केंद्रीय कृषि मंत्री-समीक्षा
केंद्रीय कृषि अउ किसान कल्याण मंत्री शिवराज सिंह चौहान ह आज अल नीनो के संभावित प्रभाव के समीक्षा बर उच्च स्तरीय बइठका लीन। पत्रकार मनले गोठबात म ओमन किहीन कि केंद्र सरकार ह एसो अप्रैल म ही अल नीनो के चुनौती ले निपटे के तियारी सुरू कर देहे। ओमन बतइन कि अल नीनो निगरानी प्रकोष्ठ अउ नोडल अधिकारी मनके माध्यम ले बोवाई, फसल अउ बाजार के स्थिति उपर सरलग देखरेख करे जात हे। ओमन किहीन कि मानसून म देरी के सेति तुअर, सोयाबीन, कपास अउ आने फसल मनके बोवाई प्रभावित होय हे।
निगम/मंडल-सदस्य नियुक्ति
प्रदेस के कतकोन निगम, मंडल, बोर्ड, समिति अउ आने संस्था मन म अध्यक्ष-उपाध्यक्ष अउ सदस्य मनके नियुक्ति के आदेस जारी कर दे गेहे। छत्तीसगढ़ राज्य केस सिल्पी कल्याणबोर्ड के अध्यक्ष पद म गौरीशंकर श्रीवास के नियुक्ति करे गेहे। त उहें, राज्य महिला आयोग के अध्यक्ष डॉक्टर ममता साहू ल बनाय गेहे। उहें, छत्तीसगढ़ राज्य अनुसूचित जाति आयोग के अध्यक्ष रामलाल चौहान अउ उपाध्यक्ष पद म वेदराम मनहरे के नियुक्ति करे गेहे। संगेसंग छत्तीसगढ़ मछुवा कल्याण बोर्ड के अध्यक्ष आनंद निषाद ल बनाय गेहे। उहें, छत्तीसगढ़ संस्कृत विद्यामंडल के अध्यक्ष के पद म राजेश कुमार राजपूत के नियुक्ति करे गेहे। त शाकम्भरी बोर्ड के अध्यक्ष राजेन्द्र नायक ल बनाय गेहे। अइसने छत्तीसगढ़ राज्य शिक्षा आयोग के अध्यक्ष सुधीर गौतम ल बनाय गेहे।
जारी आदेस के मुताबिक रईपुर विकास प्राधिकरण के उपाध्यक्ष पद म डॉक्टर जे.पी.शर्मा, छत्तीसगढ़ श्रम कल्याण मंडल के उपाध्यक्ष किशोर महानंद त गौसेवा आयोग के उपाध्यक्ष पद म आनंद कुमार तिवारी अउ छत्तीसगढ़ राज्य अनुसूचित जनजाति आयोग के उपाध्यक्ष मंगलदास ठाकुर ल बनाय गेहे। मुख्यमंत्री विष्णुदेव साय ह नवा बने अध्यक्ष, उपाध्यक्ष अउ सदस्य मन ल बधई अउ सुभकामना दे हवय।
प्रभार-फेरबदल
राज्य शासन ह भारतीय प्रशासनिक सेवा के आठ झिन अधिकारी मनके प्रभार म फेरबदल करे हे। एखर अलावा राज्य प्रशासनिक सेवा के उन्नीस अधिकारी मनके तबादला आदेस जारी करे गेहे। उहें, राज्य के ग्यारा जिला पंचायत म मुख्य कार्यपालन अधिकारी मन ल घलो बदले गेहे।
प्रतीक जैन ल जिला पंचायत कोरबा, जयंत नाहटा ल जिला पंचायत धमतरी, एम भार्गव ल जिला पंचायत दंतेवाड़ा त उहें, तनमय खन्ना ल जिला पंचायत बस्तर अउ दुर्गा प्रसाद अधिकारी ल जिला पंचायत राजनांदगांव के मुख्य कार्यपालन अधिकारी बनाय गेहे। एखर अलावा गोकुल राम रावटे ल जिला पंचायत मंुगेली, आशुतोष चतुर्वेदी ल जिला पंचायत बलरामपुर-रामानुजगंज, अभिषेक कुमार गुप्ता ल जिला पंचायत मोहला-मानपुर, ऋषिकेश तिवारी ल जिला पंचायत सारंगढ़-बिलाईगढ़, विनय कुमार पोयम ल जिला पंचायत जांजगीर-चांपा अउ योगेन्द्र श्रीवास ल जिला पंचायत कोरिया के मुख्य कार्यपालन अधिकारी बनाय गेहे। संगेसंग सुरूचि सिंह ल नगर पालिका निगम भिलाई के आयुक्त नियुक्त करे गेहे। त उहें, विजेन्द्र सिंह ल नगर पालिका चिरमिरी, जी.