तीजन बाई निधन
छत्तीसगढ़ के नामी पंडवानी गायिका अउ पद्म विभूषण डॉक्टर तीजन बाई के निधन हो गेहे। लंबा बेरा ले ओमन बीमार चलत रिहीन, उंखर ईलाज रईपुर के एम्स म चलत रिहीस। आज मुंधरहा करीबन सवा तीन बजे ओमन आखिरी सांस लीन।
राष्ट्रपति द्रौपदी मुर्मु, उपराष्ट्रपति सी.पी.राधाकृष्णन, प्रधानमंत्री नरेंद्र मोदी, छत्तीसगढ़ के राज्यपाल रमेन डेका अउ मुख्यमंत्री विष्णुदेव साय समेत आने नेता मन तीजन बाई के निधन उपर दुख जतइन।
प्रधानमंत्री श्री मोदी ह तीजन बाई के निधन उपर दुख जतावत अपन सोसल मीडिया पोस्ट म केहे हे कि तीजन बाई ह छत्तीसगढ़ के लोककला ल अपन भव्य प्रस्तुति ले दुनियाभर म एक ठिन बिसिष्ट चिन्हारी देवइन हे, उंखर जवई ह कला अउ संस्कृति जगत बर बड़का नकसान हे।
तीजन बाई निधन के समाचार मिलतेसाठ मुख्यमंत्री विष्णुदेव साय, स्वास्थ्य मंत्री श्यामबिहारी जायसवाल अउ विधायक पुरंदर मिश्रा समेत कला जगत ले जुड़े मनखे अउ आने लोगन मन एम्स पहुंचके तीजन बाई के पार्थिव सरीर उपर फूलमाला अर्पित करीन।
मुख्यमंत्री ह किहीन कि तीजन बाई ह अपन अद्भुत गायन सैली विलक्षण प्रतिभा अउ लोक परंपरा मन ल संजोवत छत्तीसगढ़ के सांस्कृतिक पहिचान ल विश्व पटल म स्थापित करीन।
तीजन बाई के जनम चौबीस अप्रैल सन् उन्नीस सौ छप्पन के छत्तीसगढ़ के दुरूग जिला के गनियारी गांव म साधारण परिवार म होय रिहीस। नान्हेपन ले ओमन महाभारत के कथा ल सुने अउ गाय के सौंकिन रिहीन। सामाजिक विरोध अउ आर्थिक तंगी के बाद घलो ओमन एमा रमे रिहीन।
माईलोगिन मन बर ओ बेरा म पंडवानी ल कपालिक सैली म गवई ल वर्जित माने जात रिहीस, फेर तीजन बाई ह ए रीत ल तिरिया के मंच म अपन अलगहे चिन्हारी बनाइन।
तीजन बाई ह अपन मजबूत आवाज रौबदार एक्टिंग अउ पंडवानी ल अनोखा रूप ले प्रस्तुत करे के सैली ले पंडवानी ल न केवल देस म भलुक विदेस तक नवा पहिचान देवइन। महाभारत के कथा ल मंच म जियत देखाय म उंखर कला ह उनला भारतीय लोक संस्कृति के सबले नामी कलाकार म सामिल करीस।
तीजन बाई के दाह संस्कार आज संझा दुरूग जिला म स्थित उंखर गांव गनियारी म पूरा राजकीय सम्मान के संग करे गीस। उंखर बाबू पिला दिलहरण पारधी ह उनला मुखाग्नि दीन। एखर पहिली पुलिस डहार ले उनला गार्ड ऑफ आनर दे गीस। अंतिम संस्कार म स्कूल शिक्षा मंत्री गजेन्द्र यादव अउ सांसद विजय बघेल समेत जनप्रतिनिधि, प्रशासनिक अधिकारी, कलाकार साहित्य अउ उंखर हजारों प्रसंसक मन डबडबावत आंखी ले लोककला के ए महान विभूति ल आखिरी प्रणाम करीन।
जी राम जी योजना-राशि
केंद्रीय ग्रामीण विकास मंत्री शिवराज सिंह चौहान ह एक जुलाई ले विकसित भारत-रोजगार अउ आजीविका गारंटी मिसन-ग्रामीण, वीबी-जी राम जी-अधिनियम सफलता पूर्वक लागू होय उपर खुसियारी जतइन हे। श्री सिंह ह वीडियो कान्फ्रंेसिंग के जरिया ए मिसन के अंतर्गत राज्य मन बर पच्चीस हजार करोड़ रूपिया के मुख्य सहायता रासि जारी करीन। श्री चौहान ह सबो राज्य अउ केंद्रशासित प्रदेस मन के ग्रामीण विकास मंत्री मन संग वीबी जी राम जी योजना मन ल लागू करे बारे म समीक्षा घलो करीन। ओमन कहीन कि आज जारी करे गे पहला किस्त के उद्देस्य ए तय करना हे कि राज्य मन तीर पर्याप्त धन रासि हो, जेखर ले मजदूरी के भुगतान पंद्रह दिन के भीतरे करे जा सकय। ओमन यहू किहीन कि मनरेगा ल लागू होय म तीन बछर ले जादा के बेरा लगे रिहीस हे, फेर विकसित भारत जी राम जी ह पूरा देस म सिरिफ एके दिन म लागू हो गेहे।
