विधायक दल-बैठक
भारतीय जनता पार्टी के विधायक दल के बइठका मुख्यमंत्री विष्णुदेव साय के पगरइती म अब ले थोरकिन देर बाद संझा सात बजे नवा रईपुर स्थित मुख्यमंत्री निवास म सुरू होही। ए बइठका म भाजपा अवइया मानसून सत्र ल लेके अपन रणनीति तियार करही। ए बइठका म विपक्ष डहार ले उठइया मुद्दा उपर गोठबात होय के संभावना हे।
विधानसभा अध्यक्ष-मुलाकात
छत्तीसगढ़ विधानसभा के मानसून सत्र ले पहिली मुख्यमंत्री विष्णुदेव साय अउ विधानसभा म विपक्ष के नेता डॉक्टर चरणदास महंत ह आज रईपुर स्थित स्पीकर हाउस म विधानसभा अध्यक्ष डॉक्टर रमन सिंह ले भेंट करीन। ए दउरान अवइया मानसून सत्र के सुचारू अउ प्रभावी संचालन समेत आने-आने संसदीय बिसय मन उपर गोठबात होइस। संगेसंग बछर दू हजार छब्बीस के उत्कृष्ट विधायक सम्मान बर संभावित नाम उपर घलो बिचार-विमर्स करे गीस।खबर के मुताबिक छत्तीसगढ़ विधानसभा के मानसून सत्र तेरह जुलाई ले सुरू होही। ए सत्र सत्रह जुलाई तक चलही।
शिवराज सिंह चौहान-प्रगति परियोजना
केंद्रीय कृषि मंत्री शिवराज सिंह चौहान ह आज प्रगति परियोजना के सुभारंभ करीन। एखर उद्देस्य बीस हजार ले जादा कृषि उद्यमी अउ बीस लाख किसान मन ल सशक्त बनाना हे। नई दिल्ली म मीडिया ले गोठबात करत श्री चौहान ह विकसित भारत के लक्ष्य ल पाय बर कृषि विकास, समृध्द गांव अउ समृध्द किसान मन के विकास के जरूरत उपर बल दीन। ओमन किहीन कि सरकार ए लक्ष्य ल पाय बर हरसंभव कोसिस करत हे। श्री चौहान ह किहीन कि सरकार ह प्रगति कारीकरम के अंतर्गत छब्बीस हजार लघु कृषि उद्यमी मन ल प्रसिक्षित करे के फइसला लेहे। ओमन किहीन हे कि ए उद्यमी एक गांव के कृषि काम म बदलाव लाय बर सौ ले दू सौ किसान मन के संग मदद करथे।
रथ यात्रा-विशेष ट्रेन
रेलवे मंत्री अश्विनी वैष्णव ह किहीन हे कि ए बछर भगवान जगन्नाथ के रथ यात्रा बर तीन सौ ले जादा बिसेस ट्रेन चलाय जाही। ए ट्रेन ल रोज चलाय जावत ट्रेन मनके अलावा अलग ले चलाय जाही। नई दिल्ली म श्री वैष्णव ह किहीन कि पूरी रेलवे स्टेसन म तीस हजार यात्री मन बर अस्थायी व्यवस्था करे जाही।
मुख्य सचिव-समीक्षा
मुख्य सचिव विकासशील ह आज मंत्रालय म राज्य शासन के जम्मों विभाग के सचिव मनके बइठका लेके योजना अउ काम के समीक्षा करीन। बठइका म मुख्य सचिव ह जम्मो विभाग मन म बैकलॉग के खाली पद मनके भर्ती बर कार्रवाई जल्दीच सुरू करे के निरदेस दीन। संगेसंग विभागीय सचिव मन ल उंखर विभाग के योजना के काम ल सरलग देखरेख करे बर घलो किहीन।
बइठका म मुख्य सचिव ह ई-ऑफिस, लोक सेवा गारंटी, नियद नेल्लानार डेसबोर्ड, सुघ्घर छत्तीसगढ़, पीएम प्रगति पोर्टल, ई-प्रगति सीजी स्टेट पोर्टल, सेवा सेतु, ग्रामीण विकास विभाग के योजना, पीएम सूर्य घर बिजली समेत आने-आने योजना मनके जानकारी लीन।