आर. मरकाम ल नगर निगम राजनांदगांव अउ अरूण वर्मा ल नगर पालिका धमतरी के आयुक्त बनाय गेहे।
मुख्यमंत्री-समीक्षा
मुख्यमंत्री विष्णुदेव साय ह काली राजस्व अउ आपदा प्रबंधन विभाग के कामकाज के समीक्षा करीन। ओमन राजस्व मामला म जीरो टालरेंस के नीति अपनाय अउ लोगन मन ल बढ़िया सेवा देके निरदेस दीन। मुख्यमंत्री ह किसान मनके बी वन ए-खसरा, ऋण पुस्तिका अउ भुईया ले जुड़े जानबा व्हाट्सअप के माध्यम ले दे जाय के व्यवस्था करे बर किहीन। ओमन लंबित राजस्व प्रकरण मनके जल्दी निपटारा, राजस्व अभिलेख के डिजीटलीकरण अउ ऑनलाइन सेवा मनके विस्तार उपर जोर दीन।
तीजन बाई-संगीतमय श्रध्दांजलि
पद्म विभूषण ले सम्मानित जानेमाने पंडवानी गायिका स्वर्गीय तीजन बाई ल आज रईपुर के महंत घासीदास संग्रहालय परिसर स्थित मुक्ताकाशी मंच म संगीतमय श्रध्दांजलि दे गीस। ए मउका म संस्कृति मंत्री राजेश अग्रवाल ह डॉक्टर तीजन बाई के नाव उपर पंडवानी कला के क्षेत्र म हर साल राज्य सम्मान दे जाय के घोसना करीन। ओमन किहीन कि उंखर गृहग्राम गनियारी ल कलाग्राम के रूप म बनाय जाही। संगेसंग तीजन बाई के तंबूरा ल रईपुर स्थित महंत घासीदास संग्रहालय परिसर म देखाय बर राखे जाही।
महतारी वंदन योजना/ईकेवाईसी
महतारी वंदन योजना के पात्र हितग्राही माईलोगिन मन के ईकेवाईसी के पंजीयन के तारीख ल तीस अगस्त तक बढ़ा दे गेहे। बस्तर जिला के महिला अउ बाल विकास अधिकारी मनोज कुमार सिन्हा ह बतइन कि जिला म करीबन नब्बे प्रतिसत हितग्राही माईलोगिन मन ह ईकेवाईसी करवा लेहे। ओमन छूटे हितग्राही महिला मन ले तय करे गे बेरा तक ईकेवाईसी कराय के अपील करे हवय।
विजय शर्मा-केंद्रीय मंत्री पत्र
छत्तीसगढ़ के उपमुख्यमंत्री विजय शर्मा ह प्रधानमंत्री आवास योजना ग्रामीण के तहत प्रदेस के जम्मो पात्र परिवार मन ल घर देवाय बर केंद्रीय ग्रामीण विकास मंत्री शिवराज सिंह चौहान ले जरूरी पहल करे के विनती करे हे। ओमन बतइन कि ‘‘आवास प्लस टू प्वॉइंट ओ‘‘ के सूची अउ ग्रामसभा के दउरान जउन पात्र हितग्राही मनके नाव सामिल नइ होय पाय हे। ओखरो मनके समस्या के समाधान बर जरूरी निर्णय ले के विनती करीन।
ननि चुनाव-समीक्षा
