अमित शाह सहकारिता मंत्रालय
केंद्रीय गृह अउ सहकारिता मंत्री अमित शाह आज सहकारिता मंत्रालय के पांचवां स्थापना दिवस समारोह म सामिल होइन। ए मउका म ओमन किहीन कि सहकारी आंदोलन सुधार, डिजीटलीकरण अउ पेसेवर प्रबंधन के माध्यम ले बिस्तार के एक नवा चरण म प्रवेस करत हे। श्री शाह ह किहीन कि राष्ट्रीय स्तर के नौ ठिन प्रमुख सहकारी समिति बनाय गेहे। ओमन किहीन कि सहकारिता मंत्रालय पाछू पांच साल ले सहकारिता के माध्यम ले समृध्दि के मंत्र के पालन करत हे, जेखर सेति मंत्रालय डहार ले लाखों लोगन के जीवन म बदलाव आय हे।
केंद्रीय मंत्री ह किसान मन ले जैविक कृषि उत्पाद के उत्पादन बढ़ाय अउ रासायनिक उर्वरक के संघरा कीटनाशक के उपयोग कम करे के अपील करीन। श्री शाह किहीन कि पाछू पांच बछर म सहकारी प्रणाली ल आधुनिक, पारदर्सी, प्रौद्योगिकीय सक्षम अउ प्रतिस्पर्धी बनाय के दिसा म सराहनीय काम करे गेहे।
मुख्यमंत्री-भूमिपूजन
मुख्यमंत्री विष्णुदेव साय आज रईपुर के चिकित्सा महाविद्यालय म राखे गे एक ठिन कारीकरम म एक सौ तीन करोड़ रूपिया ले जादा लागत के आने-आने विकास कार्य के भूमिपूजन करीन। एमा छात्र-छात्रा मन बर आधुनिक छात्रावास, कैंसर भवन के विस्तार अउ चिकित्सक मनके संघरा कर्मचारी मनके आवासीय परिसर समेत आने-आने निर्माण काम सामिल हे।
कारीकरम ल संबोधित करत मुख्यमंत्री ह किहीन कि स्वस्थ छत्तीसगढ़ ही विकसित छत्तीसगढ़ के निर्माण करही। ए परियोजना प्रदेस म चिकित्सा शिक्षा अउ स्वास्थ्य सेवा ल नवा ऊंचाई दिही अउ मरीज, विद्यार्थी अउ चिकित्सक मन ल एखर फायदा मिलही।
कारीकरम ल उपमुख्यंत्री अरूण साव अउ स्वास्थ्य मंत्री श्यामबिहारी जायसवाल ह घलो संबोधित करीन।
बतादन कि परियोजना के पहिली चरण म दू सौ सीटर आधुनिक छात्र-छात्रावास बनाय जाही। उहें, दूसरइया चरण म कैंसर भवन के विस्तार करे जाही।
डॉक्टर श्यामाप्रसाद मुखर्जी-जयंती
समग्र राष्ट्र आज भारतीय जन संघ के संस्थापक डॉ. श्यामाप्रसाद मुखर्जी के जयंती म श्रध्दांजलि अर्पित करत हे। प्रधानमंत्री नरेंद्र मोदी ह डॉ. मुखर्जी के जयंती म ओमन ल श्रध्दांजलि देवत ओमन ल साहस, राष्ट्रवाद अउ निस्वार्थ सेवा के शास्वत प्रतीक बताय हे। श्री मोदी ह एक ठिन आलेख म कहिन हे कि डॉ. मुखर्जी के जीवन अखंड भारत बर उंखर अटल प्रतिबध्दता के प्रमाण हे।
छत्तीसगढ़ के राज्यपाल रमेन डेका ह आज लोकभवन म डॉ. श्यामाप्रसाद मुखर्जी के जयंती म उंखर चित्र म पुष्पांजलि अर्पित करके श्रध्दांजलि दीन। राज्यपाल ह किहीन हे कि डॉ. मुखर्जी के राष्ट्र के एकता, अखंडता अउ लोकतांत्रिक मूल्य बर समर्पण जम्मों देसवासी मन बर प्रेरणास्त्रोत हे।