रोजगार/आवास दिवस
प्रदेस के आने-आने ग्राम पंचायत मन म आज रोजगार अउ आवास दिवस के आयोजन करे गीस। एखर माध्यम ले गांव वाले मन ल विकसित भारत जी-राम-जी योजना अउ प्रधानमंत्री आवास योजना-ग्रामीण के कामकाज के जानकारी दे गीस। संगेसंग पात्र हितग्राही मन ल आने-आने जनकल्याणकारी योजना मनके संबंध म घलो जागरूक करे गेहे। कारीकरम के दउरान श्रमिक मन के पंजीयन, ई-केवाईसी अउ पीएम आवास योजना-ग्रामीण के तहत बनत आवास मनके कामकाज के समीक्षा करे गीस।
सहकारी सप्ताह-समापन
सहकारिता मंत्रालय की स्थापना के पांच बछर पूरा होय म आयोजित सहकारी सप्ताह के काली समापन होगे। ए मउका म रईपुर म राखे गे कारीकरम म राज्य के सहकारिता मंत्री केदार कश्यप ह जिला सहकारी केंद्रीय बैंक परिसर म छत्तीसगढ़ महतारी के मूर्ति के अनावरण करीन। ओमन बतइन हे कि प्रदेस म करीबन तेरह सौ सहकारी समिति मनके गठन करे गेहे।
समारोह म केंद्रीय गृह अउ सहकारिता मंत्री अमित शाह के संबोधन के सीधा प्रसारण घलो करे गीस। कारीकरम म बताय गेेहे कि रईपुर जिला सहकारी केंद्रीय बैंक ह वित्त बछर दू हजार पच्चीस-छब्बीस म दू सौ सोलह करोड़ रूपिया के फायदा पाय हे।
कारीकरम के सहकार भारती के प्रदेस महामंत्री कनीराम अउ राज्य सहकारी बैंक के अध्यक्ष केदार नाथ गुप्ता ह घलो संबोधित करीन।
विद्युत कंपनी-अपील
बरसा के मौसम म बिजली ले होवइया दुर्घटना मन ले बचाव खातिर छत्तीसगढ़ स्टेट पावर डिस्ट्रीब्यूशन कंपनी ह लोगन मनले बिसेस सावधानी बरते के अपील करे हे। कंपनी ह किहीन हे कि बिजली के खंभा, टूटे तार, ट्रांसफार्मर अउ आने-आने विद्युत उपकरण मन ले सुरक्षित दूरी बनाय राखे अउ एमा कोनो कीसम के छेड़छाड़ झन करय अउ कोनो मेर बिजली के तार या उपकरण ह टूटे-फूटे दिखय, त तुरते एखर खबर टोल-फ्री नंबर-एक नौ एक दू, मोर बिजली ऐप या तीर-तखार के वितरण केंद्र मन ल देय।
किसान-सलाह
सरलग होवत बरसा ल देखत कृषि बिसेसज्ञ मन ह प्रदेस के किसान मन ल सलाह देहे कि खेत मन म पर्याप्त पानी होय म मचाई करके धान के रोपाई करय। तीर-तखार म नर्सरी नइ हे त किसान मन अंकुरित बीजा के लेही विधि ले ड्रम सीडर या छिटकवा विधि ले बोवई कर सकत हे। विसेसज्ञ मन ह किहीन हे कि मानसून के देरी ले आय के सेति किसान मन एक सौ पच्चीस दिन लेे एक सौ तीस दिन म पकइया जल्दीच अउ मध्यम बेरा के धान कीसम के चुनई करय। सीधा बोवइया किसान मन पंद्रह जुलाई तक अउ रोपा लगाने वाला किसान मन तीस जुलाई तक काम पूरा कर लय। कृषि बिसेषज्ञ मन ह धान के सीधा बोआई म खरपतवार नियंत्रण उपर बिसेस धियान दे अउ रासायनिक उर्वरक के संग हरियर खाद अउ जैव उर्वरक मन ल बउरे के आग्रह करे हे।
