रेलवे-इलेक्ट्रिक लोकोमोटिव
रेलवे ह रइपुर म दू सौ पचास इलेक्ट्रिक लोकोमोटिव के उपराहा रख-रखाव केंद्र बनाय बर एक सौ पचहत्तर करोड़ रूपिया मंजूर करे हे। रेल मंत्रालय के अनुसार ए परियोजना भारतीय रेल के विद्युत ईंजन बेड़े के तेजी ले होवत बिस्तार अउ जम्मो नेटवर्क म माल ढुलाई अउ यात्री परिचालन के बढ़ोत्तरी ल चेत म राखत बुनियादी ढांचा ल बेहतर बनाय के प्रयास के हिस्सा आय। उपराहा प्राथमिक कंेद्र ले रेलवे ह मौजूदा बुनियादी ढंाचा के बेहतर इस्तेमाल कर पाही।
ई85-ईंधन
पेट्रोलियम अउ प्राकृतिक गैस मंत्री हरदीप सिंह पुरी ह किहीन हें कि सरकार ह ई-एटी फाइव ईंधन लाने के योजना बनावत हे, जउन मानक ई-ट्वेंटी पेट्रोल ले करीबन बीस रूपिया सस्ता होही। ई-एटी फाइव सिरिफ ओ गाड़ी मन बर उपलब्ध होही, जउन बिसेस रूप ले ए ईंधन के उपयोग बर डिजाइन करे गेहे। ओमन यहू किहीन कि इथेनॉल मिले पेट्रोल ले ईंजन ल नुकसान अउ गाड़ी उपर उल्टा प्रभाव परे के आसंका ल घलो खारिज करिन।
कैथलैब-स्वास्थ्य मंत्री
स्वास्थ्य मंत्री श्यामबिहारी जायसवाल ह जगदलपुर के डिमरापाल के कॉन्टिनेंटल सुपर स्पेशलिटी अस्पताल म बस्तर संभाग के पहिली अउ छत्तीसगढ़ के दुसरइया अत्याधुनिक कैथलैब के लोकार्पण करीन। ए सुविधा के सुरू होय ले हृदय रोगी मन ल एंजियोग्राफी, एंजियोप्लास्टि अउ आने आधुनिक इलाज के सुविधा अब स्थानीय स्तर म मिलही। ए दउरान स्वास्थ्य मंत्री ह किहीन कि- ‘‘अब मरीज मन ल इलाज बर बड़े सहर उपर निर्भर नइ रहना परही संगेसंग ओमन ल बेरा म इलाज घलो मिल सकही।
श्रम मंत्री-बैठक
प्रदेस म ई-रिक्सा सहायता योजना के तहत मिलइया अनुदान रासि ल पचास हजार ले बढ़ाके एक लाख रूपिया करे जाही। श्रम मंत्री लखनलाल देवांगन के अध्यक्षता म काली मंत्रालय म होय छत्तीसगढ़ असंगठित कर्मकार राज्य सामाजिक सुरक्षामंडल के पहिली बइठका म ए निर्णय ले गिस। बइठका म गिग वर्कर्स, चरवाहा अउ असंगठित कर्मचार के मेघावी लइका मन बर नवा कल्याणकारी योजना तियार करे उपर घलो सहमति बनिस। एति, श्रम मंत्री पंजीकृत श्रमिक मनके ई-केवाईसी अउ आधार पंजीयन कराय के संग पात्र हितग्राही मन तक योजना के लाभ पहुंचाय के निरदेस देइन हें।
खरीफ फसल-बोनी
प्रदेस म ए बेरा खेती-किसानी के काम जोर धर लेहे। अब तक बीस लाख चौदह हजार हेक्टेयर ले जादा क्षेत्र म धान, मक्का, कोदो, कुटकी, राहेर, मूंग संगेसंग आने-आने फसल के बोनी करे जा चुके हे, जउन लक्ष्य के इकतालिस प्रतिसत हे। बतादन कि, एसो खरीफ सीजन म राज्य सरकार ह अड़तालीस लाख उनहत्तर हजार हेक्टेयर क्षेत्र म बोनी के लक्ष्य राखे हे।
