तरीय प्रतियोगिता म प्रदेसभर के निशानेबाज मन हिस्सा लेवत हवय। प्रतियोगिता के उद्घाटन समारोह म मुख्य अतिथि के रूप म रईपुर पुलिस कमीश्नर डॉ. संजीव शुक्ला सामिल होइन। विसेस अतिथि के रूप म विंग कमांडर विवेक कुमार साहू सामिल होइन। ए राज्य सूटिंग मीट म मनखे अउ माईलोगिन वर्ग के संगेसंग आने-आने आयु समूह के मुकाबला आयोजित करे जावत हवय।
नगरीय निकाय-वित्तीय आवंटन
नगरीय प्रशासन विभाग ह प्रदेस के नगरीय निकाय नगर निगम नगरपालिका परिषद अउ नगर पंचायत ल वित्तीय आवंटन जारी करे हे। एखर तहत वित्तीय बछर दू हजार 26-27 खातिर महापौर अध्यक्ष निधि के संगेसंग पार्षद निधि के पहिली किस्त के रूप म पचास प्रतिसत रासि हस्तांतरित करे के आदेस जारी करे गे हवय। दूनों मद ल मिलाके कुल 104 करोड़ 54 लाख 25 हजार रूपिया के रासि बैंक के जरिया ले सीधा निकाय मनके खाता म भेजे जावत हे।
डंप बरामद
दंतेवाड़ा जिला म सुरक्षा बल मन ह नक्सली मन डहार ले लुका के राखे गे हथियार अउ बिस्फोटक जिनिस बरामद करीन हवय। ए कार्रवाई हालेच म आत्मसमर्पण कर मुख्यधारा म लहुटिन माओवादी मन के निशानदेही म बारसूर थाना क्षेत्र के तोड़मा जंगल म करे गीस। सर्च अभियान म तकरीबन 16 लाख रूपिया कीमत के 116 ग्राम सोना के बिस्किट, दू लाख रूपिया नगद, इंसास रायफल, मैगजीन, कारतूस, बंदूक, टिफिन बम, पाईप बम, हैंड ग्रेनेड, वर्दी अउ आने-आने जिनिस ल बरामद करे गीस।
उहें, कांकेर-नारायणपुर सीमा क्षेत्र के ग्राम आलपरस अउ गुमचुर के बीच जंगल-पहाड़ी क्षेत्र म सुरक्षा बल ह नक्सली मन ले लुका के राखे गे डंप बरामद करीन हवय। पुलिस के मुताबिक कोयलीबेड़ा थाना क्षेत्र 11 जुलाई ले डी.आर.जी. बी.एस.एफ. अउ बी.डी.एस. के मिलेजुले टीम डहार ले सघन सर्चिंग अभियान चलाय जावत हे। इही दउरान जमीन के भीतर लुका के राखे गे हथियार, इलेक्ट्रानिक उपकरण अउ नक्सली जिनिस बरामद होय हे। एमा दू ठिन थ्री नॉट थ्री रायफल, 32 राउंड कारतूस, एक ठिन लैपटॉप, एक ठिन टैबलेट, तीन ठिन वायरलेस बैटरी, रेडियो अउ नक्सली साहित्य समिल हवय।
जवान-श्रध्दांजलि
मोहला-मानपुर जिला म आज कोरकोट्टी-मदनवाड़ा नक्सल हमला के 17वीं बरसी म शहीद मन ल श्रध्दांजलि दे गीस। जिला के पुलिस रक्षित केंद्र मोहला म आयोजित श्रध्दांजलि सभा म कलेक्टर, पुलिस अधीक्षक, आई.टी.बी. पी. के अधिकारी, जनप्रतिनिधि अउ मनखे मन ह सहीद मन ल श्रध्दासुमन अर्पित करीन। जिला के आने-आने थाना अउ गांव म घलो श्रध्दांजलि सभा आयोजित करे गीस। ए मउका म मोहला अउ औंधी म रक्तदान सिविर घलो लगाय गीस।
गौरतलब हे कि 12 जुलाई दू हजार नौ के मदनवाड़ा क्षेत्र म होय नक्सल हमला म ओ बेरा के पुलिस अधीक्षक विनोद कुमार चौबे समेत 29 जवान सहीद हो गे रिहीस।
दुर्घटना
जशपुर म तपकरा थाना क्षेत्र के ओड़िसा-कुनकुरी मार्ग म लवाकेरा के तीर म काली एक ठिन तेज रफ्तार हाईवा अउ कार के बीच जोरदरहा टक्कर होगिस। टक्कर अतका भयंकर रिहीस कि कार ह बुरी तरह क्षतिग्रस्त होगिस अउ ओमा बइठे दू झिन लोगन मनके मउकच म मउत होगिस।
ओति, सरगुजा जिला के मैनपाट म काली दू ठिन मोटर साइकिल के होइस टक्कर म तीन झिन मनखे मनके मउत होगिस। उहें, एक ठिन आने हादसा म अंबिकापुर-सीतापुर राष्ट्रीय राजमार्ग 43 म सेदम के तीर मोटर साइकिल ले जावत रिहीस एक ठिन दंपति ल ट्रक ह पाछू ले टक्कर मार दीस, जेखर ले महिला के मउत होगिस अउ ओखर पति ह गंभीर रूप ले घायल होगिस हवय।
उहें, जांजगीर-चांपा जिला के बुचहरदी गांव म दू ठिन मोटर साइकिल के बीच होय टक्कर म एक मनखे के मउत होगे हवय। ए दुघर्टना म दू लइका समेत चार झिन आने मनखे मन घायल हो गे हवय, जेमन ल बिलासपुर के अस्पताल म भर्ती कराय गेहे।
अउ अब थोरकुन समाचार सार म –
– छत्तीसगढ़ लोक सेवा आयोग डहार ले सूबेदार, उप निरीक्षक संवर्ग अउ प्लाटून कमांडर के भर्ती खातिर प्रारंभिक परीक्षा आज बिहनिया 10 बजे ले मंझनिया 12 बजे तक आयोजित करे गीस।
– दक्षिण पूर्व मध्य रेलवे के रईपुर मंडल म भिलाई अउ भिलाई नगर के बीच खुर्सीपार रेलवे समपार फाटक म मरम्मत काम करे जाही। एखर चलत 14 जुलाई के बिहनिया 8 बजे ले 24 जुलाई के रतिहा 8 बजे तक ए फाटक म सड़क यातायात पूरा बंद रइही।
अउ
– जशुपर जिला के चार ठिन वन परिक्षेत्र मन म ए बेरा लगभग 32 हाथी मनके दल ह किंजरत हवय। हाथी मनके गतिविधि ल देखत वन विभाग ह निगरानी बढ़ा दे हवय। वन विभाग ह गांव वाला मनखे मन ले अपील करीन हे कि ओमन हाथी के किंजरइया क्षेत्र म झन जावय।