मुख्यमंत्री-थोक बाजार लोकार्पण
मुख्यमंत्री विष्णुदेव साय काली आठ जुलाई के रईपुर के डूमरतराई म नवीन थोक बाजार के नामकरण अउ लोकार्पण करही। समारोह के पगरईती आवास मंत्री ओ.पी.चौधरी करही।
खबर के मुताबिक हे राष्ट्रीय राजमार्ग-तीस म करीबन छत्तीस एकड़ क्षेत्र म विकसित ए आधुनिक थोक बाजार व्यापारी मन के जरूरत ल धियान म राखत आधुनिक सुविधा मन ले बनाय गेहे। ए बाजार रईपुर समेत पूरा प्रदेस के व्यापारिक विकास ल नवा दिसा दे के संग आर्थिक गतिविधि मन ल घलो नवा गति दिही।
तीजन बाई-संगीतमय श्रध्दांजलि
पद्म विभूषण ले सम्मानित प्रख्यात पंडवानी गायिका स्वर्गीय तीजन बाई ल काली आठ जुलाई के रईपुर के महंत घासीदास संग्रहालय परिसर स्थित मुक्ताकाशी मंच म संगीतमय श्रध्दांजलि दे जाही। संस्कृति विभाग कोति ले राखे गे ए कारीकरम मंझनिया दू बजे सुरू होही। एमा मुख्यमंत्री विष्णुदेव साय, संस्कृति मंत्री राजेश अग्रवाल समेत मंत्री, संासद, विधायक अउ जनप्रतिनिधि मन सामिल होही। प्रदेस के पद्मश्री अउ राज्य अलंकरण ले सम्मानित कलाकार मन के संग आने-आने लोक कलाकार मन गीत, पंडवानी अउ लोककला के प्रस्तुति के माध्यम ले स्वर्गीय तीजन बाई ल श्रध्दांजलि अर्पित करही।
बारनवापारा वन्यजीव अभ्यारण्य
बारनवापारा वन्यजीव अभ्यारण्य एक जुलाई ले इकतीस अक्टूबर तक पर्यटक मन बर बंद रइही। वन्यजीव मनके प्रजनन काल ल सुरक्षित राखे बर ए फइसला ले गेहे। फेर ए दउरान बलौदाबाजार नवमंडल ह बारनवापारा-सिरपुर पर्यटन सर्किट-द सेक्रेड गारलैंड के सुरूआत करे हे। ए पर्यटन सर्किट म सिरपुर, धसकुंड जलप्रपात, तुरतुरिया ईको कल्चरल सेंटर, गिरौदपुरी धाम, सिध्दखोल जलप्रपात, सोनाखान, शहीद वीर नारायण सिंह स्मारक, देवपुर नेचर कैंप, अचानकपुर के देव हिल्स ईको एथनिक स्टे, कोडार डेम समेत कतकोन प्रमुख पयर्टन स्थल सामिल हे।
अउ अब थोरकुन समाचार सार म –
– मुख्यमंत्री विष्ण्ुादेव साय के पगरइती म काली आठ जुलाई के नवा रईपुर अटल नगर स्थित मंत्रालय म राज्य मंत्रिपरिषद के बइठका होही।
– कृषक विभाग डहार ले ए बछर के ‘‘डॉक्टर खूबचंद बघेल कृषक रत्न पुरस्कार‘‘ बर प्रदेस के पात्र किसान मन ले आवेदन मंगाय गेहे। इच्छुुक किसान मन ह इकतीस जुलाई तक आवेदन कर सकत हे। पुरस्कार ले संबंधित पात्रता, नियम अउ आने जानकारी कृषि विभाग के बेवसाइट म उपलब्ध हे।
अउ
– मुख्यमंत्री आईटी फेलोशिप बर ऑनलाइन आवेदन करइया के आज आखिरी दिन हरय। ए योजना के तहत एम.टेक.-डाटा र्साइंस अउ आर्टिफिशियल इंटेलिजेंस म प्रवेस लेवइया चुने गे लइका मन ल हरेक महिना पचास हजार रूपिया फेलोशिप दे जाही।