श्री चौहान ह किहीन हे कि विकसित भारत-जी राम जी योजना के चलत मजदूरी दर ल औसतन करीबन दस प्रतिसत बढ़ाय गेहे।
चिंतन शिविर
राज्य मंत्रिमंडल के सदस्य मन बर नवा रईपुर स्थित भारतीय प्रबंधन संस्थान-आईआईएम म राखे गे दू दिन वाले चिंतन प्रसिक्षण सिविर के आज समापन होवत हे। एखर पहिली आज बिहनिया मुख्यमंत्री विष्णुदेव साय अउ मंत्रिमंडल के सदस्य मन योगाभ्यास करके स्वस्थ अउ संतुलित जीवन के आरो दिन।
एखर संगे, आज बिहनिया मुख्यमंत्री विष्णुदेव साय अउ मंत्रिमंडल के सदस्य मन ह योग अभ्यास कर स्वस्थ अउ संतुलित जीवन के संदेस दीन। एखर संगेसंग मुख्यमंत्री ह नया रईपुर स्थित आईआईएम कैम्पस म एक पेड़ मां के नांव अभियान के चलत पउधा घलो लगइन।
सहकारिता सप्ताह-कार्यक्रम
अंतर्राष्ट्रीय सहकारिता दिवस के मउका म रईपुर स्थित इंदिरा गांधी कृषि विश्वविद्यालय म सहकारिता क्षेत्र के चुनौती, उपलब्धि अउ अवइया बेरा म संभावना मन उपर केंद्रित एक ठिन बिसेस पैनल गोठबात राखे गे रिहीस। कारीकरम के सुभारंभ अपेक्स बैंक के प्राधिकृत अधिकारी केदारनाथ गुप्ता, मार्कफेड के प्राधिकृत अधिकारी शशिकांत द्विवेदी अउ जिला सहकारी कंेंद्रीय बैंक अंबिकापुर के अध्यक्ष रामकिशुन सिंह ह करीन।
स्कूल-गणवेश
स्कूल शिक्षा विभाग ह बताय हे कि प्रदेस म पहिली ले आठवीं कक्षा तक पढ़इया लइका मन बर तियार करे जात रेडीमेड स्कूल ड्रेस के क्वालिटी के सत प्रतिसत जांच करे बाद ही स्कूल मन म पठोय जात हे। राज्य हथकरघा विकास अउ विपणन सहकारी संघ के मुताबिक स्कूल ड्रेस ल स्थानीय बुनकर अउ महिला स्व-सहायता समूह मनके माध्यम ले तियार करे जात हे। बस्तर-सरगुजा अउ बिलासपुर संभाग म ए स्कूल ड्रेस के सप्लाई पूरा हो गेहे। फेर आने क्षेत्र म ए काम चलत हे। स्कूल शिक्षा विभाग ह स्पष्ट करे हे कि क्वालिटी या साईज संबंधी सिकइत मिले उपर स्कूल ड्रेस ल तुरते बदले जाही।
हादसा-मजदूर मौत
सूरजपुर जिला म आज एक ठिन खदान म चट्टान धंसे ले दू झिन मजदूर मनके मउत हो गेहे। मिले जानकारी मुताबिक जिला के लांची गांव तीर के खदान म मजदूर मन खोदत रिहीन। तभे उरहा खदान के चट्टान धसक गे, जेखर ले दू झिन मजदूर मलबा म दब गीस। घटना के सूचना मिलतेसाठ पुलिस अउ प्रशासन के टीम ह मउका जघा म पहुंचके रेस्क्यू ऑपरेसन चलइस। इंहा ले दूनों मजदूर के लास ल बाहिर निकाले गीस। पुलिस ह मामला के जांच करत हे।
अउ अब पेस हे मौसम के हाल…
मौसम विभाग ह अवइया चौबीस घंटा के दउरान मध्य अउ दक्षिण छत्तीसगढ़ के कोनो-कोनो जघा म जोरदरहा बरसा होय के चेतावनी देहे। उहें, ए बेरा उत्तर पश्चिम बंगाल अउ ओडिसा के उपर एक ठिन चक्रवाती घेरा बने के सेति प्रदेस म बरसा होय ल धर लेहे।
आज बिहनियाच ले राजधानी रईपुर समेत प्रदेस के कतकोन जघा म गरजई-चमकई के संगे पानी गिरत के खबर हे।
युवा संसद-चयन
नारायणपुर जिला के छेरीबेड़ा एकलव्य मॉडल आवासीय विद्यालय के टीम ह राजस्थान के उदयपुर म राखे गे जोनल राष्ट्रीय युवा संसद प्रतियोगिता म उप विजेता के स्थान हासिल करे हे। ए विद्यालय के आठ झिन नोनी बाबू के चुनई नेशनल बर होय हे।
डीएपी उर्वरक आवंटन
छत्तीसगढ़ ल खरीफ सीजन बर छियालिस हजार पांच सौ मीट्रिक टन उपराहा डीएपी खातू आवंटित करे गेहे। मुख्यमंत्री विष्णुदेव साय ह एखर बर प्रधानमंत्री नरेंद्र मोदी अउ केंद्रीय उर्वरक मंत्री जे.पी. नड्डा बर आभार जतइन हे।