उहें, मुख्यमंत्री विष्णुदेव साय ह रईपुर स्थित अपन निवास कार्यालय म डॉ. मुखर्जी ल श्रध्दांजलि अर्पित करीन। ए मउका म मुख्यमंत्री ह किहीन कि डॉ. मुखर्जी के देखाय गे रद्दा म अग्रसर होवत हमन विकसित अउ सशक्त भारत के निर्माण करबो।
चिंतन शिविर-समापन
रईपुर म राखे गे दू दिन के चिंतन सिविर-थ्री प्वॉइंट ओ काली सिराही। मुख्यमंत्री विष्णुदेव साय ह किहीन कि सिविर ले मिले सुझाव विकसित छत्तीसगढ़ के निर्माण अउ सुशासन ल नवा दिसा दिही। ओमन किहीन कि पाछू चिंतन सिविर के सुझाव के आधार म मंत्रालय म ई-ऑफिस, मुख्यमंत्री हेल्पलाइन-एक सून्य सात छै अउ सेवा सेतु जइसे पहल सफलता पूर्वक लागू करे गेहे। मुख्यमंत्री ह किहीन हे कि यहू दारी मिले सुझाव ल जल्दी नीति अउ प्रशासनिक सुधार के रूप म लागू करे जाही। सिविर म सुशासन, तकनीक, कृषि, पर्यटन, नेतृत्व विकास अउ विकासपरक राजनीति जइसे बिसय उपर विशेषज्ञ अउ वरिष्ठ अधिकारी मन विचार-विमर्स करीन।
गनियारी स्कूल- तीजन बाई
गनियारी के शासकीय हाई-हायर सेकेंडरी स्कूल के नांव अब डॉक्टर तीजन बाई शासकीय हाई-हायर सेकेंडरी विद्यालय गनियारी होही। ए घोसना काली स्कूल शिक्षा मंत्री गजेन्द्र यादव ह विश्वविख्यात पंडवानी गायिका डॉक्टर तीजन बाई के गृहग्राम गनियारी म राखे गे अंतिम संस्कार अउ श्रध्दांजलि कारीकरम के दउरान करीन। ए मउका म ओमन किहीन कि डॉक्टर तीजन बाई ह अपन कला के माध्यम ले छत्तीसगढ़ के लोक संस्कृति ल राष्ट्रीय अउ अंतर्राष्ट्रीय स्तर म नवा पहिचान दिलाय हे।
बिजली बिल समाधान योजना
छत्तीसगढ़ स्टेट पावर डिस्ट्रीब्यूशन कंपनी ह मुख्यमंत्री बिजली बिल समाधान योजना के अवधि तीस सितंबर तक बढ़ाय के आदेस जारी कर देहे। योजना के तहत निम्नदाब घरेलू, बीपीएल अउ कृषि श्रेणी के पात्र उपभोक्ता मन ल बिजली बिल के मूल रासि अउ अधिभार म नियमानुसार छूट दे जात हे। पावर कंपनी ह पात्र उपभोक्ता मन ले तीस सितंबर तक योजना के फायदा लेके अपील करीन हे। बतादन कि मुख्यमंत्री विष्णुदेव साय ह मुख्यमंत्री बिजली बिल समाधान योजना के बेरा एक महिना बढ़ाय के घोसना करे रिहीन।
खरीफ सीजन-रासायनिक खाद
राज्य सरकार के अनुसार प्रदेस म खरीफ सीजन बर रासायनिक खाद के पर्याप्त भंडार मौजूद हे। तीस जून तक तेरह लाख सोलह हजार मीट्रिक टन ले जादा उर्वरक भंडारण करे गेहे, जउन पाछू साल के तुलना म जादा हे। जुलाई म छत्तीसगढ़ ल छियालिस हजार पांच सौ टन डीएपी के अतिरिक्त आपूर्ति घलो मिले हे। अब तक किसान मन ल सात लाख सत्ताईस हजार मीट्रिक टन ले जादा खाद बांटे जा चुके हे, जबकि लगभग पांच लाख नवासी हजार मीट्रिक टन उर्वरक के भंडार अभी भी मौजूद हे। सरकार ह केहे हे कि खरीफ सीजन म किसान मन ल खाद के कोनो कमी नइ होय दे जाही।
