आईएएस-फेरबदल
राज्य सरकार ह भारतीय प्रशासनिक सेवा के पांच अधिकारी मनके प्रभार म फेरबदल करे हे। सामान्य प्रशासन विभाग डहार ले जारी आदेस के अनुसार गौरेला-पेण्ड्रा-मरवाही जिला के कलेक्टर संतोष कुमार देवांगन ल स्कूल शिक्षा विभाग के बिसेस सचिव बनाय गेहे। उंखर जघा म तकनीकी शिक्षा विभाग के संचालक विजय दयाराम ल गौरेला-पेण्ड्रा-मरवाही जिला के कलेक्टर नियुक्त करे गेहे।
उहें, हेमंत रमेश नंदनवार ल तकनीकी शिक्षा, रोजगार अउ प्रसिक्षण के संचालक बनाय गेहे। एखरे संग ओमन ल छत्तीसगढ़ राज्य कौशल विकास प्राधिकरण के मुख्य कार्यपालन अधिकारी के अतिरिक्त प्रभार घलो सौंपे गेहे। एखर अलावा सुमीत अग्रवाल ल छत्तीसगढ़ राज्य सहरी विकास अभीकरण के मुख्य कार्यपालन अधिकारी अउ अनुपमा आनंद ल महासमुंद जिला पंचायत के मुख्य कार्यपालन अधिकारी के जिम्मेदारी दे गेहे।
नया शिक्षा सत्र-दिशा/निर्देश
प्रदेस म अवइया बछर ले नवा शिक्षा सत्र एक अप्रैल ले सुरू होय हे। ए संबंध म स्कूल शिक्षा विभाग के सचिव डॉक्टर कमलप्रीत सिंह ह लोकशिक्षण संचालनालय ल पत्र भेज के दिसा निरदेस जारी करे हे। एखर तहत वर्तमान म राज्य संचालित होवइया सोलह जून ले तीस अप्रैल के शिक्षा सत्र ल अब खत्म कर दे जाही। एखर जघा म देस के आने प्रमुख शिक्षा बोर्ड अउ मंडल के समान हे अब छत्तीसगढ़ म घलो नवा सत्र एक अप्रैल ले सुरू होके इकतीस मार्च तक चलही। फेर छात्र मन ल मिलइया गर्मी के छुट्टी म कोनो कटौती नइ करे गेहे। प्रदेस म एक मई ले पंद्रह जून तक गर्मी के छुट्टी पहिली जइसे ही रइही।
एक अप्रैल के नवा शिक्षा सत्र सुरू होय के संगही स्कूल म शाला प्रवेस उत्सव मनाय जाही। ए दउरान छात्र मन ल निसुल्क पुस्तक, सरस्वती सायकल योजना के तहत सायकल अउ स्कूल ड्रेस बांटे जाही। उहें, आने सबो छात्र मनके हित के योजना अउ गतिविधि घलो अनिवार्य रूप ले सुरू करे जाही।
इही बीच, राज्य सरकार ह अवइया सैक्षणिक सत्र ले प्रदेस के सबो स्कूल म कक्षा पहिली म प्रवेस बर न्यूनतम आयु सीमा छै बछर निर्धारित कर देहे। ए नवा व्यवस्था सबो शासकीय, अशासकीय अउ अनुदान प्राप्त विद्यालय उपर लागू होही। संगेसंग शिक्षा के अधिकारी अधिनियम के तहत निजी विद्यालय के पच्चीस प्रतिसत आरक्षित सीट म होवइया प्रवेस बर घलो ए नियम प्रभावी रइही। ए निर्णय राष्ट्रीय शिक्षा नीति, शिक्षा के अधिकार अधिनियम अउ केंद्रीय शिक्षा मंत्रालय के दिसा निरदेस के अनुरूप ले गेहे।
स्कूल शिक्षा सचिव डहार ले जारी निरदेस के अनुसार अवइया सैक्षणिक सत्र के एक अप्रैल के लइका मन के उमर के आधार म प्रवेस दे जाही। अभिभावक अउ लइका मनके सुविधा बर राज्य शासन ह एक अप्रैल के निर्धारित आयु पूरा नइ कर पाय लइका मन बर एक जुलाई तक उंखर जरूरी आयु पूरा होय तक तीन माह के छूट देहे।