ऐति, कृषि विभाग के अधिकारी मन बतइन कि- एसो खरीफ फसल बर प्रदेस म चार लाख पंचानवे हजार कुंटल प्रमाणित बीज बांटे के लक्ष्य राखे गेहे। उहें, अब तक तीन लाख बांसठ हजार कुंटल बीज किसान मन ल बांटे गिस हे।
प्रधानमंत्री जनमन योजना
प्रधानमंत्री जन-मन योजना के तहत कबीरधाम जिला के बोड़ला इलाका म बनइया सड़क के राज्य स्तरीय जांच करे गिस। एखर बाद निर्मान कारज के निगरानी अउ गुनवत्ता म लापरवाही पाय जाय म सहायक अउ उपअभियंता ल निलंबित करे के निरदेस देय गिस। संगेसंग क्षतिग्रस्त सड़क के हिस्सा ल दुबारा बनाय अउ ठेकेदार ल ब्लैकलिस्ट करे बर केहे गिस।
बातों-बातों-में
प्रादेशिक समाचार एकांश के समसामयिक बिसय उपर आधरित कारीकरम ‘‘बातों-बातों-में‘‘ ए दारी छत्तीसगढ़ के महिला अउ बाल विकास मंत्री श्रीमती लक्ष्मी राजवाड़े ले लेय गे भेंटवार्ता के प्रसारण करे जाही। एखर प्रसारण काली ग्यारह जुलाई के आकाशवाणी केंद्र रइपुर डहार ले एफ.एम. अउ प्रायमरी चैनल म बिहनिया नौ बजे करे जाही। एला छत्तीसगढ़ के जम्मो आकाशवाणी केंद्र एके संघरा रिले करहीं।
भाजपा प्रकोष्ठ पदाधिकारी-कार्यशाला
रइपुर म आज भारतीय जनता पार्टी के सत्रह नवा प्रकोष्ठ पदाधिकारी मन के पहिली कार्यशाला आयोजित करे गिस। जिहां, प्रकोष्ठ के भूमिका अउ दायित्व उपर गोठबात होइस। ए कार्यशाला म मुख्यमंत्री विष्णुदेव साय के संगे भाजपा प्रदेस अध्यक्ष किरण सिंह देव, संगठन के तीनों प्रदेस महामंत्री, सबो सत्रह प्रकोष्ठ के प्रदेस संयोजक अउ सह-संयोजक के अलावा अब्बड़ झन कार्यकर्ता मन मौजूद रिहीन।
हाईकोर्ट-प्राकृतिक आपदा
छत्तीसगढ़ उच्च न्यायालय ह प्राकृतिक आपदा ले होवइया मउत उपर मुआवजा देय बर राज्य सरकार के नीति उपर अहम फइसला सुनाय हे। न्यायाधीश संजय के. अग्रवाल के एकल पीठ ह स्पष्ट किहीन हें कि-आंधी तूफान, भारी बरसा अउ हवा गरेर के बेरा पेड़ ले गिर के होय मउत ह घलो प्राकृतिक आपदा के श्रेणी म आथे। कोर्ट ह राजस्व विभाग डहार ले राजनांदगांव जिला के मोहला इलाका म एक मनखे के मउत मामला म मुआवजा देय ले इनकार करे के आदेस ल निरस्त करत ओखर बेटा ल तीस दिन के भीतर चार लाख रूपिया मुआवजा के निरदेस देइस हे।
मुख्यमंत्री-लोकार्पण
मुख्यमंत्री विष्णुदेव साय ह काली रइपुर जिला के समोदा म एक सौ अट्ठाईस करोड़ रूपिया ले जादा के आने-आने बिकास कारज के लोकार्पन अउ भूमिपूजन करिन। ओमन रीवा गांव म करीबन चार करोड़ रूपिया के लागत ले स्टाप डैम बनाय के संग कतकोन बिकास कारज के घोसना करिन। ए बेरा मुख्यमंत्री ह बतइन कि राज्य सरकार ह सुशासन बिकास अउ जलकल्याण ल प्राथमिकता देवत प्रदेस के सबो इलाका म बुनियादी सुविधा के बिस्तार करत हे।