एनटीए-आवेदन फीस
राष्ट्रीय परीक्षा एजेंसी-एनटीए ह राष्ट्रीय पात्रता अउ प्रवेस परीक्षा-नीट/यूजी के आवेदन फीस लहुटाय बर बैंक खाता विवरण अपडेट करे के आखिरी तारीख बढ़ाके सात जुलाई कर देहे। सोसल मीडिया पोस्ट म एनटीए ह बतइस कि जउन उम्मीदवार मन अपन बैंक खाता विवरण के पुष्टि कर देहे, ओमन बर रिफंड प्रक्रिया सुरू हो चुके हे। अब तक केवल आठ लाख उनतीस हजार पांच सौ दस उम्मीदवार मन ही अपन बैंक विवरण म सुधार या अपडेट करीन हे।
बल्क वेस्ट जनरेटर्स-पंजीयन
नगरीय प्रशासन विभाग ह प्रदेस के जम्मो निकाय म बल्क वेस्ट जनरेटर्स के पंजीयन केंद्रीय प्रदूषण नियंत्रण बोर्ड के पोर्टल म कराय के निरदेस देहे। विभाग ह ए संबंध म जम्मो नगर-निगम के आयुक्त, नगर पालिका अउ नगर पंचायत के मुख्य नगर पालिका अधिकारी मन ल परिपत्र जारी करे हे।
बारिश
प्रदेस के अधिकांश जिला मन म पाछू दू दिन ले होवत सरलग बारिस के सेती सामान्य जनजीवन प्रभावित होय हे। उहें, कई ठिन नदिया-नरवा उफान म हे। दुरूग जिला म शिवनाथ नदी के जल स्तर बाढ़े के सेति महमरा एनीकट के तीर पांच फीट उपर पानी बोहाथे, जेखर सेति नदिया तीर के जघा मन म सतर्कता बढ़ा दे गेहे। सुरक्षा ल देखत प्रशासन ह महमरा गांव जाने वाला रद्दा अउ पुलगांव स्थित छोटे पुलिया ल अवई-जवई बर बंद कर देहे। उहें, थनौद ले लेके अरसनारा तक नदिया तीर बसे गांव के लोगन मन ल नदिया ले दूर रहे बर चेताय गेहे। कोनो भी अपात स्थिति ले निपटे बर एसडीआरएफ के टीम तैनात हे।
उहें, रायगढ़ जिला म पाछू छत्तीस घंटा ले रूक-रूक के होवत बारिस के सेति कई जघा मन म सड़क मन म पानी भरे के संगेसंग निचला बस्ती मन म स्थित घर म पानी भर गेहे। पानी भरे के सेती प्रशासन ह केलोबांध के चार गेट खोल देहे, जेखर ले नदी के जलस्तर बाढ़ गेहे।
रोजगार मेला
जगदलपुर के आड़ावाल स्थित शासकीय लाइवलीहुड कॉलेज म काली सात जुलाई के संभाग स्तरीय रोजगार मेला के आयोजन करे जाही। ए मेला के माध्यम ले निजी क्षेत्र के आने-आने कंपनी के लगभग पंद्रह सौ ले जादा पद उपर भर्ती करे जाही। इच्छुक अभ्यर्थी रोजगार पोर्टल म ऑनलाइन आवेदन करके जरूरी दस्तावेज के साथ मेला म सामिल हो सकत हे।
कोरबा लूट-आरोपी गिरफ्तार
कोरबा पुलिस ह पाछू एक जुलाई के छुरीकला स्थित सोनार दुकान म होय लूट के मामला म दू झिन आरोपी मन ल गिरफ्तार करे हे। उहें, एक झन दूसर आरोपी अभी भी फरार हे, जेखर तलास करे जात हे। जिला के पुलिस अधीक्षक सिध्दार्थ तिवारी ह आज एक ठिन पत्रकारवार्ता म बतइन कि तीनों आरोपी पहिली हत्या दुष्कर्म अउ दूसर गंभीर मामला म जेल के सजा काट चुके हे।