मंत्री परिषद-निर्णय
ईस ऑफ डूइंग बिजनेस विधेयक ल लागू करइया छत्तीसगढ़ देस के पहिली राज्य होही। मुख्यमंत्री विष्णुदेव साय के अध्यक्षता म काली मंत्रालय म होय राज्य मंत्रिमंडल के बइठका म ए विधेयक के प्रारूप के अनुमोदन करे गीस। बइठका के बाद पत्रकार मन ले चर्चा करत हुए उप मुख्यमंत्री अरूण साव ह बतइन कि ए विधेयक के उद्देस्य राज्य म व्यापार अउ उद्योग स्थापित करे के प्रक्रिया ल जादा सरल, पारदर्सी, डिजीटल अउ समयबध्द बनाना हे।
मंत्रि परिषद ह बस्तर फाइटर्स म फाइटर आरक्षक भर्ती अउ सेवा नियम म संसोधन ल स्वीकृति दे देहे। उहें, छत्तीसगढ़ निजी विश्वविद्यालय स्थापना अउ संचालन संसोधन विधेयक के प्रारूप के अनुमोदन करे हे। एखर ले राज्य म गुणवत्तापूर्ण उच्च शिक्षा संस्थान के स्थापना ल प्रोत्साहन मिलही।
अल्पावधि ऋण योजना
मुख्यमंत्री विष्णुदेव साय काली राज्य के शासकीय सेवक मन बर वेतन के विरूध्द अल्पावधि ऋण योजना के सुभारंभ करीन। एखर उद्देस्य शासकीय सेवक मन ल आकस्मिक परिस्थिति म सम्मान जनक, तुरते अउ सहज वित्तीय सहायता उपलब्ध कराना हे। मुख्यमंत्री ह किहीन कि अब कर्मचारी मन ल अचानक पड़े जरूरी बर निजी साहूकार या ऊंचा ब्याजदर म ऋण ले बर विवस्ता के सामना नइ करना पड़ही। सरकार ह अइसन व्यवस्था विकसित करे हे, जेखर जरिया ले ओमन बिना जरूरी कागजी प्रक्रिया के अपन पात्रता के अनुसार कम समय म ऋण पा सकही।
ईवी-चार्जिंग इंफ्रास्ट्रक्चर
छत्तीसगढ़ सरकार ह राज्य म इलेक्ट्रानिक गाड़ी ल बढ़ावा देबर चार्जिंग इंफ्रास्ट्रक्चर ल तेजी ले बढ़ाय के फइसला करे हे। सबो जिला के आरटीओ अउ डीटीओ ल अपन क्षेत्र म चार्जिंग स्टेसन ल जघा चिन्हित करे अउ एनओसी के प्रक्रिया तेज करे के निरदेस दे गेहे। वर्तमान म अलग-अलग कंपनी के अलग-अलग ऐप हे, जेखर ले उपभोक्ता मन ल परेसानी होथे। सरकार अब राज्य स्तर म एकीकृत प्लेटफॉर्म ऐप बनाही। उहें, भारत सरकार घलो यूनिवर्सल ईवी चार्जिंग ऐप लावत हे।
रामगोपाल-ईओडब्ल्यू रिमांड
कांग्रेस के पूर्व कोषाध्यक्ष रामगोपाल अग्रवाल ल करीब पांच सौ करोड़ रूपिया के कोल लेवी घोटाला मामला म काली गिरफ्तार करे गे रिहीस। आज ओमन ल रईपुर के बिसेस अदालत म पेस करे गीस, जिहां कोर्ट ह रामगोपाल अग्रवाल ल सत्रह जुलाई तक आर्थिक अपराध अन्वेषण ब्यूरो- ईओडब्ल्ूय के रिमांड म भेज दे गेहे।
जानबा के मुताबिक रामागोपाल अग्रवाल के खिलाफ ए मामला म बिसेस अदालत ह स्थायी वारंटग जारी करे रिहीस। उंखर तलास म कतकोन जघा छापा घलो मारे गे रिहीस।
मुख्यमंत्री-थोक बाजार लोकार्पण