जयदीप साहू-स्वर्ण पदक
दक्षिण अफ्रीका म चार ले बारह जुलाई तक आयोजित एशिया, पेसिफिक, अंतरराष्ट्रीय पावरलिफ्टिंग चैंपियनशिप म दुरूग जिला के जयदीप साहू ह व्यक्तिगत रूप ले दूसरइया स्वर्ण पदक हासिल करिस हे। जयदीप ह दूसरइया पारी के क्लासिक प्रतियोगिता के तहत छियासठ किलो वर्ग म जोरदार प्रदर्सन करत स्वर्ण पदक अपन नांव करिस।
एखर ले पहिली जयदीप ह इही प्रतियोगिता के पहिली चरन म बीते छै जुलाई के इक्विप्ड कैटेगरी म पहिली स्वर्ण पदक जीते रिहीस।
दीदी के गोठ
मुख्यमंत्री विष्णुदेव साय ह किहीन हे कि रेडियो कारीकरम ‘‘दीदी के गोठ‘‘ प्रदेस के माईलोगन मन बर प्रेरना के माध्यम बन गेहे। काली रइपुर म आयोजित ‘‘दीदी के गोठ‘‘ वार्षिकउत्सव म मन ओमन ‘‘दीदी के गोठ‘‘ अउ कॉफी टेबल बुक, ‘बिहान वाणी‘ त्रैमासिक पत्रिका अउ ‘मोर गांव-मोर पानी‘‘ पुस्तक के विमोचन करिन। ए बेरा मुख्यमंत्री ह सफलता के कहानी साझा करइया माईलोगन मन ल सम्मानित करत किहीन कि-कारीकरम के एक बछर म परसारित बारह एपिसोड ले माईलोगन मन ल आत्मनिर्भर, नवाचार अउ स्व-रोजगार के प्रेरक जानकारी मिलिस।
अउ अब थोरकुन समाचार सार म –
– छत्तीसगढ़ लोक सेवा आयोग डहार ले सूबेदार, उप निरीक्षक संवर्ग अउ प्लाटून कमांडर के भर्ती बर प्रारंभिक परीक्षा बारह जुलाई के बाईस केंद्र म आयोजित करे जाही। परीक्षा बिहनिया दस बजे ले मंझनिया बारह बजे तक चलही।
– रइपुर के इंदिरा गांधी कृषि विश्वविद्यालय म चालू सैक्षणिक सत्र म कृषि अभियांत्रिकी अउ खाद्य प्रौद्योगिकी पाठ्यक्रम के पहिली बछर म प्रवेस बर ऑनलाइन काउंसिलिंग के प्रक्रिया आज ले सुरू होगिस। इच्छुक अभ्यर्थी मन बीस जुलाई तक पंजीयन कर सकत हे।
– कोंडागांव पुलिस ह तैंतालीस शिक्षक मन ले कुल बारह करोड़ रूपिया के ठगी के मामला म 5 आरोपी मन ल गिरफ्तार करे हे। आरोपी मन ह फरसगांव, केशकाल, बड़ेडोंगर, धनोरा, विश्रामपुरी समेत कतकोन इलाका के शिक्षक मन ले पर्सनल लोन देवाय के नांव म ठगी करे रिहीन।
– सरगुजा जिला के सीतापुर थाना इलाका म सोनतराई गांव के देवगढ़ मोड़ े तिर एक ठन गाड़ी म आगी लग गिस, हादसा म गाड़ी चलइया संग तीन झन गंभीर रूप ले झुलस गिन।
– दुरूग जिला ले भिलाई स्टील प्लांट ले लौह स्क्रैप चोरी के मामला म प्लांट के एस.एम.एस. थ्री के जीएम अउ इंजीनियरिंग एसोसिएट ल गिरफ्तार करे गिस। ए मामला म अब तक पंद्रह आरोपी पकड़े गिन हंे।
अउ
– बारनवापारा अभयारण्य म तीन ठन चीतल के मउत होगिस। वन विभाग के अनुसार एमा ले दू ठन नर चीतल के मउत आपस म लड़े ले होइस, उहें, एक ठन चीतल के सिकार होय के आसंका बताय गिस।