सुनइया मन ल बतादन कि ए योजना म अब तक माईलोगिन के खाता म करीब अट्ठारा हजार आठ सौ छै करोड़ रूपिया भेजे जा चुके हे।आईपीएस-तबादला
राज्य सरकार ह भारतीय पुलिस सेवा के चौबीस ठन अधिकारी के तबादला आदेस जारी करे हे। गृह विभाग कोति ले जारी आदेस अनुसार आई.जी., डी.आई.जी., ए.आई.जी. समेत बारह जिला के पुलिस अधीक्षक मन ल बदले गेहे। आईपीएस अजय कुमार यादव ल राजनांदगांव रेंज के नवा पुलिस महानिरीक्षक बनाय गेहे।
उहें, जिला मन म घलो बड़का बदलाव करत हुए चंद्र मोहन सिंग ल दंतेवाड़ा जिला के नवा पुलिस अधीक्षक बनाय गेहे। एखर अलावा त्रिलोक बंसल ल बेमेतरा, सुनील शर्मा ल सारंगढ़-बिलाईगढ़, जितेन्द्र कुमार यादव ल कबीरधाम अउ चौहान किरण गंगाराम ल बालोद के एसपी बनाय गेहे। संगेसंग योगेश कुमार पटेल ल सूरजपुर, राय गौरव राम प्रवेश ल बलौदाबाजार-भाटापारा, उमेश कुमार गुप्ता ल बीजापुर अउ मयंक गुर्जर ल सुकमा जिला के जिम्मेदारी सौंपे गेहे। अइसने, संदीप कुमार पटेल ल नारायणपुर, भावना पांडे ल धमतरी अउ हरीश राठौर ल कोरिया जिला के नवा पुलिस अधीक्षक बनाय गेहे।
एखर अलावा रॉबिनसन गुरिया ल रइपुर पश्चिम के पुलिस उपायुक्त बनाय गेहे।
उपमुख्यमंत्री-समीक्षा बैठक
उपमुख्यमंत्री अउ गृह मंत्री विजय शर्मा ह आज मंत्रालय म राखे गे पुलिस विभाग के समीक्षा बइठका म नक्सल प्रभावित क्षेत्र म राहत, पुनर्वास अउ विकास काम म तेजी लाय के निरदेस दीन। ओमन किहीन कि नक्सल मामला म जेल म बंद अइसन आरोपी, जेखर खिलाफ जादा गंभीर जनहानि के प्रकरण नइ हे, ओखर मामला म नियमानुसार समीक्षा करके रिहाई के प्रक्रिया सुरू करे जावय।
उपमुख्यमंत्री ह किहीन कि अति नक्सल प्रभावित क्षेत्र के विकास बर शासन कोति ले नक्सल मुक्त प्रस्ताव पास करके अइसन गांव म एक-एक करोड़ रूपिया के विकास कार्य स्वीकृत करे जाही, जेखर ले ग्रामीण मन ल आय के साधन तो मिलही ही, संगेसंग गांव के विकास घलो होही।
एक ठिन आने बइठका म श्री शर्मा ह बस्तर के अइसन गांव मनके पहिचान करे के निरदेस दीन हे, जिहां आज तक किसनहा मन रासायनिक खातू नइ बउरे हे।
ग्राम सड़क योजना-एआई
छत्तीसगढ़ म प्रधानमंत्री ग्राम सड़क योजना के तहत बने गांव के रद्दा के निगरानी अब आर्टिफिसियल इंटेलीजेंस यानी एआई तकनीक ले करे जाही।
उपमुख्यमंत्री अउ पंचायत तथा ग्रामीण विकास मंत्री विजय शर्मा ह अधिकारी मन ल ए व्यवस्था लागू करे के निरदेस देहे। एमा हर महिना रद्दा के वीडियो निरीक्षण होही अउ एआई तकनीक ह गड्ढा, दरार अउ आने नुकसान के पहिचान करही। रिपोर्ट के आधार म सबले जादा खराब रद्दा के मरम्मत के कार्य योजना ल सबले पहिली बनाय जाही। ए नवा व्यवस्था के पायलेट प्रोजेक्ट आज ले प्रदेस के सबो जिला म सुरू हो गेहे।
हाईकोर्ट-पुलिस गवाह/नर्सिंग कॉलेज
छत्तीसगढ़ उच्च न्यायालय ह किहीन हे कि नक्सल प्रभावित क्षेत्र मन म सिरिफ पुलिस गवाह मनके आधार म घलो सजा हो सकत हे, एखर बर स्वतंत्र गवाह जरूरी नइ हे। कोर्ट ह किहीन कि नक्सल प्रभावित क्षेत्र मन म स्वतंत्र गवाह मिलना हमेसा व्यावहारिक नइ होवय, अइसन स्थिति म केवल पुलिस अधिकारी मन के बयान के आधार उपर घलो आरोपी मन ल दोषी ठहराय जा सकत हे, बसर्ते उंखर गवाही विश्वसनीय अउ सही हो। सिरिफ पुलिस विभाग ले होय ले कोनो गवाह के बयान ल खारिज नइ करे जा सकय। मुख्य न्यायाधीश रमेश सिन्हा अउ जस्टिस रवींद्र कुमार अग्रवाल के डिवीजन बेंच ह ए व्यवस्था देवत हुए प्रतिबंधित माओवादी संगठन ले जुड़े एक नक्सली के अपील ल खारिज कर दीस अउ उंखर दस बछर के सजा ल जारी रखे हे।