मुख्यमंत्री विष्णुदेव साय ह काली रईपुर के डूमरतराई म छत्तीसगढ़ गृह निर्माण मंडल डहार ले विकसित नवीन थोक बाजार फेस-टू के लोकार्पण करीन। ए दउरान श्री साय ह घोसना करीन कि परिसर के नामकरण सरदार वल्लभ भाई पटेल के नाम म करे जाही अउ इंहा स्टेचू ऑफ यूनिटी के तर्ज म उंखर पंद्रह फीट ऊंचा प्रतिमा स्थापित करे जाही। ए बेरा म मुख्यमंत्री ह किहीन कि राज्य सरकार ईस ऑफ डूइंग बिजनेस के संग ईस ऑफ लिविंग ल घलो समान महत्व देवत हे।
राष्ट्रीय कार्यशाला
केंद्रीय जनजातीय कार्य मंत्रालय डहार ले भुवनेश्वर म आयोजित दू दिवसीय राष्ट्रीय कार्यशाला म छत्तीसगढ़ आदिमजाति अनुसंधान अउ प्रसिक्षण संस्थान ल अच्छा प्रदर्सन बर सम्मानित करे गीस। ए कार्यसाला देस के जनजातीय अनुसंधान के सुदृढ़ीकरण बर आयोजित करे गे रिहीस। एमा उनतीस राज्य के जनजातीय अनुसंधान संस्थान के प्रतिनिधि मन ह हिस्सा लीन। कार्यशाला के दउरान जनजातीय अनुसंधान संस्था के कार्यप्रणाली, जनजातीय विकास बर अनुसंधान, आधुनिकीकरण, जीआईएस, आर्टिफिसियल इंटेलीजेंस अउ नवाचार पारिस्थिति तंत्र जइसन बिसय म विचार विमर्स करे गीस।
कृषि विवि-ऑनलाइन काउंसलिंग
रईपुर स्थित इंदिरा गांधी कृषि विश्व विद्यालय म चालू सैक्षणिक सत्र म कृषि अभियांत्रिकी अउ खाद्य प्रौद्योगिकी पाठ्यक्रम के पहिली बछर म प्रवेस बर ऑनलाइन काउंसलिंग के प्रक्रिया काली दस जुलाई ले सुरू होवत हे। काउंसलिंग म भाग लेवइया इच्छुक अभ्यर्थी जरूरी दस्तावेज के संग बीस जुलाई तक पंजीयन कर सकत हे। अभ्यर्थी के प्रवीण सूची तेईस जुलाई के विश्वविद्यालय के वेबसाइट म प्रकासित करे जाही।
अउ अब थोरकुन समाचार सार म –
– राजनांदगांव के वरिष्ठ पत्रकार राजेन्द्र व्यास के काली आठ जुलाई के निधन होगिस। श्री व्यास राजनांदगांव प्रेस क्लब के संरक्षक रिहीन। ओमन ह लंबा समय तक राजनांदगांव जिला के आकाशवाणी संवाददाता के रूप म घलो अपन सेवा दीन।
– केंद्रीय गृहमंत्रालय डहार ले जारी वार्षिक पुलिस थाना रैंकिंग म बस्तर स्थित बोधघाट थाना ल राज्य के सर्वश्रेष्ठ पुलिस थाना घोसित करे गेहे। गृह मंत्रालय डहार ले हर बछर देसभर के पुलिस थाना के मुल्यांकन आने-आने मानक म करे जाथे।
– राष्ट्रीय परीक्षा एजेंसी-एनटीए ह सी.एस.आई.आर. यूजीसी नेट परीक्षा बर अग्रिम सहर सूचना पर्ची जारी कर देहे।
– बलौदाबाजार-भाटापारा जिला म खम्हरिया चूना भट्ठी के तीर दू मोटरसाइकिल के टकराय ले दू लोगन के मउत होगिस। फेर, एक माईलोगिन गंभीर रूप ले घायल हो गेहे।
अउ
– दुरूग जिला के मोहन नगर थाना पुलिस ह रईपुर नाका क्षेत्र म जुआ खेलत बारह झिन आरोपी मन ल गिरफ्तार करे हे। उंखर तीर ले नौ लाख रूपिया ले जादा नगद पइसा अउ दस मोबाइल जब्त करे गेहे।