एसो दिसंबर म होवइया नगरीय निकाय के आम अउ उपचुनई के तियारी के समीक्षा बर आज छत्तीसगढ़ राज्य निर्वाचन आयोग डहार ले बइठका ले गीस। राज्य निर्वाचन आयुक्त अजय सिंह ह सचिव स्तरीय बइठका म अधिकारी मन ल बेरा म पूरा काम करे के निरदेस दीन। जानबा के मुताबिक प्रदेस के पंद्रह नगरीय निकाय, जेमा चार नगर पालिक निगम, पांच नगर पालिका परिषद के संगेसंग छै ठिन नगर पंचायत सामिल हे। एखर कार्यकाल एसो दिसंबर म खतम होवइया हे अउ संगेसंग दू ठिन नवा बने नगर पंचायत म घलो आम निर्वाचन के तियारी करे जात हे।
एनएसएस-जिला संगठक नियुक्ति
छत्तीसगढ़ म राष्ट्रीय सेवा योजना-एनएसएस के गतिविधि ल अउ जादा प्रभावी बनाय बर उच्च शिक्षा विभाग ह उनतीस झिन अंशकालीन जिला संगठक मनके नियुक्ति करे हे। ए संगठक मन ल दू साल बर उपराहा जिम्मेवारी दे गेहे। उहें, कलेक्टर मन के समन्वय ले जिला स्तरीय सलाहकार समिति बनाके एनएसएस के कामकाज के सरलग निगरानी करे के निरदेस दे गेहे।
फैक्ट्री-हादसा
रईपुर के तीर उरला म एक ठिन फैक्ट्री म काली संझा होय हादसा म तीन झिन मजूर क मउत हो गेहे। जानबा के मुताबिक ए घटना आक्सीजन सिलेंडर म बिस्फोट के सेती होइस। ए बिस्फोट के बाद दू झिन मजूर के मउकच म मउत होगे अउ एक झन मजूर के अस्पताल ले जात खानी मउत होगे। दू झिन मजूर मन मध्यप्रदेस के रहइया हरय। त उहें, एक झिन मजूर छत्तीसगढ़ के जांजगीर-चांपा जिला के रहइया हरय। ए फैक्ट्री म पिग आयरन के रिफायनिंग के काम होथे। पुलिस ह ए मामला के जांच सुरू कर देहे।
इही बीच, औद्योगिक स्वास्थ्य अउ सुरक्षा विभाग के निरदेस उपर कारखाना प्रबंधन ह मृतक श्रमिक मनके परिवार वाले मन ल तीस-तीस लाख रूपिया के आर्थिक सहायता दे उपर मंजूरी दे देहे।
इंडोनेशिया यात्रा-परसेरो टीबीके
प्रधानमंत्री नरेंद्र मोदी के इंडोनेशिया यात्रा के दउरान स्टील अथॉरिटी ऑफ इंडिया लिमिटेड-सेल ह इंडोनेशिया म पीटी क्राकाटाउ स्टील-परसेरो टीबीके के संग समझौता ज्ञापन उपर दस्तखत करे के घोसना करे हे। ए समझौता के तहत स्टेनलेस स्टील स्लैब के उत्पादन बर एक ठिन संयुक्त उद्यम बनाय के संभावना खोजे जाही। सेल के अध्यक्ष अउ प्रबंध निदेशक डॉक्टर अशोक कुमार पंडा ह किहीन कि ए साझेदारी पारंपरिक सीमा ले परे अउ अवइया बेरा बर क्षमता निर्माण करे के प्रति सेल के प्रतिबध्दता ल दर्साथे।
पावरलिफ्टिंग चैंपियनशिप
अफ्रीका म चार ले बारह जुलाई तक चलत एशियन पैसिफिक अउ अफ्रीका अंतर्राष्ट्रीय पावरलिफ्टिंग चैंपियनशिप म छत्तीसगढ़ के दुरूग जिला के जयदीप साहू ह स्वर्ण पदक जीते हे। जयदीप ह छैंसठ किलोग्राम सिनियर वर्ग म बढ़िया प्रदर्सन करत चार सौ बावन किलो ले जादा के वजन उठाइन। जानबा के मुताबिक ए प्रतियोगिता म छत्तीसगढ़ के दू झिन आने खिलाड़ी प्रियंक मिश्रा अउ अमान शुक्ला ह घलो भाग लेवत हे।