उहें, एक आने मामला म हाईकोर्ट ह राज्य के निजी नर्सिंग कॉलेज मन म बी.एस.सी. नर्सिंग पाठ्यक्रम म भर्ती बर राज्य सरकार के न्यूनतम दस परसेंटाइल अंक पाय के अनिवार्यता ल अवैध ठहरात हुए रद्द कर दीस। कोर्ट ह किहीस कि केंद्र सरकार के वैधानिक संस्था इंडियन नर्सिंग काउंसिल-आई.एन.सी. कोति ले दे गे छूट ल राज्य सरकार ह अपन मर्जी ले नइ बदल सकय। जस्टिस ए.के. प्रसाद के सिंगल बेंच ह प्राइवेट नर्सिंग कालेज एसोसिएसन अउ एक ठन आने याचिका के संघरा सुनवाई करत हुए ए आदेस जारी करीस। कोर्ट ह राज्य सरकार ल निरदेस दीन हे कि आई.एन.सी. कोति ले देगे छूट के जइसन बगैर कोनो न्यूनतम परसेंटाइल के सर्त के सिरिफ मेरिट आधार म पंद्रह दिन के भीतर नवा सिरा ले काउंसिलिंग के प्रक्रिया सुरू करय।
नगरीय निकाय पत्र
नगरीय प्रशासन और विकास विभाग ह प्रदेस के सबो नगर निकाय ल चिट्ठी लिखके खुला गड्ढा़ ले लइका मन ल जान के खतरा होय के सेति सुरक्षा उपाय के निरदेस देहे। पत्र म केहे गेहे कि नगरीय क्षेत्र म अभियान चलाके खुला गड्ढ़ा, खुला नाली अउ बनत जघा ल पहिचान करके ओखर चारो कोति सुरक्षा कवच बनाय जाय, जेखर ले लइका मन सुरक्षित रइही।
ईडी महादेव ऑनलाइन सट्टा
प्रवर्तन निदेशालय याने ईडी ह महादेव ऑनलाइन सट्टा मामला के जांच म अब तक तीन हजार चार सौ सात करोड़ सतहत्तर लाख रूपिया के कथित अपराधिक आय पता लगाय के दावा करे हे। एजेंसी अनुसार अब तक पांच सौ तिहत्तर करोड़ रूपिया ले जादा के चल अउ अचल संपत्ति ल जब्त या कुर्क करे जा चुके हे अउ पांच ठन अभियोजन सिकायत रईपुर के विसेस पीएमएलए अदालत म दाखिल करे गेहे जेमा जांच जारी हे।
रागनी साहू-चंद्र मिशन
महासमुंद के पढ़इया लइका रागनी साहू के चयन अंतरराष्ट्रीय चंद्र मिशन ‘‘शक्तिसैट‘‘ बर नेशनल फाइनलिस्ट के रूप म होय हे। रागनी ह छत्तीसगढ़ ले चुने गे इकलौता छात्रा हे। ए मिसन म एक सौ आठ देस के पढ़इया लइका मन ह चंद्र उपग्रह अउ रोवर बनाही, जेला ए बछर अक्टूबर म इसरो ह श्रीहरिकोटा ले लॉन्च करही।
हाथी हमला-मौत
रायगढ़ जिला म आज जंगली हाथी के हमला म दू लोगन के मउत होगे। धरमजयगढ़ डिवीजन के डीएफओ जितेन्द्र उपाध्याय ह बतइन कि कापू वन क्षेत्र के अंतर्गत तालगांव म एक जंगली हाथी ह माईलोगिन उपर हमला कर दीस, जेखर ले ओखर मउत होगे। उहें, छाल वनक्षेत्र के औरनारा गांव म घलो हाथी के हमला म एक मजदूर के मउत होगे।
सुनइया मन ल बतादन कि राज्य म एक हफ्ता के भीतर हाथी के हमला म तीन झन के मउत हो गेहे।
साइबर ठगी-गिरफ्तारी
खैरागढ़-छुईखदान-गंडई पुलिस ह साढ़े आठ करोड़ रूपिया ले जादा के साइबर ठगी के मामला म फरार एक आरोपी ल पकड़े हे। आरोपी के पहिचान सुपेला निवासी राकेश कुमार के रूप म होय हे।
पुलिस ले मिले जानकारी अनुसार आरोपी ह पूछताछ म अपन अपराध ल मान लेहे। ओखर तीर ले मोबाइल, सिमकार्ड अउ आने डिजीटल साक्ष्य जब्त करे गेहे।
जिले की चिट्ठी
आकाशवाणी रईपुर के प्रादेशिक समाचार एकांश, डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल छत्तीसगढ़ के सबो आकाशवाणी कंेंद्र एके संघरा रिले करही। ए दारी के अंक म ‘‘बस्तर‘‘ जिला के बारे म जानकारी दे जाही।
स्वतंत्रता दिवस-बैठक तैयारी
मुख्य सचिव विकासशील के अगुवई म काली मंत्रालय म स्वतंत्रता दिवस समारोह के तियारी ल लेके अधिकारी मनके एक बड़का बइठका होइस। बइठका म स्वतंत्रता दिवस के आयोजन के तियारी के बारे म बिचार करे गीस। संगेसंग स्वतंत्रता दिवस समारोह के आने-आने व्यवस्था बर अधिकारी मन के जिम्मेदारी तय करे गीस। बइठका म बताय गीस कि राजधानी रइपुर के पुलिस परेड ग्राउंड म राज्य स्तरीय समारोह के आयोजन बिहनिया नौ बजे ले होही।